Mme Mbụme Ẹtode Mme Andikot
Mme Mbụme Ẹtode Mme Andikot
Ke ẹma ẹkedomo ubonowo akpatre udomo ke utịt Tọsịn Isua Ukara Christ, ndi mme owo ẹyesụk ẹnam idiọkn̄kpọ ẹnyụn̄ ẹkpan̄a?
Itie N̄wed Abasi iba ke n̄wed Ediyarade ẹn̄wam nnyịn ibọrọ mbụme emi. Akpa itien̄wed okot ete: “Ẹtop n̄kpa ye Hades ẹdọn̄ ke n̄kpọdiọhọ ikan̄. Emi ada aban̄a udiana n̄kpa, kpa n̄kpọdiọhọ ikan̄.” (Ediyarade 20:14) Ọyọhọ itien̄wed iba okot ete: “Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.”—Ediyarade 21:4.
Tịm fiọk ini oro mme n̄kpọ emi ẹditịbede. Ẹtop “n̄kpa ye Hades” ẹdọn̄ ke n̄kpọdiọhọ ikan̄ ke ẹma ẹkeda “mme n̄kpọ eke ẹwetde ke n̄wed,” m̀mê mme ibet oro Jehovah edinọde ubonowo ke ini tọsịn isua ukara oro, ẹkpe ikpe mbon oro ẹbọhọde Armageddon, mbon oro ẹsetde ke n̄kpa, ye owo ekededi oro akamanade ke Armageddon ama ekebe. (Ediyarade 20:12, 13) Apostle John ewet n̄kukụt en̄wen oro enye okokụtde, emi odude ke Ediyarade ibuot 21. N̄kukụt emi edisu ke ini Tọsịn Isua Ukara Christ Jesus. Nte ededi, n̄kukụt emi edisu ọyọhọ ọyọhọ ke utịt Usen Ikpe Tọsịn Isua Ukara Christ. Ini oro ndien ke Jehovah edidu ye ubonowo ọyọhọ ọyọhọ ndien esịne-ufọt ndomokiet ididụhe, koro Jesus ayayak Obio Ubọn̄ ọnọ Ete esie. Jehovah oyodụn̄ ye “ikọt esie” ke ndamban̄a usụn̄ ke nsinsi, esịne-ufọt ndomokiet idinyụn̄ idụhe. ‘N̄kpa ididụhe aba’ ke ini ẹdidade ufọn uwa ufak Christ ẹnam ubonowo ẹfọn ẹma.—Ediyarade 21:3, 4.
Ntem, ufak Christ eyetre n̄kpa oro ẹtịn̄de ẹban̄a ke Ediyarade 21:4, kpa n̄kpa oro ẹdade ẹto Adam. (Rome 5:12-21) Ke ini ẹtrede n̄kpa oro ubonowo ẹkedade ẹto Adam, mme owo ẹditie ukem nte Adam ke ini ẹkebotde enye. Adam ekedi mfọnmma, edi oro ikọwọrọke ke enye ikekemeke ndikpa. Jehovah ama ọdọhọ Adam okûdia “eto ifiọk, eti ye idiọk” onyụn̄ adian do ete: “Usen eke afo adiade ke esịt afo ayakpa n̄kpa.” (Genesis 2:17) N̄kpa enye emi okoto n̄koinnam idiọkn̄kpọ. Ke ẹma ẹkedomo ubonowo akpatre udomo ke utịt Tọsịn Isua Ukara Christ, mme owo ẹdisụk ẹnyenyene ifụre ndimek n̄kpọ nnọ idem. (Ediyarade 20:7-10) Mmọ ẹyesụk ẹkeme ndibiere ke idemmọ m̀mê mmimọ iyaka iso inam n̄kpọ Jehovah m̀mê idinamke. Owo ikemeke ndidọhọ ke owo ndomokiet idikpaha edem esie iwụt Abasi, nte Adam akakpade owụt.
Nso iditịbe inọ owo oro emekde ndisọn̄ ibuot ye Abasi ke ama ekebe akpatre udomo, kpa ini oro n̄kpa m̀mê Hades mîdidụhe? N̄kpa ẹdade ẹto Adam ididụhe aba ini oro. Ndien Hades, kpa udi ofụri ubonowo emi mme akpan̄kpa ẹdude ẹbet ediset ke n̄kpa, ididụhe aba. Kpa ye oro, Jehovah oyosobo owo ekededi oro ọsọn̄de ibuot ke n̄kpọdiọhọ ikan̄, anamde owo oro inyeneke idotenyịn ediset ke n̄kpa. N̄kpa enye emi editie nte n̄kpa oro Adam ye Eve ẹkekpade, idịghe n̄kpa oro mme owo ẹkedade ẹto Adam.
Nte ededi, ntak ndomokiet idụhe ndinịm ke owo ekededi ọyọsọn̄ ibuot ye Jehovah. Odu akpan usụn̄ kiet emi mbon oro ẹbede akpatre udomo ẹdikpụhọrede ye Adam. Ẹyenen̄ede ẹdomo mmọ ẹse. Nnyịn imekeme ndinịm ke akpatre udomo oro eyenen̄ede odomo mme owo ese koro Jehovah ọfiọk ndinen̄ede ndụn̄ọde mme owo. Nnyịn imekeme nditịm nnịm ke owo ekededi oro edidade ifụre oro enye enyenede ndimek se enye amade nnam n̄kpọ ke idiọk usụn̄ idibehe akpatre udomo oro. Mmọdo, okposụkedi mbon oro ẹdibede akpatre udomo oro ẹkemede ndisọn̄ ibuot ye Abasi, anamde ẹsobo mmọ ẹfep, enen̄ede etie nte ke owo ekededi oro ebede akpatre udomo idisọn̄ke ibuot ye Abasi.
[Ndise ke page 31]
Ke ẹma ẹkedomo ubonowo akpatre udomo, ke nso usụn̄ ke mmọ ẹditie nte Adam?