Nso Idin̄wam Fi Ọfiọk Bible?

“AFO [emetịm] edịp mbon ọniọn̄ ye mbon ikike mme n̄kpọ emi, onyụn̄ ayarade mmọ ọnọ nditọwọn̄.” (Luke 10:21) Ikọ oro Jesus eketịn̄de mi ye Ete esie eke heaven owụt ke ana inyene nnennen edu man ikeme ndifiọk Bible. Ẹkụt ọniọn̄ Jehovah ke emi enye ọnọde ubonowo n̄wed emi mbon oro ẹsụhọrede idem kpọt, ẹnyịme ndibọ ukpep ẹkemede ndinen̄ede mfiọk.

Isimemke utom ediwak nnyịn ndisụhọde idem. Kpukpru nnyịn idada edu ntan̄idem imana. Adianade do, nnyịn idu uwem ke “mme akpatre usen,” ke otu mme owo oro ẹdide ‘mme ama idem, mbon nsọn̄ibuot, ye mbon n̄kohodeidem.’ (2 Timothy 3:1-4) Mme edu emi iyakke nnyịn ifiọk Ikọ Abasi. Edi n̄kpọ mfụhọ nditịn̄ ke nte mme owo ẹdude uwem ke n̄kann̄kụk nnyịn esitụk nnyịn. Didie ndien ke afo ekeme ndinyene nnennen edu oro edin̄wamde fi ọfiọk Bible?

Tịm Esịt ye Ekikere Fo

Ezra, emi akadade ikọt Abasi usụn̄ ke eset ‘[“ama etịm,” NW] esịt esie ndidụn̄ọde n̄wed ibet Jehovah.’ (Ezra 7:10) Ndi odu usụn̄ oro nnyịn ikemede nditịm esịt nnyịn? Ih odu. Nnyịn imekeme nditọn̄ọ ndinam ntre ebe ke ndinyene nnennen edu mban̄a N̄wed Abasi. Apostle Paul ekewet ntem ọnọ ẹsọk ekemmọ mme Christian: “Ke ini mbufo ẹbọde ikọ Abasi, emi mbufo ẹkekopde ẹto nnyịn, mbufo ibọhọ enye nte ikọ owo, edi, kpa nte enye ke akpanikọ edide, nte ikọ Abasi.” (1 Thessalonica 2:13) Okposụkedi ẹkedade mme owo ẹwet Bible, mmọ ẹkewet se Jehovah ọkọdọhọde mmọ ẹwet. Ndifiọk ata akpan n̄kpọ emi ayanam nnyịn inen̄ede inyịme se ikotde ke Bible.—2 Timothy 3:16.

Akam edi usụn̄ en̄wen oro ikemede ndida ntịm esịt nnyịn. Sia ẹkedade odudu edisana spirit Abasi ẹwet Bible, edisana spirit oro ayan̄wam nnyịn ifiọk Bible. Ana ibọn̄ akam inọ Abasi ada edisana spirit esie an̄wam nnyịn. Tịm fiọk nte emi ekedide akpan n̄kpọ ọnọ andiwet psalm emi ekewetde ete: “Tịm sian mi, ndien nyekpeme ido fo; nnyụn̄ nnịm enye ke ofụri esịt mi.” (Psalm 119:34) Oyom ibọn̄ akam iben̄e ikike man ifiọk se ikotde ke Bible inyụn̄ ibọn̄ iben̄e eti esịt man inyịme se ikotde. Oyom nnyịn inyịme akpanikọ man ifiọk Bible.

Ke ini etiede ekere nte ekemede ndinyene nnennen edu, kere n̄ko ban̄a nte ndikpep Bible ekemede ndin̄wam fi. Nnyịn imenyene nti ntak ndikot Ikọ Abasi, edi akakan ntak edi man an̄wam nnyịn isan̄a ikpere Abasi. (James 4:8) Ndikot mban̄a nte Jehovah esinamde n̄kpọ ke nsio nsio idaha, nte enye adade  mbon oro ẹmade enye, ye nte enye esinamde n̄kpọ ye mbon oro ẹkpọn̄de enye, esinam nnyịn ifiọk orụk owo oro enye edide. Kpukpru ini, akpana akpan ntak oro anamde ikot Bible edi man inen̄ede idiọn̄ọ Abasi, ndien emi ayan̄wam nnyịn isọn̄ọ itie ebuana nnyịn ye enye.

Se Ikemede Ndibiọn̄ọ Nnyịn Ndinyene Nnennen Edu

Nso ikeme ndibiọn̄ọ nnyịn ndifiọk Ikọ Abasi? Ubiọn̄ọ kiet edi ndisọn̄ọ nyịre ke ukpepn̄kpọ mbon oro nnyịn imade. Ke uwụtn̄kpọ, afo emekeme ndisọn̄ọ nyịre ke mme ukpepn̄kpọ ye ekikere mbon oro mme owo ẹkponode. Edi, nso edieke mme owo emi mîmaha akpanikọ Bible? Nditiene mme utọ owo emi idiyakke owo ọfiọk se Bible enen̄erede ekpep. Mmọdo, Bible esịn udọn̄ ọnọ nnyịn nditịm ndụn̄ọde se ẹkekpepde nnyịn.—1 Thessalonica 5:21.

Ukem n̄kpọ emi ama ọwọrọ Mary eka Jesus. Ẹkekpep enye ukpepn̄kpọ mme Jew toto ke uyen. Enye ama esinịm Ibet Moses ketket, ndien eyịghe idụhe ke enye ama esika synagogue. Nte ini akakade, enye ama edifiọk ke Abasi ikenyịmeke aba utuakibuot oro ete ye eka esie ẹkekpepde enye. Mmọdo, Mary ama edinyịme se Jesus ekekpepde onyụn̄ akabade edi kiet ke otu akpa mme andibuana ke esop Christian. (Utom 1:13, 14) Emi ikedịghe ndisọn̄ ibuot ye ete ye eka esie m̀mê ndisịn mme ukpepn̄kpọ mmọ; utu ke oro, emi okowụt ima oro enye akamade Abasi. Edieke anade ibọ ufọn ito Bible, nnyịn inyene ndikpebe Mary ke ndima ukpepn̄kpọ Abasi utu ke eke owo.

Edi n̄kpọ mfụhọ nditịn̄ ke ediwak owo idaha akpanikọ Bible ke n̄kpọ. Ndusụk owo ẹma nditiene ido edinam nsunsu ido ukpono. Nte mbon en̄wen ẹtịn̄de ikọ ẹnyụn̄ ẹdude uwem owụt ke mmọ ẹse akpanikọ ke mbio. Nte ededi, ndinyịme akpanikọ Bible asan̄a ye n̄waidem: Enye ekeme ndinam mme ufan fo, mme mbọhọidụn̄, mme nsan̄autom, ye idem ubon fo ẹsua fi. (John 17:14) Kpa ye oro, enyene-ọniọn̄ Edidem Solomon ekewet ete: “Dep akpanikọ, kûnyụn̄ unyam” enye. (Mme N̄ke 23:23) Edieke afo enen̄erede ama akpanikọ, Jehovah ayan̄wam fi ọfiọk Bible.

Ndisịn ndinam se Bible ọdọhọde edi n̄kpọ en̄wen oro ọbiọn̄ọde owo ndifiọk Bible. Jesus ọkọdọhọ mme mbet esie ete: “Ẹyak mbufo ẹfiọk ndisana ndịben̄kpọ obio ubọn̄ heaven, edi owo iyakke mbon oro ẹfiọk. Koro esịt mbon emi amakabade odobi, utọn̄ mmọ omonyụn̄ okop ye unana ediyere.” (Matthew 13:11, 15) Ata ediwak mbon oro Jesus ọkọkwọrọde ikọ ọnọ ikakpan̄ke utọn̄, ikonyụn̄ imaha ndinam ukpụhọde. Mmọ ẹkekpụhọde didie ntem ye owo urua oro Jesus akadade ọnọ uwụtn̄kpọ! Ke owo urua oro ama okokụt pearl emi ekọmurua esie okponde, enye ama ọsọsọp akanyam kpukpru n̄kpọ emi enye ekenyenede edep pearl oro. Nnyịn ikpada edifiọk akpanikọ Bible nte ọsọn̄urua n̄kpọ n̄ko.—Matthew 13:45, 46.

Ntak Esisọn̄de Ndinyịme Ndibọ Ukpep

Se isinen̄erede inam ọsọn̄ owo ndifiọk Bible edi nditre ndinyịme ndibọ ukpep. Ekeme ndisọn̄ ndinyịme mbufa ekikere oro owo emi ẹdade nte usụhọde owo ọnọde. Kpa ye oro, mme apostle Jesus Christ ẹkedi “mmọ emi mîfiọkke n̄wed ye mme usụhọde owo.” (Utom 4:13) Paul ama anam emi an̄wan̄a ke ini enye ekewetde ete: “Mbufo ẹmekụt ikot oro enye okotde mbufo, nditọete, ẹte ke ikokotke ediwak mbon oro ẹnyenede ọniọn̄ ke ido obụkidem, ikokotke ediwak mme okopodudu, ikokotke ediwak mbọn̄; edi Abasi ekemek ndisịme n̄kpọ ererimbot, man enye ekpesuene mbon ọniọn̄.” (1 Corinth 1:26, 27) Edieke afo okụtde ke esisọn̄ fi ndisụhọde idem ke ini usụhọde owo ekpepde fi n̄kpọ, do ti ke Abasi akam ada enye ọnọ fi ukpep. Nso ifet okpokpon akan ndidi se Jehovah, kpa “Akwa Anditeme” nnyịn ọnọde ukpep?—Isaiah 30:20, NW; 54:13.

Ama ọsọn̄ Naaman etubom ekọn̄ Syria ndinam se usụhọde owo eketemede enye. Sia enye okoyomde ẹnam akpamfia okụre imọ, enye ama aka ndikụt Elisha prọfet Jehovah. Abasi akada isụn̄utom Elisha eteme Naaman  se enye edinamde man akpamfia esie asana. Etop oro ẹketobode Naaman ye nte ẹketobode enye ama anam ọsọn̄ enye ndisụhọde idem nnam se ẹketemede enye. Ke akpa enye ikamaha ndinam se isụn̄utom prọfet Abasi eketemede enye. Ikebịghike, Naaman ama osụhọde idem, ẹma ẹnyụn̄ ẹnam akpamfia esie asana. (2 Ndidem 5:9-14) Nnyịn imesisobo ukem n̄kpọ-ata oro ke ini ikotde Bible. Nnyịn imekeme ndikpep ke oyom idu obufa uwem mbemiso ikemede ndisana ke n̄kan̄ eke spirit ye eke ido uwem. Ndi nnyịn iyosụhọde idem inyịme owo ekpep nnyịn se anade inam? Sụk mbon oro ẹnyịmede ndibọ ukpep ẹkeme ndifiọk Bible.

Eren kiet emi okodude ke idak Candace ọbọn̄ an̄wan mbon Ethiopia ama enyene eti edu. Enye akawat ke chariot ọnyọn̄ Africa, ndien mbet oro Philip ama efehe akadiana chariot esie. Philip ama obụp eren emi m̀mê enye ọfiọk se enye okokotde. Akwa owo ukara emi ama enen̄ede osụhọde idem ọbọrọ ete: “N̄keme didie ndifiọk, ke mîbọhọke owo ada mi usụn̄?” Enye ama ana baptism ke ama ekedifiọk Ikọ Abasi. Ke oro ebede, enye ama ‘ọnyọn̄ esie ke idatesịt.’—Utom 8:27-39.

Mme Ntiense Jehovah ke ofụri ofụri ẹdi mme owo nte nnyịn. Mmọ ẹsika ufọk mme owo oro ẹwakde ẹbe miliọn itiokiet ẹkekpep mmọ Bible kpukpru urua. Sia Bible ekpepde mfọnn̄kan usụn̄ uwem, anamde ẹfiọk n̄kukụre ata idotenyịn oro odude ọnọ ubonowo, onyụn̄ owụtde nnyịn nte ikemede ndinen̄ede ndiọn̄ọ Abasi, ediwak miliọn owo ẹmekụt ke ndikpep Bible nnyụn̄ mfiọk se enye etịn̄de enen̄ede anam mmimọ ikop inemesịt. Afo n̄ko emekeme nditiene n̄kop utọ inemesịt emi.

[Ndise ke page 7]

Ama ọsọn̄ Naaman ndinam se usụhọde owo eketemede enye

[Ndise ke page 7]

Ndifiọk Bible anam nnyịn ikop inemesịt