Nte Afo Emeti?

Ndi ama ọbọ ufọn ndikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Didie ke Jesus ‘edinyan̄a ubuene’ nte ẹkebemde iso ẹtịn̄ ke Psalm 72:12?

Kpukpru owo ẹyenyene unenikpe ke ini enye edikarade; udia-inọ ididụhe aba. Ekọn̄ esinam mme owo ẹbuene, edi Christ ayanam mfọnmma emem odu. Enye esitua owo mbọm, oyonyụn̄ anam kpukpru owo ẹdiana kiet, onyụn̄ okụt ete ke mme owo ẹnyene udia barasuene. (Psalm 72:4-16)—5/1, page 7.

• Didie ke nnyịn mme Christian ikeme ndiwụt ke imenyene “ifụre utịn̄ikọ”? (1 Timothy 3:13; Philemon 8; Mme Hebrew 4:16)

Nnyịn imekeme ndiwụt ke imenyene ifụre utịn̄ikọ ke ndisịn ifịk n̄kwọrọ ikọ uko uko nnọ mbon en̄wen, n̄kpep mmọ n̄kpọ nnyụn̄ nsọsọp nnọ owo item uforo uforo, n̄n̄wan̄a esịt nnyịn nnọ Abasi ke akam, nnyụn̄ nnyene mbuọtidem ke enye ọyọbọrọ akam nnyịn.—5/15, page 14-16.

• Ntak emi ndusụk ndammana n̄kpọ oro ẹbuanade ndido idan̄ ẹkenamde owo “edehe” ke idak ibet Moses?

Ibet emi ẹkenọde ẹban̄a owo ndidehe ke ntak emi idem erenowo ọbọhọde ọduọhọ, n̄kpọ ọwọrọde n̄wan ke idem, ye umaneyen, ẹma ẹnam mmọ ẹdu edisana uwem, ẹnyene n̄kokon̄ ido uwem, ẹnyụn̄ ẹnen̄ede ẹnam mmọ ẹfiọk nte iyịp edide edisana ye ufọn edisio isop idiọkn̄kpọ.—6/1, page 31.

• Edieke owo oyomde ndikop inemesịt, ntak emi ọkpọfọnde enye odụn̄ọde n̄wed Psalm?

Mme andiwet Psalm ẹma ẹfiọk ke eti itie ebuana ye Abasi ọnọ owo inemesịt. (Psalm 112:1) Mmọ ẹma ẹsọn̄ọ ẹtịn̄ ke idụhe itie ebuana ekededi, inyene obụkidem, ye unen oro owo okụtde oro ẹkemede ndinọ owo inemesịt oro “mbon eke Jehovah edide Abasi mmọ” ẹnyenede. (Psalm 144:15)—6/15, page 12.

• San̄asan̄a itie ebuana ewe ke nditọ Israel eset ẹkenyene ye Jehovah?

Jehovah ama ọtọn̄ọ obufa itie ebuana, oro edi ndidụk ediomi, ye nditọ Israel ke isua 1513 M.E.N. (Exodus 19:5, 6; 24:7) Ke oro ebede, ẹkemaman nditọ Israel ẹsịn ke idụt oro ẹkemekde nte mbon oro ẹyakde idem ẹnọ Abasi. Kpa ye oro, eyen Israel kiet kiet ekenyene ndibiere ke idemesie ndinam n̄kpọ Abasi.—7/1, page 21, 22.

• Ntak emi nnyịn ikpanamde kpukpru n̄kpọ “ye unana nsụkuyo”? (Philippi 2:14)

Ediwak uwụtn̄kpọ N̄wed Abasi ẹwụt ke nsụkuyo ekeme ndisịn mfịna ke otu ikọt Abasi. Nnyịn ikpenyene ndinen̄ede n̄kere mban̄a idiọk utịp oro enye ekemede ndida ndi mfịn. Mme anana-mfọnmma owo ẹsiwak ndiseme eseme, ndien nnyịn ikpenyene ndidu ke edidemede man ikeme ndifiọk idiọn̄ọ ekededi oro owụtde ke imenyene edu emi inyụn̄ ifep enye.—7/15, page 16, 17.

• Nnyịn isan̄a didie ifiọk ke eti ibuot oro ẹtịn̄de ẹban̄a ke Mme N̄ke 8:22-31 ada aban̄a owo?

Jehovah “ekenyene” m̀mê okobot eti ibuot emi ke akpa editọn̄ọ usụn̄ esie. Abasi ododu onyụn̄ enyenyene eti ibuot kpukpru ini, ntre owo ikobotke-bot eti ibuot esie. Eti ibuot oro ẹtịn̄de ẹban̄a ke Mme N̄ke 8:22-31 okodu ye Abasi nte “etubom anamutom,” (NW) ndien enye ada aban̄a owo eke spirit oro akakabarede edi Jesus emi ekenen̄erede adiana ye Abasi anam utom edibot mme n̄kpọ.(Colossae 1:17; Ediyarade 3:14)—8/1, page 31.