“Mmọ Eke Ẹmemde Ẹkan” Ẹsọn̄ Urua

“APOSTLE PETER ekewet ete: “Mbufo mme ebe, ẹka iso ẹdụn̄ ye [iban mbufo] ke ifiọk, ẹnọde mmọ ukpono nte mmọ eke ẹmemde ẹkan.” (1 Peter 3:7) Ndi N̄wed Abasi ndidọhọ ke iban ẹdi “mmọ eke ẹmemde ẹkan” osụhọde mmọ itie ke usụn̄ ekededi? Ẹyak ise se owo emi ẹkenọde odudu spirit Abasi ewet ikọ emi okoyomde ẹfiọk.

Ikọenyịn̄ Greek oro ẹkabarede “ukpono” ọwọrọ “ndida ke ọsọn̄urua n̄kpọ, ndida ke akamba . . . nditen̄e.” Ke ntre, ebe oro edide Christian enyene ndinam n̄kpọ sụn̄sụn̄ ye n̄wan esie, onyụn̄ enen̄ede ese aban̄a enye nte ọsọn̄urua n̄kpọuto oro etiede ekikọhọ ekikọhọ. Emi isụhọkede iban itie ke baba usụn̄ kiet. Ke uwụtn̄kpọ, kere ban̄a utuenikan̄ Tiffany. Ke akpanikọ, ẹkeme ndidọhọ ke ata ediye utuenikan̄ emi etie ekikọhọ ekikọhọ. Ndi utuenikan̄ emi nditie ekikọhọ ekikọhọ ọwọrọ ke enye isọn̄ke urua aba? N̄wan̄ansa-o! Ke 1997, ẹkenyam akpasarade utuenikan̄ Tiffany ke n̄kpọ nte miliọn dollar ita! Enye nditie ekikọhọ ekikọhọ akakam anam enye etetịm ọsọn̄ urua, utu ke ndisosụhọde ekọmurua esie.

Kpasụk ntre, ndinọ n̄wan ukpono nte owo eke ememde akan inamke enye anana uku m̀mê ndisụhọde enye itie. Ebe ndidụn̄ ye n̄wan esie “ke ifiọk” ọwọrọ ke enye eyekere aban̄a ukeme ye mmeme n̄wan esie, se n̄wan esie amade ye se mîmaha, nte enye esisede n̄kpọ ye nte n̄kpọ esitụkde enye. Ebe oro ekerede aban̄a n̄wan esie ọfiọk ke nte imọ isinamde n̄kpọ okpụhọde ye nte n̄wan imọ esinamde. Enye enen̄ede ekere aban̄a n̄wan esie “mbak n̄kpọ edibiọn̄ọ akam [imọ].” (1 Peter 3:7) Ebe oro mîkponoke nti edu n̄wan esie odomo ndibiat itie ebuana esie ye Abasi. Nte an̄wan̄ade, Ikọ Abasi isụhọkede iban itie. Utu ke oro, akam ọnọnọ mmọ uku ye ukpono.

[Ebiet Ẹdade Ndise Ẹto ke page 32]

© Christie’s Images Limited 1997