Ndisọn̄ọ Nda Nnam N̄kpọ Nnọ Christ kpa Edidem

“Ẹnọ enye ubọn̄, ye ukpono, ye itie-edidem, ẹte kpukpru mme idụt ye obio ye usem ẹnam n̄kpọ ẹnọ enye.”—DANIEL 7:14.

1, 2. Nnyịn isan̄a didie ifiọk ke Christ ikọtọn̄ọke ndikara ọyọhọ ọyọhọ ke Obio Ubọn̄ heaven ke isua 33 E.N.?

 EWE andikara ekeme ndikpa nnọ mbon oro enye akarade ndien ekem afiak odu uwem akara nte edidem? Ewe edidem ekeme ndidu ke isọn̄ nnam mbon oro enye akarade ẹbuọt idem ye enye ẹnyụn̄ ẹsọn̄ọ ẹda ye enye, ndien ekem eketie ke heaven akara? N̄kukụre owo oro ekemede ndinam emi ye se ikam ikande emi edi Jesus Christ. (Luke 1:32, 33) Ke Pentecost isua 33 E.N., ke Jesus ama akakpa, eset, onyụn̄ ọdọk heaven, Abasi ama “anam enye edi ibuot kpukpru n̄kpọ ọnọ esop.” (Ephesus 1:20-22; Utom 2:32-36) Ntem, Christ ama ọtọn̄ọ ndikara edi ikarake ọyọhọ ọyọhọ. Akpa mbon oro enye akakarade ẹkedi mme Christian oro ẹyetde aran, emi ẹdide Israel eke spirit, “kpa Israel Abasi.”—Galatia 6:16; Colossae 1:13.

² Ke n̄kpọ nte isua 30 tọn̄ọ Pentecost isua 33 E.N. ekebe, apostle Paul ama ọsọn̄ọ ke Christ ikọtọn̄ọke kan̄a ndikara ọyọhọ ọyọhọ ke Obio Ubọn̄ heaven, edi ke okodu “ke ubọk nnasia Abasi, ọtọn̄ọde ke ini oro enye etie ebet tutu ẹnịm mme asua esie nte udori ukot esie.” (Mme Hebrew 10:12, 13) Ekem, ke utịt utịt akpa isua ikie E.N., akanieren apostle John ama okụt ke n̄kukụt nte Andikara Ekondo, kpa Jehovah, odoride Christ Jesus ke ebekpo nte Edidem Obio Ubọn̄ heaven oro ọkọtọn̄ọde obufa. (Ediyarade 11:15; 12:1-5) Ini oro nnyịn idude uwem mi ekeme ndinen̄ede n̄n̄wam nnyịn idụn̄ọde akpakịp uyarade oro ẹsọn̄ọde ke Christ ọkọtọn̄ọ ndikara nte Edidem Messiah ke heaven ke 1914. *

3. (a) Nso obufa ntọt esịne ke eti mbụk Obio Ubọn̄ toto ke 1914? (b) Mme mbụme ewe ke ikeme ndibụp idem nnyịn?

³ Ih, toto ke 1914 eti mbụk Obio Ubọn̄ emesịne obufa ntọt oro aduaide owo idem. Ntọt oro edi ke Christ ke akara idahaemi nte Edidem Obio Ubọn̄ Abasi ke heaven, okposụkedi akarade “ke otu mme asua” esie. (Psalm 110:1, 2; Matthew 24:14; Ediyarade 12:7-12) Akan oro, ke ofụri ererimbot, mme andidu ke idak ukara esie oro ẹsọn̄ọde ẹda ye enye ẹdat esịt ndisụk ibuot nnọ ukara esie ebe ke ndibuana ke ndutịm unọ ukpep Bible ke ofụri ererimbot, kpa n̄kpọ oro akanam mîtịbeke ke udomo emi ke mbụk ubonowo. (Daniel 7:13, 14; Matthew 28:18) Mme Christian emi ẹyetde aran ke spirit, kpa “nditọ obio ubọn̄,” ẹdi “isụn̄utom emi [ẹdade] ke ibuot Christ.” Akwa otuowo oro ibat akade-ka iso ndikọri, kpa “mme erọn̄ en̄wen” Christ emi ẹdide mme udiana isụn̄utom Obio Ubọn̄ Abasi, ẹsọn̄ọ ẹda ẹnọ mme Christian oro ẹyetde aran ibetedem. (Matthew 13:38; 2 Corinth 5:20; John 10:16) Kpa ye oro, oyom nnyịn owo kiet kiet idụn̄ọrede idem nnyịn ise m̀mê imenen̄ede isụk ibuot inọ ukara Christ. Ndi nnyịn imọsọn̄ọ ida ye enye ke ofụri esịt? Didie ke ikeme ndisọn̄ọ nda ye Edidem oro etiede ke heaven akara? Nte ededi, ẹyak ibem iso ineme mme ntak oro ẹkpenamde isọn̄ọ ida inam n̄kpọ inọ Christ.

 Edidem Emi Mme Edu Esie Ẹnamde Ikọt Esie Ẹsọn̄ọ Ẹda ye Enye

4. Nso ke Jesus akanam nte Edidem oro Ẹmekde ke ini utom ukwọrọikọ esie mi ke isọn̄?

⁴ Esịtekọm oro inyenede iban̄a n̄wọrọnda edu Christ ọkọrọ ye se enye akanamde anam isọn̄ọ ida inam n̄kpọ inọ enye. (1 Peter 1:8) Ke adan̄aemi okodude ke isọn̄, Jesus kpa Edidem Oro Ẹmekde ama anam esisịt owụt se imọ idinamde ke ini idikarade ofụri ererimbot ke edikem ini Abasi. Enye ama ọnọ mbon ọbiọn̄ udia; anam mbon udọn̄ọ, mme nnan, mbon emi ẹbiomode ndo, mme inan, ye mme imụm ẹkop nsọn̄idem. Enye ama akam anam ndusụk owo oro ẹkekpan̄ade ẹset. (Matthew 15:30, 31; Luke 7:11-16; John 6:5-13) Adianade do, ndidiọn̄ọ se Jesus akanamde ke ini enye okodude ke isọn̄ anam nnyịn ifiọk mme edu esie nte Edidem oro edikarade isọn̄ ke ini iso, akpan akpan ima n̄waidem esie. (Mark 1:40-45) Ẹdọhọ ke Napoléon Bonaparte ọkọdọhọ ntem aban̄a ima n̄waidem oro Christ ekenyenede: “Ami, Alexander, Caesar, ye Charlemagne ima ibọp mme obio ukara, edi ikada nso inam ikpọ utom nnyịn? Ikada odudu. Jesus Christ kpọt akada ima ọbọp obio ubọn̄ esie, ndien mfịn ediwak miliọn owo ẹnyịme ndikpa nnọ enye.”

5. Ntak emi mme owo ẹkenen̄erede ẹma edu Jesus?

⁵ Sia Jesus ekenyenede ifụre ifụre ido onyụn̄ osụhọrede idem, ukpepn̄kpọ ye ima ima edu esie ẹma ẹnọ mbon oro ẹkekopde mmemidem ke ntak mfịghe ye ndodobi mbiomo, nduọkodudu. (Matthew 11:28-30) Nditọwọn̄ ẹma ẹsinyene ifụre ndisan̄a n̄kpere enye. Mbon nsụhọdeidem oro ẹkenyenede ikike ẹma ẹsọsọp ẹkabade ẹdi mbet esie. (Matthew 4:18-22; Mark 10:13-16) Iban oro ẹbakde Abasi ẹma ẹsọn̄ọ ẹda ẹnam n̄kpọ ẹnọ Jesus ke ntak oro enye ekesikerede aban̄a mme owo onyụn̄ anamde n̄kpọ ye mmọ ukpono ukpono; ediwak mmọ ẹma ẹkam ẹda ini, ukeme, ye inyene mmọ ẹse ẹban̄a enye ke ini enye ọkọkwọrọde ikọ.—Luke 8:1-3.

6. Ewe ima ima edu ke Jesus okowụt ke ini Lazarus akakpade?

⁶ Christ ama owụt ndusụk ima ima edu esie ke ini Lazarus ufan esie akakpade. Nnanenyịn oro Mary ye Martha ẹkedude ama enen̄ede otụk enye tutu enye omụm mmụm onyụn̄ “atua eyet.” ‘Esịt ama etịmede enye’—ke ntak ọkpọsọn̄ ubiak ye mfụhọ, okposụkedi enye ọkọfiọkde ke ibịghike imọn̄ inam Lazarus eset. Ekem, ima ye mbọm ẹma ẹnam Jesus ada odudu oro Abasi ọkọnọde enye anam Lazarus eset.—John 11:11-15, 33-35, 38-44.

7. Ntak odotde isọn̄ọ ida inam n̄kpọ inọ Jesus? (Se ekebe ke page 31.)

⁷ Uten̄e esinen̄ede omụm nnyịn aban̄a nte Jesus ekenen̄erede ama se inende onyụn̄ asuade mbubịk ye idiọkido. Enye ama anam n̄kpọ uko uko utịm ikaba man ebịn mme ọdiọk-itọn̄ mbonurua osion̄o ke temple. (Matthew 21:12, 13; John 2:14-17) N̄ko-n̄ko, enye ama osobo nsio nsio mfịna ke ini enye okodude ke isọn̄, anamde enye ke idemesie ọfiọk mme mfịghe ye mme mfịna oro nnyịn isobode. (Mme Hebrew 5:7-9) Jesus ama ọfiọk n̄ko nte esitiede owo ke idem ke ini ẹsuade ẹnyụn̄ ẹfịkde owo. (John 5:15-18; 11:53, 54; 18:38–19:16) Ke akpatre, enye ama enyịme uko uko ndikpa ibak ibak n̄kpa man osu uduak Ete esie onyụn̄ anam mbon oro ẹdude ke idak ukara esie ẹnyene nsinsi uwem. (John 3:16) Ndi mme edu oro Christ enyenede mi inamke fi aka iso ọsọn̄ọ ada anam n̄kpọ ọnọ enye? (Mme Hebrew 13:8; Ediyarade 5:6-10) Edi nso ke oyom owo anam man akabade edi andidu ke idak ukara Christ kpa Edidem?

Se Inamde Owo Odot Ndidi Andidu ke Idak Ukara Christ

8. Nso ke ẹyom ẹto mbon oro ẹdude ke idak ukara Christ?

⁸ Kere ban̄a emi: Ẹsiwak ndiyom owo anam ndusụk akpan n̄kpọ mbemiso enye akabarede edi eyenisọn̄ idụt en̄wen. Ẹkeme ndiyom mbon oro ẹyomde ndikabade ndi nditọisọn̄ idụt en̄wen ẹnyene eti edu uwem ye nsọn̄idem. Kpasụk ntre, oyom mbon oro ẹdude ke idak ukara Christ ẹnyene n̄kokon̄ idaha ido uwem ye nsọn̄idem eke spirit.—1 Corinth 6:9-11; Galatia 5:19-23.

9. Didie ke nnyịn ikeme ndiwụt ke imọsọn̄ọ ida ye Christ?

⁹ Jesus Christ enen̄ede oyom n̄ko mbon oro ẹdude ke idak ukara imọ ẹsọn̄ọ ẹda ẹnam n̄kpọ ẹnọ imọ ye Obio Ubọn̄ imọ. Mmọ ẹnam emi ke ndidu uwem n̄kekem ye se enye ekekpepde ke ini  enye okodude ke isọn̄ nte Edidem Oro Ẹmekde. Ke uwụtn̄kpọ, ana mmọ ẹnam mme n̄kpọ Obio Ubọn̄ ye uduak Abasi ẹdi akpa ke uwem mmọ utu ke mme n̄kpọ obụkidem. (Matthew 6:31-34) Ana mmọ ẹdomo n̄ko ndikpebe edu Christ, idem ke ini mmọ ẹdude ke ata idiọk idaha. (1 Peter 2:21-23) Adianade do, mbon oro ẹdude ke idak ukara Christ ẹkpebe uwụtn̄kpọ esie ke ndinam nti n̄kpọ nnọ mbon en̄wen.—Matthew 7:12; John 13:3-17.

10. Didie ke ikeme ndiwụt ke isọn̄ọ ida ye Christ ke nte inamde n̄kpọ (a) ke ubon ye (b) ke esop?

¹⁰ Mme anditiene Jesus ẹwụt n̄ko ke mmimọ isọn̄ọ ida ye Jesus ke ndikpebe edu esie ke nte mmọ ẹnamde n̄kpọ ke ubon. Ke uwụtn̄kpọ, mme ebe ẹwụt ke mmimọ isọn̄ọ ida ye Edidem mmimọ eke heaven ke ndikpebe edu Christ ke nte mmọ ẹnamde n̄kpọ ye ibanndọ ye nditọ mmọ. (Ephesus 5:25, 28-30; 6:4; 1 Peter 3:7) Ibanndọ ẹwụt ke mmimọ isọn̄ọ ida ye Christ ebe ke ndinyene edisana edu uwem ọkọrọ ye “sụn̄sụn̄ ye ifụre ifụre edu.” (1 Peter 3:1-4; Ephesus 5:22-24) Nditọ ẹwụt ke isọn̄ọ ida ye Christ ke ini mmọ ẹkpebede nsụkibuot esie. Ke ini Jesus ekedide uyen, enye ama osụk ibuot ọnọ ete ye eka esie, okposụkedi mmọ ẹkedide mme anana-mfọnmma owo. (Luke 2:51, 52; Ephesus 6:1) Mbon oro ẹdude ke idak ukara Christ ẹnen̄ede ẹdomo ndikpebe enye ebe ke ndiwụt ‘edikere mban̄a, ndinyene ima nditọete nnyụn̄ ntua owo mbọm.’ Mmọ ẹdomo n̄ko ndibiet Christ, ‘ke ndisụhọde idem, idaha idiọk isio owo usiene idiọk, inyụn̄ isụn̄ike owo eke osụn̄ide mmọ.’—1 Peter 3:8, 9; 1 Corinth 11:1.

Mbon Oro Ẹdude ke Idak Ukara Christ Ẹnịm Ibet Esie

11. Mme ibet ewe ke mbon oro ẹdude ke idak ukara Christ ẹnịm?

¹¹ Ukem nte mbon oro ẹyomde ndikabarede ndi nditọisọn̄ idụt en̄wen ẹsinịmde ibet obufa idụt oro, kpasụk ntre n̄ko ke mbon oro ẹdude ke idak ukara Christ ẹnịm “ibet Christ” ebe ke ndidu uwem n̄kekem ye se Jesus ekekpepde onyụn̄ etemede. (Galatia 6:2) Ke edide akpan n̄kpọ akan, mmọ ẹsọn̄ọ ẹda ẹnịm “ibet edidem,” emi edide ima. (James 2:8) Nso ke mme ibet emi ẹbuana?

12, 13. Didie ke nnyịn isọn̄ọ ida inịm “ibet Christ”?

¹² Mbon oro ẹdude ke idak ukara Christ ẹdi mme anana-mfọnmma owo, ẹsinyụn̄ ẹnam ndudue. (Rome 3:23) Mmọdo, oyom mmọ ẹnyene “ima nditọete eke mîsan̄ake ye mbubịk” man “ẹnyene ufiop ufiop ima emi otode esịt ẹnọ kiet eken.” (1 Peter 1:22) Mme Christian ẹsisọn̄ọ ẹda ẹnịm ibet Christ ke ‘ndika iso nyọ kiet eken nnyụn̄ mfen kiet eken ke ofụri esịt,’ “edieke owo ekededi enyenede ntak nditọhọ ye kiet eken.” Ndinịm ibet emi an̄wam mmọ ẹka iso ẹfụmi unana mfọnmma kiet eken ẹnyụn̄ ẹkụt mme ntak ndima kiet eken. Ndi esịt inemke fi ndidu ye mbon oro ẹnen̄erede ẹsụk ibuot ẹnọ edima Edidem nnyịn, ndien ke ntem ẹmende ima ẹsịne, kpa “mfọnmma mbọbọ edidianakiet”?—Colossae 3:13, 14.

¹³ N̄ko-n̄ko, Jesus ama owụt ke ima oro imọ imade mme owo okpon akan ima oro mme owo  ẹsimade ekemmọ owo. (John 13:34, 35) Edieke imade sụk mbon oro ẹmade nnyịn, nnyịn inamke “n̄wọrọnda n̄kpọ” ndomokiet. Oro ọkpọwọrọ ke nnyịn inyeneke ata ima. Jesus ama eteme nnyịn ete ikpebe ima Ete imọ ebe ke ndinyene ima edumbet nnọ idem mbon oro ẹsuade ẹnyụn̄ ẹkọbọde nnyịn. (Matthew 5:46-48) Ima emi n̄ko anam mbon oro ẹdude ke idak ukara Obio Ubọn̄ ẹsọn̄ọ ẹda ẹnam akpan utom oro ẹnọde mmọ. Ewe utom edi oro?

Ẹdomo Nsọn̄ọnda Mbon Oro Ẹdude ke Idak Ukara Christ

14. Ntak emi utom ukwọrọikọ enen̄erede edi akpan n̄kpọ?

¹⁴ Mbon oro ẹdude ke idak ukara Obio Ubọn̄ Abasi idahaemi ẹnyene akpan utom oro edide “ndinọ ọyọhọ ikọ ntiense mban̄a obio ubọn̄ Abasi.” (Utom 28:23) Edi akpan n̄kpọ ndinam utom emi koro Obio Ubọn̄ Messiah oyowụt ke Jehovah enyene unen ndikara ofụri ekondo. (1 Corinth 15:24-28) Ke ini ikwọrọde eti mbụk, mbon oro ẹkopde ẹnyene ifet ndikabade ndi mme andidu ke idak ukara Obio Ubọn̄ Abasi. Adianade do, nte mme owo ẹnamde n̄kpọ ẹban̄a eti mbụk ke Christ kpa Edidem edida ebiere ikpe ọnọ mmọ. (Matthew 24:14; 2 Thessalonica 1:6-10) Ntem, akpan usụn̄ oro nnyịn iwụtde ke imọsọn̄ọ ida ye Christ edi ndinam ewụhọ esie oro ọdọhọde ikwọrọ Obio Ubọn̄ emi inọ mbon en̄wen.—Matthew 28:18-20.

15. Ntak emi ẹdomode nsọn̄ọnda mme Christian?

¹⁵ Nte ededi, Satan odomo ndida usụn̄ ekededi oro enye ekemede mbiọn̄ọ utom ukwọrọikọ, ndien mme andikara n̄ko iyomke ndifiọk odudu oro Abasi ọnọde Christ. (Psalm 2:1-3, 6-8) Ntak edi oro Jesus okodụride mme mbet esie utọn̄ ete: “Ofụn ikponke ikan eteufọk esie. Edieke mmọ ẹkekọbọde mi, mmọ ẹyekọbọ mbufo n̄ko.” (John 15:20) Emi owụt ke mme anditiene Christ ẹn̄wana ekọn̄ eke spirit oro odomode nsọn̄ọnda mmọ.—2 Corinth 10:3-5; Ephesus 6:10-12.

16. Didie ke mbon oro ẹdude ke idak ukara Obio Ubọn̄ ẹnọ “Abasi mme n̄kpọ eke ẹnyenede Abasi”?

¹⁶ Kpa ye oro, mbon oro ẹdude ke idak ukara Obio Ubọn̄ Abasi ẹsọn̄ọ ẹda ẹnam n̄kpọ ẹnọ Edidem mmọ oro enyịn mîkwe inyụn̄ isọn̄ke ibuot ye mme ukara owo. (Titus 3:1, 2) Jesus ọkọdọhọ ete: “Ẹnọ Caesar mme n̄kpọ eke ẹnyenede Caesar, edi ẹnọ Abasi mme n̄kpọ eke ẹnyenede Abasi.” (Mark 12:13-17) Ke ntre, mbon oro ẹdude ke idak ukara Christ ẹnịm mme ibet ukara oro mîtuahake ye mme ibet Abasi. (Rome 13:1-7) Nte ededi, ke ini akwa esop mme Jew ẹkeyomde ndibiat ibet Abasi ke ndiwụk mme mbet Jesus ẹte ẹtre ndikwọrọ ikọ, mme mbet Jesus ẹma ẹnen̄ede ẹsịn ẹnyụn̄ ẹdọhọ ukpono ukpono ẹte ke mmimọ inyene “ndikop uyo Abasi nte andikara utu ke uyo owo.”—Utom 1:8; 5:27-32.

17. Ntak emi ikemede ndiyọ idomo nsọn̄ọnda uko uko?

¹⁷ Edi akpanikọ ke enen̄ede oyom uko man mbon oro ẹdude ke idak ukara Christ ẹsọn̄ọ ẹda ye Edidem mmọ ke ini ẹkọbọde mmọ. Kpa ye oro, Jesus ọkọdọhọ ete: “Inemesịt edi eke mbufo ke ini mme owo ẹsụn̄ide mbufo ẹnyụn̄ ẹkọbọde mbufo ẹnyụn̄ ẹtịn̄de kpukpru orụk idiọkn̄kpọ ke nsu ẹdian mbufo ke ntak enyịn̄ mi. Ẹdara ẹnyụn̄ ẹfrọ ke idatesịt, koro utịp mbufo ke heaven omokpon.” (Matthew 5:11, 12) Akpa mme anditiene Christ ẹma ẹkụt nte ikọ oro edide akpanikọ. Idem ke ini ẹkemiade mmọ ke ntak emi mmọ ẹkekade iso ẹkwọrọ ẹban̄a Obio Ubọn̄, mmọ ẹma ẹdara “koro ẹbatde ẹte mmimọ imodot ndibọ esuene kaban̄a enyịn̄ esie. Ndien kpukpru usen ke temple ye ke ufọk ke ufọk mmọ ẹka iso ye unana edikpa mba ndikpep nnyụn̄ ntan̄a eti mbụk aban̄ade Christ, Jesus.” (Utom 5:41, 42) Nnyịn imotoro mbufo ke ndisọn̄ọ nda kpasụk ntre ke ini ẹyọde nsọn̄ọn̄kpọ, udọn̄ọ, n̄kpa owo ima, m̀mê ubiọn̄ọ.—Rome 5:3-5; Mme Hebrew 13:6.

18. Nso ke ikọ oro Jesus eketịn̄de ye Pontius Pilate owụt?

 ¹⁸ Idem ke ẹma ẹkememek Jesus nte Edidem, enye ama ọdọhọ Pontius Pilate, andikara oro Rome ekemekde, ete: “Obio ubọn̄ mi idịghe ubak ererimbot emi. Edieke obio ubọn̄ mi ekpedide ubak ererimbot emi, mme asan̄autom mi ẹkpen̄wana mbak ẹdiyak mi ẹsịn mme Jew ke ubọk. Edi, obio ubọn̄ mi itoho ebiet emi.” (John 18:36) Mmọdo, mbon oro ẹdude ke idak ukara Obio Ubọn̄ heaven in̄wanake ekọn̄ ye owo ekededi inyụn̄ isịnke idem ke ekọn̄ ekededi. Sia mmọ ẹsọn̄ọde ẹda ye “Ọbọn̄ Emem,” mmọ ẹnen̄ede ẹda san̄asan̄a ẹkpọn̄ n̄kpọ ekededi oro ọtọde ubahade ke ererimbot.—Isaiah 2:2-4; 9:6, 7.

Nsinsi Edidiọn̄ Oro Ẹnọde Mbon Nsọn̄ọnda

19. Ntak emi mbon oro ẹdude ke idak ukara Christ ẹkemede ndinyene mbuọtidem ke ini iso?

¹⁹ Mbon nsọn̄ọnda oro ẹdude ke idak ukara Christ, kpa “Edidem ndidem,” ẹnyene mbuọtidem ke ini iso. Enen̄ede ọdọn̄ mmọ ndikụt nte enye adade akaka odudu esie nte edidem anam n̄kpọ mi ke isọn̄ ke mîbịghike. (Ediyarade 19:11–20:3; Matthew 24:30) Nsụhọ “nditọ obio ubọn̄” oro ẹyetde aran ke spirit emi ẹsọn̄ọde ẹda, ẹtie ẹbet ndibọ ọsọn̄urua udeme mmọ nte ndidem oro ẹdikarade ye Christ ke heaven. (Matthew 13:38; Luke 12:32) “Mme erọn̄ en̄wen” Christ oro ẹsọn̄ọde ẹda, ẹnen̄ede ẹtie ẹbet ini oro Edidem mmọ edidọhọde mmọ ete: “Ẹdi, mbufo emi Ete mi ọdiọn̄de, ẹda [Paradise isọn̄ eke] obio ubọn̄ emi ẹketịmde ẹnịm ẹnọ mbufo toto ke editọn̄ọ ererimbot ẹnyene.” (John 10:16; Matthew 25:34) Mmọdo, kpukpru mbon oro ẹdude ke idak ukara Obio Ubọn̄ Christ ẹkpekam ẹbiere ndika iso nsọn̄ọ nda nnam n̄kpọ nnọ Christ kpa Edidem.

[Ikọ idakisọn̄]

Nte Afo Emekeme Ndinam An̄wan̄a?

• Ntak emi odotde isọn̄ọ ida inam n̄kpọ inọ Christ?

• Didie ke mbon oro ẹdude ke idak ukara Christ ẹwụt ke imọsọn̄ọ ida inam n̄kpọ inọ enye?

• Ntak emi ọdọn̄de nnyịn ndisọn̄ọ nda ye Christ kpa Edidem?

[Mme Mbụme Ukpepn̄kpọ]

[Ekebe ke page 31]

MME N̄WỌRỌNDA EDU EFEN ORO CHRIST ENYENEDE

Unana Asari—John 4:7-30.

Mbọm—Matthew 9:35-38; 12:18-21; Mark 6:30-34.

Ima N̄waidem—John 13:1; 15:12-15.

Nsọn̄ọnda—Matthew 4:1-11; 28:20; Mark 11:15-18.

Edikere Mban̄a—Mark 7:32-35; Luke 7:11-15; Mme Hebrew 4:15, 16.

Eti Ibuot—Matthew 15:21-28.

[Ndise ke page 29]

Ndima kiet eken owụt ke imọsọn̄ọ ida inịm “ibet Christ”

[Mme ndise ke page 31]

Ndi mme edu Christ ẹnam fi ọsọn̄ọ ada anam n̄kpọ ọnọ enye?