‘Ekọn̄ Enyene Jehovah’
“Nnyịn Inyene Ndikop Uyo Abasi Nte Andikara Utu Ke Uyo Owo”
‘Ekọn̄ Enyene Jehovah’
UDỊMEKỌN̄ iba ẹben̄e idem ndin̄wana ye kiet eken, kiet ada ke obot ke edem oko, eken ada ke obot ke edem emi, ebeden̄ onyụn̄ esịne ke ufọt. Idem enyek iren Israel etieti ke usen 40, Goliath owo uko mme Philistine esinyụn̄ esịn mmọ ke ndek kpukpru usen.—1 Samuel 17:1-4, 16.
Goliath ọwọrọ ada amia ata ye Israel ke ọkpọsọn̄ uyo ete: “Mbufo ẹsio owo kiet ke otu [idem mbufo], man enye osụhọde etiene mi. Enye ama ekeme ndin̄wana ye ami, ama onyụn̄ owot mi, nnyịn iyedi ifịn mbufo; edi ami mma n̄kem ubọk ye enye, mma nnyụn̄ n̄wot enye, mbufo ẹyedi ndien ifịn nnyịn, ẹnyụn̄ ẹnam n̄kpọ ẹnọ nnyịn. . . . Ami nsịn mbon-ekọn̄ mme Israel ke ndek mfịn emi: mbufo ẹnọ mi owo man nnyịn in̄wana ye enye.”—1 Samuel 17:8-10.
Ekedi ọsọ n̄kpọ ke eset owo uko ndida ke ibuot udịmekọn̄ esie n̄n̄wana ye owo uko udịmekọn̄ efen. Udịmekọn̄ owo oro akande ẹkesidi mme andikan. Edi owoekọn̄ emi esịnde Israel ke ndek mi idịghe ikpîkpu owoekọn̄. Enye edi ata edikon̄ owo—kpa afai afai asua emi enyenede ndịk. Nte ededi, Goliath ndisịn udịmekọn̄ ikọt Jehovah ke ndek ọwọrọ ke enye idibọhọke.
Emi idịghe ikpîkpu ekọn̄. Edi ekọn̄ ke ufọt Jehovah ye mme abasi Philistine. Utu ke Saul edidem Israel ndinyene uko nda udịmekọn̄ esie n̄kan̄wana ye mme asua Abasi, ndịk owot enye.—1 Samuel 17:11.
Akparawa Ọbuọt Idem ye Jehovah
Ke ini emi udịmekọn̄ mbiba ẹdopde ẹda mi, akparawa kiet emi ẹma ẹkeyeyet aran ndikabade ndi edidem Israel edi ndise nditọeka esie emi ẹdude ke udịmekọn̄ Saul. Enye ekere David. Ke ini okopde se Goliath etịn̄de, enye obụp ete: “Edụt Philistine emi edi anie owo, eke enye ekpesịnde mbon-ekọn̄ Abasi uwem ke ndek?” (1 Samuel 17:26) David ọfiọk ke Goliath ada ke ibuot mme Philistine ye mme abasi mmọ. Esịt enen̄ede ayat David, ntre ọdọn̄ enye ndida nnọ Jehovah ye Israel nnyụn̄ n̄n̄wana ye edikon̄ owo Philistine oro edide okpono ndem mi. Edi Edidem Saul ọdọhọ ete: “Afo udukemeke ndika n̄kan̄wana ye Philistine emi: koro afo edide eyenọwọn̄.”—1 Samuel 17:33.
Ekikere Saul okpụhọrede didie ntem ye eke David! Saul ada David nte ekpri ekpemerọn̄ emi oyomde ndin̄wana ye edikon̄ owo oro edide ikaki. Edi David ada Goliath nte ikpîkpu owo emi omiomde Jehovah Ọbọn̄ Andikara. David enyene uko ke ntak emi enye ọfiọkde ke Abasi idiyakke owo esịn enyịn̄ Esie ye ikọt Esie ke ndek ye unana edibọ ufen. Ke adan̄aemi Goliath anamde inua aban̄a odudu esie, David ọkọn̄ mbuọtidem esie ke Jehovah, onyụn̄ ese n̄kpọ emi nte Abasi esede.
‘Nda Enyịn̄ Jehovah Mme Udịm Ntiene Fi’
David enyene eti ntak ndibuọt idem ke Abasi. Enye eti ke Abasi ama an̄wam imọ inyan̄a erọn̄ imọ isio bear ye lion ke inua. Ekpri ekpemerọn̄ emi enen̄ede enịm ke Jehovah ayan̄wam imọ ikan enyene-ndịk Philistine emi. (1 Samuel 17:34-37) David ada utopitiat ye ndọnọ itiat ition kpọt ọwọrọ aka ndin̄wana ye Goliath.
Ekpri David ada odudu oro Jehovah ọnọde 1 Samuel 17:45-47.
aka ndinam n̄kpọ emi etiede nte se owo mîkemeke ndinam mi. Enye ọdọhọ owo Philistine oro uko uko ete: “Afo ada ofụt, ye eduat, ye enyịm etiene mi: edi ami nda enyịn̄ Jehovah mme udịm, Abasi mbon-ekọn̄ Israel, emi afo esịnde ke ndek, ntiene fi. Mfịn emi Jehovah ayada fi esịn mi ke ubọk . . . man ofụri ererimbot ẹfiọk ẹte ke Israel ẹnyene Abasi. Ndien ofụri esop emi ẹyefiọk ẹte ke Jehovah idaha ofụt, inyụn̄ idaha eduat, in̄wana: koro ekọn̄ enyenede Jehovah.”—Nso idi utịp? N̄wetnnịm n̄kpọ eke odudu spirit oro ọdọhọ ete: “David ada utop-itiat ye itiat akan Philistine oro, onyụn̄ ọtọ Philistine owot; edi ofụt idụhe David ke ubọk.” (1 Samuel 17:50) Ofụt ikodụhe enye ke ubọk, edi Jehovah Abasi ama enen̄ede ọnọ enye ibetedem. *
En̄wan oro ama owụt ke ama enen̄ede enen David ndibuọt idem ke Jehovah! Ke ini anade imek m̀mê idibak owo m̀mê idibuọt idem ke odudu edinyan̄a Jehovah, se inyenede ndimek ana in̄wan̄-in̄wan̄: “Nnyịn inyene ndikop uyo Abasi nte andikara utu ke uyo owo.” (Utom 5:29) Akan oro, ke ini isede n̄kpọsọn̄ idaha nte Jehovah Abasi esede, nnyịn iyokụt ke ikpọ mfịna ikam ikponke nte ikekerede.
[Ikọ idakisọn̄]
^ ikp. 13 Se 2006 Calendar of Jehovah’s Witnesses, May ye June.
[Ekebe/Ndise ke page 9]
GOLIATH OKOKPON ADAN̄A DIDIE?
Akpa Samuel 17:4-7 asian nnyịn ke Goliath ama okon̄ akan ibio idomo okụk itiokiet ke idaha—n̄kpọ nte mita ita. Udobi ọfọn̄idem ekọn̄ okpoho esie owụt nte enye okokponde ye nte enye ekenyenede odudu. Ọfọn̄idem oro okodobi kilogram 57 (ekpat simen kiet odobi kilogram 50)! Eto eduat esie ekebiet eto mme ọdọk-ọfọn̄, idem eduat esie onyụn̄ odobi kilogram itiaba. Kamse, anaedi n̄kpọekọn̄ Goliath ama odobi akan David ke idemesie!