“N̄kpọuto Ofụri Galilee”

AMA odu obio emi owo mîsiakke enyịn̄ ke mme Gospel; enye oyom usụn̄ ke kilomita itiokiet ye ubak ọtọn̄ọde ke ufọt edem edere ye edem usoputịn Nazareth, kpa obio emi ẹkebọkde Jesus. Kpa ye oro, Flavius Josephus, ọwọrọetop ewet mbụkeset eyen Jew okokot enye “n̄kpọuto ofụri Galilee.” Obio oro ekedi Sepphoris. Nso ke nnyịn ifiọk iban̄a obio emi?

Ke Akwa Herod ama akakpa, ke n̄kpọ nte isua 1 M.E.N., mbio obio Sepphoris ẹma ẹsọn̄ ibuot ye Rome, anamde ẹsobo obio mmọ ẹfep. Eyen Herod oro ekekerede Antipas ama ada Galilee ye Peraea enyene onyụn̄ emek ndon Sepphoris nte obufa ibuot obio esie. Ẹkefiak ẹbọp obio oro nte obio mbon Greece ye Rome, edi mme Jew ẹkenen̄ede ẹdụn̄ọ. Prọfesọ Richard A. Batey ọdọhọ ke Sepphoris ama akabade edi “akpan ifụm ukara emi ẹketiede ẹkara Galilee ye Perea,” tutu Antipas ọbọp Tiberias ke n̄kpọ nte isua 21 E.N. man ada itie Sepphoris nte ibuot obio. Ini emi ke Jesus okodụn̄ ke mbọhọ obio emi.

Prọfesọ James Strange, emi ọkọdọkde isọn̄ ke Sepphoris oyom mme n̄kpọeset, enịm ke obio emi ama enyene mme itie ubon n̄kpọeset, itie ubon n̄kpọuto, itie ubon n̄kpọekọn̄, mme itie unịm okụk, mme ufọk ukara, ye mme urua emi ẹsinyamde ọtọ-akpa, akrasi, tian, n̄kpọmbana, ye nsio nsio udia. Mme ọdọk ọfọn̄ ye mme anyam ọfọn̄ ye mme ufọkurua emi ẹkenyamde akpasa, n̄kpọ mbanaufọk, ufuọn̄n̄kpọ, ye mme n̄kpọ ntre ẹma ẹdu. Ẹdọhọ ke n̄kpọ nte owo 8,000 esịm 12,000 ẹkedụn̄ọ do ini oro.

Ndi akanam Jesus ama aka akwa obio emi, oro akadade n̄kpọ nte isan̄ hour kiet tọn̄ọ ke Nazareth? Mme Gospel itịn̄ke. Nte ededi, The Anchor Bible Dictionary ọdọhọ ke “eti usụn̄ kiet ndito Nazareth n̄ka Cana eke Galilee ekebe ke Sepphoris.” (John 2:1; 4:46) Ẹkeme ndida ke Nazareth n̄kụt Obot Sepphoris emi okon̄de n̄kpọ nte mita 120. Ndusụk owo ẹnịm ke etie nte Jesus ekenyene obio emi ke ekikere ke ini enye ọkọnọde uwụtn̄kpọ emi, “Obio ikemeke ndidịbe ke ini enye odude ke obot.”—Matthew 5:14.

Ke ẹma ẹkesobo Jerusalem ke isua 70 E.N., Sepphoris ama akabade edi akpan obio mme Jew ke Galilee, ndien nte ini akakade onyụn̄ edi ebiet emi esop Sanhedrin, kpa akwa esop mme Jew, okodude. Ama odu ini oro enye ekedide akpan ebiet ukpepn̄kpọ mme Jew.

[Ndise obio/Ndise ke page 32]

(Ama oyom ndikụt nte enye enen̄erede etie, se n̄wed)

Inyan̄ Galilee

GALILEE

Cana

Tiberias

SEPPHORIS

Nazareth

PEREA

[Mme Ebiet Ẹdade N̄kpọ Ẹto ke page 32]

Pottery: Excavated by Wohl Archaeological Museum, Herodian Quarter, Jewish Quarter. Owned by Company for the Reconstruction of the Jewish Quarter in the Old City of Jerusalem, Ltd