Ndifiọk Bible Ayanam Fi Okop Inemesịt

BIBLE ọdọn̄ọ ọsọn̄urua akpanikọ otode Abasi. Enye asian nnyịn se idide uduak uwem, ntak emi mme owo ẹbọde ndutụhọ, ye se idide ini iso ubonowo. Enye ekpep nnyịn nte ikemede ndikop inemesịt, ndinam ufan, ye nte ikpakande mme mfịna uforo uforo. Akan oro, enye ekpep nnyịn aban̄a Andibot nnyịn, kpa Ete nnyịn eke heaven, Jehovah. Utọ ifiọk oro anam nnyịn ikop idatesịt onyụn̄ anam uwem nnyịn enyene se ọwọrọde.

Bible emen edikọ ifiọk Abasi odomo ye edidia udia. Jesus ọkọdọhọ ete: “Idịghe uyo ikpọn̄ ke ana owo ada odu uwem, edi edida kpukpru ikọ eke ẹwọrọde Jehovah ke inua odu.” (Matthew 4:4; Mme Hebrew 5:12-14) Kpa nte oyomde idia nti udia kpukpru usen man ika iso idu uwem, kpasụk ntre ke oyom ikot Ikọ Abasi kpukpru ini man ikpọbọ un̄wọn̄ọ nsinsi uwem oro Abasi ọn̄wọn̄ọde ọnọ nnyịn.

Esinem nnyịn ndidia udia koro ẹkebot nnyịn ke usụn̄ oro ikemede ndikop inem udia, n̄ko koro ndidia udia oyụhọ akpan udọn̄. Nte ededi, imenyene akpan udọn̄ en̄wen oro anade iyụhọ edieke anade ikop inemesịt. Jesus ọkọdọhọ ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.” (Matthew 5:3) Ndifiọk Ikọ Abasi ekeme ndinam iyụhọ udọn̄ nnyịn ke n̄kan̄ eke spirit onyụn̄ anam ikop inemesịt.

Edi akpanikọ ke esisọn̄ ndusụk owo ndifiọk Bible. Ke uwụtn̄kpọ, emekeme ndiyom un̄wam man ọfiọk itien̄wed oro ẹtịn̄de n̄kpọ ẹban̄a mme ido edinam oro afo mûmeheke m̀mê oro ẹdọn̄ọde ndamban̄a ikọ. N̄ko-n̄ko, odu mme ntịn̄nnịm ikọ oro ẹdade ndamban̄a usem ẹwet, ndien n̄kukụre usụn̄ oro ikemede ndifiọk se mmọ ẹwọrọde edi  ndikot mme itien̄wed en̄wen ke Bible emi ẹtịn̄de n̄kpọ ẹban̄a ukem ntịn̄nnịm ikọ oro. (Daniel 7:1-7; Ediyarade 13:1, 2) Kpa ye oro, afo emekeme ndinen̄ede mfiọk Bible. Edi afo ekeme ndisan̄a didie mfiọk Bible?

Kpukpru Owo Ẹkeme Ndikop Inemesịt ke Ndifiọk Bible

Bible edi Ikọ Abasi. Abasi ada enye ayararede uduak esie ọnọ nnyịn. Ndi Abasi ọkpọnọ nnyịn n̄wed oro owo mîkemeke ndifiọk m̀mê oro an̄wan̄ade sụk mbon oro ẹnen̄erede ẹfiọk n̄wed? Baba, Jehovah ikpanamke utọ n̄kpọ oro. Jesus Christ ọkọdọhọ ete: “Ewe ete odu ke otu mbufo eke edinọde eyen urụkikọt utu ke iyak ke ini eyen esie eben̄ede enye iyak? M̀mê edinọde eyen ikpeyen ke ini eyen eben̄ede enye nsenunen? Ke ntre, edieke mbufo, emi ẹdiọkde, ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mbon oro ẹben̄ede enye!” (Luke 11:11-13) Ntem, nen̄ede nịm ke emekeme ndifiọk Bible nyụn̄ nịm ke edieke eben̄ede Abasi un̄wam ke ofụri esịt, enye ọyọnọ fi un̄wam oro oyomde man ọfiọk Ikọ esie. Kamse, idem n̄kpri nditọwọn̄ ẹkeme ndifiọk mme akpan ukpepn̄kpọ Bible!—2 Timothy 3:15.

Okposụkedi oyomde isịn ukeme man ifiọk Bible, ndinam ntre ekeme ndinen̄ede nsọn̄ọ nnyịn idem. Ke Jesus ama ekeset, enye ama owụt mbet esie iba idem onyụn̄ atat mme ntịn̄nnịm ikọ Bible ọnọ mmọ. Luke ewet ete: “Enye ọtọn̄ọ ke Moses ye kpukpru mme Prọfet asiak mme n̄kpọ emi ẹketịn̄de ẹban̄a enye ke ofụri N̄wed Abasi ọnọ mmọ.” Nso ikedi utịp? Nte mme mbet oro ẹkekerede ẹban̄a se mmọ ẹkekpepde mbubịteyo oro, mmọ ẹma ẹdọhọ kiet eken ẹte: “Nte esịt ikofiopke nnyịn ke ini enye ekenemede nneme ye nnyịn ke usụn̄, nte enye akatatde N̄wed Abasi ọnọ nnyịn ọyọhọ ọyọhọ?” (Luke 24:13-32) Ndifiọk Ikọ Abasi ama anam mmọ ẹkop inemesịt, koro emi ama anam mmọ ẹtetịm ẹbuọt idem ke mme un̄wọn̄ọ Abasi onyụn̄ anam mmọ ẹdori enyịn ke ini iso ọyọfọn.

Utu ke ndidi mbiomo, ndifiọk Ikọ Abasi enem onyụn̄ enyene ufọn, etie nte edidia edinem udia. Nso ke ana afo anam man ọfiọk Ikọ Abasi? Ibuotikọ oro etienede owụt nte afo ekemede ndikop inem ke ndinyene “ifiọk Abasi.”—Mme N̄ke 2:1-5.

[Ndise ke page 4]

Ukem nte edima ete, Jehovah ọnọ nnyịn edisana spirit man an̄wam nnyịn ifiọk Bible