Ndisịm Esịt Eyenọwọn̄

NDI esifịna fi ke ini okụtde eyenọwọn̄ ebrede mbre ekọn̄? Sia afai ọyọhọde mme edinam unọ idem inemesịt mfịn, edi ọsọ n̄kpọ ndikụt ata n̄kpri nditọwọn̄ ẹbrede utọ mbre oro. Didie ke afo ekeme ndin̄wam eyenọwọn̄ ebre mbre ifụre ifụre utu ke ndikama n̄kpọekọn̄ nditọwọn̄ mbre mbre? Waltraud emi edide isụn̄utom Mme Ntiense Jehovah ke anyan ini ke Africa, ama an̄wam eyeneren kiet anam ntre.

Ekọn̄ ama anam Waltraud ọkpọn̄ idụt oro enye okodụn̄de aka idụt efen ke Africa. Do, enye ama ọtọn̄ọ ndikpep Bible ye eka kiet oro ekenyenede eyeneren isua ition. Ini ekededi oro enye akakade ndise eka eyen emi, enye ama esikụt eyen oro akamade ikan̄ nditọwọn̄, kpa n̄kukụre n̄kpọmbre oro enye ekenyenede. Akanam Waltraud ikwe enye adade ikan̄ emi otop owo m̀mê n̄kpọ ekededi, edi esiwak ndikụt enye okụbọrede onyụn̄ ekịbide ikan̄ emi nte n̄kpọ eke oyomde ndisịn itiat ikan̄.

Waltraud ama obụp eyen oro ete: “Werner, ndi ọmọfiọk ntak emi ndụn̄de ke idụt mbufo? Ekọn̄ edi ntak—n̄kefehe n̄kpọn̄ idụt nnyịn man mbọhọ mme idiọkowo oro ẹkekamade ikan̄ oro etiede nte okuo. Ndi emekere ke ọfọn mmọ ẹtop owo?”

Werner ama ọbọrọ mfụhọ mfụhọ ete, “Ih ih, ifọnke.”

Waltraud ama ọdọhọ ete, “Afo emenen.” Ekem enye ama obụp ete: “Ndi ọmọfiọk ntak oro nsidide ndise fi ye eka fo kpukpru urua? Ntak edi koro Mme Ntiense Jehovah ẹyom ndin̄wam mme owo ẹdu ke emem ye Abasi ye mme mbọhọidụn̄.” Ke ama akasian eka Werner, Waltraud ama ọdọhọ eyen oro ete: “Edieke afo edinọde mi ikan̄ fo, nyotop enye nduọk, ndien nyọnọ fi ubomisọn̄ nditọwọn̄.”

Werner ama ọnọ enye ikan̄ oro. Enye ama ebet ke urua inan̄, ndien ekem ẹma ẹnọ enye obufa n̄kpọmbre—ubomisọn̄ nditọwọn̄ oro ẹdade eto ẹnam, emi enye akadarade ndibọ.

Ndi ẹmesida ini ẹtịn̄ ikọ ye nditọ mbufo, ẹdomode ndisịm esịt mmọ man mmọ ẹtre ndikama mme n̄kpọmbre oro ẹbietde n̄kpọekọn̄? Edieke edide ntre, mbufo ẹnọ mmọ ukpep oro edidade ufọn ọsọk mmọ ke ofụri eyouwem mmọ.