Mme Mbụme Ẹtode Mme Andikot
Mme Mbụme Ẹtode Mme Andikot
Nnyịn isan̄a didie ifiọk ke eti ibuot oro ẹtịn̄de ẹban̄a ke Mme N̄ke 8:22-31 aban̄a Jesus Christ ke ini emi enye okodude ke heaven mbemiso ekedide owo?
N̄wed Mme N̄ke oro ẹkedade odudu spirit ẹwet etịn̄ ntem aban̄a eti ibuot: “Jehovah ekenyene mi ke akpa editọn̄ọ usụn̄ esie, ke enye mîka-inamke n̄kpọ esie, ke ata eset. . . . N̄kamana ke ini ikpọ obot mîka-iwụhọke, ke ini n̄kpri obot mîka-idụhe: . . . Ami n̄kodu do ke adan̄aemi enye owụkde enyọn̄: . . . ndien ndu enye ke n̄kan̄ [“nte etubom anamutom,” NW]: n̄konyụn̄ ndi se idatde enye esịt ofụri usen; ndara ke iso esie kpukpru ini: . . . ndien idatesịt mi odu ke otu nditọ owo.”
Itie N̄wed Abasi emi ikemeke nditịn̄ mban̄a eti ibuot emi otode Abasi m̀mê eti ibuot oro owo enyenede. Ntak idọhọde ntre? Koro ‘ẹkenyene,’ m̀mê ẹkebot eti ibuot oro ẹtịn̄de ẹban̄a ke itie N̄wed Abasi emi ke akpa editọn̄ọ usụn̄ Jehovah. Jehovah Abasi ododu kpukpru ini onyụn̄ enyene eti ibuot kpukpru ini. (Psalm 90:1, 2) Eti ibuot esie inyeneke ntọn̄ọ; owo ikonyụn̄ ibotke-bot eti ibuot esie. Owo ‘ikamanke-man’ eti ibuot esie. N̄ko-n̄ko, ẹdọhọ ke eti ibuot emi etịn̄ ikọ onyụn̄ anam utom, owụtde ke enye ada aban̄a owo.—Mme N̄ke 8:1.
N̄wed Mme N̄ke ọdọhọ ke eti ibuot emi okodu ye Jehovah, kpa Andibot, ke ata eset, nte “etubom anamutom.” Ke akpanikọ, eti ibuot oro ada aban̄a Jesus. Jesus ama enen̄ede adiana ye Jehovah anam utom ke ata anyan ini mbemiso enye ekedide isọn̄ tutu Ikọ Abasi ọdọhọ ete: “Enye odu mbemiso kpukpru n̄kpọ eken ndien ebede ke enye ke ẹkenam kpukpru n̄kpọ eken ẹdidu.”—Colossae 1:17; Ediyarade 3:14.
Enen̄ede odot ndidọhọ ke eti ibuot ada aban̄a Eyen Abasi, koro enye akayararede uduak ye mme ewụhọ Jehovah oro ẹwụtde eti ibuot. Jesus ekedi Ikọ Abasi, m̀mê Etịn̄ikọ ke ibuot Abasi ke ini enye okodude ke heaven mbemiso ekedide isọn̄ nte owo. (John 1:1) Ẹdọhọ ke enye edi “odudu Abasi ye ọniọn̄ [m̀mê eti ibuot] Abasi.” (1 Corinth 1:24, 30) Nso inem inem enyịn̄ ke ẹnọ Eyen Abasi ntem, emi idatesịt esie kaban̄a ubonowo akanamde enye ọnọ uwem esie nte ufak ke ibuot mmọ!—John 3:16.
[Ndise ke page 31]
“N̄kamana ke ini ikpọ obot mîka-iwụhọke”