Didie ke Afo Ekeme Ndinam Ubiere Oro Ekemde ye Uduak Abasi?

EREN kiet ke United States ama ada babru okụk ban̄k oro ẹkewetde $25,000 aka itie unịm okụk. Enye okoyom ndisịn okụk oro do ke akpan ini man ẹkpenọ enye akwa udori. Edi anamutom ke itie unịm okụk oro ama eteme enye ete akam ayak okụk oro ọnọ akwa usiakifia ada anam mbubehe, onyụn̄ ọdọhọ ke utọ mbubehe oro isikpụhu owo. Eren oro ama ebiere ndinam ntre. Ikebịghike, ntakurua ama esịm enye.

Se iketịbede inọ eren emi owụt ke idịghe mmemmem n̄kpọ ndinam eti ubiere. Nso kaban̄a nsio nsio ubiere oro anade inam? Ediwak ubiere oro inamde ẹkeme ndinam nnyịn ikụt unen m̀mê edikpu—ndien ebebịghi m̀mê awawara oro ekeme n̄ko ndiwọrọ uwem m̀mê n̄kpa. Do, didie ke nnyịn ikeme nditịm mfiọk ke m̀mê imesinam nti ubiere?

“Emi Edi Ọkpọusụn̄”

Nnyịn imesinam ubiere kpukpru usen iban̄a se ididiade, se idisịnede, ebiet oro idikade, ye ntre ntre eken. Ndusụk ubiere ẹkeme nditie nte idịghe akpan n̄kpọ, edi utịp mmọ ẹkeme ndinen̄ede ndiọk. Ke uwụtn̄kpọ, owo ndibiere nditọn̄ọ ndin̄wọn̄ sika ekeme ndisụn̄ọ ke ndin̄wọn̄ sika ke ofụri eyouwem esie. Nnyịn ikpedehedei ida utịp ubiere oro inamde ke se itiede nte n̄kpri n̄kpọ mfefere mfefere.

M̀mọ̀n̄ ke nnyịn ikeme ndinyene ndausụn̄ ke ini inamde ubiere, idem ke se itiede nte n̄kpri n̄kpọ? Ọkpọfọn didie ntem ndinyene owo oro ikemede ndiberi edem man ọnọ nnyịn item ke ini iyomde ndinam ata ọkpọsọn̄ ubiere! Afo emekeme ndinyene utọ ọnọitem oro. N̄wed eset kiet oro etop esie ebehede nnyịn mfịn ọdọhọ ete: “Utọn̄ fo oyokop uyo ke edem fo, ete, ‘Emi edi ọkpọusụn̄, mbufo ẹsan̄a ke esịt,’ ke mbufo ẹdiwọn̄ọrede ẹka nnasia, m̀mê ẹnyụn̄ ẹka ufien.” (Isaiah 30:21) Anie etịn̄ ikọ emi? Ndien afo ekeme ndisan̄a didie mfiọk ke ẹkeme ndiberi edem ke ndausụn̄ esie?

Nsọn̄ọ oro ẹnọde ke enyọn̄ emi odu ke Bible, emi ata ediwak owo ẹkpepde ẹnyụn̄ ẹfiọkde ke edi n̄wed oro ẹdade odudu spirit Jehovah Abasi, kpa Andibot, ẹwet.  (2 Timothy 3:16, 17) Jehovah ọfiọk nte enye akanamde nnyịn, ntre enye ekeme ndinọ nnyịn mfọnn̄kan item. Enye n̄ko ekeme ndifiọk se iditịbede ke ini iso, sia enye edide ‘Enye emi asiakde akpatre ke akpa, ndien ke eset asiak se mînamke kan̄a, ete ke uduak imọ ẹyeda.’ (Isaiah 46:10) Ntem ke andiwet psalm okowụt ibetedem esie ke ikọ Jehovah: “Ikọ fo edi utuenikan̄ ukot mi, ye un̄wana usụn̄ mi.” (Psalm 119:105) Edi, didie ke Jehovah an̄wam nnyịn ikeme ndidu uwem ifụre kpa ye ndutịme oro odude ke ererimbot mfịn? Didie ke nnyịn ikeme ndinam ubiere oro ekemde ye uduak Abasi?

Da Mme Edumbet Bible Sịn ke Edinam

Jehovah Abasi ọnọ mme Christian mme edumbet man ẹn̄wam mmọ ẹnam nti ubiere. Ndikpep mme edumbet Bible nnyụn̄ nda mmọ nsịn ke edinam etie nte ndikpep nnyụn̄ nsem usem. Ndondo oro ọfiọkde usem oro, emekeme ndifiọk ini ekededi oro owo anamde ndudue ke usem oro. Ekeme ndidi udukemeke nditịn̄ akpan n̄kpọ oro anamde ikọ oro owo etịn̄de akwan̄a, edi ọmọfiọk ke inenke. Ke ini ekpepde mme edumbet Bible tutu afo emehe ye mmọ, afo emekeme ndifiọk ini emi ubiere ekededi mîfọnke, oro mîdụhe ke n̄kemuyo ye mme edumbet Abasi.

Ke uwụtn̄kpọ, kere ban̄a ubiere emi akparawa oyomde ndinam kaban̄a nte enye akpafatde idet. Idụhe ibet Bible oro asiakde utọ idet oro owo mîkpafatke. Edi kere ban̄a edumbet Bible kiet. Apostle Paul ekewet ete: “Nyom iban ẹbana idem ke ndisịne ọfọn̄ eke etịmde odot, ye nsụkidem ye eti ibuot, idịghe ke ido edidọk idet ye gold m̀mê pearl m̀mê ata ọsọn̄urua edisịnen̄kpọ, edi ke ido eke odotde iban eke ẹdọhọde ke ikpono Abasi, oro edi, ebe ke nti utom.” (1 Timothy 2:9, 10) Se Paul ewetde mi aban̄a iban, edi edumbet emi abuana iren n̄ko. Nso edumbet idi oro? Edi ke akpana ukamaidem nnyịn owụt nsụkidem ye eti ibuot. Ntre akparawa oro ekeme ndibụp idemesie ete, ‘Nte idet oro nyomde ndifat oyowụt ke mmosụk idem nte Christian okposụkde?’

Ewe edumbet ke akparawa owo ekeme ndida n̄n̄wam idem edieke okotde se mbet oro James ekewetde mi? Enye ekewet ete: “Iban n̄kaowo, nte mbufo ifiọkke ite edidi ufan ye ererimbot edi edidi asua ye Abasi? Ke ntre, owo ekededi eke oyomde ndidi ufan ye ererimbot anam idemesie asua ye Abasi.” (James 4:4) Mme Christian ikereke-kere ndidi ufan ererimbot, emi edide asua ye Abasi. Ndi utọ idet oro mme ufan esie ẹmade edinam enye edi ufan Abasi m̀mê ufan ererimbot? Akparawa emi ekerede aban̄a utọ idet oro enye akpafatde ekeme ndida mme utọ edumbet emi ẹkọn̄ọde ke Bible mi nnam eti ubiere. Ih, mme edumbet Abasi ẹkeme ndin̄wam nnyịn inam ubiere. Ndien edieke emehede nnyịn ndinam ubiere oro ẹkọn̄ọde ke mme edumbet Abasi, oro ayanam edi mmemmem  n̄kpọ ndinam nti ubiere oro mîdidaha ndiọi utịp idi.

Nnyịn imekeme ndikụt ediwak edumbet ke Ikọ Abasi. Edi akpanikọ ke ekeme ndidi nnyịn idikwe itien̄wed oro enemede n̄kpọ aban̄a mfịna nnyịn san̄asan̄a. Kpa ye oro, nnyịn imekeme ndikot mban̄a nte ndusụk owo ẹkenamde item Abasi ye nte mbon eken ẹkefụmide item Abasi. (Genesis 4:6, 7, 13-16; Deuteronomy 30:15-20; 1 Corinth 10:11) Ke ikotde mme mbụk mme owo emi inyụn̄ ikerede iban̄a mme utịp oro mmọ ẹkebọde, nnyịn iyokụt mme edumbet Abasi oro ẹkemede ndin̄wam nnyịn inam ubiere oro Abasi amade.

Da ibio ibio nneme oro Jesus Christ ekenyenede ye apostle Peter ke uwụtn̄kpọ. Mme owo oro ẹkebọde tax drachma iba ẹma ẹbụp Peter ẹte: “Nte andikpep mbufo esikpe tax drachma iba?” Peter ama ọbọbọrọ “Ih.” Esisịt ini ke oro ebede, Jesus ama obụp Peter ete: “Mmanie ke ndidem isọn̄ ẹsibọ mme utomo m̀mê tax? Nte ẹsibọ nditọ mmọ m̀mê ẹsibọ isenowo?” Ke Peter ama ọkọbọrọ ete: “Ẹsibọ isenowo,” Jesus ama ọdọhọ enye ete: “Ke akpanikọ, ndien, nditọ inyeneke ndikpe tax. Edi mbak nnyịn idinam mmọ ẹtuak ukot ẹduọn̄ọ, afo ka ke inyan̄ kọduọk uwam nyụn̄ da akpa iyak eke edimụmde, ndien ke okụbọrede enye inua, afo oyokụt okụk stater. Da nọ mmọ ke okịm ye okwo.” (Matthew 17:24-27) Ewe edumbet Abasi ke ikeme ndikụt ke mbụk emi?

Jesus ndibụp Peter nsio nsio mbụme ama anam Peter ekere ke idemesie ọfiọk ke Jesus ikenyeneke ndikpe tax sia enye edide Eyen Abasi. Okposụkedi Peter mîkọfiọkke oro ke ntọn̄ọ, Jesus ama ada mfọnido anam enye ọfiọk. Ke ini mbon en̄wen ẹnamde ndudue, nnyịn ikpenyene ndikpebe Jesus ke ndinam n̄kpọ ye mmọ ke mbọm utu ke ndisua nnọ mmọ uyat uyat m̀mê ndibiom mmọ ikpe.

Do ndien ke Peter okokụt ntak akanade mmọ ẹkpe tax—oro edi mbak ẹdinam mbon en̄wen ẹtuak ukot ẹduọn̄ọ. Edumbet en̄wen emi ikemede ndikpep nto mbụk emi edi emi: Ndikere mban̄a ubieresịt mbon en̄wen enen̄ede edi akpan n̄kpọ akan ndisọn̄ọ nyịre ke unen nnyịn.

Nso isinam nnyịn inam mme ubiere oro ẹwụtde ke imekere iban̄a ubieresịt mbon en̄wen? Edi ima mbọhọidụn̄. Jesus Christ ekekpep ete ke ndima mbọhọidụn̄ nnyịn nte idem nnyịn edi udiana n̄kponn̄kan ibet, akpa edi ndima Abasi ke ofụri ukpọn̄ nnyịn. (Matthew 22:39) Nte ededi, nnyịn idu uwem ke ererimbot ibụk, ndien ndiọi udọn̄ nnyịn ẹsinam nnyịn idi ibụk. Ntre, owo enyene ndinam ekikere esie edi obufa man ekeme ndima mbọhọidụn̄ esie nte idemesie.—Rome 12:2.

Ediwak owo ẹnam utọ ukpụhọde oro, ndien mmọ ẹsikere ẹban̄a mbon en̄wen ke ini ẹyomde ndinam n̄kpri m̀mê ikpọ ubiere. Paul ekewet ete: “Nditọete, ke akpanikọ, ẹkekot mbufo ẹte ẹdinyene ifụre; edi ẹkûda ifụre emi nte n̄kpọ ndida nnam se idọn̄de obụkidem, edi ẹdụk ufụn ẹnọ kiet eken ke ima.” (Galatia 5:13) Didie ke ikeme ndinam oro? Kere ban̄a ekpri n̄kaiferi kiet oro ọkọwọrọde aka obio-in̄wan̄ kiet ndin̄wam mme owo  ẹkpep Ikọ Abasi. Nte enye ekenyenede nneme ye mme owo, enye ama edifiọk ke ẹkesida ọfọn̄ imọ ẹtoho ufiet, okposụkedi ọfọn̄ oro ekedide ukeuke ọfọn̄ ke obio oro enye okotode edi. Nte enye ekesịnede ọfọn̄ onyụn̄ akamade idem ekedi ukeuke, edi enye ama ebiere ndisịne ọfọn̄ oro mîkenen̄ekede iye “mbak ẹditịn̄ ikọ isụn̄i ẹdian ikọ Abasi.”—Titus 2:5.

Didie ke afo akpakanam n̄kpọ edieke akpakanade anam ubiere oro aban̄ade ukamaidem m̀mê n̄kpọ efen oro amade? Ke akpanikọ, Jehovah oyokop inemesịt edieke mme ubiere fo ẹwụtde ke emekere aban̄a ubieresịt mbon en̄wen.

Kere Ban̄a Se Ubiere Fo Ediwọrọde ke Ini Iso

Ke ẹsiode mme edumbet Bible ye ubieresịt mbon en̄wen ẹfep, nso ke ikpekere iban̄a ke ini inamde mme ubiere? Okposụkedi mîdịghe mmemmem n̄kpọ ndidi Christian, Abasi ọnọ mmọ ifụre ndinam n̄kpọ ekededi oro mîtuahake ye mme edumbet Esie. (Matthew 7:13, 14) Nnyịn inyene ndikere nte mme ubiere nnyịn ẹditụkde nnyịn ke n̄kan̄ eke spirit, eke ekikere, eke ntụk, ye eke obụk ke ini iso.

Yak idọhọ ke enyene utom emi afo ekekerede ndinam. Iso-ọfọn idụhe oburobụt n̄kpọ m̀mê n̄kpọ oro ọdiọkde ke utom oro. Utom oro ọyọnọ fi ini ndidụk mme mbono esop Christian ye ikpọ mbono. Okụkọfiọn̄ oro ẹdikpede fi ayawak akan se afo ekpekerede. Eteutom enen̄ede ama usọ fo onyụn̄ oyom ndinọ fi ifetutom ekededi. Ke ẹsiode oro ẹfep, afo amama utom oro. Ndi odu se ikpakpande fi ndinyịme utom oro? Ọfọn, yak idọhọ ke omokụt ke utom oro ayadia fi idem. Ẹdọhọ fi ke owo idinyịkke fi anam utom ebe ini. Edi man ekeme ndikụre utom oro akamade ke ubọk, ndi ayama ndisịn idem nnam mbe se akpanamde? Ndi ayawak ndinam utom mbe ini ntre? Ndi oro ayanam ọkpọn̄ ubon fo, ndien nte ini akade, onyụn̄ ataba mme edinam eke spirit oro mîkpanaha ataba?

Kere ban̄a nte Jim akanamde akamba ubiere kaban̄a utom esie. Enye ama enen̄ede anam utom ẹnyụn̄ ẹmenede enye itie. Ekem enye ama edinyene ata akamba itie ke kpukpru ebiet emi usiakifia oro enye akanamde utom okodude. Nte ededi, ke n̄kpọ ama ọkọtọn̄ọ ndisọn̄ ke Japan, enye ama okụt nte ekedide ikpîkpu n̄kpọ ndibịne okụk ye odudu. Ofụri okụk oro enye ekenyenede ama atak. Enye ikọfiọkke se akpanamde. Enye ama obụp idemesie ete, ‘Nso ke ndinam ke isua duop ke iso? Do ndien ke enye ekedifiọk ke n̄wan ye nditọ imọ ẹma ẹdu uwem oro enyenede uduak ẹkan imọ. Mmọ ẹma ẹsibuana ye Mme Ntiense Jehovah ke ediwak isua oro ẹkebede. Jim ama oyom nditiene n̄kop inemesịt ye uyụhọ oro ubon esie ẹkekopde. Ntre enye ama ọtọn̄ọ ndikpep Bible.

Ikebịghike Jim ama okụt ke uwem oro imọ ikodude ikayakke imọ idu uwem nte Christian. Sia enye ekesikade Asia, United States ye Europe kpukpru ini, kpa mme ebiet emi usiakifia oro enye akanamde utom okodude, enye ikenyeneke ini ndikpep Bible nnyụn̄ mbuana ye ekemmọ mme andinịm ke akpanikọ. Enye ekenyene ndinam ubiere emi: ‘Ndi n̄kpaka iso ndu uwem oro n̄kodude ke isua 50 emi ẹbede, m̀mê n̄kpodu obufa uwem?’ Enye ama ọbọn̄ akam ọnọ Abasi aban̄a emi onyụn̄ ekere se ndikpọn̄ ediwak utom oro enye ekenyenede ediwọrọde ke ini iso, onyụn̄ ebiere ndinam utom kiet kpọt man enyene ini ọnọ mme n̄kpọ eke spirit. (1 Timothy 6:6-8) Ubiere esie ama anam enye okop inemesịt, onyụn̄ ọnọ enye ifet ndibuana ke mme edinam Christian.

Edide ke n̄kpri m̀mê ke ikpọ n̄kpọ, mme ubiere fo ẹdi akpan n̄kpọ. Ubiere oro anamde mfịn ekeme ndinam fi okụt unen m̀mê edikpu; onyụn̄ akam ekeme ndisụn̄ọ ke uwem m̀mê n̄kpa ke ini iso. Afo emekeme ndinam nti ubiere edieke ekerede aban̄a mme edumbet Bible, ubieresịt mbon en̄wen, ye se oro ediwọrọde ke ini iso. Ntre nam mme ubiere oro ẹkemde ye uduak Abasi.

[Ndise ke page 13]

Mme ubiere oro ẹtiede nte ẹdi n̄kpri ẹkeme ndinyene ata ndiọi utịp

[Ndise ke page 14]

Didie ke mme edumbet Bible ẹkeme ndin̄wam enye anam eti ubiere?

[Ndise ke page 15]

Jesus ama owụt mbọm ke nte eketịn̄de ikọ ye Peter