Mme Mbụme Ẹtode Mme Andikot

Nso ke ikọ Jesus ọkọwọrọ ke ini enye ọkọdọhọde Nicodemus ete: “Baba owo kiet ikọdọkke ikodụk ke heaven ibọhọke enye oro okotode ke heaven osụhọde edi, kpa Eyen owo”?—John 3:13.

Jesus okodu ke isọn̄ ke ini enye eketịn̄de ikọ emi, ikonyụn̄ idọkke m̀mê ndifiak nnyọn̄ heaven kan̄a. Nte ededi, se ifiọkde iban̄a Jesus ọkọrọ ye se enye ekenemede aban̄a ke ini enye eketịn̄de ikọ emi ekeme ndinam nnyịn ifiọk se ikọ esie ọwọrọde.

Jesus okoto ke “heaven osụhọde edi” sia enye ekebem iso odu do ye Ete esie, edi ke ini ama ekekem, Abasi ama osio uwem Eyen esie emi edisịn ke idịbi Mary, anamde enye edimana nte owo ke isọn̄. (Luke 1:30-35; Galatia 4:4; Mme Hebrew 2:9, 14, 17) Ke Jesus ama akakpa, ẹkenyene ndinam enye eset nte owo eke spirit, ndien afiak ọnyọn̄ okodu ye Jehovah. Ntak edi oro Jesus ọkọdọhọde ke akam oro enye ọkọbọn̄de esisịt ini mbemiso ẹkewotde enye ete: “Ete, nọ mi ubọn̄ oro n̄kenyenede ye afo mbemiso ererimbot ekedide edidu.”—John 17:5; Rome 6:4, 9; Mme Hebrew 9:24; 1 Peter 3:18.

Jesus ikafiakke kan̄a ika heaven ini emi enye ekenyenede nneme ye Nicodemus, kpa Pharisee emi ekedide andikpep ke Israel. Edi akpanikọ ke owo baba kiet ikakpaha inyụn̄ idọk ika heaven kan̄a ini oro. Jesus ke idemesie ọkọdọhọ ke John Andinịm owo baptism ekedi prọfet Abasi emi mîkenyeneke mbiet, “edi owo emi ekpride akan ke obio ubọn̄ heaven okpon akan enye.” (Matthew 11:11) Apostle Peter n̄ko ama owụt ke idem anam-akpanikọ Edidem David ama akpa ndien ke enye okosụk odu ke udi esie, ikọdọkke ikodụk ke heaven. (Utom 2:29, 34) Enyene ntak emi David, John Andinịm owo baptism, ye iren mbuọtidem eken oro ẹkekpan̄ade mbemiso Jesus akakpade, mîkakaha heaven. Mmọ ẹma ẹkpan̄a mbemiso Jesus akasiakde usụn̄ ọnọ mme owo ndiset ke n̄kpa n̄ka heaven. Apostle Paul ekewet ete ke Jesus ekedi ebeiso emi “ọkọtọn̄ọde . . . obufa ye odu-uwem usụn̄”—oro edi usụn̄ uka heaven.—Mme Hebrew 6:19, 20; 9:24; 10:19, 20.

Sia Jesus mîkakpaha kan̄a inyụn̄ iset, nso ke ikọ esie ọkọwọrọ, ke ini enye ọkọdọhọde Nicodemus ete: “Baba owo kiet ikọdọkke ikodụk ke heaven ibọhọke enye oro okotode ke heaven osụhọde edi, kpa Eyen owo”? (John 3:13) Kere ban̄a se Jesus ekenemede ye Nicodemus.

Ke ini andikara Jew emi ekedide ebịne Jesus ke okoneyo, Jesus ama ọdọhọ enye ete: “Ke ata akpanikọ ke ndọhọ fi nte, Ibọhọke owo ekededi ọtọn̄ọ ntak amana, enye ikemeke ndikụt obio ubọn̄ Abasi.” (John 3:3) Nicodemus ama ọbọrọ ete: ‘Didie ke oro ekeme nditịbe? Didie ke owo ekeme ndimana ọyọhọ utịm ikaba?’ Ukpepn̄kpọ Abasi emi aban̄ade nte owo ekemede ndidụk Obio Ubọn̄ Abasi ikan̄wan̄ake enye. Ndi usụn̄ ndomokiet ama odu oro enye ekpekekpepde n̄kpọ emi? Ke akpanikọ, enye ikpekekemeke ndida ifiọk owo ndiọn̄ọ emi; idụhe owo oro ekpekekpepde enye n̄kpọ emi, sia idụhe owo ndomokiet oro akanam odude ke heaven man ekpekeme ndinam owo en̄wen ọfiọk nte owo akpasan̄ade odụk Obio Ubọn̄ heaven. N̄kukụre owo emi ekpekemede ndinam emi ekedi Jesus. Enye ama ekeme ndinam Nicodemus ye mbon eken ẹfiọk emi sia Enye okotode heaven osụhọde edi, onyụn̄ odot ndikpep mme owo mban̄a mme n̄kpọ emi.

Mbụme oro Nicodemus okobụpde mi anam ikụt ufọn edikpep Ikọ Abasi. Iwụtke ifiọk owo ndituak ukot nduọ ke ntak emi se enye okotde ke itie N̄wed Abasi etiede nte ọsọn̄ enye ndifiọk se ọwọrọde. Ẹkpenyene ndida se itie Bible kiet etịn̄de ndomo ye se mme itie Bible en̄wen ẹtịn̄de, nnyụn̄ n̄kụt ke mmọ ẹdu ke n̄kemuyo ye kiet eken. Ke adianade do, se ikanamde ẹtịn̄ ikọ oro ikotde, m̀mê se ẹketịn̄de ẹban̄a ekeme ndin̄wam nnyịn itịm ifiọk se itien̄wed oro ọsọn̄de ndifiọk ọwọrọde.