Ẹnen̄ede Ẹnam N̄kọri ke Ediye Isuo

ESINEM isenowo oro ẹsikade Taiwan ndikụt awawa mbiet ẹyọhọde isuo emi. Ndiye awawa edesi ẹsikọri ẹkabade ẹtie utouto ke ini ukpen̄e. Ikpọ akai ẹdodu ẹkanade mben ikpọ obot. Mme unaisọn̄ ye ikpọ obot oro awawa mbiet ẹkọride mi ẹnen̄ede ẹye ẹnyụn̄ ẹfụre owo ke idem ẹkan ikpọ obio oro mme owo ẹwakde ẹkaha. Kamse, ntak uyai isuo emi akanam akpa owo oro okotode Edem Usoputịn edi isuo emi okot enye Ilha Formosa, m̀mê “Ediye Isuo.”

Ih, Taiwan edi ekpri ediye isuo—kilomita 390 kpọt ke uniọn̄ ye n̄kpọ nte kilomita 160 ke ebiet oro atarade akan. Iwakke ebiet ke isuo emi oro ikpọ obot mîdụhe. Yü Shan (Obot Morrison) okon̄ akan Obot Fuji ke Japan, m̀mê Obot Cook ke New Zealand. N̄kpri unaisọn̄ oro ẹsopde ibuot ke inyan̄ ẹkanade ikpọ obot emi ẹkụk, ndien mi ke mbon Taiwan oro ẹwakde idahaemi ẹbe miliọn 22 ẹdụn̄ọ.

Orụk N̄kọri En̄wen

Nte ededi, ẹka iso ndinen̄ede n̄kụt orụk n̄kọri en̄wen ke Taiwan—n̄kọri eke spirit. Ifịk oro n̄kpri ye ikpọ owo ẹnyenede ke ndondo oro mmọ ẹdide ẹdifiọk ata Abasi, Jehovah, etịp esịn ke n̄kọri emi. Enen̄ede eye ndikụt ke ibat mbon oro ẹsịnde ifịk ẹn̄wam mbon en̄wen ẹfiọk Jehovah ye uduak esie ke ọkọri.

N̄kọri esida utom efen efen edi. Ke ntre, ẹma ẹdep isọn̄ ke December 1990 man ẹtat n̄kọk itieutom Mme Ntiense Jehovah. Akani n̄kọk itieutom oro okodude ke Taipei ama ekpri akaha ndise mban̄a utom oro mme asuanetop Obio Ubọn̄ 1,777 oro ẹkedude ke Taiwan ini oro ẹkenamde. Ke mme anamutom unyịmesịt eke ofụri ererimbot ye eke n̄kann̄kụk—n̄kpri ye ikpọ—ẹma ẹkesịn ifịk ẹnam utom ke ediwak isua, ẹma ẹkụre ediye obufa n̄kọk itieutom ke Hsinwu ke August 1994. Mme asuanetop 2,515 ẹkesitan̄a eti mbụk Ikọ Abasi, kpa Bible, ini oro. Idahaemi, ke se ikande isua  duop ẹma ẹkebe, mme asuanetop ẹmewak ẹkan oro utịm ikaba, ẹwakde ẹbe 5,500, ndien n̄kpọ nte mme asuanetop 1,400 ẹsibuana ke utom ukwọrọikọ uyọhọ ini kpukpru ọfiọn̄. Nnyịn ifreke mme uyen oro ẹtiede nte inem inem “mbara” usenubọk, emi ẹnen̄erede ẹsịn ifịk ke utom emi.—Psalm 110:3.

Mme Uyen Ẹnam N̄kọri eke Spirit

Ediwak mme asuanetop eti mbụk oro ẹnyenede ifịk ẹdi mme uyen. Ndusụk mmọ ẹdi nditọ ufọkn̄wed praimari. Ke uwụtn̄kpọ, ẹma ẹkot n̄wan ye ebe emi ẹdụn̄de ke obio kiet ke edere edere Taiwan ẹte ẹdidụk Ufọkn̄wed Utom Ukara Abasi, kpa ufọkn̄wed oro ekpepde Mme Ntiense Jehovah nte ẹkpekpepde mme owo akpanikọ Bible. Idem ama akpa n̄wan ye ebe emi ndikụt Weijun, ekpri eyeneren, adade ke mbot utịn̄ikọ okot Bible udọn udọn akan ediwak ikpọ owo. Ekem ke ini mmọ ẹkedụkde mbono esop en̄wen, ama enen̄ede enem mmọ ndikụt nte idem n̄kpri nditọwọn̄ oro mîtọn̄ọke kan̄a n̄wed ẹnọde mme ibọrọ oro ẹsịnede ifiọk. N̄wan ye ebe emi ẹma ẹtịn̄ ẹban̄a usụn̄ nte n̄kpri nditọwọn̄ oro ẹkedude ke Ufọkmbono Obio Ubọn̄ ẹkenyenede ido.

Ntak emi n̄kpri nditọwọn̄ emi ẹnen̄erede ẹma ukpep Bible oro mmọ ẹbọde ke idụt oro mbon ido ukpono Buddha ye Toa ẹwakde ẹkan mi? Ntak edi ke mme ete ye eka mmọ oro ẹdide Christian ẹmeda mme edumbet Bible ẹsịn ke edinam ẹnyụn̄ ẹbọp inem inem ubon oro ẹdade itie ebuana mmọ ye Jehovah ke akpan n̄kpọ. Sia ete ye eka Weijun ẹsịnde ifịk ẹnam ukpepn̄kpọ Bible ubon ye utom ukwọrọikọ ẹnyene inem, akpan ye adiaha eka Weijun ẹdi Mme Ntiense oro ẹma ẹkena baptism. Ke ini Weijun ọkọdọhọde ke ndondo emi ke imoyom nditiene n̄kwọrọ ikọ, eka esie ama ọdọhọ ke enye ama enenịm ediwak magazine ọfiọn̄ oro akan se kpukpru mbonubon eken ẹkenịmde. Weijun esikop inem ndineme mban̄a akpanikọ, ndinọ ibọrọ ke mme mbono esop, ndinyụn̄ mbuana se enye ekpepde ye mbon en̄wen.

Nte Mmọ Ẹkọride Ẹkponi

Didie ke utọ n̄kpri nditọwọn̄ oro ẹsinam n̄kpọ ke mmọ ẹma ẹkekponi? Ata ediwak mmọ ẹsika iso ẹnen̄ede ẹma Jehovah ye utom ukwọrọikọ. Ke uwụtn̄kpọ, Huiping edi eyen ufọkn̄wed. Usen kiet andikpep ama ọdọhọ ke mbon ido ukpono kiet isikịmke iyịp isịn ke idem edi ke imọ ifiọkke m̀mê mmọ ẹdi mmanie. Ke andikpep oro ama ekekpep n̄kpọ okụre, n̄kaiferi Christian emi ama asian enye ke mbon ido ukpono oro ẹdi Mme Ntiense Jehovah onyụn̄ etịn̄ ntak emi mmọ mîsikịmke iyịp isịn ke idem.

Andikpep en̄wen ama owụt vidio aban̄ade mme udọn̄ọ ẹmende ẹto idan̄. Vidio oro ama asiak 1 Corinth 6:9, edi andikpep oro ama ọdọhọ ke Bible ikpanke idan̄ ukemuduot. Huiping ama ọtọn̄ọ ntak anam andikpep emi ọfiọk ekikere Abasi kaban̄a idan̄ ukemuduot.

Ke ini Shuxia, nsan̄a ubet ukpepn̄kpọ Huiping eketịmde utịn̄ikọ aban̄ade afai ubon, Huiping ama ọnọ enye Awake! eke November 8, 2001, emi ibuotikọ edide “Help for Battered Women” onyụn̄ asian enye ke Awake! oro ọdọn̄ọ ekese ntọt oro ẹkọn̄ọde ke Bible ẹban̄ade afai ubon. Nte ini akakade, Shuxia ama akabade edi asuanetop oro mînaha kan̄a baptism. Idahaemi enye ye Huiping ẹsibuana eti mbụk ye mbon en̄wen.

Ediwak mme Christian oro ẹkade n̄wed ẹkụt ke ọsọn̄ ndidi mbon oro ẹdiọn̄ọde nte ẹdade mme edumbet Bible ẹdu uwem. Emi edi ntre akpan akpan ke n̄kpri obio-in̄wan̄. Zhihao ekenyene ndiyọ nsahi oro ubọkn̄ka esie ẹkesisakde enye ke ntak se enye enịmde ke akpanikọ ye ke ntak utom ukwọrọikọ. Enye ọdọhọ ete: “Esịt ama esinen̄ede etịmede mi tutu esinam mi ndịk ndikụt mme nsan̄a ubet ukpepn̄kpọ mi ke ini n̄kwọrọde ikọ. Ndusụk ini, mbon oro ẹsisakde mi ẹsisịm owo duop!” Usen kiet andikpep ama ọdọhọ Zhihao eneme ido ukpono esie ye mme nsan̄a ubet ukpepn̄kpọ esie. Zhihao ọdọhọ ete: “Mma mbiere ndida Genesis ibuot 1 ntọn̄ọ nneme mi ndien ekem nneme mme utọ  mbụme nte: Anie akanam isọn̄ ye kpukpru se idude ke esịt? Owo akasan̄a didie edidu uwem? Ndusụk mmọ ẹma ẹtọn̄ọ ndisak mi ndondo oro n̄kokotde N̄wed Abasi, ẹnyụn̄ ẹdọhọ ke se n̄ketịn̄de edi nsu. Nte ededi, mma n̄ka iso ke nneme mi tutu n̄kụre. Ke oro ebede, mma nnyene ifet ndinyene ọkpọkpọ nneme ye ndusụk nsan̄a ubet ukpepn̄kpọ mi mban̄a utom nnyịn ye se inịmde ke akpanikọ. Idahaemi mmọ isisakke mi aba ke ini ẹkụtde nte n̄kwọrọde ikọ!”

Zhihao aka iso ọdọhọ ete: “Sia ete ye eka mi ẹdide Mme Ntiense, nnyịn imesineme itie N̄wed Abasi eke usen ke usen kpukpru usenubọk. Nnyịn imesikpep Bible n̄ko inyụn̄ idụk mme mbono esop kpukpru ini. Ntak edi oro nsikemede ndiyọ owo ekededi oro esisụk oyomde ndisak mi nsahi ke ini ndomode ndibuana akpanikọ Bible oro ọnọde ndọn̄esịt ye mbon en̄wen.”

Tingmei aka n̄wed ke ufọkn̄wed iban oro ẹkpepde ubọkutom. Isan̄ kiet, ẹma ẹkot enye edisan̄a ye ndusụk nsan̄a ubet ukpepn̄kpọ esie ọkọrọ ye n̄kparawa ẹtode ufọkn̄wed iren, aka isan̄ inemesịt. Enye ama ada okụt ke utọ isan̄ oro ekeme ndisụn̄ọ ke oburobụt ido onyụn̄ esịn nditiene n̄ka. Ẹma ẹfiak ẹkot enye ediwak ini, okposụkedi enye ama ekeneneme mme akpan n̄kpọ ẹtode n̄wed Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn * ye mme nsan̄a ubet ukpepn̄kpọ esie. Mme n̄kaiferi emi ẹma ẹsak enye ẹnyụn̄ ẹdọhọ ke enye edi owo eset. Nte ededi, ikebịghike ama ana in̄wan̄-in̄wan̄ ke owụt eti ibuot nditiene mme edumbet Bible koro kiet ke otu mme n̄kaiferi ubet ukpepn̄kpọ esie ama oyomo onyụn̄ osion̄o idịbi. Tingmei ọdọhọ ete: “Ndinam se Jehovah ọdọhọde amanam mi nnyene edisana ubieresịt. Emi anam mi nnen̄ede n̄kop idatesịt ye uyụhọ.”

Ndikan Mme N̄kpọ Oro Mîyakke Ẹnam N̄kọri

Ruiwen edi kiet ke otu n̄kpet n̄kpet ufan Tingmei. Ke ini Ruiwen ekedide ekpri n̄kaiferi, eketie enye nte ke ndidụk mme mbono esop Christian nnyụn̄ mbuana ke an̄wautom ẹkekam ẹfefek owo. Nte ededi, ke ini enye okokụtde ke ata ima oro mbon esop mmọ ẹnyenede okpụhọde ye ufan inua inua oro nsan̄a ubet ukpepn̄kpọ esie ẹkenamde ye enye, enye ama edikụt ke oyom inam ukpụhọde ke uwem imọ. Ruiwen ama ọtọn̄ọ ndikwọrọ ikọ nnọ mme nsan̄a ubet ukpepn̄kpọ esie ndien ikebịghike enye ama edinen̄ede ọfiọk se akpanade imọ inam. Enye ama ọtọn̄ọ ndikwọrọ ikọ nte asiakusụn̄ unọ un̄wam, adade se ibede  hour 50 ọkwọrọ ikọ kpukpru ọfiọn̄. Ekem enye ama ọtọn̄ọ ndinam utom usiakusụn̄ ofụri ini, adade se ibede hour 70 ọkwọrọ ikọ kpukpru ọfiọn̄. Ruiwen ọdọhọ ete: “Mmenen̄ede n̄wụt esịtekọm nnọ Jehovah. Enye ikedehedei iduọk idotenyịn ke idem mi. Idem okposụkedi n̄kanamde se idiọkde enye esịt, enye okosụk amama mi. Eka mi ye mbon eken ke esop ẹma ẹwụt n̄ko ke imama mi. Idahaemi ami nnịm ukpepn̄kpọ Bible ition, ndien mmokụt ke nnam utom oro enen̄erede ọnọ owo uyụhọ.”

Ẹma ẹmek nditọ Ntiense iba emi ẹkade ufọkn̄wed sekọndri oro odude ke obio-in̄wan̄ kiet ẹte ẹtiene ẹbuana ke mbuba unek ke ibuot ufọkn̄wed mmọ. Ke ini mme uyen Ntiense oro ẹkefiọkde se mbuba oro abuanade, mmọ ẹma ẹkụt ke esịt oyobiom mmimọ nditiene mbuana. Ke ini mmọ ẹkedomode ndinam ekikere mmọ an̄wan̄a nnyụn̄ mben̄e ẹsio enyịn̄ mmimọ ẹfep, owo ikenyịmeke. Utu ke oro, mme andikpep ẹma ẹsian mmọ ke mmọ ẹnyene nditiene mmia mbuba oro koro ẹma ẹmek mmọ. Sia mîkenyịmeke nditiene mmia mbuba oro, mme uyen Ntiense oro ẹma ẹka ikpehe Intanet oro aban̄ade ukpepn̄wed ẹkewet leta ẹnọ ẹsọk itieutom esede aban̄a ukpepn̄wed ẹnyụn̄ ẹsian mmọ mfịna mmọ. Okposụkedi owo mîkọnọhọ mme uyen oro ọkpọkpọ ibọrọ, ikebịghike ẹma ẹteme ufọkn̄wed mmọ ẹte ẹkûnyịk owo ndomokiet etiene amia mbuba oro. Esịt ekenem uyen iba emi didie ntem ndikụt ke ukpep Bible oro mmọ ẹkebọde ama anam mmọ ẹnyene eti ubieresịt onyụn̄ ọnọ mmọ ukeme ndisọn̄ọ nda nnam se inende!

Idem mbon oro ẹbiomode ndo ẹnen̄ede ẹnem esịt ndibuana etop Bible ye mbon en̄wen. Minyu ọdọn̄ọ akpauben̄ toto ke emana. Sia n̄kaiferi emi mîkemeke ndida ubọk nnam n̄kpọ, enye esida edeme okụbọde Bible oyom itien̄wed oro enye oyomde ndikot. Ke ini enye ọnọde utịn̄ikọ ke Ufọkn̄wed Utom Ukara Abasi ke Ufọkmbono Obio Ubọn̄, enye esina ke isọn̄ isọn̄ n̄kpana ke adan̄aemi enyeneufọk esitiede ke isọn̄ isọn̄ n̄kpọitie akama ukwak utịn̄ikọ ọnọ enye. Esidi n̄kpọ inemesịt didie ntem ndifiọk ukeme oro Minyu esisịnde etịm mme utịn̄ikọ emi!

Ke ini Minyu okoyomde ndikabade ndi asuanetop Obio Ubọn̄, ndusụk nditọete iban ke esop ẹma ẹkpep nte ẹdade urụk ukopikọ ẹnọ ikọ ntiense man ẹkpen̄wam enye. Enye esida edeme esie efịk nọmba urụk ukopikọ ke adan̄aemi nditọete iban ẹsin̄wamde enye ẹwet mme owo oro enye okotde. Enye enen̄ede ama ndinam emi tutu enye akabade edi asiakusụn̄ unọ un̄wam, adade hour 50 esịm 60 kpukpru ọfiọn̄ eneme Obio Ubọn̄ Abasi ye mbon en̄wen ke urụk ukopikọ. Enye emenyene nneme ye ndusụk owo oro ẹbọde mme n̄wed Bible ẹnyụn̄ ẹnyịmede enye esifiak okot mmimọ. Idahaemi enye enịm ukpepn̄kpọ Bible ye owo ita oro enye ekenyenede nneme ke urụk ukopikọ.

Ih, kpa nte inem inem mbara, uyen oro ẹdude ke esop Mme Ntiense Jehovah 78 ke Taiwan ke ẹsịn ifịk ẹnyụn̄ ẹda imaesịt ẹtan̄a eti mbụk Obio Ubọn̄ oro ọnọde uwem ẹnọ ediwak miliọn owo oro ẹyọhọde isuo emi. Emi etịp esịn ke ndisu ntịn̄nnịm ikọ Bible oro osude ke ofụri ererimbot mi: “Ikọt fo ẹdi enọ ima-esịt ke usen odudu fo, ke edisana mbana—oto ke idịbi usiere—afo emenyene mbara uyen fo.” (Psalm 110:3) Nso nsịnudọn̄ ke mme uyen emi ẹnọ ekemmọ mme ọkwọrọikọ eti mbụk oro ẹma ẹkesọn̄ ntem, ndien ke akande kpukpru, mmọ ẹdat Jehovah Abasi, kpa Ete mmọ eke heaven esịt didie ntem!—Mme N̄ke 27:11.

[Ikọ idakisọn̄]

[Ekebe/Ndise ke page 10]

ẸYOM MME UFỌKMBONO OBIO UBỌN̄ EFEN EFEN

Ke ntak n̄kọri oro odude ke Taiwan, enen̄ede ọsọn̄ ndinyene mme Ufọkmbono Obio Ubọn̄ efen efen. Ntak-a? Koro ke ẹsiode ndusụk obio-in̄wan̄ ẹfep, enen̄ede ọsọn̄ ndikụt isọn̄ oro ọfọnde ndida mbọp mme Ufọkmbono Obio Ubọn̄. Akan oro, isọn̄ enen̄ede ọsọn urua, ukara inyụn̄ isịnke mbubru ke ibet aban̄ade nte ẹdade isọn̄ ẹnam n̄kpọ. N̄kukụre se ẹkemede ndinam ke ikpọ obio edi ndikpe okụk mbọ mme ufọk oro ẹkebọpde ẹnọ utom ọfis nnyụn̄ nda mmọ nnam mme Ufọkmbono Obio Ubọn̄. Kpa ye oro, dek ediwak ufọk emi ẹsikpere isọn̄ ẹkaha, okụk ufọk ọsọn̄ urua akaha, inyụn̄ idịghe ebiet emi ẹsiyakde mme owo ẹbe ẹdụk nte ẹmama. Mme n̄kpọ eken n̄ko isiyakke mme utọ ufọk emi ẹfọn ndida nnam mme Ufọkmbono Obio Ubọn̄.

Kpa ye oro, ke mme isua ndondo emi, Mme Ntiense Jehovah ke Taiwan ẹmenyene ediwak mbufa Ufọkmbono Obio Ubọn̄. Mmọ ke ẹka iso ẹyom mbufa itie ndibọp Mme Ufọkmbono Obio Ubọn̄ ẹnyụn̄ ẹnyịme nditịp okụk man ẹse ẹban̄a emi, mmọ ke ẹnyụn̄ ẹkpep mme usọ ubọpufọk oro ẹyomde.