Nso Idi Uduak Abasi Kaban̄a Isọn̄?

NTAK emi esinemde fi ndisan̄a ke itie unọ idem nduọkodudu m̀mê ke ebiet emi mme enem-ufuọn̄ flawa ẹdude? Ntak emi esịt esidatde fi ke ini okụtde ediye akwa n̄kpọdiọhọ mmọn̄ m̀mê ikpọ obot emi etịn̄e esịmde ntọn̄enyọn̄? Ntak emi esituakde ada okop ndinem ikwọ inuen? Ntak emi esiyede fi ndikụt nte okoyo ọfrọde m̀mê ndikụt nte mme erọn̄ ẹtade mbiet?

Kpukpru mbụme emi ẹnyene ibọrọ kiet kpọt. Ẹkebot nnyịn man idu uwem ke Paradise! Adam ye Eve emi ẹdide akpa ete ye eka nnyịn ẹketọn̄ọ uwem ke Paradise. Nnyịn ikada udọn̄ ndidu uwem ke Paradise imana ito mmọ, ndien Andibot, kpa Jehovah Abasi, ọkọnọ mmọ udọn̄ oro. Enye ama ọfiọk ke nnyịn mme owo iyokop inem ndidu ke Paradise koro enye ama ọnọ nnyịn mme edu oro iyomde man ikop inem ndidu ke utọ ediye isọn̄ oro.

Ntak emi Jehovah okobotde isọn̄? ‘Okobot enye man mme owo ẹdụn̄ ke esịt.’ (Isaiah 45:18) ‘Enye emi akanamde isọn̄’ ama ọnọ Adam ye Eve ediye ebietidụn̄ emi ekedide Paradise, kpa In̄wan̄ Eden. (Jeremiah 10:12; Genesis 2:7-9, 15, 21, 22) Anaedi mmọ ẹkenen̄ede ẹma idịm, mme flawa, ye mme eto esie didie ntem! Ekese ndiye inuen ẹkeyọyọhọ ikpaenyọn̄, nsio nsio orụk unam ẹnyụn̄ ẹyọhọ isọn̄—edi ndomokiet ke otu emi ikesịnke owo ndịk ke idem. Iyak ye mme edibotn̄kpọ eken ẹma ẹwọk ifụre ifụre ke mmọn̄ oro asanade. Se ikakam ifọnde ikan edi ke Adam ye Eve ẹkedu ọtọkiet. Mmọ ẹma ẹkeme ndinyene nditọ nnyụn̄ ndiana ye nditọ oro ntat Paradise ebietidụn̄ mmọ ke inemesịt.

Okposụkedi isọn̄ mîdịghe Paradise idahaemi, ẹkeme ndimen enye ndomo ye ata eti ufọk emi ubon emi ẹkopde inemesịt ẹnyenede. Ofụri ekondo oro Abasi ọnọde nnyịn nte ebietidụn̄ enyene kpukpru se iyomde—un̄wana, ufiop, mmọn̄, ye udia. Nnyịn ima un̄wana ye ufiop utịn ye mfụt mfụt un̄wana ọfiọn̄ didie ntem! (Genesis 1:14-18) Ukan̄ ye aran emi nnyịn isidade ibara ikan̄  ẹdu ke isọn̄. Mmọn̄ oro esisan̄ade akanade, akpa, ikpọ n̄kpọdiọhọ mmọn̄, ye inyan̄ mi ke isọn̄ iyakke nnyịn inana mmọn̄. Ndien awawa mbiet onyụn̄ etie nte ubrin̄kpọ isọn̄ufọk ọnọ isọn̄.

Kpa nte owo esibonde udia ke ufọk esie, ntre n̄ko ke Jehovah anam akpakịp udia ẹdu ke isọn̄. Sia mbun̄wụm ẹyọhọde ikọt, mfri ẹnyụn̄ ẹyọhọde in̄wan̄ mfri, Jehovah ọnọ nnyịn ‘ini eduek, anam esịt nnyịn ẹyọhọ ye udia ye idatesịt.’ (Utom 14:16, 17) Sia isọn̄ edide utọ ediye ebietidụn̄ oro, kere nte enye editiede ke ini “Abasi inemesịt,” kpa Jehovah, edinamde enye akabade Paradise!—1 Timothy 1:11.

 [Ebiet ẹdade ndise ẹto ke page 2]

IKPAEDEM: Isọn̄: Foto NASA; Ntantaọfiọn̄: NASA, ESA ye AURA/Caltech