Mme Enyene Ifụre Ifụre Ido Ẹyeda Isọn̄ Ẹnyene

“N̄kere ke mme n̄kpọ-obot ẹyefiak ẹketie nte ẹkebotde mmọ. . . . Idịghe nte emi ọmọn̄ etetịbe, edi editịbe ko ke ini iso, ke ini obufa enyọn̄ ye obufa isọn̄.”—Jean-Marie Pelt, eyen France emi edide ataifiọk emi anamde n̄kpọ aban̄a n̄kann̄kụk, eketịn̄ ikọ emi.

EDIWAK owo ẹkpema ndikụt ẹnamde isọn̄ emi akabade edi Paradise sia mmọ mînemke esịt iban̄a nte n̄kpọ etiede ke isọn̄. Edi, ndima ndikụt nte isọn̄ akabarede edi Paradise itọn̄ọke mfịn. Ke anyan ini ko, Bible ama ọn̄wọn̄ọ ke isọn̄ ọyọtọn̄ọ ntak edi Paradise. Mme owo ẹnen̄ede ẹmehe ye ikọ Jesus emi ke “mme enyene ifụre ifụre ido . . . ẹyeda isọn̄ ẹnyene” ye “yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 5:5; 6:10) Nte ededi, mfịn, ediwak owo inịmke ke isọn̄ emi ayakabade edi Paradise oro mme enyene ifụre ifụre ido ẹdidụn̄de. Ediwak owo oro ẹdọhọde ke idi Christian ẹkere ke Paradise idifiakke idu aba.

La Vie, magazine France oro ẹsiode ke urua ke urua, etịn̄ ntak emi mme utọ ufọkabasi nte Ufọkabasi Catholic, mînịmke ke Paradise—edide ke heaven m̀mê ke isọn̄—oyodu. Magazine oro ọdọhọ ete: “Ke ukpepn̄kpọ Paradise ama ekenen̄erede ọdọn̄ n̄kam ke Ufọkabasi Catholic ke isua ikie 19 ke nsụhọde n̄kaha, mbon Catholic ẹma ẹditop ekikere emi ẹduọk ofụri ofụri, itịn̄ke-tịn̄ n̄kpọ iban̄a enye aba ke ini mmọ ẹtiede ke idemmọ ẹkere n̄kpọ Abasi, ke ederi mmọ ke Sunday, ke ini oro ẹkpepde ukpepn̄kpọ ido ukpono mmọ, ye ke ini katkisịm mmọ.” Ẹdọhọ ke idem ikọ oro Paradise edi ‘akwa ndịben̄kpọ oro mîn̄wan̄ake owo.’ Ndusụk mme ọkwọrọ ederi ẹkokoi ẹtre nditịn̄ n̄kpọ mban̄a Paradise sia enye “anamde owo enen̄ede ekere aban̄a inemesịt ke isọn̄.”

Frédéric Lenoir, ekpep n̄kpọ mban̄a itie ebuana owo, emi enen̄erede ọfiọk n̄kpọ aban̄a ido ukpono ekere ke Paradise edidi “akani ikọ.” Kpasụk ntre, Jean Delumeau, ewetmbụk eset emi ewetde ediwak n̄wed aban̄a Paradise ekere ke mme ntịn̄nnịm ikọ Bible ẹdisu ke ndamban̄a usụn̄ kpọt. Enye ewet ete: “Ke ndibọrọ mbụme emi, ‘Nso kaban̄a Paradise?’ Ukpepn̄kpọ mme Christian ọdọhọ ete: Sia Andinyan̄a nnyịn ama ekeset, usen kiet kpukpru nnyịn iyokụt nte idotenyịn nnyịn osude.”

Ndi ufọn osụk odu nditịn̄ n̄kpọ mban̄a Paradise isọn̄? Isọn̄ emi editie didie ke ini iso? Ndi imekeme ndinen̄ede mfiọk se iditịbede ke ini iso? Ibuotikọ oro etienede ọyọbọrọ mme mbụme emi.

 [Ebiet Ẹdade Ndise Ẹto ke page 2]

IKPAEDEM: Emma Lee/Life File/Getty Images