Ndi Nnyịn Imoyom Messiah?

AFO n̄ko emekeme ndibụp ete: “Ndi nnyịn imoyom Messiah?” Ih, owụt ifiọk ndibụp m̀mê Messiah ayanam ufọn ekededi ọnọ fi.

Ndusụk mbon oro afo esikponode ikọ mmọ ẹkeme ndisian fi ke afo emenen̄ede oyom Messiah, kpa nte ediwak owo eken ẹyomde. Ataifiọk ibet mme Jew ke akpa isua ikie ekewet ntem aban̄a Messiah: “Inamke n̄kpọ m̀mê mme un̄wọn̄ọ Abasi ẹwak adan̄a didie, mmọ ẹmekabade ẹdi Ih ebe ke enye.” Ntem, enye okowụt ke Messiah enyene akpan udeme ke ndisu uduak Andibot nnyịn, emi edide ndidiọn̄ kpukpru idụt ererimbot. (2 Corinth 1:20) Utom Messiah enen̄ede edi akpan n̄kpọ tutu anam kpukpru ntịn̄nnịm ikọ Bible ẹban̄a edidi esie ye nte n̄kpọ editiede ye enye ke isọn̄. Henry H. Halley ọkọdọhọ ke n̄wed kiet oro ediwak miliọn owo ẹkekotde ke isua 70 oro ẹkebede ete: “Ẹkewet Akani Testament man ẹnam mme owo ẹdu ke edidemede ẹban̄a Edidi [Messiah] ẹnyụn̄ ẹtịm idem ẹben̄e Edidi Esie.” Edi, ndi ufọn odu enye ndidi? Ntak emi edidi esie ekpebehede fi?

“Messiah” enen̄ede ọwọrọ “Enye Oro Ẹyetde Aran,” onyụn̄ ọwọrọ ukem n̄kpọ ye udorienyịn̄ oro ẹtịmde ẹdiọn̄ọ mi, “Christ.” Akana Enye Emi Encyclopædia Britannica, Nsiondi eke 1970, okotde “akakan andifak,” edi ke ntak oro akpa owo iba oro, Adam ye Eve, ẹkesọn̄de ibuot ye Abasi. Ẹkebot mmọ nte mme mfọnmma owo oro ẹkenyenede inem inem idotenyịn ndidu uwem nsinsi ke Paradise, edi mmọ ẹma ẹtaba idotenyịn oro. Ọsọn̄ibuot angel oro ẹkedide ẹdidiọn̄ọ nte Satan kpa Devil, ama asian mmọ ke Andibot mmọ etie ukpan ukpan akaha ye nte ke n̄kpọ eyenen̄ede ọfọn ye mmọ edieke mmọ ẹbierede ke idemmọ se idide eti ye se idide idiọk.—Genesis 3:1-5.

Ẹma ẹbian̄a Eve, enye ama onyụn̄ enịm nsu oro. Etie nte Adam ama ama n̄wan esie akan Abasi, ntre enye ama etiene abuana ke nsọn̄ibuot oro Devil ọkọtọn̄ọde. (Genesis 3:6; 1 Timothy 2:14) Se mmọ ẹkenamde ama anam mmọ ẹtaba idotenyịn edidu uwem nsinsi ke Paradise, ẹnyụn̄ ẹyak idiọkn̄kpọ ye utịp esie, oro edi n̄kpa, ẹnọ nditọ mmọ oro mîkamanake kan̄a.—Rome 5:12.

Jehovah, kpa Andibot nnyịn ama ọsọsọp anam ndutịm oro enye edidade abiat mme utịp idiọkn̄kpọ oro ẹtode nsọn̄ibuot oro. Jehovah ekenyene ndinam mme owo ẹfiak ẹdidu ke emem ye enye ebe ke nditiene se ẹkedidiọn̄ọde nte mme edumbet Ibet Moses—oro edi uwem ke uwem. (Deuteronomy 19:21; 1 John 3:8) Ẹkenyene nditiene edumbet emi edieke akanade nditọ Adam ye Eve oro ẹkedade-da idiọkn̄kpọ ẹmana ẹdu uwem nsinsi ke  Paradise isọn̄, nte Andibot akaduakde ubonowo odu. Emi owụt ke imoyom Messiah.

Ke ini ekebierede ikpe ọnọ Devil, Jehovah Abasi eketịn̄ ntem ke akpa ntịn̄nnịm ikọ Bible: “Nyonyụn̄ nsịn usua ke ufọt fo ye n̄wan, ye ke ufọt ubon fo ye ubon esie: enye ayanuak fi ibuot, afo oyonyụn̄ anuak enye nditịn̄-ikpat.” (Genesis 3:15) Eyen ukpepn̄kpọ Bible kiet ọkọdọhọ ke “mme un̄wọn̄ọ N̄wed Abasi ẹban̄ade Messiah ẹtọn̄ọ ye ntịn̄nnịm ikọ [emi].” Eyen ukpepn̄kpọ en̄wen ọkọdọhọ ke Abasi edida Messiah “abiat kpukpru utịp idiọkn̄kpọ Adam ye Eve,” ke ntem adade edidiọn̄ ọsọk ubonowo.—Mme Hebrew 2:14, 15.

Nte ededi, afo ọmọfiọk ke n̄kpọ ifọnke ye ubonowo kan̄a. Utu ke oro, ubonowo enen̄ede anana idotenyịn onyụn̄ odu ke nnanenyịn. Ntem, The World Book Encyclopedia ọdọhọ ke “ediwak mme Jew ẹsụk ẹdodori enyịn ke Messiah eyedi” ye nte ke enye “eyenen̄ede se ikwan̄ade onyụn̄ akan mme asua mmọ.” Nte ededi, Bible ọdọhọ ke Messiah ama ededi. Ndi ntak odu ndinịm se Bible etịn̄de? Ibuotikọ oro etienede ọyọbọrọ mbụme emi.