Ndidot Ndina Baptism nte Christian
Ndidot Ndina Baptism nte Christian
“Nso ibiọn̄ọ mi ndina baptism?”—UTOM 8:36.
1, 2. Didie ke Philip ọkọtọn̄ọ nneme ye akwa owo ukara Ethiopia, ndien nso ikowụt ke owo Ethiopia emi ama ama Abasi?
KE N̄KPỌ nte isua kiet m̀mê iba ẹma ẹkebe tọn̄ọ Jesus akakpa, akwa owo ukara kiet akasan̄a ke usụn̄ edem usụk, emi otode Jerusalem edika Gaza. Eyedi enye ekenyene ndiwat ke chariot n̄kpọ nte kilomita 1,500. Eten̄e-Abasi emi okoto ko ke Ethiopia edi Jerusalem ndituak ibuot nnọ Jehovah. Nte enye okosụk akade ke usụn̄ unyọn̄, enye ama ada ifet emi anam n̄kpọ nte ọfọnde ke ndikot Ikọ Abasi—ndien emi owụt ke enye ama enyene mbuọtidem. Jehovah ama okụt ke enye enyene eti esịt, onyụn̄ ada angel esie anam Philip ọkọkwọrọ ikọ ọnọ enye.—Utom 8:26-28.
2 Philip ama ọtọn̄ọ nneme mmemmem mmemmem ye akwa owo ukara Ethiopia emi sia owo emi okokotde n̄wed uyo ọwọrọ nte ẹkesinamde ini oro. Ntem, Philip ama okop ke enye okokot n̄wed Isaiah. Mmemmem mbụme kiet oro Philip okobụpde owo Ethiopia emi ama edemede enye udọn̄: “Nte afo emetịm ọfiọk se afo okotde?” Emi ama anam mmọ ẹneme se idude ke Isaiah 53:7, 8. Ke akpatre, Philip ama “atan̄a eti mbụk emi aban̄ade Jesus ọnọ enye.”—Utom 8:29-35.
3, 4. (a) Ntak emi Philip ekenịmde owo Ethiopia oro baptism ye unana ubiatini? (b) Mme mbụme ewe ke idineme idahaemi?
3 Ikebịghike, owo Ethiopia emi ama ọfiọk udeme oro Jesus enyenede ke ndisu uduak Abasi, onyụn̄ ọfiọk ke oyom ikabade idi mbet Christ oro anade baptism. Ntre ke okụtde mmọn̄ oro okponde ekem, enye ama obụp Philip ete: “Nso ibiọn̄ọ mi ndina baptism?” Nte ededi, utọ n̄kpọ emi isiwakke nditịbe. Owo Ethiopia emi ekedi owo oro enyenede mbuọtidem emi ama ekesikpokpono Abasi ke ido mme Jew. Ekeme ndidi enye ikpọkọsọpke inyene utọ ifet oro aba ndina baptism. Ke edide akpan n̄kpọ akan, enye ama ọfiọk se Abasi okoyomde imọ inam, ntre enye ama eben̄e idem ndinam oro ke ofụri esịt. Philip ama okop inemesịt ndinam eben̄e esie, ndien ke owo Ethiopia emi ama akana baptism, enye ama “[ọnyọn̄] esie ke idatesịt.” Eyedi enye ama akakabade edi ifịk ifịk ọkwọrọ eti mbụk ke obio emana esie.—Utom 8:36-39.
4 Okposụkedi owo mîkpadaha ediyak idem nnọ Abasi ye edina baptism mfefere mfefere, m̀mê ndinam enye itọk itọk, uwụtn̄kpọ owo Ethiopia emi owụt ke ẹsidu mme ini oro mme owo ẹnade baptism esisịt ini ke mmọ ẹma ẹkekop akpanikọ Ikọ Abasi. * Mmọdo, odot ikere iban̄a mme mbụme emi: Nso ntịmidem ke owo akpanam mbemiso anade baptism? Ndi isua emana ekeme ndinen̄ede mbiọn̄ọ owo ndina baptism? Nso n̄kọri eke spirit ke owo akpanam mbemiso anade baptism? Ke akande kpukpru emi, ntak emi Jehovah oyomde mme asan̄autom esie ẹna baptism?
Ata Akpan Un̄wọn̄ọ
5, 6. (a) Didie ke ikọt Abasi ke eset ẹkenam ẹwụt ke imama Jehovah? (b) Nso n̄kpet n̄kpet itie ebuana ke idinyene ye Abasi ke ima ikana baptism?
5 Ke Jehovah ama akanyan̄a nditọ Israel osio ke Egypt, enye ama enyịme ndida mmọ nte “akpan inyene” esie, ndima, ndikpeme, nnyụn̄ nnam mmọ ẹdi “edisana idụt.” Nte ededi, nditọ Israel ẹkenyene ndinam n̄kpọ n̄wụt ke imama Abasi mbemiso mmọ ẹkebọde mme utọ edidiọn̄ oro. Mmọ ẹkenam emi ke ndinyịme ndinam ‘kpukpru se Jehovah ọdọhọde’ nnyụn̄ ndụk ediomi ye enye. (Exodus 19:4-9) Ke akpa isua ikie, Jesus ama owụk mme anditiene enye ete ẹnam mme owo ke kpukpru idụt ẹdi mbet imọ, ndien mbon oro ẹkenyịmede ukpepn̄kpọ esie ẹma ẹna baptism. Ndibuọt idem ke Jesus Christ nnyụn̄ nna baptism akanam owo enyene eti itie ebuana ye Abasi.—Matthew 28:19, 20; Utom 2:38, 41.
6 Se mme itie N̄wed Abasi oro ẹtịn̄de ẹwụt ke Jehovah esidiọn̄ mbon oro ẹn̄wọn̄ọde ndinam n̄kpọ esie, mînyụn̄ ibiatke un̄wọn̄ọ oro. Mme Christian ẹfiọk ke oyom owo ayak idem ọnọ Abasi onyụn̄ ana baptism man enyene edidiọn̄ Jehovah. Nnyịn imebiere ndidu uwem ekekem ye mme edumbet Abasi nnyụn̄ nyom ndausụn̄ esie. (Psalm 48:14) Ke ini inamde emi, Jehovah omụm nnyịn ubọk ke ndamban̄a usụn̄ owụt usụn̄ eke ikpasan̄ade.—Psalm 73:23; Isaiah 30:21; 41:10, 13.
7. Ntak emi owo ekpebierede ke idemesie ndiyak idem nnọ Abasi nnyụn̄ nna baptism?
7 Ima oro imade Jehovah ye udọn̄ ndinam n̄kpọ esie akpanam nnyịn iyak idem inọ enye inyụn̄ ina baptism. Owo ndomokiet ikpenyeneke ndina baptism sia ẹdọhọ ke enye ekpep n̄kpọ ebịghi ekem m̀mê sia mme ufan esie ẹmọn̄ ẹna baptism. Nte ido edide, mme ete ye eka ye mme Christian oro ẹkọride ẹsịm ọyọhọ idaha ẹkeme ndisịn udọn̄ nnọ owo ekere aban̄a ediyak idem nnọ Abasi nnyụn̄ nna baptism. Apostle Peter ama esịn udọn̄ ọnọ mbon oro ẹkekopde utịn̄ikọ esie ke usen Pentecost ete “ẹna baptism.” (Utom 2:38) Nte ededi, ediyak idem nnọ Abasi edi ọkpọkpọ mbubehe, ndien idụhe owo ndomokiet oro ekemede ndinam oro nnọ nnyịn. Ana nnyịn ibiere ke idem nnyịn ndinam uduak Abasi.—Psalm 40:8.
Nditịm Idem Edifọn Edifọn Nnọ Baptism
8, 9. (a) Ntak emi edinịm nseknditọ baptism mîkemke ye N̄wed Abasi? (b) Nso n̄kọri eke spirit ke mme uyen ẹkpenam mbemiso ẹnade baptism?
8 Ndi nditọwọn̄ ẹnyene ifiọk ẹkem ndiyak idem nnọ Abasi? Nte ededi, N̄wed Abasi inịmke isua emana oro owo akpanade baptism. Edi nseknditọ ikemeke ndidi mme andinịm ke akpanikọ; mmọ ikemeke ndinyene mbuọtidem, m̀mê ndiyak idem nnọ Abasi. (Utom 8:12) Se se Augustus Neander, ewetmbụk eset, ekewetde aban̄a mme Christian akpa isua ikie ke n̄wed esie oro General History of the Christian Religion and Church: “Ẹkesinịm ikpọ owo kpọt baptism ke eset, koro mme owo ẹkenịm ke ana owo enyene mbuọtidem mbemiso anade baptism.”
9 Edi ndusụk uyen ẹsikọri ke n̄kan̄ eke spirit ke ini mmọ ẹsụk ẹdide n̄kpri, ke adan̄aemi mbon eken ẹsikọride ke n̄kan̄ eke spirit ke ẹma ẹkekponi. Nte ededi, mbemiso uyen anade baptism, akpana enye enyene ọkpọkpọ itie ebuana ye Jehovah, enen̄ede ọfiọk mme akpan n̄kpọ oro N̄wed Abasi ekpepde, onyụn̄ enen̄ede ọfiọk se ẹyomde ẹto mbon oro ẹyakde idem ẹnọ Abasi kpa nte ẹyomde ẹto ikpọ owo.
10. Nso ke owo enyene ndinam mbemiso ayakde idem ọnọ Abasi onyụn̄ anade baptism?
10 Jesus ọkọdọhọ mme mbet esie ẹkpep mbufa owo kpukpru se imọ iketemede. (Matthew 28:20) Mmọdo, ana mbufa owo ẹbem iso ẹkọ nnennen ifiọk akpanikọ emi edinamde mmọ ẹnyene mbuọtidem ke Jehovah ye ke Ikọ esie. (Rome 10:17; 1 Timothy 2:4; Mme Hebrew 11:6) Ndien, ke ini akpanikọ N̄wed Abasi otụkde owo esịt, oro ayanam enye akabade esịt onyụn̄ ọwọn̄ọde ọkpọn̄ n̄kani usụn̄ uwem esie. (Utom 3:19) Ke akpatre, owo emi eyesịm idaha oro enye edibierede ndiyak idemesie nnọ Jehovah nnyụn̄ nna baptism nte Jesus eketemede.
11. Ntak emi edide akpan n̄kpọ nnyịn ndibuana ke an̄wautom kpukpru ini mbemiso inade baptism?
11 Akpan n̄kpọ en̄wen oro anade owo anam mbemiso anade baptism edi nditiene n̄kwọrọ eti mbụk Obio Ubọn̄. Ata akpan utom oro Jehovah ọnọde ikọt esie ke mme akpatre usen emi edi oro. (Matthew 24:14) Ntem, mme asuanetop oro mînaha baptism ẹkpenyene ndikop inemesịt ndineme se mmọ ẹnịmde ke akpanikọ ye mbon en̄wen. Nditiene nnam utom emi etịm mmọ idem n̄ko ndidi ifịk ifịk mbon oro ẹbuanade ke an̄wautom kpukpru ini ke mmọ ẹma ẹkena baptism.—Rome 10:9, 10, 14, 15.
Ndi Odu Se Ibiọn̄ọde Fi Ndina Baptism?
12. Nso ikeme ndibiọn̄ọ ndusụk owo ndina baptism?
12 Ndusụk owo ẹkeme nditre ndina baptism koro mmọ iyomke ndibiom mbiomo oro asan̄ade ye baptism. Mmọ ẹfiọk ke emi oyoyom inam akamba ukpụhọde ke uwem mmimọ man idu uwem ekekem ye mme edumbet Jehovah. Mîdịghe mmọ ẹkeme ndikop ndịk ke mmimọ idikemeke ndidu uwem ekekem ye se Abasi oyomde ke ima ikana baptism. Ndusụk owo ẹkam ẹkeme ndikere ẹte, “Mmekeme ndinam se mîfọnke usen kiet, ndien ẹsio mi ẹfep ke esop.”
13. Nso ikọbiọn̄ọ ndusụk owo nditiene Jesus ke ini enye okodude ke isọn̄?
13 Ke eyo Jesus, ndusụk owo ẹma ẹyak mbubehe idemmọ ye ọkpọsọn̄ ima oro mmọ ẹkemade ubon mmọ ẹbiọn̄ọ mmọ ndikabade ndi mme mbet Jesus. Ewetn̄wed kiet ọkọdọhọ ke iyetiene Jesus ika ebiet eke enye edikaka. Edi Jesus ama anam enye ọfiọk ke imọ isikam inyeneke ebiet ndinịm ibuot. Ke ini Jesus ọkọdọhọde owo efen oro akakpan̄de utọn̄ ọnọ enye ete etiene imọ, owo oro ọkọdọhọ yak ika kan̄a ‘ikobụk’ ete imọ. Eyedi enye okoyom ndiketetie ke ufọk mbet tutu ete esie akpa, utu ke nditiene Jesus nnyụn̄ mbet ete esie akam akpa kan̄a mbemiso ekerede aban̄a ndibụk enye. Ke akpatre, ọyọhọ owo ita ọkọdọhọ yak ‘ikọkọm mbonufọk imọ unyọn̄’ mbemiso idide iditiene Jesus. Jesus ọkọdọhọ ke utọ ubiatini oro edi ‘edikabarede nse edem.’ Ntem, etie nte ke mbon oro ẹtiede ntre ẹsiwak ndinyene ntak ndinọ man ẹfep mbiomo oro anade Christian obiom.—Luke 9:57-62.
14. (a) Didie ke Peter, Andrew, James, ye John ẹkenam n̄kpọ ke ini Jesus ọkọdọhọde mmọ ẹdidi mme ọkọ owo? (b) Ntak emi nnyịn mîkpabiatke ini ndimen ọkpọnọ Jesus n̄kọn̄ọ?
14 Peter, Andrew, James, ye John iketiehe ntre. Ke ini Jesus ọkọdọhọde mmọ ẹtiene imọ ẹnyụn̄ ẹkabade ẹdi mme ọkọ owo, Bible ọdọhọ ete: “Kpa idaha oro, mmọ ẹdaha ẹkpọn̄ iyịre mmọ ẹnyụn̄ ẹtiene enye.” (Matthew 4:19-22) Ke ndibiere nditiene Jesus kpa idaha oro, mmọ ẹma ẹdikụt ke se Jesus akasiande mmimọ ke ukperedem edi akpanikọ. Enye ọkọdọhọ: “Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde esịt, ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.” (Matthew 11:29, 30) Okposụkedi baptism asan̄ade ye mbiomo, Jesus ọsọn̄ọ etịn̄ ọnọ nnyịn ete ke emi edi mmemmem ye mfefere mbiomo oro edikam enen̄erede ọnọ nnyịn nduọkodudu.
15. Didie ke se iketịbede inọ Moses ye Jeremiah ẹwụt ke nnyịn imekeme ndinịm ke Abasi ayan̄wam nnyịn?
15 Nte ededi, edi ndammana n̄kpọ owo ndikere ke imọ idikemeke ndibiom mbiomo asan̄ade ye edina baptism. Ke akpa, Moses ye Jeremiah ẹkekere ke mmimọ idikemeke ndinam utom oro Jehovah ọkọdọn̄de mmimọ. (Exodus 3:11; Jeremiah 1:6) Didie ke Abasi ọkọsọn̄ọ mmọ idem? Enye ọkọdọhọ Moses ete: “Nditreke ndidu ye afo.” Enye okonyụn̄ ọn̄wọn̄ọ ọnọ Jeremiah ete: “Koro ami ndude ye afo ndinyan̄a fi.” (Exodus 3:12; Jeremiah 1:8) Nnyịn n̄ko imenyene mbuọtidem ke Abasi eyebere ye nnyịn. Ndima Abasi nnyụn̄ mbuọt idem ke enye ẹkeme ndinam nnyịn ikan eyịghe oro ẹkemede ndinam nnyịn ikere m̀mê iyekeme ndidu uwem ekekem ye uyakidem nnyịn. Apostle John ekewet ete: “Ndịk idụhe ke ima, edi ima oro ọfọnde ama emebịn ndịk ọduọk ke an̄wa.” (1 John 4:18) Ndịk ekeme ndinam ekpri eyenọwọn̄ ke ini enye asan̄ade ikpọn̄, edi enye idikopke aba ndịk ke ini enye omụmde ete esie ubọk asan̄a. Kpasụk ntre, edieke nnyịn ibuọtde idem ye Jehovah ke ofụri esịt nnyịn, enye ọn̄wọn̄ọ ‘ndinen̄ede usụn̄ nnyịn nnịm,’ nte nnyịn isan̄ade ye enye.—Mme N̄ke 3:5, 6.
Edinam Oro Enyenede Uku
16. Ntak emi baptism abuanade edibụk owo ofụri ofụri ke mmọn̄?
16 Ẹsibem iso ẹnọ utịn̄ikọ N̄wed Abasi oro owụtde nte baptism Christian edide akpan n̄kpọ mbemiso ẹnịmde mme owo baptism. Ke utịt utịn̄ikọ emi, ẹsidọhọ mbon oro ẹyomde ndina baptism ẹyararede mbuọtidem mmọ an̄wan̄wa ke ndibọrọ mbụme iba oro ẹsibụpde mbon baptism. (Rome 10:10; se ekebe ke page 22.) Ke oro ebede, ẹsibụk mmọ ofụri ofụri ke mmọn̄, kpa nte ẹkebụkde Jesus. Bible owụt ke Jesus ama akana baptism ama, enye ama “ọwọrọ ke mmọn̄ ọdọk.” (Matthew 3:16; Mark 1:10) Ana in̄wan̄-in̄wan̄ ke John Andinịm Owo Baptism ama obụk Jesus ofụri ofụri ke mmọn̄. * Ndibụhọ ofụri ofụri ke mmọn̄ enen̄ede odot ndida mban̄a akwa ukpụhọde oro inamde ke uwem—enye ọwọrọ ke imakpa ke ndamban̄a usụn̄ ikpọn̄ akani usụn̄ uwem nnyịn, inyụn̄ itọn̄ọ ndidu obufa uwem emi edide ndinam n̄kpọ Abasi.
17. Didie ke mbon oro ẹyomde ndina baptism ye mbon eken ẹkeme ndinam edinam oro enyene uku?
17 Baptism edi ata akpan edinam oro asan̄ade ye idatesịt. Bible owụt ke Jesus ama ọbọn̄ akam ke ini John okobụkde enye ke Akpa Jordan. (Luke 3:21, 22) Man ẹwụt ke imetiene uwụtn̄kpọ Jesus, mbon oro ẹyomde ndina baptism ẹkpenyene ndikama idem nte odotde. N̄ko sia Bible esịnde udọn̄ ọnọ nnyịn ete isịne n̄kpọ ke usụn̄ oro owụtde iso bụt kpukpru ini, nte nnyịn ikpakam isịneke n̄kpọ oro etịmde owụt iso bụt ikana baptism? (1 Timothy 2:9) Mbon eken ẹkeme n̄ko ndinen̄ede n̄wụt ukpono ke nditịm n̄kpan̄ utọn̄ ke ini ẹnọde utịn̄ikọ baptism ye ke ndinam n̄kpọ ke ido nte eyede ke ini ẹsede nte ẹnịmde mme owo baptism.—1 Corinth 14:40.
Mme Edidiọn̄ Oro Ẹnọde Mme Mbet Oro Ẹnade Baptism
18, 19. Mme edidiọn̄ ewe ke baptism anam owo enyene?
18 Ndondo oro iyakde idem inọ Abasi inyụn̄ ina baptism, nnyịn imakabade idi ubak san̄asan̄a ubon esie. Akpa edidiọn̄ oro inyenede edi ke Jehovah amakabade edi Ete ye Ufan nnyịn. Nnyịn ikedi mme asua Abasi ke ini nnyịn mîkanaha baptism, edi ke emi imedidu ke emem ye enye. (2 Corinth 5:19; Colossae 1:20) Uwa Christ anam nnyịn isan̄a ikpere Abasi, Abasi onyụn̄ asan̄a ekpere nnyịn. (James 4:8) Prọfet Malachi ọdọhọ ke Jehovah esikpan̄ utọn̄ onyụn̄ okop se mbon oro ẹkerede enyịn̄ esie ẹnemede, onyụn̄ esịn enyịn̄ mmọ ke n̄wed editi esie. Abasi ọdọhọ ete: “Mmọ ẹyedi ata inyene mi . . . ndien nyatua mmọ mbọm, kpa nte owo atuade eyen esie eke anamde n̄kpọ ọnọ enye mbọm.”—Malachi 3:16-18.
19 Baptism anam nnyịn n̄ko ikabade idi ubak otu nditọete oro ẹdude ke ofụri ererimbot. Ke ini apostle Peter okobụpde m̀mê nso edidiọn̄ ke mme mbet Jesus ẹdinyene ke ndikayak kpukpru n̄kpọ ẹtak mmọ nnyụn̄ ntiene Jesus, Jesus ama ọn̄wọn̄ọ ọnọ mmọ ete: “Owo ekededi emi ọkọkpọn̄de ufọk m̀mê nditọeka iren m̀mê nditọeka iban m̀mê ete m̀mê eka m̀mê nditọ m̀mê isọn̄ ke ntak enyịn̄ mi ọyọbọ se iwakde ikan oro, oyonyụn̄ enyene nsinsi uwem.” (Matthew 19:29) Peter ama ewet ediwak isua ke ukperedem aban̄a “ofụri otu nditọete,” emi ẹdude “ke ererimbot.” Peter ke idemesie ama ọbọ un̄wam ye edidiọn̄ oto ndima nditọete emi, ndien nnyịn imonyụn̄ ikeme ndibọ utọ edidiọn̄ oro n̄ko.—1 Peter 2:17; 5:9.
20. Nso utịbe utịbe idotenyịn ke baptism anam owo enyene?
20 Ke adianade ye oro, Jesus ọkọdọhọ ke mbon oro ẹtienede imọ “[ẹyenyene] nsinsi uwem.” Ih, ediyak idem nnọ Abasi nnyụn̄ nna baptism anam owo ekeme ‘ndisọn̄ọ mmụm ata uwem n̄kama’—kpa nsinsi uwem ke obufa ererimbot Abasi. (1 Timothy 6:19) Emi edi mfọnn̄kan itiat idakisọn̄ oro nnyịn ikemede ndisịn nnọ idem nnyịn ye ubon nnyịn. Utịbe utịbe idotenyịn emi ayanam nnyịn “isan̄a ke enyịn̄ Jehovah Abasi nnyịn ke nsinsi-nsinsi.”—Micah 4:5.
[Mme Ikọ idakisọn̄]
^ ikp. 4 Owo tọsịn ita, oro edi mme Jew ye mbon oro ẹkekponode Abasi ke ido mme Jew, oro ẹkekopde utịn̄ikọ Peter ke usen Pentecost, ẹma ẹna baptism n̄ko ye unana ubiatini. Nte ededi, kpa nte eunuch owo Ethiopia oro, mmọ ẹma ẹfọfiọk mme akpan ukpepn̄kpọ ye mme edumbet Ikọ Abasi.—Utom 2:37-41.
^ ikp. 16 Vine’s Expository Dictionary of New Testament Words ọdọhọ ke ikọ Greek oro baʹpti·sma (baptism) ọwọrọ “edibụk ofụri ofụri, edinyịni nnyụn̄ nsio ndi.”
Nte Afo Emekeme Ndinam An̄wan̄a?
• Didie ke nnyịn ikpanam n̄kpọ iban̄a ima oro Jehovah amade nnyịn, ndien ntak-a?
• Nso n̄kọri eke spirit ke owo akpanam mbemiso anade baptism?
• Ntak emi nnyịn mîkpayakke ndịk edinam idiọk m̀mê ndịk edibiom mbiomo ọbiọn̄ọ nnyịn ndina baptism?
• Mme utịbe utịbe edidiọn̄ ewe ke mme mbet Jesus Christ oro ẹnade baptism ẹkeme ndinyene?
[Mme Mbụme Ukpepn̄kpọ]
[Ndise ke page 26]
“Nso ibiọn̄ọ mi ndina baptism?”
[Mme ndise ke page 29]
Baptism edi ata akpan edinam oro asan̄ade ye idatesịt