Ndi Emetịm Ọfiọk Ndineme Nneme?

“LETA ima oro owo isua 60 ekewetde.” Oro edi ibuotikọ mbuba oro ban̄k kiet ke Japan eketịmde ke isua ifan̄ emi ẹkebede. Mbuba emi ekesịn udọn̄ ọnọ mme ebe ye ibanndọ ke Japan emi ẹdude ke iduọk isua 50 ye 60 ndiwet nnọ nsan̄a ndọ mmọ nte mmọ “ẹnen̄erede ẹma” kiet eken. Ebe kiet emi eketienede amia mbuba emi ekewet ọnọ n̄wan esie ete: “Imam ekeme ndibọhọ fi, edi esịt idinemke mi edieke mmensianke fi se nyomde ndisian fi emi, mmọdo, nnen̄ede ndọhọ nte: Amanam etieti ndikọdọ mi.”

Owo isisịnke udọn̄ inọ mme owo ke ediwak ebiet, esịnede ndusụk ebiet ke Edem Usiahautịn, nditịn̄ se isịnede mmọ ke esịt. Kpa ye oro, se iwakde ibe owo 15,000 ẹma ẹbuana ke mbuba uwet leta ima emi. Mme owo ẹma ẹnen̄ede ẹma mbuba uwet leta emi tutu ẹfiak ẹtịm efen, ndien ẹma ẹda mme leta emi ẹsio mme n̄wed. Emi owụt ke esinen̄ede ọdọn̄ ediwak mme ọdọ ndọ nditịn̄ nnọ nsan̄a mmọ nte mmimọ imade mmọ. Nte ededi, mbon eken isimaha ndinam oro. Ntak-a? Ekeme ndidi koro esinen̄ede oyom usọ ye ukeme mbemiso mmọ ẹkemede ndinam mbon en̄wen—utọ nte nsan̄a ndọ—ẹfiọk nte etiede mmọ ke idem.

Hitoshi Kato, emi ekewetde n̄wed aban̄a ini ukpọn̄ utom, ọdọhọ ke udu oro ibanndọ ẹkamade ke esịt ẹsan̄a ke ediwak isua esidi ntak ediwak usiondọ ke otu n̄kani mme ọdọ ndọ ke Japan. Kato ọdọhọ ete: “Edi ntak efen oro esinamde ẹsio ndọ edi mme ọdọ ndọ ndisitre ndineme mfịna mmọ ke ini mme mfịna ẹdemerede.”

Ke ndondo oro ebe ọkpọn̄de utom, idem ekeme ndikpa enye ndikụt n̄wan esie ọnọde enye n̄wed usiondọ. Ekeme ndidi ke ediwak isua mmọ ikesitịn̄ke nte mmọ ẹmade kiet eken. Mîdịghe, ekeme ndidi ebe ye n̄wan ẹma ẹsidomo nditịn̄ nte mmọ ẹmade kiet eken, edi  ikekemeke nditịn̄ enye ke usụn̄ oro ọfọnde. Ntre, utu ke ndinen̄ede nsan̄a n̄kpere kiet eken, mmọ ẹsikam ẹfan̄a mfan̄a kpukpru ini.

Didie ke ebe ye n̄wan ẹkeme ndise mban̄a mfịna mmọ emem emem nnyụn̄ nneme nte etiede mmọ ke idem ke usụn̄ oro enemde? Esịt eyenem fi ndifiọk ke emekeme ndikụt ata nti item ke nte ekemede ndinam emi ke n̄wed oro mîdịghe ọnọitem ndọ ewet ke ndondo emi, edi ke n̄wed eset oro mme owo ẹnen̄erede ẹma ke ata ediwak isua idahaemi—kpa Bible.