Mme Mbụme Ẹtode Mme Andikot

Ntak emi ndusụk ndammana n̄kpọ oro ẹbuanade ndido idan̄ ẹkenamde owo “edehe” ke idak Ibet Moses?

Abasi ọkọnọ owo ndido idan̄ man ẹda ẹnyene nditọ, ebe ye n̄wan ẹnyụn̄ ẹda ẹkop inem. (Genesis 1:28; Mme N̄ke 5:15-18) Nte ededi, ke Leviticus ibuot 12 ye 15, nnyịn imokụt mbet emi ẹnọde ke nde ke nde ẹban̄a owo ndidehe ke ntak emi idem erenowo ọbọhọde ọduọhọ, n̄kpọ ọwọrọde n̄wan ke idem, ye umaneyen. (Leviticus 12:1-6; 15:16-24) Mme utọ mbet oro ẹkenọde Israel eset do ẹma ẹnam mmọ ẹdu edisana uwem, ẹnyene n̄kokon̄ ido uwem, ẹnyụn̄ ẹnen̄ede ẹnam mmọ ẹfiọk nte iyịp edide edisana ye ufọn edisio isop idiọkn̄kpọ.

Kiet ke otu ufọn Ibet Moses ẹban̄ade idan̄ ekedi man ofụri idụt Israel ẹkop nsọn̄idem. N̄wed oro The Bible and Modern Medicine ọdọhọ ete: “Ndinịm ibet oro akakpande edinyene ebuana idan̄ ke ini n̄wan okụtde n̄kpọ ekedi ata eti usụn̄ ndikpan udọn̄ọ oro ẹmende ẹto idan̄ . . . ndien ikonyụn̄ iyakke kansa ọtọn̄ọ onyụn̄ ọkọri ke usụn̄ eyen.” Mme utọ mbet emi ikayakke ikọt Abasi ẹnyene udọn̄ọ emi ekemede ndidi mmọ ikọfiọkke-fiọk ke odu m̀mê emi mmọ mîkpakakam ifiọkke ke imenyene. Nditiene edumbet Abasi oro akakpande edidu ye n̄wan ke ini enye okụtde n̄kpọ ama anam idụt oro ẹtọt sia Abasi ama ọn̄wọn̄ọ ndinam mmọ ẹtọt ẹnyụn̄ ẹwak. (Genesis 15:5; 22:17) Mme utọ mbet oro ẹma ẹnam mmọ ẹkop nsọn̄idem ke n̄kan̄ eke ntụk n̄ko. Ndinịm mbet emi ẹma ẹnam ebe ye n̄wan ẹkpep ndikara udọn̄ idan̄ mmọ.

Nte ededi, uwọrọiyịp ekedi ata akpan ntak emi owo ekedehede ke nsio nsio usụn̄ ke n̄kpọ aban̄ade idan̄. Mbet Jehovah ẹban̄ade iyịp ẹma ẹnam nditọ Israel ẹnen̄ede ẹfiọk nte iyịp edide edisana ẹnyụn̄ ẹnam mmọ ẹfiọk akpan udeme oro iyịp enyenede ke utuakibuot Jehovah, oro edi, ke uwa ye usio-isop idiọkn̄kpọ.—Leviticus 17:11; Deuteronomy 12:23, 24, 27.

Mmọdo, mbet emi ẹkenọde ke nde ke nde ẹban̄a n̄kpọ emi ẹnyene n̄kpet n̄kpet ebuana ye unana mfọnmma owo. Nditọ Israel ẹma ẹfiọk ke Adam ye Eve—ẹma ẹkenam idiọkn̄kpọ—mmọ ikekemeke ndinyene mfọnmma nditọ. Kpukpru nditọ mmọ ẹnyene ndibọ utịp ndammana idiọkn̄kpọ—oro edi, unana mfọnmma ye n̄kpa. (Rome 5:12) Ke ntak emi, n̄kukụre se mme ete ye eka ẹkemede ndiyak nnọ nditọ mmọ ẹdi unana mfọnmma ye idiọkn̄kpọ, idem okposụkedi ẹkebotde ndido idan̄ man ẹkpekeme ndida nnyene mfọnmma nditọ ke owo ama ọkọdọ ndọ.

Mbet oro ẹkedọhọde ẹnam idem asana ẹma ẹti nditọ Israel ke mmọ ẹkedada idiọkn̄kpọ ẹmana ẹnyụn̄ ẹti mmọ ke mmọ ẹma ẹyom uwa ufak man ẹfen mme idiọkn̄kpọ ẹnyụn̄ ẹnam owo afiak edi mfọnmma. Nte ededi, mme uwa unam oro mmọ ẹkesiwade ikanamke mmọ ẹdi mfọnmma. (Mme Hebrew 10:3, 4) Uduak Ibet Moses ekedi man ada nditọ Israel ọsọk Christ onyụn̄ an̄wam mmọ ẹfiọk ke uwa mfọnmma uwem Jesus ekeme ndinam ẹnen̄ede ẹfen ẹnọ owo, anamde mbon oro ẹnamde akpanikọ ẹkeme ndinyene nsinsi uwem.—Galatia 3:24; Mme Hebrew 9:13, 14.