“Nte Edide ke Heaven, Yak Edi ke Isọn̄ Kpasụk Ntre”

“Ukpepn̄kpọ Catholic asiak N̄kpọ Inan̄ emi nte Akpatre N̄kpọ Oro Ẹditịbede: N̄kpa, Ikpe, Hell, Heaven.”—Oto n̄wed oro Catholicism, emi George Brantl ewetde.

TỊM fiọk ete ke n̄wed emi isiakke isọn̄ nte kiet ke otu ebiet emi mme owo ẹdidude. Oro ikpakpaha owo idem koro Ufọkabasi Catholic, kpa nte ediwak ido ukpono eken, ẹnịm ke usen kiet ẹyesobo isọn̄ emi. Dictionnaire de Théologie Catholique anam emi an̄wan̄a ke ibuotikọ oro “Utịt Ererimbot” ete: “Ufọkabasi Catholic ẹnịm ẹnyụn̄ ẹkpep ke Abasi ikobotke ererimbot emi ndidu ke nsinsi.” Katkisịm Ufọkabasi Catholic oro ẹsụk ẹsiode ndondo emi ọdọhọ ete: “Ererimbot nnyịn emi . . . idibọhọke nsobo.” Edi edieke ekondo emi edibede efep, nso kaban̄a emi Bible ọn̄wọn̄ọde ke Paradise oyodu ke isọn̄?

Bible etịn̄ in̄wan̄-in̄wan̄ aban̄a Paradise emi edidude ke isọn̄ ke ini iso. Ke uwụtn̄kpọ, prọfet Isaiah eketịn̄ aban̄a isọn̄ ye mme andidụn̄ enye ete: “Mmọ ẹyebọp ufọk  ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia: koro usen ikọt mi ẹbietde usen eto, ndien edimek ikọt mi ẹyedia se ubọk mmọ ẹnamde.” (Isaiah 65:21, 22) Mme Jew oro Abasi ọkọn̄wọn̄ọde un̄wọn̄ọ emi ọnọ ẹma ẹnen̄ede ẹnịm ke usen kiet isọn̄ mmimọ—ye ofụri isọn̄, ke nditịm ntịn̄—ayakabade Paradise man ubonowo ẹbọ ufọn ke nsinsi.

Psalm 37 ọsọn̄ọ idotenyịn emi. Enye ọdọhọ ete: “Mbon nsụkidem ẹyeda isọn̄ ẹnyene.” (Psalm 37:11) Ufan̄ikọ emi itịn̄ke n̄kukụre iban̄a edinam idụt Israel ẹfiak ẹkedụn̄ ke Isọn̄ Un̄wọn̄ọ ke ibio ini. Kpa Psalm emi etịn̄ ata in̄wan̄-in̄wan̄ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Fiọk ete ke psalm emi ọdọhọ ke nsinsi uwem ke isọn̄ edi utịp oro ẹdinọde “mbon nsụkidem.” Ke Bible Usem French, ikọ oro atatde ufan̄ikọ emi ọdọhọ ke ikọ oro ẹkabarede “mbon nsụkidem” mi “enen̄ede ọwọrọ n̄kpọ akan se ẹkabarede emi; enye esịne mbon n̄kpọnnam, mbon oro ẹkụtde ukụt m̀mê ukọbọ ke ntak Yahweh, mbon oro ẹsụkde idem ẹnọ Abasi.”

Ke Isọn̄ m̀mê ke Heaven?

Ke Ukwọrọikọ Oro ke Obot, Jesus ama ọn̄wọn̄ọ un̄wọn̄ọ oro anamde iti mme itien̄wed oro ẹkotde ẹsịn ke enyọn̄ emi. Enye ọkọdọhọ ete: “Inemesịt edi eke mme enyene ifụre ifụre ido, koro mmọ ẹyeda isọn̄ ẹnyene.” (Matthew 5:5) Ih, isọn̄ emi edidi nsinsi enọ oro ẹnọde ikọt Abasi. Nte ededi, Jesus ama asian mme apostle esie ete ke imọ imọn̄ iketịm itie inọ mmọ “ke ufọk Ete” imọ, ye nte ke mmọ ẹyedu ye imọ ke heaven. (John 14:1, 2; Luke 12:32; 1 Peter 1:3, 4) Didie ndien ke nnyịn ikpada mme un̄wọn̄ọ ẹban̄ade mme edidiọn̄ eke isọn̄? Ndi ufọn odu ndisụk ndori enyịn ke mme utọ un̄wọn̄ọ oro mfịn, n̄ko mmanie ẹdibọ mmọ?

Nsio nsio nditọ ukpepn̄kpọ Bible ẹdọhọ ke “isọn̄ oro Jesus eketịn̄de aban̄a ke Ukwọrọikọ Oro ke Obot, ye enye oro Psalm 37 etịn̄de aban̄a edi ndamban̄a n̄kpọ. F. Vigouroux etịn̄ ke n̄wed oro Bible de Glaire ete ke mme ufan̄ikọ emi “ẹda ẹban̄a heaven ye Ufọkabasi.” M. Lagrange, eyen France, emi edide anam-ndụn̄ọde Bible ọdọhọ esie ete ke mme edidiọn̄ emi “iwọrọke ke mme enyene ifụre ifụre ido ẹdida ata ata isọn̄ oro mmọ ẹdụn̄ọde idahaemi ẹnyene, m̀mê ndidori enyịn ndidụn̄ ke isọn̄ oro enen̄erede ọfọn akan emi ke ini iso, edi isọn̄ oro ẹtịn̄de ẹban̄a mi, ebiet ekededi oro enye edidude, ada aban̄a obio ubọn̄ heaven.” Anam-ndụn̄ọde en̄wen ke Bible ọdọhọ esie ete ke un̄wọn̄ọ emi edi “edida n̄kpọ isọn̄ nnam se idude ke heaven an̄wan̄a.” Mme anam-ndụn̄ọde en̄wen ke Bible ẹdọhọ ke “Isọn̄ Un̄wọn̄ọ, kpa isọn̄ Canaan, ada aban̄a obio oro odude ke enyọn̄, oro edi, obio ubọn̄ Abasi, emi mbon oro ẹnyenede ifụre ifụre idọ ẹdidade ẹnyene. Se Psalm 37 ye mme itien̄wed en̄wen ẹtịn̄de ẹban̄a ẹdi oro.” Edi ndi akpana isọsọp isio ata ata isọn̄ ifep ke mme un̄wọn̄ọ Abasi?

Nsinsi Uduak Kaban̄a Isọn̄

Ke editọn̄ọ, se Abasi akaduakde ọnọ owo ekenen̄ede enyene n̄kpọ ndinam ye isọn̄. Andiwet psalm ekewet ete: “Enyọn̄ edi heaven Jehovah: edi enye ada isọn̄ ọnọ nditọ owo.” (Psalm 115:16) Mmọdo, akpasarade uduak oro Abasi akaduakde ọnọ ubonowo ekenyene n̄kpọ ndinam ye isọn̄, idịghe heaven. Jehovah ama ọnọ akpa n̄wan ye ebe oro utom edinam ofụri isọn̄ akabade etie nte In̄wan̄ Eden. (Genesis 1:28) Emi ikedịghe uduak ibio ini. Jehovah ọsọn̄ọ ke Ikọ esie ete ke isọn̄ emi edidu ke nsinsi. Enye ọdọhọ ete: “Emana kiet aka, emana efen onyụn̄ edi: edi ererimbot ada ke nsinsi.”—Ecclesiastes 1:4; 1 Chronicles 16:30; Isaiah 45:18.

 Akananam se Abasi ọn̄wọn̄ọde ikpụhu, sia enye edide Ata Edikon̄, enye esikụt ete ke mme un̄wọn̄ọ imọ ẹsu. Bible ada nte mmọn̄ esisan̄ade akanade owụt ke mme un̄wọn̄ọ Abasi iditreke ndisu, ete: “Kpa nte edịm ye snow ẹtode ke enyọn̄ ẹsụhọde, ndien ifiakke ika do, tutu ẹbịt isọn̄, ẹnyụn̄ ẹnam enye afiari onyụn̄ etịbe, . . . kpa ntre ke ikọ mi emi ọwọrọde mi ke inua editie: idifiakke itiene mi ubọk-ubọk, tutu enye anam se mmade, onyụn̄ okụt unen ke utom emi ndọn̄de enye.” (Isaiah 55:10, 11) Abasi ọn̄wọn̄ọ un̄wọn̄ọ ọnọ mme owo. Ediwak isua ẹkeme ndibe mbemiso mme un̄wọn̄ọ oro ẹsude, edi mmọ iditreke ndisu. Mmọ “idifiakke ibịne enye” ibọhọke ke ẹma ẹkesu kpukpru se enye eketịn̄de.

Jehovah ama enen̄ede ‘ama’ ndibot isọn̄ nnọ ubonowo. Ke ọyọhọ usen itiokiet oro enye akadade obot n̄kpọ ama ekesịm utịt, enye ama ọdọhọ ke kpukpru n̄kpọ ẹma “ẹfọn eti eti.” (Genesis 1:31) Edinam isọn̄ akabade edi Paradise oro ebịghide ke nsinsi edi ubak uduak Abasi oro mîsụhu kan̄a. Nte ededi, mme un̄wọn̄ọ Abasi ‘idifiakke itiene enye ubọk-ubọk.’ Kpukpru mme un̄wọn̄ọ oro ẹban̄ade mfọnmma uwem emi mme owo ẹdidude ke isọn̄ ke nsinsi, ke emem ye ke ifụre, ẹyesu.—Psalm 135:6; Isaiah 46:10.

Uduak Abasi Itreke Ndisu

Idiọkn̄kpọ akpa ete ye eka nnyịn, Adam ye Eve, ama etịmede ke esisịt ini akpasarade uduak oro Abasi akaduakde ndinam isọn̄ akabade edi Paradise. Ke mmọ ẹma ẹkesọn̄ ibuot, ẹma ẹbịn mmọ ẹsion̄o ke In̄wan̄ Eden. Mmọdo, mmọ ẹma ẹduọk ifet editiene nsu uduak Abasi ndinam mfọnmma ubonowo ẹdụn̄ ke Paradise isọn̄. Kpa ye oro, Abasi ama anam ndutịm man osu uduak esie. Didie?—Genesis 3:17-19, 23.

Se iketịbede ke Eden etie nte owo oro ọtọn̄ọde ndibọp ufọk ke ata eti isọn̄. Nte enye osụk esịnde itiat idakisọn̄, owo edi edibiat itiat idakisọn̄ oro. Utu ke ndision̄o idem n̄kpọn̄ ndibọp ufọk oro, enyeneufọk oro anam n̄kpọ ndikụt nte ke imọbọp ufọk imọ ikụre. Idem okposụkedi ediyomde ẹfiak ẹdian okụk ẹnam utom oro, oro idiwọrọke ke enye ama anam ndudue nditọn̄ọ ndibọp ufọk oro.

Kpasụk ntre, Abasi anam ndutịm ndikụt ke uduak imọ osu. Ke esisịt ini ẹbede ke akpa ete ye eka nnyịn ẹma ẹkenam idiọk, Abasi ama ọtọt idotenyịn oro enye enịmde ọnọ nditọ mmọ—kpa “mfri” oro edifiakde ọdiọn̄ se ẹkebiatde. Man osu ntịn̄nnịm ikọ emi, akpan mfri emi ekedide Jesus Eyen Abasi, ama edi isọn̄ edinọ uwem esie nte uwa man afak ubonowo. (Galatia 3:16; Matthew 20:28) Ke ẹma ẹkenam enye eset aka heaven, Jesus ama akabade edi Edidem Obio Ubọn̄. Enye edi akpan owo emi enyenede ifụre ifụre ido, emi edidade isọn̄ enyene; ndien mme anam-akpanikọ mbon oro ẹmekde, emi ẹnamde ẹset ẹketiene enye ẹkara ke Obio Ubọn̄ emi ẹyetiene enye ẹda ẹnyene. (Psalm 2:6-9) Nte ini akade, ukara emi ayakara ofụri isọn̄ man osu akpasarade uduak Abasi onyụn̄ anam isọn̄ akabade edi Paradise. Anana-ibat mme enyene ifụre ifụre ido “ẹyeda isọn̄ ẹnyene” ke ndibọ ufọn nto ukara Obio Ubọn̄ oro Jesus Christ ye mme nsan̄a esie ẹdikarade.—Genesis 3:15; Daniel 2:44; Utom 2:32, 33; Ediyarade 20:5, 6.

“Nte Edide ke Heaven, Yak Edi ke Isọn̄ Kpasụk Ntre”

Apostle John ama okokụt edinyan̄a oro ẹtịn̄de ẹban̄a mi ke n̄kukụt, emi ndusụk owo ẹdikade heaven, ke adan̄aemi ndusụk ẹdude ke isọn̄. Enye ama okụt ndidem ẹtiede ke heaven, kpa mmọ oro ẹkemekde ẹto mme anam-akpanikọ mbet Christ. Bible etịn̄ in̄wan̄-in̄wan̄ aban̄a mme nsan̄a Christ  emi ete ke “mmọ ẹyekara isọn̄ nte ndidem.” (Ediyarade 5:9, 10) Tịm fiọk adiana-iba n̄kpọ oro ẹdisude uduak Abasi—edifiak nnam isọn̄ edi Paradise ke idak Obio Ubọn̄ heaven oro Jesus Christ ye nsan̄a mme ada udeme ye enye nnyene ẹdikarade. Kpukpru ndutịm oro Abasi anamde mi ẹyenam isọn̄ akabade edi Paradise ke akpatre man ekekem ye akpasarade uduak esie.

Ke akam oro Jesus ekekpepde, enye ama ọdọhọ mme mbet esie ẹbọn̄ akam ẹte uduak Abasi ada itie “nte edide ke heaven, yak edi ke isọn̄ kpasụk ntre.” (Matthew 6:9, 10) Ndi okpowụt ifiọk ndibọn̄ utọ akam emi edieke isọn̄ emi edibede efep m̀mê edieke enye ekpedide sụk ndamban̄a heaven? Ke adianade do, ndi okpowụt ifiọk ndibọn̄ utọ akam emi edieke kpukpru nti owo ẹdikade heaven? Uduak Abasi kaban̄a isọn̄ enen̄ede ana in̄wan̄-in̄wan̄ ke N̄wed Abasi, ọtọn̄ọde ke Genesis emi aban̄ade nte ẹkebotde n̄kpọ tutu esịm n̄kukụt oro ẹdude ke n̄wed Ediyarade. Isọn̄ emi ayakabade edi se Abasi okoyomde enye edi—Paradise. Se Abasi aduakde ndinam edi oro. Ikọt Abasi ke isọn̄ ẹbọn̄ akam ẹte uduak esie emi osu.

Andibot emi edide Abasi emi mîkemeke ndikpụhọde, okoyom mme owo ẹdu uwem ke nsinsi ke isọn̄. (Malachi 3:6; John 17:3; James 1:17) Ke se ibede isua ikie idahaemi, magazine emi, Enyọn̄-Ukpeme, anam mme owo ẹfiọk usụn̄ iba oro Abasi edidade osu uduak esie. Emi anam nnyịn ifiọk mme un̄wọn̄ọ ẹban̄ade edinam isọn̄ afiak edi Paradise nte N̄wed Abasi owụtde. Nnyịn imesịn udọn̄ inọ fi ndinen̄ede ndụn̄ọde n̄kpọ emi nse, edide ke ndinyene nneme ye Mme Ntiense Jehovah m̀mê mme andimịn̄ magazine emi.

[Ndise ke page 4]

Bible etịn̄ in̄wan̄-in̄wan̄ aban̄a nte ẹdifiakde ẹnam isọn̄ edi Paradise ke ini iso

[Ndise ke page 7]

Ndi akam oro Jesus ekekpepde ekpenyene ufọn edieke isọn̄ emi ekpebede efep?