Ndi Afo Etie nte Eto Lagani Auna?

MME ọkwọrọikọ iba ẹkenyọn̄ọ ukwọrọikọ usen kiet ke obio-in̄wan̄ oro ekperede obio Port Moresby ke Papua New Guinea. Mmọ ẹma ẹkụt ediye eto kiet ke usụn̄. Andisọn̄ọ enye eken ama ofiori ete: “Hau, omokụt lagani auna!” Ekem enye ama ọwọn̄ọde ese ekpri nsan̄a esie, ete: “[Lagani auna] ọwọrọ ‘eto eke isua ke isua.’ Enye itiehe nte mme eto eken, ikọn̄ esie ẹsiken̄e kpukpru isua onyụn̄ anam enye akabade ebiet obukpo eto. Nte ededi, ke ini edịm edepde, enye esifiak afiari ikọn̄ ye flawa, onyụn̄ afiak eye.”

Nnyịn imekeme ndikpep n̄kpọ nto eto emi. Ndusụk ntaifiọk ẹdọhọ ke enye edi kiet ke otu eto ition oro ẹyede ẹkan ke ofụri ererimbot. Eto emi esin̄wọn̄ ekese mmọn̄ ọdọn̄ ke idem okposụkedi ikọn̄ ye mme flawa esie ẹsiken̄ede ke ndaeyo. Orụn̄ esie ẹnen̄ede ẹsọn̄, ẹnyụn̄ ẹkeme ndinen̄ede ndụk isọn̄ oro ikpọ itiat ẹdude. Itiat emi isiyakke oyobio eberi eto emi ọduọk. Ke nditịn̄ ibio ibio, se in̄wamde eto emi ọkọri edi ukeme esie ndikpụhọde n̄kekem ye idiọk idaha oro enye odude.

Nnyịn imekeme ndidu ke idaha oro esịnde mbuọtidem nnyịn ke udomo. Nso idin̄wam nnyịn iyọ? Ukem nte eto lagani auna, nnyịn imekeme ndinen̄ede n̄n̄wọn̄ ọnọ-uwem mmọn̄ Ikọ Abasi. Nnyịn n̄ko ikpenyene ndisọn̄ọ mmụm ‘akwa itiat nnyịn,’ kpa Jehovah, ye esop esie n̄kama. (2 Samuel 22:3) Ke akpanikọ, eto lagani auna enen̄ede eti nnyịn ke idem edieke n̄kpọ ọsọn̄de ye nnyịn, ke nnyịn imekeme ndika iso n̄kop idem nnyụn̄ nye ke n̄kan̄ eke spirit edieke idade mme n̄kpọ oro Jehovah ọnọde idu uwem. Ke inamde oro, nnyịn ‘iyọbọ mme un̄wọn̄ọ Abasi,’ esịnede un̄wọn̄ọ nsinsi uwem.—Mme Hebrew 6:12; Ediyarade 21:4.