Nte Edisịne Ọfọn̄ Idet Unam Anam Owo Edi Owo Abasi?
Nte Edisịne Ọfọn̄ Idet Unam Anam Owo Edi Owo Abasi?
EDIDEM LOUIS IX ama esisịne utọ ọfọn̄ emi. Ke ini Sir Thomas More ekekpepde ibet ke ini enye ekedide akparawa, ọfọn̄ emi ikesiyakke enye ede idap ebe hour inan̄ m̀mê ition kpukpru usen ke ediwak ọfiọn̄. Ẹnen̄ede ẹfiọk ke More ama esisịne ọfọn̄ emi ata ediwak ini. Ke ini ẹkewotde Akwa Bishop Canterbury emi ekekerede Thomas Becket ke Akwa Ufọkederi Canterbury, idem ama akpa mme owo ndikụt ke enye ekesisịne ọfọn̄ idet unam emi nte ọfọn̄ idakidem. Nso ke mme owo emi ẹda ebiet kiet eken? Mmọ mbita ẹkesisịne ọfọn̄ idet unam mbak ẹdikop inem idem, ke ntem ẹbiọn̄ọde mme udọn̄ obụkidem.
Ẹkeda idet ebot ẹnam ọfọn̄ emi, ndien ẹkesisịne enye nte ọfọn̄ idakidem man enye atịgha owo ke idem, anamde andisịne okûkop inem idem. Idan̄ ẹma ẹsidụn̄ ke ọfọn̄ emi. Ẹdọhọ ke Thomas Becket ekesisịne ọfọn̄ emi ọkọrọ ye ibio ọfọn̄ukot oro ẹdade idet ebot ẹnam n̄ko, ndien “idan̄ ẹkesiyọyọhọ mmọ.” Ke ọyọhọ isua ikie 16 ama ekebe, ndusụk ini mme owo ẹma ẹsisịne ọfọn̄ oro ẹdade waya oro ẹtiede n̄kukịm n̄kukịm ẹnam utu ke enye oro ẹdade idet ebot ẹnam. Ọfọn̄ waya emi ama esikịm owo ọnọ unan.
N̄wed ndụn̄ọde kiet ọdọhọ ke ẹkesisịne utọ ọfọn̄ emi mîdịghe ẹnọ idem unan ke usụn̄ efen man “ẹbiat ndiọi udọn̄ obụkidem ẹnyụn̄ ẹnam owo ẹnen̄ede ẹnyene udọn̄ ke n̄kpọ Abasi ye ke nti ido uwem.” Idịghe mbon oro ẹsuade inem uwem kpọt ẹkesisịne ọfọn̄ emi; mme usụhọde owo ye mbon oro ẹnyenede ikpọ itie ke ukara ẹma ẹsisịne ọfọn̄ emi n̄ko. Idem mfịn emi, ndusụk n̄ka ido ukpono ke ẹsesịne ọfọn̄ emi.
Ndi edisịne ọfọn̄ idet unam m̀mê editụk idem anam owo edi owo Abasi? Baba-o, idịghe mme utọ n̄kpọ oro ẹnam owo edi owo Abasi. Ke akpanikọ, apostle Paul ama akpan utọ “ọkpọsọn̄ ntụkidem” oro. (Colossae 2:23) * Utu ke oro, ndiyom ifiọk Abasi ebe ke ndisịn ifịk n̄kpep Ikọ esie nnyụn̄ nda ifiọk oro ndu uwem anam owo edi ata owo Abasi.
[Ikọ idakisọn̄]
^ ikp. 5 Edieke oyomde ndifiọk n̄kpọ efen efen mban̄a n̄kpọ emi, se ibuotikọ emi, “The Bible’s Viewpoint: Is Asceticism the Key to Wisdom?” ke Awake! eke October 8, 1997.
[Mme ebiet ẹdade ndise ẹto ke page 32]
Edidem Louis IX, ke enyọn̄ enyọn̄: Ẹda ẹto n̄wed oro Great Men and Famous Women; Thomas Becket, ufọt: Ẹda ẹto n̄wed oro Ridpath’s History of the World (Eb. IV); Thomas More, isọn̄: Ẹda ẹto n̄wed oro Heroes of the Reformation, 1904