Ndinyene Ata Ifiọk

EKEDI ke December 18, 1810. Eyo ama ọtọn̄ọ ndifụk owo idem. Ekpri nsụn̄ikan̄ Mme An̄wanaekọn̄ Mmọn̄ Britain emi ẹkekotde HMS Pallas ama osop usụn̄ ke akpa emi akadahade ke mbọhọ ufọt edem usụk ye edem usiahautịn Scotland. Eyo ndikọdọdiọn̄ n̄kụt ye ọkpọsọn̄ snow emi ekedepde ikayakke mme awat nsụn̄ikan̄ oro ẹkụt ikan̄ ndausụn̄ emi akpadade mmọ usụn̄ man ẹwat ẹkedian ke obot. Kere nte esịt ekenemde mmọ ke ini mmọ ẹkedade ẹkụt ikan̄ ke akpatre ẹnyụn̄ ẹwat ẹka do! Ke mfụhọ, ikan̄ oro ikedịghe ikan̄ ndausụn̄ emi mmọ ẹkeyomde. Ke nditịm ntịn̄, ikan̄ oro ekedi ikan̄ mme anamutom usọ emi akasakde ekpere esụk oro. Mmọ ẹma ẹwat Pallas ẹketọ akamba itiat, ndien enye ama esịp. Owo 11 ẹma ẹkpan̄a. Nso n̄kpọ mmọn̄eyet ke emi ekedi ntem!

Ndudue akanam Pallas esịp. Nte ededi, ndusụk ini abian̄a abian̄a ikan̄ ndausụn̄ esinen̄ede esịn mme awat nsụn̄ikan̄ ke fehesan̄. N̄wed oro Wrecks, Wreckers and Rescuers ọdọhọ ke ẹkesikokoi ẹdomo mme utọ ikan̄ oro man ẹtap mme nsụn̄ikan̄ ẹditọ ikpọ itiat mbenesụk ẹsịp, man ẹkpewo mme nsụn̄ikan̄ oro.

‘Ndisana Uwetn̄kpọ Emi Ẹkemede Ndinam Fi Ọbọ Edinyan̄a’

Nte osụk oyomde ifiọk, afo oyosobo mme afanikọn̄ ẹbietde eke mme awat nsụn̄ikan̄ oro. Afo emekeme nditiene ikọ oro otụnde owo usụn̄, mîdịghe ẹkam ẹkeme ndikokoi mbian̄a fi. Usụn̄ mbiba emi ẹkeme ndida nsịm nnama. Nso ke afo ekeme ndinam man ekpeme idemfo? Kụt ete ke ebiet emi afo ọbọde ifiọk edi eti ye se ẹkemede ndiberi edem. Ke se ibede isua 125 idahaemi, magazine emi omowụt ke Ikọ Abasi eke odudu spirit, kpa Bible, edi akakan ebiet ukọ ifiọk emi ẹkemede ndiberi edem, koro enye ọdọn̄ọ “ndisana uwetn̄kpọ, emi ẹkemede ndinam fi enyene ọniọn̄ ọbọ edinyan̄a.”—2 Timothy 3:15-17.

Edi akpanikọ, man ekeme ndinyene mbuọtidem ke Bible edi ọnọ-ndausụn̄ un̄wana emi ẹkemede ndiberi edem, owụt eti ibuot  ndidụn̄ọde mfiọk nte enye edide akpanikọ. (Psalm 119:105; Mme N̄ke 14:15) Kûmen̄e ndiwet mme andisio magazine emi nyom ntọt oro anamde ata ediwak owo ẹnịm ke Abasi ekenen̄ede ọnọ odudu spirit ẹda ẹwet Bible. Ke uwụtn̄kpọ, kot ediye uduot ekpri n̄wed oro “N̄wed Ofụri Owo. * Enye eneme ekese n̄kpọ emi ẹwụtde ke Bible enen, edi akpanikọ, ye nte ke ẹkenyụn̄ ẹda odudu spirit ẹwet.

N̄wọrọnda Akpanikọ

Nso idi ndusụk n̄wọrọnda akpanikọ emi ẹdọn̄ọde ke “ndisana uwetn̄kpọ” emi? Kere ban̄a mbon oro ẹtienede mi.

Ata Ọkpọsọn̄ Abasi ye Andibot kierakiet emi okobotde kpukpru n̄kpọ odu. (Genesis 1:1) Nnyịn idu koro “[Abasi okobot] kpukpru n̄kpọ” onyụn̄ ọnọ nnyịn uwem. (Ediyarade 4:11) Ntak edi oro anade ituak ibuot inọ enye ikpọn̄-ikpọn̄. Andibot edi akakan Owo emi ekemede ndinọ ifiọk. (Psalm 36:9; Isaiah 30:20, 21; 48:17, 18) Enye enyene ọkpọkpọ enyịn̄ oro oyomde nnyịn isikot. (Exodus 3:15) Enyịn̄ oro, emi ẹdade abisi usem Hebrew ẹwet ẹnyụn̄ ẹkabarede ẹwet YHWH, odu n̄kpọ nte utịm ike 7,000 ke Bible. Ke ediwak isua idahaemi ẹkot enye “Jehovah” ke Ikọ Efịk.—Psalm 83:18.

Jehovah okobot mme owo man ẹdu uwem ke nsinsi ke Paradise mi ke isọn̄. Enye ama ọnọ owo mme edu eke spirit emi ẹbietde esiemmọ. Enye ama ọnọ mmọ ndammana ifiọk ye ukeme oro ẹkpekenamde mmọ ẹnen̄ede ẹma ndidu inem inem uwem mi ke isọn̄. (Genesis 1:26-28) Enye ikedehedei iyom isọn̄ edi ebiet utọ ikpat mbe n̄ka heaven, nte n̄kpọ eke edide ke mmọ ẹkeme ndinyene itie ebuana ye Abasi ke heaven kpọt.

Owo oro Abasi okobotde ikenyeneke idiọk baba kiet. Idiọkido okodụk edi ke ini mme edibotn̄kpọ Abasi—oro edi owo mi ke isọn̄ ye owo eke spirit—ẹkedade ifụre umek n̄kpọ mmọ ẹmek ndisọn̄ ibuot ye Abasi. (Deuteronomy 32:5, NW) Akpa ete ye eka nnyịn ẹma ẹmek ke idemmọ ndibiere se idide eti ye se idide idiọk. (Genesis 2:17; 3:1-5) Oro ama anam n̄kpa atara esịm ofụri ubonowo. (Genesis 3:19; Rome 5:12) Jehovah ama enyịme ndiyọ idiọkido ke ibio ini man ebiere mme eneni oro nsọn̄ibuot oro ekedemerede. Edi se enye akaduakde ọnọ isọn̄ ye ubonowo ikpụhọkede. (Isaiah 45:18) Mme owo ẹyesụk ẹdụn̄ ke nsinsi ke Paradise isọn̄ emi ẹnamde asana.—Matthew 6:10; Ediyarade 21:1-5.

Jesus Christ idịghe Ata Ọkpọsọn̄ Abasi, edi edi Eyen Abasi. Jesus Christ ke idem esiemmọ ekekpep mme anditiene enye ete ẹbọn̄ akam ntem: “Ete nnyịn emi odude ke heaven, yak ẹnam enyịn̄ fo asana.” (Matthew 6:9) Akananam enye ikọdọhọke ke idi n̄ka ye Abasi. Utu ke oro, enye ọkọdọhọ ete: “Ete omokpon akan mi.”—John 14:28.

Jesus enyene akpan udeme ke ndisu uduak Abasi. Abasi ọkọnọ enye “nte un̄wana ke ererimbot, man kpukpru owo eke ẹbuọtde idem ye [enye] ẹkûka iso ẹdu ke ekịm.” (John 12:46) Apostle Peter ọkọdọhọ ke “edinyan̄a  itoho owo efen ekededi.” (Utom 4:12) Emi edi akpanikọ koro edinyan̄a nnyịn ọkọn̄ọ ke ọsọn̄urua iyịp Christ. (1 Peter 1:18, 19) Jesus Christ ọkọnọ uwem esie nte uwa ndifak ubonowo nsio ke idiọkn̄kpọ oro akpa ete ye eka nnyịn, oro edi Adam ye Eve, ẹkedade ẹsọk ofụri ubonowo. (Matthew 20:28; 1 Timothy 2:6) Abasi ama ada Jesus ayararede uduak Esie n̄ko.—John 8:12, 32, 46, 47; 14:6; Utom 26:23.

Abasi ọmọtọn̄ọ Obio Ubọn̄, m̀mê ukara eke heaven, emi Jesus Christ ye mbon oro ẹmekde ke otu ubonowo ẹnamde. Obio Ubọn̄ Abasi edi ata akpan etop Bible. Abasi ọmọnọ mme andikara emi utom edikụt nte ke ẹnam uduak imọ ke isọn̄ kpa nte ẹnamde ke heaven. (Matthew 6:10) Ke editọn̄ọ, ikedịghe uduak Abasi owo ekededi ke otu ubonowo ndika heaven. Ebiet idụn̄ mmọ ekenyene ndidi isọn̄. Edi ke owo ama akanam idiọkn̄kpọ, Abasi ama aduak obufa n̄kpọ. Enye ama aduak ndimek mme owo “ke kpukpru esien ye usem ye obio ye idụt” man ‘ẹkara’ ye Christ ke ukara eke heaven. (Ediyarade 5:9, 10) Ukara Obio Ubọn̄ oro ọyọsọp ‘anuak onyụn̄ ama’ kpukpru orụk ukara owo, emi ẹdade ekese unana inemesịt ye ubiak ẹsọk ubonowo.—Daniel 2:44.

Ukpọn̄ esikpa. N̄wọrọnda akpanikọ Bible emi anam ẹfiọk ekese n̄kpọ ẹban̄ade owo ye idotenyịn oro enye enyenede ndidu uwem. Enye enen̄ede n̄ko ukwan̄ ekikere oro mîyakke mme owo ẹfiọk idaha mme akpan̄kpa.

Ata akpa n̄wed Bible asian nnyịn ete: ‘Ndien Jehovah Abasi obot owo ke ntanisọn̄, onyụn̄ ọduọk ibifịk uwem esịn ke odudu ibuo esie; ndien owo akabade edi ukpọn̄ eke odude uwem.’ (Genesis 2:7) Ndi ọmọfiọk se oro ọwọrọde? Ukpọn̄ idịghe mbukpọn̄ mbukpọn̄ n̄kpọ oro odude ke esịtidem owo. Owo inyeneke-nyene ukpọn̄. Enye ededi ukpọn̄, ndien ẹda mbuaha n̄kpatan̄a n̄kpọ emi ẹdude ke “ntanisọn̄” ye odudu uwem otode Abasi, ẹbot ukpọn̄. Ukpọn̄ esikpa. Ke ini owo akpade, ukpọn̄ akpa oro.—Genesis 3:19; Ecclesiastes 9:5, 10.

Mbon oro ẹkpade ẹkeme ndifiak ndu uwem ebe ke ediset ke n̄kpa. Ke ibio ini oro Abasi ayakde idiọkido odu ama ekebe, “kpukpru mme andidu ke udi editi [ẹyekop Jesus] uyo ẹnyụn̄ ẹwọn̄ọ ẹdi, mbon oro ẹkenamde se ifọnde ẹyeset ke n̄kpa ẹdụk uwem, mbon oro ẹkenamde se idiọkde ẹyeset ke n̄kpa ẹdụk ikpe.” (John 5:28, 29; Utom 24:15) Ediset ke n̄kpa ayanam mme owo ẹfiak ẹdidu uwem ke Paradise isọn̄, nte Abasi okoyomde ẹdu toto ke editọn̄ọ.

 Tịn̄ Enyịn Dụn̄ọde N̄wed Abasi ke Usen ke Usen

Ndi omokụt nte ndifiọk mme utọ n̄wọrọnda akpanikọ oro ekemede ndin̄wam fi? Ke ndiọkeyo afanikọn̄ emi, utọ ifiọk oro ekeme ndikpeme fi nsio ke se “ẹkotde ke nsu ẹte ‘ifiọk,’” emi Satan kpa Devil asuande. Enye anam nte idi “angel un̄wana,” mme asan̄autom esie ẹnyụn̄ ẹnam nte idi “mme asan̄autom edinen ido.” (1 Timothy 6:20; 2 Corinth 11:13-15) Nnennen ifiọk Bible ekeme ndikpeme fi mbiọn̄ọ inua-okot ifiọk akwaifiọk “mbon ọniọn̄ ye mbon ikike” ererimbot, emi ‘ẹduọkde uyo Jehovah.’—Matthew 11:25; Jeremiah 8:9.

Sia ata ediwak nsunsu ukpepn̄kpọ ye akwaifiọk ẹkedude ke eyo apostle John, enye ama odụri mme Christian akpa isua ikie utọn̄ ete: “Ẹkûnịm kpukpru ikọ odudu spirit ke akpanikọ.” Enye ama adian do ete: “Ẹdomo mme ikọ odudu spirit ẹse man ẹkụt m̀mê mmọ ẹtọn̄ọ ẹto Abasi.” (1 John 4:1) Da enye ntem. Edieke afo ọkpọbọde etop oro ekemede ndinen̄ede ntụk uwem fo, ndi afo ekpenyịme enye inikiet inikiet ye unana edikekere, sia etiede nte etop oro oto owo emi ẹkemede ndiberi edem? Baba-o. Afo okpodụn̄ọde owo emi ọnọde enye ọkọrọ ye se etop oro ọwọrọde mbemiso anamde n̄kpọ aban̄a enye.

Sia Abasi ọnọde n̄wetnnịm n̄kpọ eke odudu spirit emi ọdọn̄ọde n̄wọrọnda akpanikọ, enye anam fi ekeme ndinam orụk ndụn̄ọde oro—man ‘odụn̄ọde ọfiọk’ ke ikan̄ ndausụn̄ oro afo etienede edi eti. (1 Thessalonica 5:21) Ẹma ẹtoro mbon Beroea eke akpa isua ikie ke mmọ ẹnyene ido koro mmọ ‘ẹkenen̄erede ẹdụn̄ọde N̄wed Abasi ke usen ke usen’ ẹte ise m̀mê se mmimọ ikekpepde ẹkedi akpanikọ. (Utom 17:11) Afo emekeme ndinam ntre n̄ko. Yak Bible ada fi usụn̄, “nte utuenikan̄ eke ayamade ke n̄kịmn̄kịm ebiet,” esịm eti itie. (2 Peter 1:19-21) Edieke anamde ntre, ‘afo eyesịme ifiọk Abasi,’ emi edide ata ifiọk.—Mme N̄ke 2:5.

[Ikọ idakisọn̄]

[Ndise ke page 4]

Ikọ Abasi etie nte utuenikan̄

[Ndise ke page 5]

Abasi ekere didie?

[Ndise ke page 5]

Nso idi idotenyịn ubonowo?

[Ndise ke page 6]

Ndi Jesus edi Ata Ọkpọsọn̄ Abasi?

[Ndise ke page 6]

Mme akpan̄kpa ẹdu m̀mọ̀n̄?

[Ndise ke page 7]

Ediset mme akpan̄kpa edi kiet ke otu n̄wọrọnda akpanikọ oro ẹkpepde ke Bible