“Ka Iso Tịn̄ Nọ Nnyịn!”

NDITỌ ufọkn̄wed sekọndri ke obio Nezlobnaya ke Russia ẹkekpep mme n̄wed Mikhail Bulgakov owo Russia. Kiet ke otu n̄wed oro etịn̄ n̄kpọ abiat Jesus Christ onyụn̄ ọdọhọ ke Satan edi uko erenowo. Ke ukpepn̄kpọ oro okụrede, andikpep ama ọnọ mmọ udomo ọdọhọ ẹwet n̄kpọ ẹban̄a n̄wed oro. Nte ededi, Andrey, uyen Ntiense Jehovah emi edide isua 16, ama ọdọhọ ukpono ukpono ke imọ idiwetke udomo oro koro ubieresịt imọ ikayakke imọ ikpep orụk n̄wed oro. Enye ama eben̄e ẹyak imọ iwet n̄kpọ iban̄a nte imọ idade Jesus Christ. Andikpep ama enyịme.

Andrey ama ọdọhọ ke se enye ekewetde ke idịghe nte imọ isasua ekikere mbon en̄wen, edi ke imọ imokụt ke mfọnn̄kan usụn̄ ndifiọk n̄kpọ mban̄a Jesus edi ndikot kiet ke otu Gospel mbinan̄ ke Bible. Enye ọkọdọhọ ke ndinam ntre, ke “afo eyekpep aban̄a uwem ye mme ukpepn̄kpọ Jesus nte mbon emi ẹkekụtde ke enyịn ẹbụkde.” Enye ama adian do ete: “N̄kpọ efen edi nte ẹtịn̄de ẹban̄a Satan. Ekeme ndinem ndusụk owo ndikot n̄wed emi ọdọhọde ke Satan edi uko erenowo, edi inemke mi.” Enye ama anam an̄wan̄a ke Satan enen̄ede edi okopodudu idiọk edibotn̄kpọ eke spirit emi akakpade edem owụt Abasi, anamde idiọkn̄kpọ, ukụt, ye ndutụhọ ẹsịm ubonowo. Andrey ekeberi se enye ekewetde ntem: “Nnịmke ke ndikot utọ n̄wed emi ayan̄wam mi. Nte ededi, nnyeneke mfịna ndomokiet ye Bulgakov. Edi ami ndikam n̄kot Bible man mfiọk ata akpanikọ aban̄ade Jesus Christ.”

Andikpep ama ama se Andrey ekewetde tutu ọdọhọ Andrey eben̄e idem ndineneme n̄kpọ mban̄a Jesus Christ. Andrey ama ọsọsọp enyịme. Andrey ama okot se enye ekewetde ọnọ ofụri otu nditọ ubet ukpepn̄kpọ esie isan̄ en̄wen emi mmọ ẹkekpepde edikot n̄wed. Enye ama etịn̄ ntak emi enye ekenịmde ke Jesus ekedi akakan owo emi akanam odude uwem. Ekem, enye ama okot ibuot kiet ke n̄wed Matthew ke Bible aban̄ade n̄kpa Jesus. Sia ini emi ẹkenọde Andrey ekefịtde ukot, enye ama oyom ndida nneme oro n̄keberi, edi nditọ ubet ukpepn̄kpọ esie ẹma ẹdọhọ enye ẹte: “Ka iso tịn̄ nọ nnyịn! Nso iketịbe ke oro ebede?” Ntre, enye ama aka iso okot ibuot n̄wed Matthew oro aban̄ade Jesus ndiset ke n̄kpa.

Ke Andrey ama okokụre, nditọ ubet ukpepn̄kpọ esie ẹma ẹbụp enye ekese mbụme ẹban̄a Jesus ye Jehovah. Andrey ọdọhọ ete: “Mma mbọn̄ akam mben̄e Jehovah ọnọ mi ọniọn̄, enye ama onyụn̄ eyere akam mi. Mma mbọrọ kpukpru mbụme mmọ!” Ke ukpepn̄kpọ ama okokụre, Andrey ama ọnọ andikpep Akakan Owo Oro Akanam Odude Uwem, * ndien enye ama enen̄ede okop inemesịt ndibọ n̄wed emi. Andrey ọdọhọ ete: “Enye ama ọnọ mi ediwak mak ke se n̄kewetde onyụn̄ otoro mi ke ndisọn̄ọ nda ke se nnịmde ke akpanikọ mmennyụn̄ n̄kopke bụt mban̄a oro. Enye ama ọdọhọ n̄ko ke imọ imenịm ndusụk n̄kpọ oro ami nnịmde ke akpanikọ.”

Andrey adat esịt ke ntak emi enye eketienede ubieresịt esie oro Bible ọnọde ukpep onyụn̄ etre ndikot n̄wed oro esuenede Jehovah ye Jesus Christ Eyen esie. Utọ edu oro ekpeme enye ọbiọn̄ọ mme ekikere emi mîkemke ye N̄wed Abasi onyụn̄ ebererede utịbe utịbe ifet ọnọ enye ndibuana akpanikọ Bible ye mbon en̄wen.

[Ikọ idakisọn̄]