Mme Mbụme Ẹtode Mme Andikot

Nso inam “n̄kpọuto emi ẹtode kpukpru mme idụt” (NW) ẹdụk ẹdi “ufọk” utuakibuot akpanikọ?—Haggai 2:7.

Jehovah akada prọfet Haggai etịn̄ ete: “[Nyenyen̄e] kpukpru mme idụt, ndien [“n̄kpọuto emi ẹtode kpukpru mme idụt,” NW] ẹyedi: ndien nyesịn ubọn̄ ke ufọk emi nyọhọ.” (Haggai 2:7) Ndi edinyen̄e “kpukpru mme idụt” anam “n̄kpọuto emi ẹtode kpukpru mme idụt”—oro edi mbon oro ẹnyenede esịt akpanikọ—ẹnyịme utuakibuot akpanikọ? Baba-o.

Kere ban̄a se inyen̄ede mme idụt ye se idide utịp edinyen̄e oro. Bible ọdọhọ ke ‘mme idụt ẹfịt, mme obio ẹnyụn̄ ẹkere ikpîkpu n̄kpọ.’ (Psalm 2:1) “Ikpîkpu n̄kpọ” oro mmọ “ẹkerede” edi ndika iso ke ukara mmọ. Idụhe se inyen̄ede mmọ nte n̄kpọ oro ekemede ndibiat ukara mmọ.

Mme idụt ẹkop ndịk ẹban̄a edikwọrọ Obio Ubọn̄ Abasi oro ama ọkọtọn̄ọ ndikara, emi Mme Ntiense Jehovah ẹkwọrọde ke ofụri ererimbot. Kamse, Obio Ubọn̄ Abasi emi Messiah, kpa Jesus Christ akarade, “ayanuak onyụn̄ ama kpukpru mme idụt [ukara owo].” (Daniel 2:44) Etop ubiereikpe oro isitan̄ade n̄ko ke ini ikwọrọde ikọ enyen̄e mme idụt. (Isaiah 61:2) Ndien nte isịnde ifịk inam utom ukwọrọikọ emi ye nte utom emi atarade enen̄ede enyen̄e mme idụt. Edi nso ke edinyen̄e oro ẹkebemde iso ẹtịn̄ ke Haggai 2:7 ada aban̄a?

Haggai 2:6 ọdọhọ ete: “Ntem ke Jehovah mme udịm ọdọhọ, ete, Osụk kan̄a ini kiet, enye edi esisịt, ndien ami nyenyen̄e ikpa-enyọn̄, ye isọn̄, ye inyan̄, ye obot.” Apostle Paul akada se idude ke ufan̄ikọ emi ewet ete: “Enye ọn̄wọn̄ọ, ete: ‘Osụk kan̄a ini kiet efen ami nyesịn ndutịme ke isọn̄ ye ke enyọn̄ n̄ko.’ Ikọ oro ‘osụk kan̄a ini kiet efen’ ọwọrọ edimen mme n̄kpọ oro ẹnyekde mfep nte mme n̄kpọ oro ẹkenamde, man mme n̄kpọ oro mînyekke [Obio Ubọn̄] ẹkpeka iso ẹdu.” (Mme Hebrew 12:26, 27) Ke akpanikọ, ẹyenyen̄e ofụri editịm n̄kpọ emi ẹsio fapfap man itie odu ọnọ obufa ererimbot oro Abasi edidade edi.

Idịghe edinyen̄e mme idụt anam mbon esịt akpanikọ ẹdidụk utuakibuot akpanikọ. Se idụride mmọ idian Jehovah ye utuakibuot esie edi kpa utom oro enyen̄ede mme idụt, oro edi, utom ukwọrọikọ oro ẹkwọrọde ke ofụri ererimbot ẹban̄a Obio Ubọn̄ Abasi oro ama ọkọtọn̄ọ ndikara. Editan̄a ‘nsinsi eti mbụk emi edide etop idatesịt’ odụri mme owo oro ẹnyenede eti esịt edi utuakibuot Abasi akpanikọ.—Ediyarade 14:6, 7.

Etop Obio Ubọn̄ edi etop ubiomikpe ye eke edinyan̄a. (Isaiah 61:1, 2) Edikwọrọ etop emi ke ofụri ererimbot enyene utịp iba: kiet edi nte ke enye enyen̄e mme idụt, ndien ọyọhọ iba, enye anam n̄kpọuto emi ẹtode kpukpru mme idụt ẹdụk ẹdi man ubọn̄ enyene Jehovah.