Mme Mbụme Ẹtode Mme Andikot

Nso ke nnyịn ikeme ndikpep nto ewụhọ oro ẹkụtde ke Exodus 23:19: “Kûtem eyen ebot ke mmọn̄-eba eka esie”?

Ewụhọ oro ẹkenọde ke Ibet Moses emi ẹdude itie ita ke Bible mi, ekeme ndinam nnyịn ifiọk nte Jehovah esede se inende, onyụn̄ anam ifiọk mbọm ye ima oro enye enyenede. Ewụhọ oro ọsọn̄ọ owụt n̄ko nte enye asuade nsunsu utuakibuot.—Exodus 34:26; Deuteronomy 14:21.

Nditem eyen ebot m̀mê eyen unam ekededi ke mmọn̄eba eka esie atuaha ye ndutịm obot oro Jehovah akanamde. Abasi ọkọnọ eka ebot mmọn̄eba man ada ọbọk eyen man ọkọri. Eyen ukpepn̄kpọ kiet ọdọhọ ke nditem eyen ebot ke mmọn̄eba eka esie ọkpọwọrọ “ndisịn edisana itie ebuana emi Abasi anamde odu ke ufọt eka ye eyen ke ndek.”

Ke adianade do, ndusụk owo ẹnọ ekikere ke ekeme ndidi editem eyen ebot ke mmọn̄eba eka esie ekedi edinam ukpono ndem oro ẹkesidade ẹsịn edịm. Edieke oro ekedide ntre, eyedi ẹkenọ ewụhọ emi mbak nditọ Israel ẹditiene ẹbuana ke ndisịme ye ibak ibak edinam ido ukpono oro ẹkekande mmọ ẹkụk. Ibet Moses ama enen̄ede akpan nditọ Israel ndisan̄a ke ido idụt oro.—Leviticus 20:23.

Ke akpatre, ewụhọ emi anam nnyịn ikụt esịtmbọm oro Jehovah enyenede. Ke nditịm ntịn̄, Ibet Moses esịne ediwak ewụhọ ntre emi ẹkpande ẹdibak ibak ye mme unam, inyụn̄ iyakke ẹbiat ndutịm obot oro Jehovah anamde. Ke uwụtn̄kpọ, Ibet Moses ama akpan ẹdiwa unam ekededi oro mîtiehe ye eka esie isịm usen itiaba, akpan ẹdiwot unam ye eyen esie ke usen kiet, onyụn̄ akpan ẹdisio eka inuen n̄kọrọ ye nsen m̀mê nditọ ke efọk mmọ.—Leviticus 22:27, 28; Deuteronomy 22:6, 7.

Nte an̄wan̄ade, Ibet Moses ikedịghe sụk awak-n̄kukọhọ ewụhọ ye mme ukpan. Ke adianade ye mme ufọn eken, mme edumbet esie ẹnam nnyịn ifiọk mme n̄kokon̄ idaha ido uwem emi ẹnen̄ede ẹwụt mme utịbe utịbe edu Jehovah.—Psalm 19:7-11.

[Ebiet Ẹdade Ndise Ẹto ke page 31]

© Timothy O’Keefe/Index Stock Imagery