Ndutịm Oro Edisude Uduak Abasi

“[Abasi anam] kpukpru n̄kpọ nte ekemde ye usụn̄ emi ekikere esie etemede.”—EPHESUS 1:11.

1. Ntak emi kpukpru esop Mme Ntiense Jehovah ẹdisopde idem ke April 12, 2006?

 N̄KPỌ nte owo miliọn 16 ẹyedụk Udia Mbubịteyo Ọbọn̄ ke mbubịteyo Wednesday, April 12, 2006. Ke kpukpru ebiet oro ẹdinịmde Editi emi, ẹyedori uyo eke leaven mîdụhe, emi adade aban̄a idem Christ, ke okpokoro, ẹnyụn̄ ẹdori ndatndat wine, emi adade aban̄a iyịp oro Jesus ọkọduọkde. Ke ini utịn̄ikọ oro anamde se Editi n̄kpa Jesus adade aban̄a ekperede utịt, ẹyemen uyo, ekem ẹmen wine ẹsan̄a ẹnọ kpukpru mme andidụk. Owo kiet m̀mê akande oro ẹdita uyo ẹnyụn̄ ẹn̄wọn̄ wine ke ibat ibat esop Mme Ntiense Jehovah. Nte ededi, ke ediwak esop, baba owo kiet iditaha uyo inyụn̄ in̄wọn̄ wine. Ntak emi ibat ibat Christian, kpa mbon oro ẹdoride enyịn ndika heaven, ẹsitade uyo ẹnyụn̄ ẹn̄wọn̄de wine, ke adan̄aemi ata ediwak mbon eken, oro ẹdoride enyịn ndidu mi ke isọn̄ ke nsinsi mîsitaha uyo inyụn̄ in̄wọn̄ wine?

2, 3. (a) Didie ke Jehovah okobot n̄kpọ nte ekemde ye uduak esie? (b) Ntak emi Jehovah okobotde isọn̄ ye owo?

² Jehovah edi Abasi uduak. Enye anam “kpukpru n̄kpọ nte ekemde ye usụn̄ emi ekikere esie etemede,” man osu uduak esie. (Ephesus 1:11) Enye ekebem iso obot ikpọn̄-ikpọn̄ edibon Eyen esie. (John 1:1, 14; Ediyarade 3:14) Ekem, Jehovah ama ada Eyen esie obot ubon Esie eke spirit, ndien ekem obot ekondo, esịnede isọn̄ ye owo.—Job 38:4, 7; Psalm 103:19-21; John 1:2, 3; Colossae 1:15, 16.

³ Jehovah ikobotke isọn̄ nte ebiet oro ẹdidade ẹdomo m̀mê owo oyodot ndinyọn̄ ndidi kiet ke otu nditọ imọ eke spirit ke heaven, nte emi ediwak ufọkabasi Christendom ẹkpepde. Enye okobot isọn̄ ye akpan uduak, oro edi “man ẹdụn̄ ke esịt.” (Isaiah 45:18) Abasi okobot isọn̄ ọnọ owo, onyụn̄ obot owo ete odụn̄ ke isọn̄. (Psalm 115:16) Akana ofụri isọn̄ akabarede edi Paradise oro ndinen owo emi ẹdidiọn̄de ẹnyụn̄ ẹkpeme enye ẹdiyọhọde. Owo ikedehedei idọhọ akpa ebe ye n̄wan oro ke mmọ ẹyenyọn̄ ẹkedụn̄ ke heaven nte ini akade.—Genesis 1:26-28; 2:7, 8, 15.

Ẹneni Uduak Jehovah

4. Didie ke ẹkeneni ẹban̄a usụn̄ oro Jehovah akarade ukara ke ata ntọn̄ọ ubonowo?

⁴ Eyen Abasi eke spirit ama ọsọn̄ ibuot ye Abasi onyụn̄ ebiere ndibiat uduak Jehovah, ke ntem adade ifụre oro Abasi ọkọnọde enye anam n̄kpọ ke ukwan̄ usụn̄. Enye ikayakke kpukpru mbon oro ẹsụkde ibuot ke imaesịt ẹnọ ukara Jehovah ẹnyene emem. Satan ama  anam akpa ebe ye n̄wan oro ẹtọn̄ọ ndida ke idem n̄kpọn̄ Abasi. (Genesis 3:1-6) Satan ikafan̄ake ke Jehovah enyene odudu, edi ọkọdọhọ ke usụn̄ oro Enye akarade ifọnke, ntre ke Enye idotke ndikara. Ntem, ata akpan eneni aban̄ade ukara Jehovah ama edemede mi ke isọn̄ ke ata ntọn̄ọ ubonowo.

5. Ewe eneni efen ke ẹkedemerede, ndien eneni emi abuana mmanie?

⁵ Eneni efen oro Satan ekedemerede ke eyo Job enen̄ede enyene ebuana ye enye oro aban̄ade unen oro Abasi enyenede ndikara ofụri ekondo. Satan ama ọdọhọ ke mme edibotn̄kpọ Jehovah inamke n̄kpọ Esie ke ntak ima. Enye ọkọdọhọ ke mmọ ẹnam n̄kpọ Abasi ke ntak ibụk, ke edieke ẹdomode mmọ, ke mmọ ẹyekpọn̄ Abasi. (Job 1:7-11; 2:4, 5) Okposụkedi Satan eketịn̄de emi aban̄a asan̄autom Jehovah emi edide owo, eneni emi ama abuana n̄ko nditọ Abasi eke spirit, ye idem ikpọn̄-ikpọn̄ edibon Eyen Jehovah.

6. Didie ke Jehovah okosu uduak esie onyụn̄ anam n̄kpọ ekekem ye enyịn̄ esie?

⁶ Jehovah ama anam n̄kpọ ekekem ye enyịn̄ esie onyụn̄ akabarede edi Prọfet ye Andinyan̄a man osu uduak esie. * Enye ama ọdọhọ Satan ete: “Nyonyụn̄ nsịn usua ke ufọt fo ye n̄wan, ye ke ufọt ubon fo ye ubon esie: enye ayanuak fi ibuot, afo oyonyụn̄ anuak enye nditịn̄-ikpat.” (Genesis 3:15) Jehovah ayada Mfri “n̄wan” esie, m̀mê ikpehe esop esie ke heaven, ọbọrọ eneni Satan onyụn̄ ọnọ nditọ Adam idotenyịn edinyan̄a ye nsinsi uwem.—Rome 5:21; Galatia 4:26, 31.

“Edisana Ndịben̄kpọ Uduak Esie”

7. Jehovah akada apostle Paul ayararede ewe uduak?

⁷ Apostle Paul ama etịn̄ inem inem ke leta oro enye ekewetde ọnọ ẹsọk mbon Ephesus nte Jehovah anamde ndutịm man osu uduak esie. Paul ekewet ete: “Enye ama anam nnyịn ifiọk edisana ndịben̄kpọ uduak esie. Ndịben̄kpọ asan̄a ekekem ye se itịmde inem enye, emi enye akaduakde ke idemesie ndinam ndutịm ke adan̄aemi edimek ini ekemde ọyọhọ ọyọhọ, oro edi, ndifiak ntan̄ kpukpru n̄kpọ ndọn̄ ọtọkiet ke Christ, mme n̄kpọ eke ẹdude ke heaven ye mme n̄kpọ eke ẹdude ke isọn̄.” (Ephesus 1:9, 10) Utịbe utịbe uduak Jehovah edi ndinam kpukpru edibotn̄kpọ ke ekondo ẹsụk ibuot ẹnọ ukara imọ ke imaesịt. (Ediyarade 4:11) Emi ayanam ẹkpono enyịn̄ esie, ẹwụt ke Satan edi osu nsu, uduak Abasi onyụn̄ ada itie ‘ke isọn̄ nte edide ke heaven.’—Matthew 6:10.

8. Nso ke ikọ oro ẹkabarede “ndutịm” ọwọrọ?

⁸ Jehovah edida “ndutịm” anam uduak esie, m̀mê “se enye amade,” osu. Paul akada ikọ oro ọwọrọde ke ata ata usụn̄ “ndise mban̄a ufọk” etịn̄ ikọ mi. Ndutịm emi idịghe orụk ukara nte Obio Ubọn̄ Messiah, edi edi usụn̄ oro ẹtịmde m̀mê ẹnamde n̄kpọ. * Utịbe  utịbe usụn̄ oro Jehovah ekenyenede ndinam ndutịm man osu uduak esie ama abuana “edisana ndịben̄kpọ,” oro ẹkenyenede ndida ata ediwak isua nyararede nsịtnsịt.—Ephesus 1:10; 3:9.

9. Didie ke Jehovah akayararede edisana ndịben̄kpọ aban̄ade uduak esie nsịtnsịt?

⁹ Jehovah ama ada nsio nsio ediomi ayararede nsịtnsịt nte uduak esie kaban̄a Mfri oro ẹken̄wọn̄ọde ke Eden edisude. Un̄wọn̄ọ oro enye ọkọn̄wọn̄ọde ọnọ Abraham ama owụt ke Mfri un̄wọn̄ọ oro edito ubon Abraham, ndien ke “kpukpru mme idụt ke ererimbot” ẹyenyụn̄ ẹkụt mfọn eke otode Mfri oro. Un̄wọn̄ọ oro ama owụt n̄ko ke mbon en̄wen ẹyediana ye akpan mfri oro. (Genesis 22:17, 18) Ibet ediomi oro Jehovah akanamde ye Israel eke obụk ama owụt ke enye aduak ndinyene “obio oku.” (Exodus 19:5, 6) Ediomi oro Abasi akanamde ye David ama owụt ke Mfri oro edidi Adaibuot Obio Ubọn̄ ke nsinsi nsinsi. (2 Samuel 7:12, 13; Psalm 89:3, 4) Ke Ibet ediomi ama akada mme Jew edisịm Messiah, Jehovah ama afiak ayarade ikpehe efen ke uduak esie. (Galatia 3:19, 24) Mbon oro ẹdidianade ye akpan mfri emi ẹdidi “obio oku” oro ẹken̄wọn̄ọde, emi ẹdidade ẹsịn ke “obufa ediomi” nte obufa “Israel,” kpa Israel eke spirit.—Jeremiah 31:31-34; Mme Hebrew 8:7-9. *

10, 11. (a) Didie ke Jehovah akanam ẹfiọk Mfri oro ẹketịn̄de ẹban̄a? (b) Ntak emi ikpọn̄-ikpọn̄ edibon Eyen Abasi ekedide isọn̄?

¹⁰ Ini ama edikem Mfri oro ẹken̄wọn̄ọde ndidi isọn̄ man ndutịm oro Abasi anamde aban̄a uduak esie okposu. Jehovah ama ọdọn̄ angel Gabriel ọkọdọhọ Mary ke  enye ayaman eyeneren oro edikerede Jesus. Angel oro ọkọdọhọ enye ete: “Enye oyokpon, oyonyụn̄ ekere Eyen Ata Edikon̄; ndien Jehovah Abasi ọyọnọ enye ebekpo ete esie David, ndien enye ayakara ufọk Jacob nte edidem ke nsinsi, obio ubọn̄ esie idinyụn̄ inyeneke utịt.” (Luke 1:32, 33) Ntem ke ẹkenen̄ede ẹfiọk enye emi edide Mfri emi.—Galatia 3:16; 4:4.

¹¹ Ikpọn̄-ikpọn̄ edibon Eyen Jehovah ekenyene ndidi isọn̄ ndisobo ata ọkpọsọn̄ idomo. Jesus edinen̄ede ọbọrọ eneni oro Satan ekedemerede. Ndi enye ọyọsọn̄ọ ada anam akpanikọ ọnọ Ete esie? Ebiet oro edisana ndịben̄kpọ odụkde edi edi oro. Apostle Paul ama anam ifiọk se Jesus edinamde ete: “Edisana ndịben̄kpọ uten̄e Abasi emi okpon nte owo mîkemeke ndineni: ‘Ẹma ẹyarade enye ke obụkidem, ẹbat ke edinen ke spirit, owụt mme angel idem, ẹkwọrọ enye ke otu mme idụt, ẹbuọt idem ye enye ke ererimbot, ẹmen ẹdọk ke ubọn̄.’” (1 Timothy 3:16) Ih, ke ndisọn̄ọ nda tutu esịm n̄kpa, Jesus ama ọbọrọ eneni Satan edifọn edifọn. Edi ama odu ikpehe efen ke edisana ndịben̄kpọ oro owo mîkosụk ifiọkke kan̄a.

“Edisana Ndịben̄kpọ Obio Ubọn̄ Abasi”

12, 13. (a) Nso idi ikpehe kiet ke “edisana ndịben̄kpọ obio ubọn̄ Abasi”? (b) Nso ke Jehovah ndikemek ibat ibat owo ndika heaven ọkọwọrọ?

¹² Isan̄ kiet ke ini Jesus akasan̄ade ke Galilee ọkwọrọ ikọ, enye ama owụt ke edisana ndịben̄kpọ emi edi itai ye aban̄ ye ukara Obio Ubọn̄ Messiah. Enye ọkọdọhọ mme mbet esie ete: “Ẹyak mbufo ẹfiọk ndisana ndịben̄kpọ obio ubọn̄ heaven [“obio ubọn̄ Abasi,” Mark 4:11].” (Matthew 13:11) Ikpehe kiet ke ndịben̄kpọ oro ama abuana Jehovah ndimek “ekpri otu erọn̄” emi edide owo 144,000 ke isọn̄ ndiketiene Eyen esie n̄kara ke heaven nte ubak mfri oro.—Luke 12:32; Ediyarade 14:1, 4.

¹³ Sia Jehovah okobotde mme owo ndidu mi ke isọn̄, ama oyom enye obot “obufa edibotn̄kpọ,” kpa ndusụk owo oro ẹdidade ẹka heaven. (2 Corinth 5:17) Sia ẹkemekde apostle Peter nditiene mbuana ke san̄asan̄a idotenyịn emi, enye ekewet ete: “Itoro enyene Abasi ye Ete Ọbọn̄ nnyịn Jesus Christ, koro nte asan̄ade ekekem ye akwa mbọm esie enye okobon nnyịn obufa ete inyene odu-uwem idotenyịn ebe ke ediset Jesus Christ ke otu mme akpan̄kpa, ete inyene udeme eke mîkemeke ndibiara mînyụn̄ isabakede mînyụn̄ ikemeke ndibe mfep. Ẹnịm enye ke heaven ẹnọ [nnyịn].”—1 Peter 1:3, 4.

14. (a) Didie ke mbon oro mîdịghe mme Jew ẹkebuana ke “edisana ndịben̄kpọ obio ubọn̄ Abasi”? (b) Nnyịn isan̄a didie ifiọk “mme ntotụn̄ọ n̄kpọ Abasi” emi?

¹⁴ Ikpehe efen ke edisana ndịben̄kpọ emi enyenede ebuana ye ukara Obio Ubọn̄ ini iso emi ekedi Abasi ndiduak ndinam mbon oro mîdịghe mme Jew ẹtiene ẹsịne ke otu ekpri otu oro ẹditienede Christ ẹkara ke heaven. Paul ama asian nnyịn nte Jehovah anamde “ndutịm,” m̀mê esede aban̄a n̄kpọ, man osu uduak esie, ete: “Owo ikanamke nditọ owo ke mme emana oko ẹfiọk ndịben̄kpọ emi nte emi ẹyararede enye idahaemi ẹnọ ndisana mme apostle ye mme prọfet esie ke spirit, oro edi, nte ke mbon idụt ẹkpedi nsan̄a mme ada udeme nnyene ye ndido idem kiet ye mme anditiene nnyịn mbuana ke un̄wọn̄ọ ke ebuana ye Christ Jesus oto eti mbụk.” (Ephesus 3:5, 6) Ẹkeyararede edisana ndịben̄kpọ emi ẹnọ “ndisana mme apostle.” Kpasụk ntre mfịn, mîkpedịghe un̄wam edisana spirit, nnyịn ikpọfiọkke “mme ntotụn̄ọ n̄kpọ Abasi” emi.—1 Corinth 2:10; 4:1; Colossae 1:26, 27.

15, 16. Ntak emi Jehovah ekemekde mme owo ke otu ubonowo man ẹtiene Jesus ẹkara?

¹⁵ Ẹdọhọ ke “ẹkedep” “owo tọsịn ikie ye aba-ye-inan̄” oro ẹkụtde nte ẹdade ye “Eyenerọn̄” ke Obot Zion eke heaven, “ẹsio ke isọn̄,” “ke otu ubonowo nte akpa mbun̄wụm ẹnọ Abasi ye Eyenerọn̄,” kpa Christ Jesus.  (Ediyarade 14:1-4) Jehovah ekemek akpan esie ke heaven ete edi ubak akpan mfri oro ẹken̄wọn̄ọde ke Eden. Edi ntak emi enye ekemekde mme owo ke otu ubonowo man ẹtiene Jesus ẹkara? Apostle Paul ọdọhọ ke ẹkekot ekpri otu emi “nte asan̄ade ekekem ye uduak [Jehovah],” m̀mê “nte asan̄ade ekekem ye se enye amade.”—Rome 8:17, 28-30; Ephesus 1:5, 11; 2 Timothy 1:9.

¹⁶ Jehovah aduak ndinam akwa edisana enyịn̄ esie etetịm asana onyụn̄ owụt ke imọ imenyene unen ndikara ofụri ekondo. Enye ama ada anana-mbiet ọniọn̄ ọniọn̄ “ndutịm” esie, m̀mê usụn̄ oro esede aban̄a n̄kpọ, osio Akpan esie ọdọn̄ edi isọn̄, man ediyọ idomo tutu esịm n̄kpa. Ke adianade do, Jehovah okoyom mbon oro ẹdisọn̄ọde ẹda ẹnọ ukara imọ tutu esịm n̄kpa, ẹtiene ẹbuana ke ukara Obio Ubọn̄ Messiah Eyen imọ.—Ephesus 1:8-12; Ediyarade 2:10, 11.

17. Ntak emi nnyịn ikpadatde esịt ke Christ ye mbon oro ẹditienede enye ẹkara ẹkedi owo nte nnyịn?

¹⁷ Jehovah okowụt akakan ima oro enye amade nditọ Adam ke ndikayak Eyen esie edi isọn̄ ye ke ndikemek mme owo mi ke isọn̄ oro ẹditienede Eyen esie ẹkara ke Obio Ubọn̄ heaven. Didie ke mbon oro ẹnamde akpanikọ ẹnọ Jehovah, ọtọn̄ọde ye Abel, ẹkeme ndibọ ufọn? Sia ẹkemande owo ẹsịn ke ufụn idiọkn̄kpọ ye n̄kpa, ana ẹkọk mme anana-mfọnmma owo ke n̄kan̄ eke spirit ye eke obụk ẹnyụn̄ ẹnam mmọ ẹfọn ẹma, man mmọ ẹkpedu orụk uwem oro Jehovah okoyomde owo odu. (Rome 5:12) Edi n̄kpọ ndọn̄esịt didie ntem ọnọ mbon oro ẹdoride enyịn ndidu nsinsi uwem ke isọn̄ ndifiọk ke Edidem mmimọ ayama mmimọ onyụn̄ ekere aban̄a mmimọ kpa nte enye akamade onyụn̄ ekerede aban̄a mme mbet esie ke ini enye ọkọkwọrọde ikọ mi ke isọn̄! (Matthew 11:28, 29; Mme Hebrew 2:17, 18; 4:15; 7:25, 26) Edi n̄kpọ ndọn̄esịt n̄ko didie ntem ndifiọk ke ndidem oro ẹdide mme oku oro ẹditienede Christ ẹkara ke heaven ẹkedi iren ye iban mbuọtidem oro ẹkenyenede mme mmeme nte nnyịn, ẹkenyụn̄ ẹtienede ẹkụt afanikọn̄ nte emi nnyịn ikụtde!—Rome 7:21-25.

Uduak Jehovah Oro Mîkemeke Ndikpu

18, 19. Ntak emi se Paul eketịn̄de ke Ephesus 1:8-11 enen̄erede an̄wan̄a nnyịn, ndien nso ke idineme ke ibuotikọ oro etienede?

¹⁸ Idahaemi ke nnyịn inen̄ede ifiọk se ikọ Paul ke Ephesus 1:8-11, oro enye eketịn̄de ọnọ mme Christian oro ẹyetde aran, enen̄erede ọwọrọ. Enye ọkọdọhọ ke Jehovah ama anam mmimọ ifiọk “edisana ndịben̄kpọ uduak esie,” ke mmimọ ‘iyetiene Christ ida udeme inyene,’ ye nte ke ẹma ẹbem iso ẹmek mmimọ “ẹnịm nte asan̄ade ekekem ye uduak enye emi anamde kpukpru n̄kpọ nte ekemde ye usụn̄ emi ekikere esie etemede.” Nnyịn imokụt ke emi ekekem ye utịbe utịbe “ndutịm” oro Jehovah anamde man osu uduak esie. Emi n̄ko anam nnyịn ifiọk ntak emi ibat ibat Christian kpọt ke otu mbon oro ẹsidụkde Udia Mbubịteyo Ọbọn̄ ẹsitade uyo ẹnyụn̄ ẹn̄wọn̄ wine.

¹⁹ Ke ibuotikọ oro etienede, nnyịn iyọfiọk se Editi n̄kpa Christ ọwọrọde ọnọ mme Christian oro ẹdoride enyịn ndika heaven. Nnyịn iyonyụn̄ ifiọk ntak emi ata ediwak owo eken oro ẹdoride enyịn ndidu ke nsinsi ke isọn̄ ẹkpenen̄erede ẹnyene udọn̄ ke se Editi n̄kpa Christ adade aban̄a.

[Mme Ikọ idakisọn̄]

Ke Ndidụn̄ọde

• Ntak emi Jehovah okobotde isọn̄ onyụn̄ obot owo esịn-e?

• Ntak emi akanade ikpọn̄-ikpọn̄ edibon Eyen Jehovah edisobo idomo ke isọn̄?

• Ntak emi Jehovah ekemekde mme owo osio ke otu ubonowo man ẹtiene Christ ẹkara?

[Mme Mbụme Ukpepn̄kpọ]