Ke Akpanikọ, Emekeme Ndikop Inemesịt

ESISỌN̄ ndinyene ata inemesịt oro ebịghide. Emi enen̄ede edi ntre koro ediwak owo oro ẹsịnde idem ẹyom inemesịt ẹyom enye ke ebiet emi mmọ mîkemeke ndikụt. Ubaha-e mmọ ẹkpenyenede eti ufan oro ẹkemede ndiberi edem emi okpowụtde mmọ se ikemede ndinọ mmọ inemesịt!

Bible edi se ikemede ndinọ owo inemesịt. Kere ban̄a n̄wed kiet kpọt ke Bible—oro edi Psalm. N̄wed emi ọdọn̄ọ ndisana ikwọ 150 oro ẹkwọde ẹnọ Jehovah Abasi, ndien Edidem David eke Israel eset ekewet n̄kpọ nte mbahade iba ke otu ikwọ emi. Edi ndifiọk ke akakan Ufan ubonowo, kpa Jehovah, ọkọnọ spirit esie ẹda ẹwet n̄wed emi edi akpan n̄kpọ akan ndifiọk owo oro ekewetde enye. Ntem, nnyịn imekeme ndinịm ke n̄wed emi ọdọn̄ọ ndausụn̄ Jehovah oro edide ke ufọn nnyịn onyụn̄ owụt nnyịn nte ikemede ndikop inemesịt.

Mme andiwet Psalm ẹma ẹtịm ẹfiọk ke inemesịt edi utịp edinyene eti itie ebuana ye Abasi. Andiwet psalm ekewet ete: “Owo eke abakde Jehovah [“okop inemesịt,” NW].” (Psalm 112:1) Idụhe itie ebuana ekededi, inyene obụkidem, ye unen oro owo okụtde oro ekemede ndinọ owo inemesịt emi “mbon eke Jehovah edide Abasi mmọ” ẹnyenede. (Psalm 144:15) Uwem ediwak mme asan̄autom Abasi eyomfịn ẹsọn̄ọ emi.

Susanne emi odude ke ntọn̄ọ ntọn̄ọ iduọk isua 40 edi kiet ke otu mmọ. * Enye ọkọdọhọ ete: “Ediwak owo mfịn ẹsidụk nsio nsio n̄ka man ẹdiana kiet ẹsịm utịtmbuba m̀mê ẹnam n̄kpọ. Nte ededi, mmọ isiwakke ndida kpukpru mbon n̄ka mmọ nte mme ufan. Edi emi idịghe ntre ye ikọt Jehovah. Ima oro imade Jehovah anam ima kiet eken. Nnyịn imesinyene ifụre ke ini idude ke otu ikọt Abasi, inamke n̄kpọ m̀mê idu ke ebiet ewe. Edidianakiet emi enen̄ede ofori uwem nnyịn. Mmanie efen ẹkeme ndidọhọ ke imanam ufan ye mme owo oro ẹdude ke nsio nsio idaha ke uwem ẹnyụn̄ ẹtode nsio  nsio idụt? Mmekeme nditịn̄ ke ofụri esịt ke ndidi kiet ke otu ikọt Jehovah anam owo okop inemesịt.”

Maree emi akamanade ke Scotland ama edifiọk n̄ko ke edi akpan n̄kpọ owo ndinyene eti itie ebuana ye Jehovah edieke anade enye okop inemesịt. Enye ọkọdọhọ ete: “Mbemiso n̄kekpepde akpanikọ Bible, mma nsima ndise mme vidio oro ẹsimụmde owo mbọribọ. Edi n̄kesikemeke ndide idap ibọhọke n̄kama cross man mbịn ekpo ye ndiọi spirit oro n̄kesikụtde ke mme vidio oro n̄kesisede. Nte ededi, ke ndondo oro n̄kekpepde akpanikọ, mma ntre ndisise mme utọ vidio oro, ndien itie ebuana mi ye Jehovah ama anam mi n̄keme ndide idap ye unana ndịk, mmonyụn̄ n̄kop inemesịt ndinam n̄kpọ Abasi oro enen̄erede okop odudu akan mme demon m̀mê ndiọi spirit oro ẹkerede-kere ke ẹdu.”

Ndibuọt Idem ke Jehovah Anam Ikop Inemesịt

Nnyịn inyeneke ntak ndomokiet ndiyịk ke Andibot enyene akaka odudu ye anana-mbiet ọniọn̄. Sia David ọkọfiọkde ke imekeme ndinyene ọyọhọ mbuọtidem ke Jehovah nnyụn̄ nda enye nte ebiet ubọhọ imọ, enye ekewet ete: “Owo eke enịmde Jehovah ke ibetesịt esie [“okop inemesịt,” NW].”—Psalm 40:4.

Maria ọkọdọhọ ete: “Se iketịbede inọ mi ke Spain ye ke mme ebiet en̄wen ẹwụt ke okposụkedi ekemede ndidọn̄ nnyịn ndinam n̄kpọ ntiene ekikere ye ntụk nnyịn, nnyịn isinyene ata nti utịp ke ini inamde n̄kpọ ke usụn̄ Jehovah. Emi esinam ikop inemesịt koro usụn̄ Jehovah ọfọn akan kpukpru ini.”

Andreas, ebiowo Christian emi ama akanam utom nte ebiowo ke ediwak idụt Europe ọfiọk n̄ko oto se iketịbede inọ enye ke nnyịn imekeme ndibuọt idem ye Jehovah. Enye ọkọdọhọ ete: “Akpaneka mi, emi akade ido ukpono en̄wen, ama enen̄ede enyene odudu ke idem mi ke ini n̄kedide uyen onyụn̄ esịn udọn̄ ọnọ mi ete mmek ubọkọkọ oro edinamde nnyene ediwak okụk. Esịt ama ọdiọk enye etieti ke ini n̄kodụkde utom uyọhọ ini, nnyụn̄ n̄kpade edem n̄wụt okụk ukpọn̄ utom oro n̄kpesibọde. Akananam nnanake se ndade ndu uwem ke ini oro n̄kanamde utom uyọhọ ini, mmonyụn̄ mbọ mme edidiọn̄ oro ọdọn̄de mbon en̄wen ndibọ.”

Ke 1993, ẹma ẹkot Felix editiene an̄wam ke nditat n̄kọk itieutom Mme Ntiense Jehovah ke Selters ke Germany. Ke ndondo oro ẹkekụrede utom oro, ẹma ẹkot enye edidi kiet ke otu mbonubon Bethel Germany. Enye akanam n̄kpọ didie? Enye ọdọhọ ete: “Mma nnyịme ikot oro okposụkedi n̄kenyenede eyịghe. Edi mmodu mi ke n̄kpọ nte isua duop idahaemi,  ndien mmenịm ke Jehovah ama ọbọrọ akam mi. Enye ọfiọk se inen̄erede ifọn ye ami. Ebede ke ndibuọt idem ke enye ọyọhọ ọyọhọ nnyụn̄ nyak enye ada mi usụn̄, mmọnọ enye ifet ndiwụt mi se enye oyomde nnam.”

Susanne oro iketịn̄de iban̄a okoyom ndinam utom nte asiakusụn̄, oro edi asan̄autom uyọhọ ini, edi ama ọsọn̄ enye ndinyene utom idịbi udia eke ibio ini. Ke enye ama ekebet isua kiet mînyeneke utom, enye ama anam n̄kpọ owụtde ke imọbuọt idem ke Jehovah. Enye okobụk ete: “Mma nsịn n̄wed eben̄e ndidụk utom usiakusụn̄ ofụri ini. Mma mfam okụk oro ekekemde ndida nse mban̄a idem mi ke n̄kpọ nte ọfiọn̄ kiet. Nso inem inem ọfiọn̄ ke emi ekedi ntem! Utom ukwọrọikọ ama enen̄ede ọnọ mi idatesịt, okposụkedi kpukpru ndụn̄ọde uda owo ke utom oro n̄kakade ọkọwọrọde ikpîkpu. Nte ededi, Jehovah ikọkpọn̄ke mi kpa nte enye ọkọn̄wọn̄ọde. Mma nnyene utom ke akpatre usen ke ọfiọn̄ oro. Ke emi mma ndifiọk ke mmekeme ndinen̄ede mbuọt idem ke Jehovah! Akpa ifiọkutom oro nnyenede ke utom uyọhọ ini mi anam mi ndu inem inem uwem oro ọnọde inemesịt.”

Nditiene Ndausụn̄ Abasi Anam Ikop Inemesịt

Edidem David ama anam ikpọ ndudue. Ndusụk ini enye ama esiyom eti item. Ndi nnyịn imesinyịme ndibọ item nte David ekenyịmede?

Ini kiet, Aida emi otode France ama ọfiọk ke imọ imanam akwa ndudue. Enye ọkọdọhọ ete: “Se ikenen̄erede ibehe mi ekedi ndifiak nnyene itie ebuana ye Jehovah. N̄kpọ ndomokiet en̄wen ikebeheke mi.” Enye ama aka ebịne mbiowo Christian okoyom un̄wam. Idahaemi ke ama akanam utom ukwọrọikọ uyọhọ ini ke se ibede isua 14, enye ọdọhọ ete: “Esịt adat mi didie ntem ndifiọk ke Jehovah ama efen ndudue mi!”

Ndibọ item Abasi ekeme ndikpan nnyịn ndinam ndudue ke akpa ifet. Judith ọkọdọhọ ete: “Ke ini n̄kedide isua 20, mma nnen̄ede nnyene udọn̄ ke idem eren Germany kiet oro n̄ketienede nnam mbubehe, emi okonyụn̄ anamde ofụri ukeme esie ndiwụt ke imama mi. Enye ekedi eren oro ẹkponode emi ekenyenede eti ubọkọkọ, edi enye ama enyene n̄wan! Mma mfiọk ke n̄kenyene ndimek ndinịm ibet Jehovah m̀mê ndikpa edem ofụri ofụri n̄wụt Enye. Mma nneme n̄kpọ emi ye ete ye eka mi. Ete mi ama asian mi in̄wan̄-in̄wan̄ se Jehovah okoyomde oto mi. Enye ikedịpke inua—enye ọkọnọ mi nnennen item! Kpa ye oro, mma nyom ntak ndinọ man mbiat mme edumbet Abasi. Eka mi ama ada ediwak mbubịteyo eneme ye ami adan̄a nte ibet Abasi ẹdide akpan n̄kpọ ẹnyụn̄ ẹnịmde owo uwem. Mmenen̄ede n̄kop inemesịt ke esịt mi ama afiak ọwọn̄ọde ebịne Jehovah. Jehovah nditụnọ nnyụn̄ nnọ mi ukpep amanam mi nnen̄ede n̄kop inemesịt—mmada ediwak isua oro ẹnọde uyụhọ nnam utom ukwọrọikọ uyọhọ ini nnyụn̄ ndọ eti ebe emi edide Christian onyụn̄ amade mi ye Jehovah ke ofụri esịt.”

Nte an̄wan̄ade, mme utọ ifiọkutom emi ẹwụt nte ikọ David emi edide akpanikọ: “Owo eke ẹfende mme idiọk ido esie, ẹnyụn̄ ẹfụkde ndudue esie [“okop inemesịt,” NW]. Owo eke Jehovah mîbatke mme ukwan̄-n̄kpọ inọ enye [“okop inemesịt,” NW].”—Psalm 32:1, 2.

Inemesịt Otode Edikere Mban̄a Mbon En̄wen

David ekewet ete: “Owo eke etịmde ndinam ye eyen ubuene [“okop inemesịt,” NW].” Enye ama aka iso ete: “Jehovah ayanam enye ọbọhọ ke usen nnanenyịn. Jehovah eyekpeme enye, onyụn̄ enịm enye uwem; enye [“oyokop inemesịt,” NW].” (Psalm 41:1, 2) Ima ima usụn̄ oro David ekekerede aban̄a Mephibosheth, mbụn̄ọ eyen Jonathan edima ufan esie, edi uwụtn̄kpọ oro owụtde nnennen edu oro ikpenyenede iban̄a mme ubuene.—2 Samuel 9:1-13.

Marlies emi edide isụn̄utom ke isua 47 enyene ifet ndisikwọrọ ikọ nnọ mbon oro ẹkefen̄ede ẹkpọn̄ mme ebiet oro ekọn̄ akan̄wanade ke Africa, Asia, ye Edem Usiahautịn Europe. Enye ọkọdọhọ ete: “Mmọ ẹnyene nsio nsio mfịna, ẹsinyụn̄ ẹwak ndikere ke ẹda mmimọ nte nyon̄, ẹnyụn̄ ẹsari mmimọ. Ndin̄wam mme utọ owo emi esinam ẹkop inemesịt kpukpru ini.”

 Marina emi odude ke ntọn̄ọ ntọn̄ọ iduọk isua 40 ekewet ete: “Sia mmendọhọ ndọ, mmesikop ndọn̄esịt ndifiọk ke mmenyene mme ufan oro ẹsin̄wamde mi. Emi esinam mi nda urụk ukopikọ m̀mê mme leta nsịn udọn̄ nnọ mme owo n̄ko. Ediwak owo ẹwụt esịtekọm ẹban̄a emi. Ndin̄wam mbon en̄wen esinam mi n̄kop inemesịt.”

Dimitar, eren emi odude ke ufọt ufọt iduọk isua 20, ọkọdọhọ ete: “Eka mi ikpọn̄ ọkọbọk mi. Ke ini n̄kedide eyenọwọn̄, esịt ama enem mi ndinyene esenyịn Ukpepn̄kpọ N̄wed Esop oro ekesisan̄ade ye ami kpukpru urua ekpep mi nte ẹkwọrọde ikọ. Nsụk n̄wowụt esịtekọm mban̄a nsịnifịk esie. Mmọfiọk ke ikememke utom inọ enye ndisisịn udọn̄ nnọ mi.” Ke ntak oro Dimitar owụtde esịtekọm aban̄a un̄wam oro enye ọkọbọde ini kiet ko, enye an̄wam mbon en̄wen idahaemi onyụn̄ ọdọhọ ete: “Mmesidomo ndisan̄a ye uyen ye akani owo ke an̄wautom ke nsụhọde n̄kaha ini kiet ke ọfiọn̄.”

N̄wed Psalm asiak mme n̄kpọ en̄wen n̄ko oro ẹnamde owo okop inemesịt. Kiet ke otu mmọ edi ufọn edibuọt idem ke Jehovah utu ke idem nnyịn: “Owo eke odudu esie odude [Jehovah] ke idem [“okop inemesịt,” NW].”—Psalm 84:5.

Corinna ọfiọk ke emi edi akpanikọ. Eyenete an̄wan emi ama ọwọrọ aka idụt oro ẹkenen̄erede ẹyom mme ọkwọrọikọ. Enye ọdọhọ ete: “N̄kenyene ndikpep obufa usem, obufa ido unam n̄kpọ, ye obufa usụn̄ ukere n̄kpọ. Eketie nte n̄kpọ eke ndude ke ekondo en̄wen. Esịt ama etịmede mi ke ini n̄kekerede nte ndikwọrọde ikọ ke esen esen n̄kann̄kụk emi. Mma mben̄e Jehovah an̄wam mi, ndien odudu esie ama an̄wam mi n̄keme ndikwọrọ ikọ kpukpru usen ke efakutom oro odude nsannsan. Nte ini akakade, ama enen̄ede emehe mi ndikwọrọ ikọ mi. Mma ntọn̄ọ ediwak ukpepn̄kpọ Bible, ndien ami ke nsụk mbọbọ ufọn nto ndikọwọrọ ndi mi. Mmekpep ke Jehovah ekeme ndinọ nnyịn ukeme ikan ubiọn̄ọ oro akam etiede nte owo ikemeke ndikan.”

Ih, ediwak n̄kpọ ẹtịp ẹsịn ke owo ndikop inemesịt, utọ nte edinam ufan ye Abasi ọkọrọ ye ikọt esie, edibuọt idem ke Jehovah ọyọhọ ọyọhọ, edibọ item esie, ye edikere mban̄a mbon en̄wen. Nnyịn imekeme ndikop inemesịt inyụn̄ inyene mfọn Jehovah ebe ke ndisan̄a ke usụn̄ esie nnyụn̄ nnịm mbet esie.—Psalm 89:15; 106:3; 112:1; 128:1, 2.

[Ikọ idakisọn̄]

[Ndise ke page 12]

Maria

[Ndise ke page 13]

Maree

[Ndise ke page 13]

Susanne ye Andreas

[Ndise ke page 15]

Corinna

[Ndise ke page 15]

Dimitar