Jehovah Ọnọ Mme Ekpemerọn̄ Esie Ukpep
Jehovah Ọnọ Mme Ekpemerọn̄ Esie Ukpep
“Jehovah enyene eti ibuot; ifiọk ye mbufiọk ẹto enye ke inua.”—Mme N̄ke 2:6.
1, 2. Ntak emi iren oro ẹma ẹkena baptism ẹsinyanarede ẹbịne mme ifetutom efen efen ke esop?
NICK emi anamde utom nte ebiowo ke isua itiaba idahaemi ọdọhọ ete: “Mma nnen̄ede n̄kop inemesịt ke ini ẹkemekde mi ebiowo. N̄kada emi nte ifetutom ndida nnam ekese ke utom Jehovah. Mma n̄kere ke nnyene ndiwụt esịtekọm mban̄a kpukpru se Jehovah anamde ọnọ mi. N̄konyụn̄ nyom ndin̄wam mme andibuana ke esop nte n̄kekeme ukem nte mbiowo eken ẹn̄wamde mi.” Nte ededi, idatesịt emi akasan̄a ye editịmede esịt. Nick aka iso ọdọhọ ete: “Sia ẹkemekde mi ke ini mmen̄kesịmke isua 30, n̄kekere ke ndinyeneke mbufiọk oro ẹyomde—ikike ye ọniọn̄—ndise mban̄a esop nte ọfọnde.”
2 Mbon oro Jehovah emekde ẹse ẹban̄a otuerọn̄ esie ẹnyene ediwak ntak ndinem esịt. Apostle Paul ama ada se Jesus eketịn̄de eti mbiowo ke Ephesus ntak kiet oro mmọ ẹnyenede ndinem esịt, enye ọkọdọhọ ete: “Inemesịt okpon ke ndinọnọ akan ke ndibọbọ.” (Utom 20:35) Ndinam utom nte asan̄autom unamutom m̀mê nte ebiowo ọnọ iren oro ẹma ẹkena baptism ifet efen efen ndinam n̄kpọ nnọ Jehovah ye esop. Ke uwụtn̄kpọ, mme asan̄autom unamutom ẹsin̄wam mbiowo ke esop. Mmọ n̄ko ẹsise ẹban̄a ediwak akpan utom eken oro ẹsidade ini. Ima Abasi ye eke mbọhọidụn̄ ẹnam nditọete emi ẹnam nti utom emi.—Mark 12:30, 31.
3. Ntak emi ndusụk owo ẹsimen̄ede ndinyanarede mbịne mme ifetutom ke esop?
3 Nso kaban̄a Christian eren oro emen̄ede ndinam n̄kpọ man odot ndidi asan̄autom unamutom ndien nte ini akade edi ebiowo, sia enye ekerede ke imọ idotke? Ukem nte Nick, enye ekeme ndikere ke imọ inyeneke ukeme ndidi eti ekpemerọn̄. Ndi afo emi edide eyenete eren oro ama akana baptism emetiene enyene ukem ekikere emi? Enyene se isinamde mme owo ẹnyene utọ ekikere oro. Jehovah oyokot mme ekpemerọn̄ ẹdinam ibat ke nte mmọ ẹnamde n̄kpọ ye otuerọn̄. Jesus ọkọdọhọ ete: “Owo eke ẹnọde ediwak n̄kpọ, ke ẹdiyom ediwak n̄kpọ ẹto enye; owo eke mme owo ẹdọhọde ese aban̄a ediwak n̄kpọ, mmọ ẹyeyom se iwakde ikan ẹto enye.”—Luke 12:48.
4. Didie ke Jehovah an̄wam mbon oro enye emekde ẹse ẹban̄a mme erọn̄ esie?
4 Ndi Jehovah oyom mbon oro enye emekde nte mme asan̄autom unamutom ye mbiowo ẹbiom mbiomo oro ke idemmọ ikpọn̄? Baba-o, enye an̄wam mmọ ẹkeme ndiyọ nnyụn̄ n̄kụt unen ke utom mmọ. Nte ima ikeneneme ke ibuotikọ oro ekebemde iso, Jehovah ọnọ mmọ edisana spirit esie, emi mbun̄wụm esie an̄wamde mmọ ndise mban̄a mme erọn̄ nte ọfọnde. (Utom 20:28; Galatia 5:22, 23) Ke adianade do, Jehovah ọnọ mmọ eti ibuot, ifiọk, ye mbufiọk. (Mme N̄ke 2:6) Didie ke enye anam emi? Ẹyak ineme usụn̄ ita oro Jehovah ọnọde mbon oro enye emekde ẹse ẹban̄a mme erọn̄ esie, ukpep.
Ẹbọ Ukpep Ẹto Mme Ekpemerọn̄ Oro Ẹnyenede Mbufiọk
5. Ntak emi Peter ye John ẹkedide nti ekpemerọn̄?
5 Ke ini apostle Peter ye John ẹkedade ke iso esop Sanhedrin, mme ebiereikpe oro ẹkedide mme ọfiọkn̄kpọ owo ererimbot ẹkeda mmọ nte “mmọ emi mîfiọkke n̄wed ye mme usụhọde owo.” Kamse, mmọ ẹma ẹkeme ndikot n̄wed nnyụn̄ mfiọk nte ẹwetde n̄kpọ, okposụkedi mmọ mîkakaha ufọkn̄wed mme rabbi ndomokiet ikekpep N̄wed Abasi. Kpa ye oro, Peter ye John ye mme mbet eken ẹma ẹkabade ẹdi mme andikpep oro ẹkenyenede uforo, ẹnamde mme owo oro ẹkekpan̄de utọn̄ ẹnọ mmọ ẹkabade ẹdi mme andinịm ke akpanikọ. Didie ke mme usụhọde owo emi ẹkekabade ẹdi mme utọ n̄wọrọnda andikpep oro? Ke ẹma ẹkekpan̄ utọn̄ ẹnọ Peter ye John, esop Sanhedrin ẹma “ẹfiọk ẹte mmọ ẹkesidu ye Jesus.” (Utom 4:1-4, 13) Edi akpanikọ ke mmọ ẹma ẹbọ edisana spirit. (Utom 1:8) Kpa ye oro, ama ana in̄wan̄-in̄wan̄—idem ke iso mme ebiereikpe oro mîkenyeneke ifiọk Abasi—ke Jesus ọkọnọ iren oro ukpep. Ke ini Jesus okodude ye mme apostle esie ke isọn̄, enye ama ekpep mmọ nte ẹkpeyomde mbon mbieterọn̄ ye nte ẹkpesede ẹban̄a mmọ ke ini mmọ ẹkabarede ẹdi ubak otuerọn̄.—Matthew 11:29; 20:24-28; 1 Peter 5:4.
6. Nso uwụtn̄kpọ kaban̄a edinọ mbon en̄wen ukpep ke Jesus ye Paul ẹkenịm?
6 Ke Jesus ama ekeset ke n̄kpa, enye ama aka iso ndinọ mbon oro enye ekemekde nte mme ekpemerọn̄ ukpep. (Ediyarade 1:1; 2:1-3:22) Ke uwụtn̄kpọ, enye ke idemesie ekemek Paul onyụn̄ okụt ete ke ẹnọ enye ukpep. (Utom 22:6-10) Paul ama enen̄ede ama ukpep oro enye ọkọbọde onyụn̄ ada oro ekpep mbiowo eken. (Utom 20:17-35) Ke uwụtn̄kpọ, enye ama ada ekese ini ye ukeme ekpep Timothy akabade edi “anamutom emi mînyeneke n̄kpọ eke anamde enye okop bụt” ke utom Abasi. (2 Timothy 2:15) Mmọ ẹma ẹnen̄ede ẹdiana kiet. Paul ama ebem iso ewet aban̄a Timothy ete: “Nte eyen emi odude ye ete enye ama asan̄a ye ami anam utom ọkpọsọn̄ ke ndisuan eti mbụk.” (Philippi 2:22) Paul ikoyomke ndinam Timothy m̀mê owo ekededi akabade edi mbet imọ. Utu ke oro, enye ekesịn udọn̄ ọnọ ekemmọ mme andinịm ke akpanikọ ‘ẹkabade ẹdi mme andikpebe imọ, kpa nte imọ ikekpebede Christ.’—1 Corinth 11:1.
7, 8. (a) Nso uwụtn̄kpọ owụt eti utịp oro ẹsinyenede ke ini mbiowo ẹkpebede Jesus ye Paul? (b) Ini ewe ke mbiowo ẹkpetọn̄ọ ndinọ mbon oro ẹdikabarede ẹdi mme asan̄autom unamutom ye mbiowo ukpep?
7 Mme ekpemerọn̄ oro ẹnyenede mbufiọk ẹkpebe Jesus ye Paul ke ndinọ nditọete iren oro ẹma ẹkena baptism ukpep, ẹnyụn̄ ẹnyene nti utịp. Kere ban̄a mbụk Chad. Mbonubon mmọ ẹkesika nsio nsio ido ukpono, ndien ẹma ẹmek enye ebiowo ndondo emi. Enye ọdọhọ ete: “Ke mme isua emi ẹbede, mbiowo oro ẹnyenede mbufiọk ẹn̄wam mi nnam n̄kọri ke n̄kan̄ eke spirit. Sia ete mi mîkenịmke ke akpanikọ, mbiowo oro ẹma ẹnen̄ede ẹnyene udọn̄ ke idem mi ẹnyụn̄ ẹkabade ẹdi mme ete eke spirit ẹnọ mi. Mmọ ẹma ẹda ini ẹnọ mi ukpep ke an̄wautom, ndien ke ukperedem, ebiowo kiet akpan akpan ama ekpep mi ndise mban̄a utom esop oro ẹkenọde mi.”
8 Nte mbụk Chad owụtde, mme ekpemerọn̄ oro ẹnyenede mbufiọk ẹsitọn̄ọ ndinọ mbon oro ẹdikabarede ẹdi mme asan̄autom unamutom ye mbiowo ukpep, anyan ini mbemiso mmọ ẹnamde n̄kọri ẹkem ndinyene utọ ifetutom oro. Ntak edide ntre? Koro Bible owụk mme asan̄autom unamutom ye mbiowo ẹnyene n̄kokon̄ idaha eke ido uwem ye eke spirit mbemiso ẹmekde mmọ ndikama ifetutom oro. Ana “ẹbem iso ẹdomo mmọ emi ẹse m̀mê ẹdot.”—1 Timothy 3:1-10.
9. Nso mbiomo ke mme ekpemerọn̄ oro ẹnyenede mbufiọk ẹnyene, ndien ntak-a?
9 Edieke anade ẹdomo nditọete ẹse, ọyọfọn ẹbem iso ẹnọ mmọ ukpep. Ke uwụtn̄kpọ: Edieke ẹtemde eyen ufọkn̄wed ọkpọsọn̄ udomo ke se mme andikpep mîkekpepke enye, ndi enye eyebe udomo oro? Enen̄ede etie nte enye idibehe. Ke ntre, oyom ẹnọ enye ukpep. Nte ededi, nti mme andikpep ẹsinọ nditọ ufọkn̄wed ukpep man ẹda se ẹkpepde ẹsịn ke edinam idịghe sụk ndida n̄wet udomo mbe. Ukem ntre, mbiowo oro ẹnamde utom ifịk ifịk ẹsinọ nditọete iren oro ẹma ẹkena baptism akpan ukpep man ẹn̄wam mmọ ẹnyene mme edu oro ẹyomde ẹto owo oro ẹmekde. Mmọ ẹnam oro man nditọete oro ẹkeme ndise mban̄a otuerọn̄ nte ọfọnde idịghe sụk man ẹmek mmọ. (2 Timothy 2:2) Edi akpanikọ ke ana nditọete iren oro ẹma ẹkena baptism ẹnen̄ede ẹsịn ifịk ẹnam n̄kpọ man ẹdot se ẹmekde nte asan̄autom unamutom m̀mê nte ebiowo. (Titus 1:5-9) Kpa ye oro, mme ekpemerọn̄ oro ẹnyenede mbufiọk ẹkeme ndin̄wam mbon oro ẹnyanarede ẹbịne mme ifetutom ke esop ẹnam n̄kọri usọp usọp ebe ke ndinyịme ndinọ mmọ ukpep.
10, 11. Didie ke mme ekpemerọn̄ ẹkeme ndinọ mbon en̄wen ukpep man ẹben̄e mmọ idem ẹnọ mme ifetutom en̄wen ke esop?
10 Ke mme akpan usụn̄ ewe ke mme ekpemerọn̄ oro ẹnyenede mbufiọk ẹkeme ndinọ mbon en̄wen ukpep man ẹse ẹban̄a mme utom esop? Akpa kan̄a, ana mmọ ẹnyene udọn̄ ke idem nditọete ke esop—ẹsan̄a ye mmọ kpukpru ini ke an̄wautom ẹnyụn̄ ẹn̄wam mmọ ẹfori ukeme mmọ ‘nditịm nsiak ikọ akpanikọ.’ (2 Timothy 2:15) Mme ekpemerọn̄ oro ẹkọride ẹsịm ọyọhọ idaha ẹsinam nditọete oro ẹfiọk idatesịt emi mmọ ẹdinyenede ke ndinam n̄kpọ nnọ mbon en̄wen ye nte mmọ ẹdikopde uyụhọ ke ndinịm nnyụn̄ nsịm utịtmbuba mmọ ke n̄kan̄ eke spirit. Mme ekpemerọn̄ n̄ko ẹsida mfọnido ẹsian eyenete mme akpan n̄kpọ oro enye enyenede ndinam man ‘akabade edi uwụtn̄kpọ ọnọ otuerọn̄.’—1 Peter 5:3, 5.
11 Ndondo oro ẹmekde eyenete asan̄autom unamutom, mme ekpemerọn̄ oro ẹnyenede ọniọn̄ ẹsika iso ẹnọ enye ukpep. Bruce emi ama ekedi ebiowo ke n̄kpọ nte isua 50 ọdọhọ ete: “Mmesima nditie ye eyenete emi ẹmekde obufa nnyụn̄ nneme ye enye mme item oro ofụn emi anamde akpanikọ onyụn̄ enyenede ọniọn̄ ọnọde. Nnyịn imesikot n̄ko mme ndausụn̄ oro ẹnọde kaban̄a utom oro ẹnọde enye anam, ndien mmesima ndinam utom oro ye enye tutu enye ọfiọk ndinam utom esie.” Nte asan̄autom unamutom ọkọride ke ifiọk, ẹkeme ndikpep enye utom ubọkerọn̄. Bruce aka iso ọdọhọ ete: “Ke ini nsisan̄ade ye asan̄autom unamutom n̄kese nditọete, mmesin̄wam enye emek mme akpan itie N̄wed Abasi oro ẹdisịnde udọn̄ ẹnọ ẹnyụn̄ ẹtụk eyenete m̀mê ubon oro ikade ndise. Ndikpep nte ẹdade N̄wed Abasi ẹnam n̄kpọ ke usụn̄ oro editụkde owo esịt ayan̄wam asan̄autom emi edi eti ekpemerọn̄.”—Mme Hebrew 4:12; 5:14.
12. Didie ke mme ekpemerọn̄ oro ẹnyenede mbufiọk ẹkeme ndinọ mbufa mbiowo ukpep?
12 Mme ekpemerọn̄ oro ẹmekde mbufa ẹsinen̄ede ẹbọ ufọn n̄ko ke ndika iso mbọ ukpep. Nick oro iketịn̄de iban̄a ọdọhọ ete: “Ukpep oro n̄kọbọde nto n̄kani mbiowo iba akpan akpan ama enen̄ede an̄wam mi. Nditọete emi ẹsifiọk ediwak ini nte ẹkpenamde n̄kpọ. Ediwak ini mmọ ẹsinyene ime ẹkpan̄ utọn̄ ẹnọ mi ẹnyụn̄ ẹnen̄ede ẹkere ẹban̄a ekikere oro nnọde—idem ọkpọkọm mmọ inyịmeke ye ekikere oro. Mma nnen̄ede n̄kpep n̄kpọ nto usụn̄ oro mmọ ẹkesụhọrede idem ẹnyụn̄ ẹnamde n̄kpọ ukpono ukpono ye nditọete iren ye iban ke esop. Mbiowo emi ẹma ẹnam mfiọk ntak oro ọfọnde ndinen̄ede mfiọk nte ẹkpedade Bible ẹbiere mfịna m̀mê ndinọ nsịnudọn̄.”
Ẹbọ Ukpep Ẹto N̄wed Abasi
13. (a) Nso ke eyenete oyom man ekeme ndidi eti ekpemerọn̄? (b) Ntak emi Jesus ọkọdọhọde ete: “Se ami n̄kpepde idịghe okịm”?
13 Ke akpanikọ, Ikọ Abasi kpa Bible ọdọn̄ọ mbet, edumbet, ye mme uwụtn̄kpọ oro ekpemerọn̄ oyomde man enye “etịm odot, eben̄e idem ọyọhọ ọyọhọ ndinam eti utom ekededi.” (2 Timothy 3:16, 17) Ifiọk N̄wed Abasi oro eyenete enyenede ye nte enye adade oro anam n̄kpọ edinam enye edi eti ekpemerọn̄, idịghe akwa ifiọkn̄wed. Kere ban̄a uwụtn̄kpọ Jesus. Enye ekedi ekpemerọn̄ eke spirit oro ekenyenede ifiọk, mbufiọk, ye ọniọn̄ akan owo ekededi oro akanam odude uwem ke isọn̄; edi, enye ke idemesie ikeberike edem ke ọniọn̄ esie ke ini ọkọnọde mme erọn̄ Jehovah ukpep. Enye ọkọdọhọ ete: “Se ami n̄kpepde idịghe okịm, edi enyene enye emi ọkọdọn̄de mi.” Ntak emi Jesus ọkọnọde Ete esie eke heaven itoro? Enye ama anam an̄wan̄a ete: “Owo eke etịn̄de ikọ ke ifiọk idemesie oyom ubọn̄ ọnọ idemesie.”—John 7:16, 18.
14. Didie ke mme ekpemerọn̄ mîsidaha ubọn̄ inọ idemmọ?
14 Mme anam-akpanikọ ekpemerọn̄ isidaha ubọn̄ inọ idemmọ. Mmọ isidaha ifiọk idemmọ inọ item ye nsịnudọn̄, edi ẹsida Ikọ Abasi. Mmọ ẹfiọk ke utom ekpemerọn̄ edi ndin̄wam mme erọn̄ ẹnyene “ekikere Christ,” idịghe ekikere mbiowo. (1 Corinth 2:14-16) Ke uwụtn̄kpọ, nso edieke ebiowo okodomode ndida ifiọk idemesie n̄n̄wam n̄wan ye ebe ẹkọk mfịna ubon utu ke ndida mme edumbet Bible ye se “ofụn emi anamde akpanikọ onyụn̄ enyenede ọniọn̄” ewetde? (Matthew 24:45) Ekeme ndidi item esie ekenen̄ede ọkọn̄ọ ke mme ido edinam n̄kann̄kụk inyụn̄ itịmke ifọn ke ntak emi enye mîfiọkke kpukpru n̄kpọ. Edi akpanikọ ke ndusụk ido edinam idiọkke, ndien ekeme ndidi ebiowo oro enyene mbufiọk. Edi mme erọn̄ ẹyenen̄ede ẹbọ ufọn ke ini mme ekpemerọn̄ ẹsịnde udọn̄ ẹnọ mmọ ndikop uyo Jesus nnyụn̄ n̄kop mme ikọ Jehovah utu ke ndikop uyo mme owo m̀mê nditiene ido edinam n̄kann̄kụk mmọ.—Psalm 12:6; Mme N̄ke 3:5, 6.
Ẹbọ Ukpep Ẹto “Ofụn Emi Anamde Akpanikọ Onyụn̄ Enyenede Ọniọn̄”
15. Nso utom ke Jesus ọkọnọ “ofụn emi anamde akpanikọ onyụn̄ enyenede ọniọn̄,” ndien nso idi ntak kiet oro anamde otu asan̄autom emi okụt unen?
15 Mme ekpemerọn̄ utọ nte apostle Peter, John, ye Paul ẹkesịne ke otu mbon oro Jesus okokotde “ofụn emi anamde akpanikọ onyụn̄ enyenede ọniọn̄.” Nditọete Jesus oro ẹyetde aran, emi ẹdude ke isọn̄ ẹnyụn̄ ẹnyenede idotenyịn ndikara ye Christ ke heaven, ẹnam otu ofụn emi. (Ediyarade 5:9, 10) Ke mme akpatre usen editịm n̄kpọ emi, ibat nditọete Christ oro ẹsụk ẹdude ke isọn̄ ke osụhọde. Nte ededi, utom oro Jesus ọkọnọde mmọ—edikwọrọ eti mbụk Obio Ubọn̄ mbemiso utịt edi—atara akan nte akanam edide. Kpa ye oro, otu ofụn emi enen̄ede okụt unen! Ntak-a? Ke ndusụk udomo, sia ofụn emi ọnọ “mme erọn̄ en̄wen” ukpep man ẹn̄wam imọ ke utom edikwọrọ ikọ ye edinọ ukpep. (John 10:16; Matthew 24:14; 25:40) Mfịn, mme anam-akpanikọ mme erọn̄ en̄wen ẹnam ekese ke utom emi.
16. Didie ke otu ofụn ọnọ mme owo oro ẹmekde ukpep?
16 Didie ke otu ofụn emi ọnọ ukpep? Ke akpa isua ikie, ẹma ẹnọ mme andida ke ibuot otu ofụn emi odudu ndinọ ukpep nnyụn̄ mmek mme esenyịn ke mme esop, ndien ekem mme esenyịn oro ẹma ẹnọ mme erọn̄ ukpep. (1 Corinth 4:17) Ntre n̄ko ke edi mfịn. Otu Ukara—kpa ekpri otu mbiowo oro ẹyetde aran, emi ẹdade ke ibuot otu ofụn oro—ọnọ mme andida ke ibuot esie odudu ndinọ ukpep nnyụn̄ mmek mme asan̄autom unamutom ye mbiowo ke kpukpru esop ke ofụri ererimbot. Ke adianade do, Otu Ukara etịm ufọkn̄wed oro ẹdade ẹkpep mbon Kọmiti N̄kọk Itieutom, mme esenyịn oro ẹsan̄ade-san̄a, mbiowo, ye mme asan̄autom unamutom ke nte mmọ ẹkemede ndise mban̄a mme erọn̄ nte ọfọnde. Ẹsinọ ndausụn̄ n̄ko ke mme leta, ke mme Enyọn̄-Ukpeme, ye mme n̄wed eken, utọ nte Ẹtịm man Inam Uduak Jehovah. *
17. (a) Didie ke Jesus owụt ke imọbuọt idem ke otu ofụn imọ? (b) Didie ke mme ekpemerọn̄ eke spirit ẹkeme ndiwụt ke mmimọ imọbuọt idem ke otu ofụn Christ?
17 Jesus ama enen̄ede ọbuọt idem ke otu ofụn emi tutu enye emek enye ese aban̄a “kpukpru inyene esie”—oro edi, kpukpru inyene eke spirit esie ke isọn̄. (Matthew 24:47) Mme ekpemerọn̄ oro ẹmekde ẹwụt ke mmimọ n̄ko imọbuọt idem ke otu ofụn emi ke nditiene ndausụn̄ emi Otu Ukara oro adade ke ibuot esie ọnọde. Ke akpanikọ, ke ini mme ekpemerọn̄ ẹnọde mbon en̄wen ukpep, ke ini mmọ ẹyakde Ikọ Abasi ọnọ mmimọ ukpep, ke ini mmọ ẹdade ukpep oro otu ofụn emi ọnọde mmọ ẹsịn ke edinam, mmọ ẹyenam otuerọn̄ ẹdiana kiet. Esịt adat nnyịn didie ntem ke Jehovah ọnọ irenowo oro ẹnen̄erede ẹse ẹban̄a owo kiet kiet ke esop Christian ukpep!
[Ikọ idakisọn̄]
^ ikp. 16 Mme Ntiense Jehovah ẹsio.
Didie ke Afo Ọkpọbọrọ?
• Didie ke mme ekpemerọn̄ oro ẹkọride ẹsịm ọyọhọ idaha ẹsinọ mbon en̄wen ukpep?
• Ntak emi mme ekpemerọn̄ mîsikpepke ekikere idemmọ?
• Didie ke mme ekpemerọn̄ ẹwụt ke imọbuọt idem ke otu ofụn Christ, ndien ntak—a?
[Mme Mbụme Ukpepn̄kpọ]
[Mme ndise ke page 24, 25]
Mbiowo ẹsinọ n̄kparawa owo ke esop ukpep
[Mme ndise ke page 26]
“Ofụn emi anamde akpanikọ onyụn̄ enyenede ọniọn̄” ọnọ mbiowo ekese ukpep