Edidi Mmọ Ama Okpụhọde Edu Mi Ofụri Ofụri

“AMA enen̄ede ọdọn̄ mi ndisian ubon mi mban̄a ‘angel’ iba oro Abasi ọkọdọn̄de ẹdi ẹdise mi.” Ntre ke eren kiet emi n̄kaiferi iba oro ẹdide Mme Ntiense Jehovah ẹkekade ẹkese, ekewet. Urua ifan̄ mbemiso n̄kaiferi iba emi ẹkekade ẹkese enye, enye ama ataba n̄wan esie emi enye ọkọdọde ke isua 45. Esịt ama enen̄ede etịmede enye. Ikpọ nditọ esie ẹma ẹdọn̄ enye esịt, edi mmọ ẹma ẹdụn̄ oyom usụn̄ ọkpọn̄ enye. Mme ufan ye mme mbọhọidụn̄ esie ikedịghe idise enye.

Eren oro ama asian n̄kaiferi oro ẹkedide ẹdise enye ete: “Nsibọn̄ke aba akam nnọ Abasi.” Nte ededi, mmọ ẹma ẹdọn̄ enye esịt ẹnyụn̄ ẹnọ enye ekpri tract oro ọkọn̄ọde ke Bible emi ẹkotde Nso Idotenyịn Idu Inọ Mbonima Ẹmi Ẹkpade? Enye ama okot tract oro mbubịteyo oro onyụn̄ okop ndọn̄esịt.

N̄kaiferi iba emi ẹma ẹfiak ẹkese eren emi ke esisịt ini ebede. Mmọ ẹma ẹti adan̄a nte enye okofụhọde akpa ini oro mmọ ẹkekade ẹkese enye, ntre mmọ ẹma ẹfiak ẹka ndise nte n̄kpọ etiede ye enye. Eren oro ekewet ke ukperedem ete: “Idem ama akpa mi ndikụt n̄kaiferi iba oro akanam mmendiọn̄ọke ẹsede ẹban̄a mi ẹnyụn̄ ẹkerede ẹban̄a mfọnọn̄kpọ mi.” Se mmọ ẹkenemede ye enye ke Bible ama esịn udọn̄ ọnọ enye. N̄kaiferi oro ẹma ẹdọhọ ke iyafiak idi. Eren oro ama enen̄ede adat esịt tutu enye ewet ikọ oro odude ke ntọn̄ọ ntọn̄ọ ibuotikọ emi ke leta oro enye ọkọnọde ẹsọk Ufọkmbono Obio Ubọn̄ Mme Ntiense Jehovah ke n̄kann̄kụk mmọ.

Mbemiso eren emi ọkọwọrọde okodụn̄ ekpere eyen esie kiet, enye ama odụk mbono esop Mme Ntiense Jehovah onyụn̄ adia udia ye ubon oro kiet ke otu n̄kaiferi emi otode. Enye ekewet ete: “Ami mmọn̄ n̄kpọn̄ ebiet emi, edi nyaka iso nditi n̄kaiferi iba emi ọkọrọ ye ufọkabasi mbufo kpukpru ini, nyonyụn̄ nsịn mbufo ke akam mi. Ih, mmesibọn̄ akam idahaemi ediwak ini. Mmokpụhọde edu mi ofụri ofụri. N̄kaiferi iba emi ẹma ẹnen̄ede ẹn̄wam mi n̄kpụhọde edu mi, ndien nyaka iso ndiwụt esịtekọm nnọ mmọ kpukpru ini.”