‘Mfọnn̄kan Usụn̄ Ndida N̄keberi’

ANDIKPEP ke ufọkn̄wed sekọndri ke Spain ekewet ete: “Ke se iwakde ibe isua ikie idahaemi, Mme Ntiense Jehovah ẹmenen̄ede ẹdiana kiet, ẹnen̄ede ẹnam akpanikọ, ndien ke akande kpukpru, mmọ ẹnyene ata ọkpọsọn̄ mbuọtidem.” Nso ikanam andikpep emi—oro ọdọhọde ke imọ inịmke ke Abasi odu—etịn̄ ikọ oro?

Kpukpru emi ọkọtọn̄ọ ke ini ẹkedọhọde Noemí, eyen ufọkn̄wed sekọndri emi onyụn̄ edide kiet ke otu Mme Ntiense Jehovah, ewet n̄kpọ emi ekedide ubak akpatre udomo esie ke sekọndri. Ibuotikọ emi enye ekemekde ekedi, “Idiọn̄ọ Ọsọbọ Ita Uduot Mmọn̄ibọn̄ ke Ini Ukara Nazi.”

Nso ikanam enye emek ibuotikọ oro? Noemí ọdọhọ ete: “Sia n̄kọfiọkde ke andikpep edise se n̄kewetde, mma n̄kere ke mmekeme ndida ifet oro nnọ enye ikọ ntiense. Mbụk aban̄ade nte Mme Ntiense Jehovah ẹkesọn̄ọde ẹda ẹnam akpanikọ ke ini ukara Nazi ke Germany ama enen̄ede otụk mi esịt. Ntre, n̄kenịm ke oyotụk mbon en̄wen n̄ko.”

Se Noemí ekewetde ama enen̄ede otụk owo awak akan nte enye ekekerede. Se enye ekewetde ama anam ẹnọ enye enọ ke October 5, 2002, ke mbuba uwetn̄kpọ ofụri idụt oro akaban̄ade ifiọk ntaifiọk ye ukpepn̄kpọ aban̄ade edinam ye ifiọk owo. Nta ifiọkn̄wed 20 emi ẹtode mme ọwọrọiso ufọkn̄wed ntaifiọk Spain ẹsinọ enọ oro.

Pilar del Castillo, asan̄autom emi esede aban̄a ukpepn̄wed ke Spain, ọkọnọ Noemí enọ esie. Noemí ama ada ifet oro ọnọ asan̄autom oro vidio Jehovah’s Witnesses Stand Firm Against Nazi Assault. Asan̄autom oro ama ọsọsọp ọbọ vidio oro.

Ko ke Manresa obio mme Noemí, n̄wedmbụk n̄kpọntịbe n̄kann̄kụk ama ewet aban̄a ifiọkn̄wed Noemí onyụn̄ eneme aban̄a se enye ekewetde. Mbemiso emi, etubom ufọkn̄wed mmọ ama ọdọhọ ẹnọ imọ se enye ekewetde man ikpesịn ke ndutịm usọrọ ọyọhọ isua 75 tọn̄ọ ẹkesiak ufọkn̄wed oro.

“Emi edi mfọnn̄kan usụn̄ ndida ukpepn̄kpọ mi ke ufọkn̄wed sekọndri n̄keberi,” ntem ke Noemí ọdọhọ. “Mma nnen̄ede n̄kop idatesịt ke ini n̄kokotde ikọ oro Ete Jorge Tomás Calot, andikpep nnyịn, ekewetde aban̄a se n̄kewetde ke ntọn̄ọikọ esie:

“‘Ami nnịmke ke Abasi odu, edi n̄kpama ẹnen̄ede ẹnam mi nnịm ke Abasi odu, oro anamde mme andituak ibuot nnọ enye ẹnyene ata eti “ima ẹnọ mbọhọidụn̄ mmọ.”’”