Idatesịt Edisan̄a ke Eti Ido

“Ufọn [“edidiọn̄,” NW] Jehovah ofori owo, enye inyụn̄ idianke afanikọn̄ ke esịt.”—MME N̄KE 10:22.

1, 2. Ntak emi ikpefepde ndinen̄ede n̄kere mban̄a ini iso?

 “EDINEN̄EDE n̄kere mban̄a ini iso . . . iyakke nnyịn idat esịt ke se inyenede idahaemi,” ntre ke owo akwaifiọk kiet ke America ọkọdọhọ. Emi edi ntre ye nditọwọn̄ emi ẹsinen̄erede ẹkere ẹban̄a se mmimọ idinamde ke ima ikokponi tutu ẹfre ufọn ini uyen; edi ke mmọ ẹma ẹkekponi mmọ ẹkere nte ikpafiakde idi uyen.

² Idem mme andituak ibuot nnọ Jehovah ẹsikere n̄kpọ ntem ndusụk ini. Kere se ikemede nditịbe edieke ikerede n̄kpọ ntem. Enen̄ede ọdọn̄ nnyịn ndikụt un̄wọn̄ọ Abasi kaban̄a Paradise isọn̄ osude. Enen̄ede ọdọn̄ nnyịn n̄ko ndidu uwem oro udọn̄ọ, usọn̄, ubiak, ye ndutụhọ mîdụhe. Okposụkedi mîdiọkke ndidori enyịn mban̄a mme n̄kpọ emi, edi nso iditịbe edieke nnyịn inen̄erede ikere iban̄a mme edidiọn̄ oro idinyenede ke Obio Ubọn̄ Abasi tutu nnyịn ifre mme edidiọn̄ eke spirit oro inyenede idahaemi? Oro ọkpọdiọk akaha! Emi ekeme ndinam isọp ikop mmemidem inyụn̄ ‘idọn̄ọ ke esịt ke ntak oro idotenyịn anamde ubịghi’ akan nte ikekerede. (Mme N̄ke 13:12) Mme mfịna ye nsọn̄ọn̄kpọ ẹkeme ndinam nnyịn ikop ọkpọsọn̄ mfụhọ m̀mê iseme idem. Utu ke ndiyọ ndiọi idaha, nnyịn imekeme nditọn̄ọ ndinyene edu n̄kụni. Nnyịn imekeme ndifep kpukpru emi edieke idade esịtekọm itie ikere mme edidiọn̄ oro inyenede idahaemi.

3. Nso ke idineme ke ibuotikọ emi?

³ Mme N̄ke 10:22 ọdọhọ ete: “Ufọn [“edidiọn̄,” NW] Jehovah ofori owo, enye inyụn̄ idianke afanikọn̄ ke esịt.” Ndi uforo eke spirit oro mme asan̄autom Jehovah eyomfịn ẹnyenede idịghe edidiọn̄ oro akpanamde nnyịn idat  esịt? Ẹyak ineme ndusụk uforo oro inyenede ke n̄kan̄ eke spirit inyụn̄ ise se mmọ ẹwọrọde ẹnọ nnyịn ọkpọkpọ. Ndida ini ntie n̄kere mme edidiọn̄ oro Jehovah ọnọde ‘edinen owo eke asan̄ade ke eti ido esie’ eyenen̄ede ọsọn̄ọ ubiere nnyịn ndika iso nnam n̄kpọ Ete nnyịn eke heaven ke idatesịt.—Mme N̄ke 20:7.

Mme Edidiọn̄ Oro Ẹforide Uwem Nnyịn Idahaemi

4, 5. Ewe ukpepn̄kpọ Bible ke afo enen̄ede ama, ndien ntak-a?

⁴ Imenyene nnennen ifiọk iban̄a mme ukpepn̄kpọ Bible. Mme ido ukpono Christendom ẹdọhọ ke imenịm Bible ke akpanikọ. Nte ededi, mmọ inyịmeke se enye ekpepde. Idem mbon oro ẹkade ukem ido ukpono ẹsiwak ndinyene nsio nsio ekikere mban̄a se N̄wed Abasi enen̄erede ekpep. Idaha mmọ okpụhọrede didie ntem ye eke mme asan̄autom Jehovah! Inamke n̄kpọ m̀mê nnyịn ito ewe idụt m̀mê ekpụk, m̀mê nso idi ido obio nnyịn, nnyịn ituak ibuot inọ Abasi oro ifiọkde enyịn̄ esie. Enye idịghe Abasi-Ita-ke-Kiet emi ẹdade nte ndịben̄kpọ. (Deuteronomy 6:4; Psalm 83:18; Mark 12:29) Nnyịn imọfiọk n̄ko ke ẹmọn̄ ẹbiere akpan eneni aban̄ade unen oro Abasi enyenede ndikara ofụri ekondo, ndien ke ndisọn̄ọ nda ye Abasi, nnyịn owo kiet kiet iwụt ke Abasi enyene unen ndikara ofụri ekondo. Nnyịn imọfiọk akpanikọ aban̄ade mme akpan̄kpa inyụn̄ ikopke ndịk iban̄a Abasi emi ẹdọhọde nte esitụhọrede mme owo ke hell ikan̄ m̀mê esinọde mme owo ẹka purgatory.—Ecclesiastes 9:5, 10.

⁵ Akan oro, nso n̄kpọ idatesịt ke edi ntem ndifiọk ke nnyịn ikotoho ke unam iforo owo! Utu ke oro, Abasi okobot nnyịn ke mbiet esie. (Genesis 1:26; Malachi 2:10) Andiwet psalm ọkọkwọ ete: “Nyọkọm fi, koro nyenede ndyọ ye ndịk; se afo anamde ẹdi utịbe; ukpọn̄ mi onyụn̄ [enen̄ede] ọfiọk.”—Psalm 139:14.

6, 7. Mme ukpụhọde ewe ke afo anam m̀mê ke ọfiọk ke mbon en̄wen ẹnam, emi adade edidiọn̄ edi?

⁶ Imọbọhọ ndiọi edu ye ndiọi edinam. Mme ndutịm usuanetop ẹsidụri mme owo utọn̄ ndien ndien ẹban̄a nte edin̄wọn̄ sika, edin̄wọn̄ mmịn mbe ubọk, ye etịme etịme ido idan̄ ẹdiọkde. Ata ediwak owo ẹfụmi ntọt emi. Nte ededi, nso isitịbe ke ini owo oro enyenede eti esịt ọfiọkde ke ata Abasi asua mme utọ n̄kpọ oro ke inyụn̄ inemke esịt ye mbon oro ẹnamde mmọ? Kamse, emi esinam enye etre mme utọ n̄kpọ oro! (Isaiah 63:10; 1 Corinth 6:9, 10; 2 Corinth 7:1; Ephesus 4:30) Okposụkedi owo emi etrede mme n̄kpọ emi akpan akpan man enem Jehovah Abasi esịt, enye ọbọ mme ufọn efen n̄ko—enyene nsọn̄idem ye emem esịtidem.

⁷ Esinen̄ede ọsọn̄ ediwak owo nditre ndiọi edu. Kpa ye oro, ediwak tọsịn owo ẹsinam ntre kpukpru isua. Mmọ ẹmeyak idemmọ ẹnọ Jehovah ẹnyụn̄ ẹna baptism mmọn̄, ntem ẹnamde mme owo ẹfiọk ke mmimọ ima itre mme n̄kpọ oro Abasi mîmaha. Emi esịn udọn̄ ọnọ kpukpru nnyịn didie ntem! Enye ọsọn̄ọ ubiere oro inamde nditre ndidụk ufụn nnọ idiọkn̄kpọ ye ndiọi edu.

8. Ewe item Bible etịp esịn ke ubon ndikop inemesịt?

⁸ Imenyene inem inem ubon. Ubon isọn̄ke idem aba ke ediwak idụt. Ẹsision̄o ediwak ndọ, ndien emi esiwak ndinen̄ede mfịna nditọ ke n̄kan̄ eke ntụk. Ke ndusụk idụt ke Europe, mme ubon oro ete m̀mê eka kpọt esede enyịn ẹkpere ndisịm mbahade kiet ke itie ition ke otu kpukpru ubon. Didie ke Jehovah an̄wam nnyịn isan̄a ke usụn̄ eti ido ke afan̄ emi? Mbọk kot Ephesus 5:22–6:4, nyụn̄ se eti item oro Ikọ Abasi ọnọde mme ebe,  ibanndọ, ye nditọ. Ndida se itien̄wed emi ye se mme itien̄wed en̄wen ke Bible ẹtịn̄de nsịn ke edinam esinen̄ede ọsọn̄ọ mbọbọ ndọ, an̄wam mme ete ye eka ẹbọk nditọ ke eti usụn̄, onyụn̄ anam ubon etie inem inem. Ndi emi idịghe edidiọn̄ oro akpanamde owo adat esịt?

9, 10. Didie ke idotenyịn oro inyenede iban̄a ini iso okpụhọrede ye eke ererimbot?

⁹ Ẹn̄wọn̄ọ ẹnọ nnyịn ke ẹyesọp ndikọk mme mfịna ererimbot. Kpa ye ekese ifiọk ntaifiọk ye ifiọk ubotn̄kpọ oro owo enyenede ọkọrọ ye ukeme ofụri esịt oro ndusụk mme andikara ẹsịnde, owo isụk ikemeke ndikọk ikpọ mfịna oro ẹdude mfịn. Klaus Schwab, andikọtọn̄ọ Mboho Ndutịm Uforo Ererimbot, ama ọdọhọ ke ndondo emi ete “ke mme mfịna ererimbot ẹkaka iso ndikọri ke adan̄aemi ini mîdụhe ndida n̄kọk mmọ.” Enye ama etịn̄ aban̄a “afanikọn̄ oro ẹsịmde kpukpru idụt, utọ nte edinam oyomonsia, edisabade n̄kann̄kụk ye mfịna okụk.” Schwab ekeberi ete: “Idahaemi, oyom mme owo ẹdiana kiet ẹnyụn̄ ẹnam ikpọ ubiere usọp usọp man ẹkọk mme mfịna ererimbot.” Nte ọyọhọ isua ikie 21 emi akade iso, ubonowo inyeneke ata idotenyịn iban̄a ini iso.

¹⁰ Edi n̄kpọ inemesịt didie ntem ndifiọk ke Jehovah anam ndutịm oro edikọkde kpukpru mfịna ubonowo—kpa Obio Ubọn̄ Messiah Abasi! Ata Abasi ayada Obio Ubọn̄ emi “anam ekọn̄ etre” onyụn̄ anam “ediwak emem” odu. (Psalm 46:9; 72:7) Edidem oro ẹyetde aran, Jesus Christ, ‘ayanyan̄a ubuene, owo ukụt, ye eyen unana osio ke ukụt ye nnama.’ (Psalm 72:12-14) Udia idinanake ke ini ukara Obio Ubọn̄. (Psalm 72:16) Jehovah “ọyọkwọhọde kpukpru mmọn̄eyet ke enyịn [nnyịn] efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.” (Ediyarade 21:4) Ẹma ẹwowụk Obio Ubọn̄ oro ke heaven ndien ibịghike enye ọyọkọk kpukpru mfịna ke isọn̄.—Daniel 2:44; Ediyarade 11:15.

11, 12. (a) Ndi edikop inem uwem esinam ẹnyene inemesịt oro ebịghide? Nam an̄wan̄a. (b) Nso inam owo enyene ata inemesịt?

¹¹ Imọfiọk se inamde owo enyene ata inemesịt. Nso inen̄ede inam owo enyene ata inemesịt? Owo kiet oro ekpepde n̄kpọ aban̄a ekikere ọkọdọhọ ke n̄kpọ ita ẹnam inemesịt—edikop inem uwem, edinyene se ẹnamde (utọ nte edisịn idem nnam utom nnyụn̄ nse mban̄a ubon), ye edinyene uduak (edibịne utịtmbuba m̀mê edinam n̄kpọ nnọ mbon en̄wen). Ke kpukpru n̄kpọ ita emi, enye akasiak edikop inem uwem nte se mîtịmke idi akpan n̄kpọ onyụn̄ ọdọhọ ete: “Enen̄ede odot kpukpru owo ẹfiọk emi koro ata ediwak owo ẹyak edikop inem uwem edi ata akpan n̄kpọ ke uwem mmọ.” Nso idi ekikere Bible ke n̄kpọ emi?

¹² Edidem Solomon eke Israel eset ọkọdọhọ ete: “Ami ndọhọ ke esịt mi, nte, Di ndien, yak nda mbre ndomo fi, nyụn̄ dia eti n̄kpọ. Ndien, sese, emi n̄ko onyụn̄ edi ikpîkpu. Ndọhọ mban̄a imam, nte, Idat: ndọhọ mban̄a mbre, nte, Enye anam nso?” (Ecclesiastes 2:1, 2) N̄wed Abasi ọdọhọ ke edikop inem uwem ọnọ owo inemesịt ibio ini. Nso kaban̄a edisịn idem nnam utom? Nnyịn imenyene utom oro enen̄erede enyene uduak oro anade inam—kpa utom edikwọrọ Obio Ubọn̄ ye edinam mbet. (Matthew 24:14; 28:19, 20) Ke ndibuana etop edinyan̄a oro odude ke Bible ye mbon en̄wen,  nnyịn inam utom oro ekemede ndinyan̄a nnyịn ye mbon oro ẹkopde uyo nnyịn. (1 Timothy 4:16) Sia nnyịn idide “nsan̄autom Abasi,” nnyịn imokụt ke “inemesịt okpon ke ndinọnọ akan ke ndibọbọ.” (1 Corinth 3:9; Utom 20:35) Utom emi anam uwem nnyịn enyene uduak onyụn̄ anam Andibot okụt se ọbọrọde andisụn̄i enye, Satan kpa Devil. (Mme N̄ke 27:11) Ke akpanikọ, Jehovah anam nnyịn ifiọk ke uten̄e Abasi anam inyene ata inemesịt oro ebịghide.—1 Timothy 4:8.

13. (a) Didie ke Ufọkn̄wed Utom Ukara Abasi edi edidiọn̄ oro akpanamde nnyịn idat esịt? (b) Didie ke afo ọbọ ufọn oto Ufọkn̄wed Utom Ukara Abasi?

¹³ Imenyene akpan ndutịm unọ ukpep oro enyenede uforo. Gerhard edi ebiowo ke esop Mme Ntiense Jehovah. Enye eti ini oro enye ekedide uyen, onyụn̄ ọdọhọ ete: “Ama esinen̄ede ọsọn̄ mi nditịn̄ ikọ ke ini n̄kedide uyen. Ama esisọn̄ mi nditịn̄ ikọ an̄wan̄a ke ini idem enyekde mi, ndien oro ama esinam ntọn̄ọ ndikek ekek. Mma n̄kere ke n̄wọrọke n̄kpọ nnyụn̄ n̄kop ọkpọsọn̄ mfụhọ. Ete ye eka mi ẹma ẹnam ndutịm ẹnọ mi man nsibọ ukpep ke nte ẹtịn̄de ikọ, edi ufọn ikodụhe. Mfịna mi ekenyene n̄kpọ ndinam ye ekikere. Nte ededi, Jehovah ama anam utịbe utịbe ndutịm—kpa Ufọkn̄wed Utom Ukara Abasi. Ndisịn enyịn̄ ke ufọkn̄wed emi ama anam mfiak nnyene uko. Mma nsịn ofụri ukeme ndida se n̄kekpepde ke ufọkn̄wed emi nsịn ke edinam. Ukpep emi ama enen̄ede ọfọn ye ami! Mma ntọn̄ọ nditịn̄ ikọ ifụre ifụre, nnyụn̄ n̄kopke aba mfụhọ, ndien mma ntetịm nnyene uko ke utom ukwọrọikọ. Mmesikam nnọ utịn̄ikọ an̄wa idahaemi. Mmenen̄ede n̄kọm Jehovah emi adade ufọkn̄wed emi ofori uwem mi.” Ndi usụn̄ oro Jehovah ọnọde nnyịn ukpep man inam utom esie idịghe ntak ndidat esịt?

14, 15. Nso un̄wam ke isinyene ke mme ini nnanenyịn? Nọ uwụtn̄kpọ.

¹⁴ Imenyene ọkpọkpọ itie ebuana ye Jehovah inyụn̄ inyene un̄wam ito nditọete nnyịn ke ofụri ererimbot. Katrin emi odụn̄de ke Germany ama enen̄ede ofụhọ ke ini enye okokopde ke akwa unyekisọn̄ oro eketịbede ke akpa ama anam akpa inyan̄ibom ufọt edem usụk ye edem usiahautịn Asia ọtọ ada ediwak tọsịn owo. Eyen esie an̄wan akaka Thailand ke ini unyekisọn̄ oro eketịbede. Usen kiet ye ubak ẹma ẹbe, enye ikọfiọkke m̀mê eyen imọ ke okodu uwem m̀mê ama esịne ke otu mbon unọmọ oro ibat akakade-ka iso ndidọk kpukpru hour. Katrin okokop inemesịt didie ntem ke ini ẹkesiande enye ke urụk ukopikọ ke n̄kpọ ikanamke eyen esie!

¹⁵ Nso ikan̄wam Katrin ke ini nnanenyịn oro? Enye ewet ete: “Mma n̄kpere ndida ofụri ini oro mbọn̄ akam nnọ Jehovah. Ediwak ini mma n̄kụt ke akam ama enen̄ede ọnọ mi odudu ye emem esịtidem. Akan oro, ndima nditọete mi eke spirit ẹma ẹdi ẹdise mi ẹnyụn̄ ẹdọn̄ mi esịt. (Philippi 4:6, 7) Idaha esie ọkpọkọdiọk didie ntem edieke enye mîkpakadaha ini nnanenyịn oro ibọn̄ akam inọ Jehovah, edieke ndima nditọete esie eke spirit mîkpokonyụn̄ idọn̄ke enye esịt! N̄kpet n̄kpet itie ebuana oro inyenede ye Jehovah ye Eyen esie ọkọrọ ye otu nditọete Christian ẹdi anana-mbiet  edidiọn̄, kpa ọsọn̄urua edidiọn̄ oro nnyịn mîkpadaha mfefere mfefere.

16. Nọ ifiọkutom oro owụtde nte idotenyịn ediset ke n̄kpa edide akpan n̄kpọ.

¹⁶ Imenyene idotenyịn edifiak n̄kụt mbonima nnyịn oro ẹma ẹkekpan̄a. (John 5:28, 29) Ẹkebọk akparawa oro ekerede Matthias nte kiet ke otu Mme Ntiense Jehovah. Nte ededi, sia enye mîkọfiọkke edidiọn̄ oro enye ekenyenede, enye ama ọfiọrọ ọkpọn̄ esop Christian ke ini enye ekedide uyen. Idahaemi enye ewet ete: “N̄kenen̄ekede nnyene ntotụn̄ọ nneme ye ete mi. Nnyịn ima isineni eneni ediwak ini ke ediwak isua oro ẹbede. Edi kpukpru ini ete mi okoyom n̄kpọ ọfọn ye ami. Enye ama enen̄ede ama mi, okposụkedi mmen̄kọfiọkke ini oro. Ke 1996, ke ini n̄ketiede ke mben bed esie mmụm enye ubọk nnyụn̄ ntua etieti, mma nsian enye ke mmatua n̄kpọfiọk mban̄a kpukpru se n̄kanamde ye nte ke mmama enye etieti. Edi enye ikokopke se n̄ketịn̄de. Enye ọkọdọn̄ọ esisịt ini onyụn̄ ebe efep. Edieke ndidude uwem n̄kụt ete mi esetde ke n̄kpa, iyeneme kpukpru n̄kpọ oro nnyịn mîkenemeke. Ndien esịt eyenen̄ede enem enye ndifiọk ke ami ndi ebiowo idahaemi, n̄ko ke ami ye n̄wan mi idi mme asiakusụn̄.” Nso edidiọn̄ ke idotenyịn ediset ke n̄kpa edi ntem ọnọ nnyịn!

“Enye Inyụn̄ Idianke Afanikọn̄ ke Esịt”

17. Didie ke nditie n̄kere mme edidiọn̄ Jehovah an̄wam nnyịn?

¹⁷ Jesus Christ eketịn̄ ntem aban̄a Ete esie eke heaven: “Enye [anam] utịn esie asiaha ọnọ ndiọi owo ye nti owo onyụn̄ [anam] edịm edep ọnọ ndinen owo ye mme anam ukwan̄ido.” (Matthew 5:45) Edieke Jehovah Abasi anamde edidiọn̄ esie akam esịm ndiọi owo ye mme anam ukwan̄ido, adan̄a didie akan oro ke enye edinen̄ede ọdiọn̄ mbon oro ẹsan̄ade ke usụn̄ eti ido! Psalm 84:11 ọdọhọ ke “ama edi mmọ eke ẹnen̄erede ẹsan̄a, [Jehovah] isịnke mmọ nti n̄kpọ.” Esịt nnyịn esiyọhọ ye ekọm ye idatesịt didie ntem ke ini itiede ikere san̄asan̄a usụn̄ oro Jehovah esede onyụn̄ ekerede aban̄a mbon oro ẹmade enye!

18. (a) Ntak emi ẹkemede ndidọhọ ke Jehovah idianke afanikọn̄ ke mme edidiọn̄ esie? (b) Ntak emi ediwak mbon oro ẹnamde akpanikọ ẹnọ Abasi ẹsibọde ndutụhọ?

¹⁸ “Ufọn [“edidiọn̄,” NW] Jehovah” ofori ikọt esie ke n̄kan̄ eke spirit. Ndien ẹn̄wọn̄ọ ẹnọ nnyịn ke Jehovah “inyụn̄ idianke afanikọn̄ ke esịt.” (Mme N̄ke 10:22) Nso ndien idi ntak emi mme idomo ẹsisịmde ediwak mbon oro ẹnamde akpanikọ ẹnọ Abasi, anamde mmọ ẹkop ọkpọsọn̄ ubiak ẹnyụn̄ ẹbọ ndutụhọ? Akpan ntak ita ẹsinam mfịna ye nnanenyịn ẹsịm nnyịn. (1) Ndammana udọn̄ ndinam idiọk. (Genesis 6:5; 8:21; James 1:14, 15) (2) Satan ye mme demon esie. (Ephesus 6:11, 12) (3) Idiọk ererimbot. (John 15:19) Okposụkedi Jehovah esiyakde ndiọi n̄kpọ ẹtịbe ẹnọ nnyịn, idịghe enye edi ntak mme n̄kpọ emi ẹtịbede. Ke akpanikọ, “kpukpru nti enọ ye kpukpru enọ eke ẹfọnde ẹma ẹto ke enyọn̄, koro mmọ ẹto Ete mme un̄wana eke enyọn̄ ẹsụhọde ẹdi.” (James 1:17) Mme edidiọn̄ Jehovah isan̄ake ye afanikọn̄.

19. Nso ina ibet mbon oro ẹkade iso ẹsan̄a ke eti ido?

¹⁹ Kpukpru ini, ndinyene n̄kpet n̄kpet itie ebuana ye Abasi esinam inyene uforo eke spirit. Ke ini inyenede n̄kpet n̄kpet itie ebuana ye enye, nnyịn ‘itịm inịm eti itiat idakisọn̄ nte n̄kpọuto inọ idem nnyịn kaban̄a ini iso, man ikpọsọn̄ọ imụm ata uwem ikama’—kpa nsinsi uwem. (1 Timothy 6:12, 17-19) Nnyịn iyenyene inyene eke spirit ọkọrọ ye eke obụk ke obufa ererimbot Abasi oro edide. Kpukpru mbon oro ‘ẹkopde uyo Jehovah’ ẹyedu ata uwem. (Deuteronomy 28:2) Ẹyak nnyịn inen̄ede ibiere inyụn̄ idat esịt ndika iso nsan̄a ke eti ido.

Nso ke Afo Ekekpep?

• Ntak emi mîwụtke eti ibuot ndinen̄ede n̄kere mban̄a ini iso?

• Mme edidiọn̄ ewe ke inyene idahaemi?

• Ntak emi mme anam-akpanikọ asan̄autom Abasi ẹsibọde ndutụhọ?

[Mme Mbụme Ukpepn̄kpọ]