Ubuene—Se Ikụtde Mfịn

ẸSIWAK ndikụt Vicente * onụkde ukpatn̄kpọ emi mbiomo ọyọhọde ke mme efak São Paulo ke Brazil. Enye esitan̄ nsọsọn̄ babru, ntaha ukwak, ye ọkpọ. Ke ini eyo ọtọn̄ọde ndifụk owo idem, enye esida nsọsọn̄ babru ebri ke idak ukpatn̄kpọ esie, onyụn̄ ana do ede. Enye isiyakke uyom oro mme ubomisọn̄ ye mme owo ẹsinamde ke efak oro enye esinade ede ke okoneyo, afịna enye. Ini kiet ko, enye ama enyene utom, ufọk, ye ubon—edi enye ama ataba kpukpru emi. Idahaemi, enye edikpat n̄kpọ ke efak man enyene se adade aka inua.

Edi n̄kpọ mfụhọ ndikụt ke ediwak miliọn owo ke ofụri ererimbot ẹdi ọkpọkpọi ubuene ukem nte Vicente. Ke mme idụt oro ẹtọn̄ọde-tọn̄ọ uforo, ediwak owo ẹdụn̄ọ ke efak, m̀mê ke ikpehe oro ẹbọpde ntaha ufọk. Ẹsiwak ndikụt mme eben̄e eben̄e—esịnede mme mbụn̄ọ, mme nnan, iban oro ẹnọde nseknditọ eba—ke mme utọ idụt emi. Ke isobo usụn̄ emi mme ubomisọn̄ ẹsituakde ẹda man mme ubomisọn̄ efen ẹbe, nditọwọn̄ ẹsifehe ẹbe ke ufọt ubomisọn̄ oro ẹtuakde ẹda, ẹnyam swid m̀mê ẹyekeme ndinyene ekpri okụk.

Utọ ubuene emi akak inyan̄ uyo. Magazine Britain oro The Economist ọkọdọhọ ete: “Mfịn ubonowo ẹnen̄ede ẹnyene ifiọk ibọkusọbọ, ifiọk ubotn̄kpọ, ye usọ ndikpetre ubuene akan nte akanam ẹnyenede.” Ke akpanikọ, ediwak owo ẹbọ ufọn ẹto ifiọk emi. Ke ediwak idụt oro ẹtọn̄ọde-tọn̄ọ uforo, mbufa ubomisọn̄ ẹdi barasuene ke mme efak ikpọ obio. Mbufa n̄kpọutom ẹyọyọhọ mme ufọkurua, ndien mme andidep inyụn̄ inanake. Ufọkurua iba ke Brazil ẹma ẹnam san̄asan̄a usuanetop ẹban̄a n̄kpọurua mmọ. Mmọ ẹkenyanyam n̄kpọ ke December 23 tutu esiere December 24, 2004. Kiet ke otu ufọkurua oro ama ada mme enek unek samba edi man ẹnam mme edep n̄kpọ ẹkop inemesịt. Se ikperede ndisịm mme edep n̄kpọ 500,000 ẹkedep n̄kpọ ke ufọkurua oro!

Kpa ye oro, ediwak owo idiaha ufọn ito inyene mbon imọ. Akamba ukpụhọde oro odude  ke ufọt imọ ye ubuene anam ediwak owo ẹdọhọ ke oyom ẹsọsọp ẹnam n̄kpọ man ẹtre ubuene. Magazine Brazil oro ẹkotde Veja ọkọdọhọ ete: “Se mme adaiso ererimbot ẹkpenen̄erede ẹkere ẹban̄a ke isua [2005] emi ekpedi nte ẹkpesan̄ade ẹnam ubuene etre.” Veja ama etịn̄ n̄ko aban̄a obufa Ndutịm Marshall oro ẹkeyomde ndinam man ẹn̄wam mme idụt emi ẹbuenede ẹkan, akpan akpan ke Africa. * Nte ededi, okposụkedi utọ ndutịm ntem anamde owo ekere ke n̄kpọ ọyọfọn, magazine oro ama adian do ete: “Ediwak ntak ẹdu n̄ko ndiyịk m̀mê ẹyekam ẹkeme ndinam se ẹduakde. Edieke ediwak idụt mîmaha nditịp okụk nda nnọ ndutịm emi ibetedem, ntak esidi sia okụk oro ẹsitịpde isisịmke mbon oro ẹkekam ẹtịpde ẹnọ.” Edi n̄kpọ mfụhọ ndikop nte ke udia-inọ ye awak-n̄kukọhọ ibet ukara isiyakke ekese okụk oro ukara, n̄ka ofụri ererimbot, ye mme owo ẹsitịpde esịm mbon oro akpande esịm.

Jesus ama ọfiọk ke mme ubuene ẹyedu kpukpru ini. Enye ọkọdọhọ ete: “Mme ubuene ẹdodu ye mbufo kpukpru ini.” (Matthew 26:11) Ndi emi ọwọrọ ke mme ubuene ẹyedu ke isọn̄ kpukpru ini? Ndi odu n̄kpọ ekededi emi ẹkpenamde man n̄kpọ ọfọn esịt ye mme ubuene? Nso ke mme Christian ẹkeme ndinam man ẹn̄wam mme ubuene?

[Mme Ikọ idakisọn̄]