Uduak Abasi Kaban̄a Isọn̄ Ọyọsọp Ndisu

KE INI Adam ye Eve ẹkesụk ẹdude ke Paradise, Abasi ama owụk mmọ ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye: ẹnyụn̄ ẹkara iyak ke akamba mmọn̄, ye inuen ke enyọn̄, ye kpukpru n̄kpọ uwem eke ẹnyọnide ke isọn̄.”—Genesis 1:28.

Ndikan isọn̄ ikedịghe nditọ n̄kpọ m̀mê ndise mban̄a ekpri ikpehe esie kpọt. Adam ye Eve ye nditọ mmọ ẹkenyene nditat Paradise tutu enye esịm ofụri ekondo. Nte ededi, akpa ebe ye n̄wan oro ẹma ẹnam idiọkn̄kpọ, ndien ẹma ẹbịn mmọ ẹfep ke In̄wan̄ Eden. (Genesis 3:23, 24) Edi oro ikọwọrọke ke tutu amama owo idikanke isọn̄.

Sia Abasi edidiọn̄de okopitem ubonowo, mmọ ẹyekan isọn̄. Ke ini Abasi ọkọdiọn̄de Israel eset, in̄wan̄ mmọ ẹma ẹn̄wụm nti mbun̄wụm, in̄wan̄ mfri mmọ ẹnyụn̄ ẹn̄wụm nti mfri. Ofụri isọn̄ nnyịn editie ntre ke ini enye edikabarede edi Paradise. Nte ẹn̄wọn̄ọde ke Ikọ Abasi eke odudu spirit, kpa Bible, “isọn̄ [oyon̄wụm] mbun̄wụm esie; Abasi, kpa Abasi nnyịn ọyọdiọn̄ nnyịn.” (Psalm 67:6) Ke nditịm ntịn̄, awawa mbiet ye ikpọ obot, eto ye mme flawa, akpa ye mme inyan̄ibom isọn̄ ẹyedat esịt. (Psalm 96:11-13; 98:7-9) Nsehe ikọn̄, ndiye inuen, ndiye unam, ye nti owo ẹdiyọyọhọ ekondo nnyịn.

 Obufa Ererimbot Emekpere!

Obufa ererimbot oro Jehovah ọkọn̄wọn̄ọde emenen̄ede asan̄a ekpere. Apostle Peter ekewet ete: “Mbufa enyọn̄ ye obufa isọn̄ ẹdu emi nnyịn itiede ibet nte ekemde ye un̄wọn̄ọ esie, ndien edi mi ke edinen ido edidụn̄.” (2 Peter 3:13) Ke ini ndusụk owo ẹkotde ikọ Peter emi, mmọ ẹkeme ndikere ke tutu amama isọn̄ emi idikabakede idi Paradise. Mmọ ẹkeme ndikere ke ẹyesobo ataata enyọn̄ ye isọn̄ ẹfep. Ndi ekeme ndidi ntre?

Nso idi “mbufa enyọn̄”? Idịghe ataata enyọn̄ emi Abasi okobotde. (Psalm 19:1, 2) Peter ama ebebem iso asiak ndamban̄a “enyọn̄”—kpa mme ukara owo emi ẹmenerede ke enyọn̄ ẹnyụn̄ ẹkon̄de ẹkan mbon oro mmọ ẹkarade. (2 Peter 3:10-12) Utọ “enyọn̄” emi ikemeke ndikara ubonowo, ndien ke ntre mmọ ẹyebe ẹfep. (Jeremiah 10:23; Daniel 2:44) “Mbufa enyọn̄” emi edidade itie mmọ edi Obio Ubọn̄ Abasi, ndien mbon emi ẹnamde enye ẹdi Edidem Jesus Christ ye owo 144,000 emi ẹdide nsan̄a mme ada udeme ye enye ke ubọn̄, emi ẹnamde ẹset ẹdụk uwem eke heaven.—Rome 8:16, 17; Ediyarade 5:9, 10; 14:1, 3.

“Obufa isọn̄” oro Peter eketịn̄de aban̄a idịghe obufa ekondo. Jehovah ama anam isọn̄ ọfọn ama man owo okpodụn̄ ke esịt ke nsinsi. (Psalm 104:5) Ndusụk ini oro Bible esitịn̄de aban̄a “ererimbot,” m̀mê isọn̄, emi esida aban̄a owo. (Genesis 11:1) Mme owo oro ẹdide ubak idiọk ererimbot emi ẹnam isọn̄ oro ẹdisọpde ndisobo mfep. Kpasụk ntre, ẹma ẹsobo ererimbot emi mîketen̄eke Abasi ke Ukwọ eyo Noah. (2 Peter 3:5-7) Nso ndien idi “obufa isọn̄”? Enye edi obufa n̄kaowo—ata mme andituak ibuot nnọ Abasi, kpa “mmọ eke esịt mmọ enende.” (Psalm 125:4; 1 John 2:17) “Mbufa enyọn̄” edinọ “obufa isọn̄” kpukpru ibet. Mme anam-akpanikọ iren emi ẹdude ke isọn̄ ẹyekụt ẹte ke ẹnịm mme ibet emi.

Utịbe Utịbe Mbufa N̄kpọ!

Ke akpanikọ Jehovah ọkọnọ nnyịn utịbe utịbe ebietidụn̄ ke ini enye eketịmde isọn̄ man mme owo ẹkpedụn̄. Enye ke idem esiemmọ ọkọdọhọ ke kpukpru utom imọ ke isọn̄ ẹma “ẹfọn eti eti.” (Genesis 1:31) Satan kpa Devil okotụn Adam ye Eve usụn̄ ndisọn̄ ibuot. (Genesis 3:1-5; Ediyarade 12:9) Nte ededi, Abasi ọyọsọp ndikụt nte ke ndinen owo ẹnyene “ata uwem,” oro edi “nsinsi uwem” ke mfọnmma idaha ke Paradise. (1 Timothy 6:12, 19) Ẹyak nnyịn idahaemi ineme ndusụk edidiọn̄ emi ubonowo ẹdinyenede ini oro.

Ẹyekọbi Satan ke ini Tọsịn Isua Ukara Christ mbak enye edidinọ ubonowo afanikọn̄. Apostle John ọdọhọ ete: “Ndien n̄kụt angel kiet [Michael etubom mme angel, m̀mê Jesus Christ] otode ke heaven osụhọde edi ye ukpọhọde editụn̄ọ ukpe onyụn̄ akama akwa n̄kpọkọbi ke ubọk esie. Enye onyụn̄ omụm dragon oro, kpa akpa urụkikọt, emi edide Devil ye Satan, onyụn̄ ọkọbi enye ke isua tọsịn kiet. Enye onyụn̄ otop enye esịn ke editụn̄ọ ukpe onyụn̄ eberi enye onyụn̄ esịri abaha enye, mbak enye editụn mme idụt usụn̄ aba tutu isua tọsịn kiet oro esịm utịt.” (Ediyarade 20:1-3; 12:12) Ke ẹsiode ubonowo ndibọhọ afanikọn̄ Satan ke ini ẹkọbide enye ke editụn̄ọ ukpe ẹfep, mmọ ẹyenyene ediwak edidiọn̄ efen ke idak ukara Obio Ubọn̄.

Idiọkido, obom, ye ekọn̄ ididụhe aba. Bible ọn̄wọn̄ọ ete: “Osụk esisịt idiọk owo ididụhe: ndien ke afo etịn̄de enyịn ke ebiet esie, enye ididụhe. Edi mbon nsụkidem ẹyeda  isọn̄ ẹnyene; ediwak emem ẹyenyụn̄ ẹnem mmọ esịt. Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:10, 11, 29) Jehovah Abasi ‘ayanam ekọn̄ etre tutu esịm ke utịt ekondo.’ (Psalm 46:9) Nso utịbe utịbe un̄wọn̄ọ ifụre ye emem ke emi edi ntem!

Akpakịp nti udia oro ẹnọde nsọn̄idem ẹyedu. Andiwet psalm ọkọkwọ ete: “Uwak ibokpot ẹyedu ke isọn̄ ke nsom ikpọ obot.” (Psalm 72:16) Owo ndomokiet idimehe enyene-ndịk ọ-biọn̄ ini oro.

Owo ndomokiet ididọn̄ọke. Ke akpanikọ, “andidụn̄ ididọhọke ite, Ndọdọn̄ọ.” (Isaiah 33:24; 35:5, 6) Ke ini Jesus Christ okodude ke isọn̄, enye ama anam mbon akpamfia ẹsana onyụn̄ ọkọk mme mbụn̄ọ ye nnan. (Matthew 9:35; Mark 1:40-42; John 5:5-9) Kam kere se enye edinamde ke obufa ererimbot! Kere ban̄a inemesịt oro mme owo ẹdikopde ke ini ẹdikọkde mme nnan, inan, mbụn̄ọ, ye imụm.

Nte okopitem ubonowo ẹsan̄ade sụn̄sụn̄ ẹbịne mfọnmma, ẹyetre mme afanikọn̄ oro ẹsisan̄ade ye usọn̄. Akrasi enyịn, esan̄, eto isan̄, n̄kpọitie mbon n̄kpọnnam, ufọkibọk, ye ibọk ididụhe aba. Nso ukpụhọde ke emi edidi ntem ke ini ẹnamde nnyịn ifiak isehe nte ikesehede ke uyen! (Job 33:25) Iyedemede ke inem inem idap kpukpru usenubọk, inyene obufa odudu, inyụn̄ inyene udọn̄ nditọn̄ọ inem inem obufa usen ye utom oro ọnọde uyụhọ.

Mbonima nnyịn ye mbon eken ndiset eyenen̄ede adat nnyịn esịt. (John 5:28, 29; Utom 24:15) Ediduai nnyịn idem didie ntem ndidara Abel, Noah, Abraham, Sarah, Job, Moses, Ruth, David, Elijah, Esther, ye ata ediwak owo eken! Ẹyenam ata ediwak owo en̄wen ẹset n̄ko. Ata ediwak mmọ ikọfiọkke Jehovah, edi mme owo emi ẹnyenede ọkpọsọn̄ udọn̄ ndikpep mmọ mban̄a Abasi, uduak esie, ye Jesus Christ Eyen esie, ẹdidara mmọ. Nte mbon oro ẹnamde ẹset ẹdidide ẹdifiọk Andibot mmọ, ke akpanikọ, ifiọk Jehovah ọyọyọhọ ererimbot.

Ke akande kpukpru, nnyịn iyekeme ndituak ibuot nnọ ata Abasi kierakiet ke nsinsi. Nnyịn iyenyene akwa ifet ‘ndinam n̄kpọ nnọ Jehovah ke idatesịt,’ iyonyụn̄ idiana kiet ibọp ndiye ufọk, itọ in̄wan̄, ndien ke akpatre ikan ofụri isọn̄. (Psalm 100:1-3; Isaiah 65:21-24) Nso idatesịt ke edidi ntem ndidu uwem ke nsinsi ke Paradise emi osion̄ode nti mbun̄wụm, etiede emem emem, onyụn̄ eyede, ndien ke ntem adade itoro ọsọk edisana enyịn̄ Jehovah!—Psalm 145:21; John 17:3.

Akpatre Udomo Ubonowo

Ke ini Tọsịn Isua Ukara Jesus, enye ayada ufọn uwa ufak esie an̄wam ofụri okopitem ubonowo. Nte ini akade, ẹyetre kpukpru idiọkn̄kpọ ẹnyụn̄ ẹnam ubonowo ẹkabade ẹdi mfọnmma. (1 John 2:2; Ediyarade 21:1-4) Ke ẹma ẹkesio utịp idiọkn̄kpọ Adam ẹfep ofụri ofụri, ubonowo ẹyefọn ẹma ke kpukpru usụn̄, ke n̄kan̄ eke ikpọkidem, eke ntụk, eke ido uwem, ye eke spirit kpa nte Abasi akaduakde. Ini emi ndien ke mmọ ‘ẹdidu uwem’ ọyọhọ ọyọhọ nte ata mme mfọnmma owo. (Ediyarade 20:5) Kpukpru emi ọkọrọ ye Paradise isọn̄ ẹdinọ Jehovah ubọn̄ didie ntem!

 Esisịt ini ke Tọsịn Isua Ukara Christ ama ekesịm utịt, ẹyesio Satan kpa Devil ye mme demon, m̀mê ndiọi angel esie ke editụn̄ọ ukpe oro ẹkedọn̄de mmọ. (Ediyarade 20:1-3) Ẹyenọ mmọ ifet man ẹsịn akpatre ukeme ndiwọn̄ọde mme owo n̄kpọn̄ Abasi. Okposụkedi ndusụk owo ẹdiyakde idem ẹnọ ndiọi udọn̄, nsọn̄ibuot emi idikwe unen. Jehovah oyosobo mbon ibụk emi ọkọrọ ye Satan ye kpukpru mme demon esie. Idiọkido iditọn̄ọke ntak idu aba tutu amama. Kpukpru mme anamidiọk ẹyetak ke nsinsi, edi nti owo ẹyenyene nsinsi uwem.—Ediyarade 20:7-10.

Ndi Afo Oyodu Do?

Mbon oro ẹmade Jehovah Abasi ẹdori enyịn ndikop inemesịt ke nsinsi. Nsinsi uwem ke Paradise isọn̄ idifekke owo. Ke nditịm ntịn̄, nte eyo esierede, ntre ke uwem editetịm enem, koro ifiọk Jehovah inyeneke adan̄a. (Rome 11:33) Afo eyenyene obufa n̄kpọ ndikpep kpukpru ini, oyonyụn̄ enyene ekese ini ndikọ ifiọk Abasi. Ntak-a? Koro afo ududụhe uwem ke isua 70 m̀mê 80 kpọt, edi edidu ke “nsinsi.”—Psalm 22:26; 90:10; Ecclesiastes 3:11, NW.

Edieke afo amade Abasi, afo oyokop inemesịt kpukpru ini ndinam uduak esie. Apostle John ekewet ete: “Emi edi se ndima Abasi ọwọrọde, ete nnyịn inịm ibet esie; ndien ibet esie idobike owo mbiomo.” (1 John 5:3) Ntre kûyak n̄kpọ ndomokiet ọbiọn̄ọ fi ndinem Jehovah Abasi esịt ebe ke ndinam se inende. Ti utịbe utịbe idotenyịn oro Ikọ Abasi, kpa Bible, ọnọde fi. Nen̄ede biere ndinam uduak Jehovah, kûnyụn̄ udedei utre ndinam oro. Nte utịp, afo oyodu ke ini uduak Abasi kaban̄a isọn̄ edisude, isọn̄ ebietidụn̄ nnyịn edinyụn̄ akabarede edi nsinsi Paradise.

[Ndise ke page 4]

Edidiọn̄ Abasi ama anam in̄wan̄ Israel ẹn̄wụm ekese

[Ndise ke page 7]

Mme edidiọn̄ ewe ke afo odori enyịn ndinyene ke Paradise?