Ọsọn̄ edi Ikopke Ndobo

USỌN̄ esibiomo ediwak owo ndo onyụn̄ anam mmọ ẹkop ndobo. Edi Fernand Rivarol emi akakpade ke Geneva ke Switzerland, ke ini ekedide isua 95, ikokopke ndobo. Enye okodụn̄ ikpọn̄ koro n̄wan esie ama ebe efep ndien eyenan̄wan esie oro ẹma ẹkedọ okodụn̄ ke ebiet en̄wen ye ubon esie. Okposụkedi Fernand ekesiwakde ndidu ikpọn̄ ke ufọk esie, enye ikokopke ndobo. Enye ekesiwak nditie ke okpokoro ufọtufọk esie nda urụk ukopikọ n̄kot mme owo man ekpenyene nneme Bible ye mmọ.

Nte ededi, enyene ini emi Fernand okokopde ndobo. Ntak-a? Ke ndondo oro Fernand ye n̄wan esie ẹkekabarede ẹdi ifịk ifịk Mme Ntiense Jehovah ke 1939, ọyọhọ ekọn̄ ererimbot iba ama asiaha ke Europe. Fernand ama ọsọn̄ọ eyịre ke ubiere esie oro ọkọkọn̄ọde ke Bible, ke imọ idinamke owo ndomokiet idiọk. Enye ama ataba utom esie ke ntak oro ẹnyụn̄ ẹbiere n̄kpọkọbi isua ition ye ubak ẹnọ enye, ẹdianarede enye ẹkpọn̄ n̄wan ye ekpri eyenan̄wan mmọ ke ofụri ini oro.

Fernand eti se iketịbede ini oro ete: “Eketie ediwak owo nte ke ami n̄kokokoi n̄kpọn̄ eti utom oro n̄kanamde nnyụn̄ nsịn ndise mban̄a ubon mi. Mme owo ikesidaha mi ke n̄kpọ, ẹkesinyụn̄ ẹda mi nte abiatibet. Kpa ye oro, ke ini ntide mme isua afanikọn̄ oro, mmesinen̄ede nti nte Jehovah ekeberede ye nnyịn onyụn̄ an̄wam nnyịn. Ediwak isua ẹmebe tọn̄ọ n̄kpọ emi eketịbe, edi nsụk nnenen̄ede mbuọt idem ye Jehovah nte n̄kọbuọtde ini oro.”

Mbuọtidem emi akanam Fernand esida urụk ukopikọ anam mbon en̄wen ẹfiọk idotenyịn oro N̄wed Abasi ọnọde. Edieke owo akamade nneme Bible oro enye ekenemede, enye ama esinọ n̄wed Bible ẹsọk owo oro. Ekem, enye ama esifiak okot owo oro man ọfiọk m̀mê owo oro ama ama ndikot n̄wed oro. Ndusụk ini mme owo ẹma ẹsiwet leta ẹkọm enye, ndien emi ama esinem enye esịt etieti.

Owo oro ebietde Fernand ke mbọhọ mbufo ekeme ndinyene nneme ye afo. Ntak mûkpan̄ke utọn̄ ukop se enye enyenede nditịn̄ man ọfiọk se enye enịmde ke akpanikọ? Mme Ntiense Jehovah ẹsikop inemesịt kpukpru ini ndisian owo se mmọ ẹnịmde ke akpanikọ.