Mbụkutom Africa

Ibat idụt: 56

Ibat mme andidụn̄: 781,767,134.

Ibat mme asuanetop: 1,015,718

Ibat ukpepn̄kpọ Bible: 1,820,540

UGANDA: Lucy edi Ntiense emi anamde utom ke akamba ufọkurua unyam ibọk. Ke ẹma ẹkedụn̄ọde ibatokụk ẹnyụn̄ ẹfiọk ke ata ediwak okụk ama osop, ẹma ẹkot enye ye ndusụk nsan̄autom esie ẹdikan̄ idem. Ke ini ama ekedisịm Lucy ndin̄wọn̄ọ Bible, enye ama okụbọde Mme N̄ke 15:3 onyụn̄ okot uyo ọwọrọ ete: “Enyịn Jehovah odu ke kpukpru ebiet, ese mme idiọk owo ye nti.” Ke mme owo oro ẹkedude do ẹma ẹkedop uyo ke esisịt ini, nsan̄autom esie emi ekeyịpde okụk oro ama adaha ebịne eseutom akayarade idemesie. Eseutom ama ọdọhọ yak kpukpru mmọ ẹsiti “itien̄wed Lucy.” Ekem ẹma ẹsịn okụkọfiọn̄ Lucy, ndien ẹma ẹmek enye ndisikama ukpọhọde ufọkurua oro.

Benin: Josué ọmọyọ ekese nsahi ke ufọkn̄wed. Ke ini enye ọkọnọde ibọrọ oro mînenke ke ubet ukpepn̄kpọ, ndusụk nsan̄a ubet ukpepn̄kpọ esie ẹma ẹsak enye ẹte, “Afo emi edide Oku Jehovah akpasasan̄a didie anam ndudue?” Mbon eken ẹma ẹtịn̄ utọ ikọ nsahi en̄wen nte, “N̄kukụre se enye ọfiọkde edi ndikama ekpat nyo.”

Josué ọdọhọ ete, “Se ikanamde mi ndịk ikan ekedi ndisobo ye nsan̄a ubet ukpepn̄kpọ mi ke ini n̄wọrọde an̄wautom ke utịturua.” Josué ama ọbọn̄ akam aban̄a oro onyụn̄ eneme ye ebiowo kiet, ndien ebiowo oro ama esịn udọn̄ ọnọ enye ete enen̄ede esịn idem ke an̄wautom, onyụn̄ ọdọhọ enye okûkop ndịk ndinọ nsan̄a ubet ukpepn̄kpọ esie n̄wed. Josué asiak usụn̄ ita oro imọ ikụtde unen. Enye ọdọhọ ete: “Idahaemi mmesiwak ndinam utom usiakusụn̄ unọ un̄wam. Owo iba ke otu nsan̄a ubet ukpepn̄kpọ mi oro ẹkesisakde mi ẹdidi nditọ ukpepn̄kpọ Bible mi idahaemi. Ibọrọ udomo mi onyụn̄ enen̄ede ọfọn akan nte ekesidide.”

Ethiopia: Ke n̄kpọ nte isua iba emi ẹkebede, Asnakech ama okụt n̄wed uwat onyụn̄ anam ndutịm man akayak ọnọ andinyene, n̄wan emi ekerede Elsa. Edinam akpanikọ Asnakech ama akpa Elsa idem tutu enye oyom ndinọ Asnakech okụk. Asnakech ikọbọhọ okụk oro onyụn̄ ọnọ Elsa ediye uduot ekpri n̄wed Nso ke Abasi Oyom Oto Nnyịn? Elsa ama ọtọn̄ọ ndikpep Bible ke ndan̄nsiere. Enye ọkọdọhọ ke idịghe akpa ini oro imọ ikokopde enyịn̄ Jehovah ekedi oro sia ete imọ emi edide oku ama asiak enyịn̄ oro ọnọ imọ. Ke ofụri ubon esie ẹma ẹkedụk mbono district, ebe esie n̄ko ama ọtọn̄ọ ndikpep Bible. Nte ededi, ke ini ete esie emi edide oku ọkọfiọkde emi, enye ama ayat esịt etieti onyụn̄ ọdọhọ ke Mme Ntiense Jehovah iwọrọke n̄kpọ. Sia Elsa ekebierede ndika iso ke ukpepn̄kpọ esie, enye ama ọdọhọ ete esie ukpono ukpono ke Mme Ntiense itiehe ntre. Ndịk ama anam ete esie emen ediye uduot ekpri n̄wed Oyom Elsa ye unana enye ndifiọk. Ete esie ama okot n̄wed emi ediwak ini ndien se enye okokotde ama otụk enye. Ke oro ebede, enye ikesibọrọke aba mme owo ekọm ke enyịn̄ Abasi-Ita-ke-Kiet nte ido esie ekedide. Ikebịghike ẹkekot enye “owo mfiakedem,” ndien ndusụk owo ẹma ẹsiyom ndimia enye. Emi ama anam enye ọwọrọ aka Addis Ababa, onyụn̄ ọkọtọn̄ọ ndikpep Bible n̄ko. Elsa ye owo itiaba ke ubon esie ẹdi Mme Ntiense oro ẹma ẹkena baptism. Ebe ye eyen esie n̄ko ke ẹnen̄ede ẹnam n̄kọri.

Côte d’Ivoire: Anderson ama ọkpọn̄ ediye uduot ekpri n̄wed Nso ke Abasi Oyom Oto Nnyịn? ọnọ anyam ufọkurua emi esiwakde ndikot Bible. Ikebịghike, ẹma ẹtọn̄ọ ndikpep enye Bible. Anyam ufọkurua oro ama enen̄ede ama ọyọhọ ukpepn̄kpọ 8 oro ibuotikọ edide “Uwem Ubon Oro Enemde Abasi Esịt.” Enye ọkọdọhọ ete: “N̄kọfiọkke ke ebe ye n̄wan ẹnyene n̄kpọ oro anade owo mmọ kiet kiet anam ke ndọ. Nsimaha n̄wan mi asua ọnọ mi ke ini nnyọn̄de ndi ufọk ke idiọk ini. N̄kesidọhọ enye nte, ‘Ami  ndi enyeneufọk, mmekeme ndika ebiet ekededi oro nyomde; afo edi n̄wanndọ, ntre enyene ndise mban̄a ufọk.’ Idahaemi mmesisọp nnyọn̄ ufọk ke mma n̄keberi ufọkurua nnyụn̄ n̄kan̄wam n̄wan mi ke utom ufọk.”

Malawi: Ke ini eyenete kiet esiwọrọde an̄wautom, eren kiet emi esiwatde enan̄ukwak ama esiwak ndinọ enye mfịna. Eren emi ama esituak ada ini ekededi oro enye okụtde eyenete emi ọkwọrọde ikọ onyụn̄ ọtọn̄ọ ndifan̄a mfan̄a ye enye. Eren emi ama akam odomo ndibọ eyenete oro Bible. Usen kiet eren emi ama awat enan̄ukwak ebe ke ini eyenete emi okosụk ekpepde owo Bible. Ke ini enye okoyomde ndinen̄ede n̄kpọ ke enan̄ukwak esie, ubọk esie ama ebe odụk wheel iso ndien enye ama ada ata akamba unan ke nnuenubọk. Okposụkedi enye ekenen̄erede okop ubiak, eyenete oro ekedi n̄kukụre owo oro akan̄wamde enye ndida n̄kpọ mbọp unan esie nnyụn̄ nnam ndutịm man ẹda enye ẹka ufọkibọk. Ekem, eyenete emi ama aka ekese eren emi ke ufọk. Bụt ama anam eren emi ke ntak nte enye ekesinamde n̄kpọ, onyụn̄ ọdọhọ ke ufụmikọ oro imọ ikokopde akanam imọ isinam n̄kpọ ntre. Enye ọkọdọhọ ete: “Mbufo ẹdi mme andituak ibuot nnọ ata Abasi kierakiet. N̄kpenịmke ke afo ọkpọfọn ido ntre ye ami ke adan̄a idiọk oro n̄kanamde fi.”

Cameroon: N̄kaiferi eyenete kiet eketie ke ubet oro ẹsitiede ẹbet abiausọbọ emi mme owo ẹma ẹketie ẹyọhọ ke ini akanieren kiet oro ọkọdọn̄ọde okodụkde edi. Sia itie mîkodụhe aba, akana akanieren oro adada. Eyenete an̄wan oro ọdọhọ ete: “Mbọm ama anam mi n̄kpọn̄ itie mi nnọ enye. Emi ama anam ediwak owo ke ubet oro ẹtọn̄ọ ndikụni n̄kụni sia oro ọkọwọrọ n̄ko ke mmayak ini mi ndikụt abiausọbọ nnọ enye. Ikebịghike n̄wan kiet ama edibụp mi m̀mê ewe ido ukpono ke nsika. Mma mbọrọ ke ndi kiet ke otu Mme Ntiense Jehovah. Enye ama otoro mi onyụn̄ ọdọhọ ke ata ediwak uyen ikpanamke se n̄kanamde oro. Ndusụk tract oro n̄kakamade ẹma ẹn̄wam mi nda ifet oro nnọ enye ye mbon eken ikọ ntiense. Mma mbọrọ ediwak mbụme. Ndusụk owo oro n̄kenyenede nneme ẹma ẹkpụhọde ekikere mmọ kaban̄a Mme Ntiense Jehovah ẹnyụn̄ ẹnyịme Mme Ntiense ẹsidi ẹbịne mmimọ ke ufọk.”

Togo: Ke adan̄aemi nditọete ẹkekwọrọde ikọ ke efakutom oro odude nsannsan, mmọ ẹma ẹkụt akparawa kiet oro akadatde esịt ndikụt mmọ. Enye ama owụt mmọ n̄wed iba oro enye okosion̄ode kpukpru se isịnede ke n̄wed Afo Emekeme Ndidu Uwem ke Nsinsi ke Paradise ke Isọn̄ ewet, ye ubak n̄kpọ oro enye okosion̄ode ke n̄wed “Eduñöre Kpukpru Ñkpö Efiök” ewet. Enye okokụt mme n̄wed oro ke ufọk pastọ ke ini enye okodụn̄de do. Pastọ oro ekenyene n̄kpọ udọn̄ n̄wed iba, enye ọkọdọn̄ mme n̄wed oro enye amade ke kiet onyụn̄ ọdọn̄ n̄wed oro “mînyeneke ufọn” ke enye eken. Akparawa emi okokụt mme n̄wed nnyịn ke n̄kpọ udọn̄ n̄wed enye oro pastọ esidọn̄de mme n̄wed oro “mînyeneke ufọn.” Ke enye ama okokot page ifan̄ ke n̄wed kiet, enye ama ama se enye okokotde. Sia enye mîkekemeke ndimen n̄wed oro, mîkonyụn̄ ifiọkke ebiet emi enye okpokụtde utọ n̄wed oro, enye ama osion̄o se ikesịnede ewet. Ke ini enye ọkọtọn̄ọde nditịn̄ nnọ mbon en̄wen se enye okokotde, eka esie ye pastọ oro ẹma ẹtọn̄ọ ndikọbọ enye. Nditọete oro ẹma ẹnọ enye mme n̄wed ndien mmọ ke ẹn̄wam enye anam n̄kọri ke n̄kan̄ eke spirit.

South Africa: Thandi edi Ntiense, ndien ekaufọk esie ama ọdọhọ enye enyene nneme ye nsan̄autom esie emi ekerede Bella, emi ekenyenede mfịna ndọ. Ebe Bella, emi edide bodisi, ama esiwak ndimia nnyụn̄ ntụhọde enye, ntre enye ama ebiere ndiwọrọ ndọ. Thandi ama ọnọ Bella n̄wed Ukpọhọde Inemesịt Ubon iba onyụn̄ ọdọhọ enye ọnọ ebe esie kiet. Ke urua kiet ama ekebe, Thandi ama enyene nneme ye Bella onyụn̄ ọfiọk ke ebe Bella ama esikot n̄wed oro ndien ke emem ọtọn̄ọ ndidu ke ufọk mmọ. Ke ọfiọn̄ ita ẹma ẹkebe, Bella ama ọdọhọ Thandi ke Abasi ama ada akam oro ikọbọn̄de ye n̄wed Inemesịt Ubon, ọkọk mfịna ndọ mmimọ. Ke ini ekaufọk Bella okokopde emi, enye ama ọdọhọ kpukpru mbonutom imọ oro ẹdide owo 2,000 ẹtiene ẹbọ n̄wed oro. Kan̄a ke emi, Thandi emenịm n̄wed Inemesịt Ubon 96 ọnọ mme nsan̄autom esie. Itieutom oro ama ọnọ etịbe ke utom ofụri ererimbot eke Mme Ntiense Jehovah.