Ndi Ekebe Ndise Edi Eti Edepeyen?

KE NDUSỤK idaha, ekeme ndinen̄ede nnem fi ndiyak nditọ fo ẹse ekebe ndise man enyene ini anam mme n̄kpọ en̄wen. Edi didie ke emi ekeme nditụk nditọ fo?

The New York Times ọtọt ete ke “se ẹsiode ke ekebe ndise ekeme nditụk idem nseknditọ.” Ke ndụn̄ọde oro ẹkenamde ndondo emi, ẹma ẹwụt nseknditọ isua kiet mbio mbio edinam ekebe ndise emi n̄wan kiet akadade n̄kpọmbre nditọwọn̄ anam n̄kpọ ke nsio nsio usụn̄. Times ọdọhọ ete: “Ke ini n̄wan emi akanamde nte ke n̄kpọmbre oro ọmọn̄ anam imọ n̄kpọ, nseknditọ emi ikamaha ndida n̄kpọmbre oro mbre mbre ndien etie nte esịt ama enen̄ede etịmede mmọ, anam mmọ ẹbọp iso, ẹmiahade iso, mîdịghe ẹtua eyet. Ke ini n̄wan emi akadade n̄kpọmbre oro ebre mbre ata inem inem, nseknditọ emi ẹma ẹnen̄ede ẹyom ndida n̄kpọmbre oro mbre mbre.”

Omokụt do ke ekebe ndise ekeme nditụk nseknditọ. Nso kaban̄a utịp oro enye edikade iso enyene ke idem nditọwọn̄? Dr. Naoki Kataoka emi edide prọfesọ ukpepn̄kpọ aban̄ade udọn̄ọ nditọwọn̄ ke Ufọkn̄wed Ntaifiọk Ukpep Ibọkusọbọ ke Kawasaki ke Kurashiki ke Japan, ama anam ndụn̄ọde ye ediwak nditọwọn̄ oro ẹsinen̄erede ẹtie idop idop mînyụn̄ isakke imam. Kpukpru mmọ ẹma ẹse TV m̀mê mme vidio ke ata anyan ini. Eyeneren kiet emi edide isua iba ikekemeke ndineme nneme inyụn̄ ifiọkke ata ediwak ikọ. Enye ama esise mme vidio kpukpru usen ọtọn̄ọde ke usenubọk tutu esịm mbubịteyo toto ke ini enye ekedide isua kiet. Ekedi n̄kukụre ke eka esie ama eketre ndiyak enye ese vidio nte dọkta eketemede onyụn̄ ọtọn̄ọ ndibre mbre ye enye ke eyen oro ọkọtọn̄ọ nditịn̄ ikọ edifọn edifọn. Ke akpanikọ, ana mme ete ye eka ẹbre ẹnyụn̄ ẹneme nneme ye nditọ mmọ.

Jehovah Abasi, emi edide Anditọn̄ọ ubon, ama ọsọn̄ọ etịn̄ nte edide akpan n̄kpọ ndineme nneme. Anyan ini ko enye ọkọdọhọ ikọt esie ete: “Dọdiọn̄ siak [ikọ Abasi] nọ nditọ fo, nyụn̄ kama mmọ ke inua fo ke ini afo etiede ke ufọk fo, ye ini afo asan̄ade ke usụn̄, ye ke ini afo anade ke isọn̄, ye ke ini afo adahade ke enyọn̄.” (Deuteronomy 6:7) Idịghe ekebe ndise, edi mme ete ye eka ẹkeme ndida ikọ ye edinam mmọ n̄kpep nditọ mmọ n̄kpọ ke mfọnn̄kan usụn̄ “nte ekemde ye usụn̄” mmọ.—Mme N̄ke 22:6.