Ke Ini Owo Ima Fo Ọkpọn̄de Jehovah

MARK ye Louise ẹdi Mme Ntiense Jehovah. * Mmọ ẹma ẹsitịm ẹda ima ẹkpep nditọ mmọ n̄kpọ nte Bible etemede mme ete ye eka emi ẹdide Christian. (Mme N̄ke 22:6; 2 Timothy 3:15) Edi n̄kpọ mfụhọ nditịn̄ ke idịghe kpukpru nditọ mmọ ẹkeka iso ẹnam n̄kpọ Jehovah ke mmọ ẹma ẹkekponi ẹwọrọ owo. Louise ọdọhọ ete: “Mmesinen̄ede n̄kop mfụhọ mban̄a nditọ oro ẹkekpọn̄de Jehovah. Emi esinen̄ede abiak mi kpukpru usen. Ke ini mbon en̄wen ẹtịn̄de n̄kpọ ẹban̄a nditọ mmọ, nsikemeke ndisioro uyo, ndien nsinyene ndimụm idem n̄kama.”

Ke akpanikọ, mbonubon oro ẹsọn̄ọde ẹda ẹnam n̄kpọ Jehovah ẹsinen̄ede ẹkop mfụhọ ke ini owo kiet ke ubon emekde ndikpọn̄ Jehovah mînyụn̄ imaha ndisan̄a ke usụn̄ oro N̄wed Abasi etemede. Irene ọdọhọ ete: “Mmenen̄ede mma eyeneka mi. Ndien mmeben̄e idem ndinam n̄kpọ ekededi man enye afiak edikpono Jehovah.” Maria, emi ekpri eyeneka esie eren ọkọkpọn̄de Jehovah aka okodu oburobụt uwem, ọdọhọ ete: “Edi ọkpọsọn̄ n̄kpọ ndiyọ koro enye edi ata eti eyeneka, ke ẹsiode enye ndikpọn̄ Jehovah ẹfep. Esinen̄ede abiak mi ke ini mmen̄kwe enye ke mboho ubon.”

Ntak Ọsọn̄de Ndiyọ Ntre?

Ntak emi esinen̄erede abiak mme iman oro ẹdide Christian ke ini eyen m̀mê iman efen ọkpọn̄de Jehovah? Koro mmọ ẹfiọk ke N̄wed Abasi ọn̄wọn̄ọ nsinsi uwem ke Paradise isọn̄ ọnọ mbon oro ẹkade iso ẹnam akpanikọ ẹnọ Jehovah. (Psalm 37:29; 2 Peter 3:13; Ediyarade 21:3-5) Mmọ ẹdori enyịn ke nsan̄a ndọ, nditọ, ete, eka, nditọeka, ye nditọ nditọ mmimọ ẹyetiene ẹbọ mme edidiọn̄ emi. Esibiak mmọ ke ini mmọ ẹkerede ke mbonima mmimọ oro ẹkekpọn̄de Jehovah ẹkeme nditaba mme edidiọn̄ emi. Idem idahaemi, mme Christian ẹdiọn̄ọ ke ibet ye edumbet Jehovah ẹdi ke ufọn mmimọ.  Mmọdo, mme Christian ẹsinen̄ede ẹfụhọ ke ini mmọ ẹkụtde mbonima mmọ ẹtọde se idinamde mmọ ẹdọk mbiara.—Isaiah 48:17, 18; Galatia 6:7, 8.

Ekeme ndisọn̄ mbon oro akanam iman mmọ mîkpọn̄ke Jehovah ndidiọn̄ọ nte mfịna emi esibiakde owo eketre. Mfịna emi esikpere nditụk ofụri uwem nnyịn. Louise ọdọhọ ete: “Esinen̄ede ọsọn̄ ndikpan̄ utọn̄ ke mbono esop Christian ke ini n̄kụtde nte mme ete ye eka ẹsakde ẹnyụn̄ ẹtịn̄de ikọ ye nditọ mmọ. Idem ke ini ndụkde inem inem edinam ekededi, nsisụk mfofụhọ ke ini ntide ke mbonima mi ikemke ibat.” Christian kiet emi edide ebiowo eti nte n̄kpọ eketiede ke isua inan̄ oro eyen n̄wan esie ekesịnde nditiene mmọ n̄kpono Jehovah. Enye ọdọhọ ete: “Idem ini idara ekesiwak ndidi ini mfụhọ. Edieke nnọde n̄wan mi enọ m̀mê ndade enye n̄ka itie nduọkodudu ke utịturua, enye ama esitua eyet ke ini etide ke adiaha esie ikodụhe do ye nnyịn.”

Ndi mme Christian oro ẹyak n̄kpọ emi afịna mmọ akaha? Baba-o. Ke nditịm ntịn̄, mmọ ẹkam ẹkpebe mme edu Jehovah emi okobotde owo ke mbiet esie. (Genesis 1:26, 27) Nso ke emi ọwọrọ? Kere ise, eketie Jehovah didie ke idem ke ini ikọt esie Israel ẹkesọn̄de ibuot ye enye? Psalm 78:38-41 owụt ke emi ama abiak Jehovah onyụn̄ ayat enye esịt. Kpa ye oro, enye ama ada ime ọnọ mmọ item ye ntụnọ, ndien ke ini mmọ  ẹkewụtde ke imakabade esịt, enye ikesitreke ndifen nnọ mmọ. Nte an̄wan̄ade, Jehovah enen̄ede ama mme edibotn̄kpọ esie, kpa ‘ubọk utom esie,’ isinyụn̄ isọpke ision̄o idem ikpọn̄ mmọ. (Job 14:15; Jonah 4:10, 11) Enye ama ọnọ owo ukeme ndinyene utọ ima oro, ndien mme andibuana ke ubon ẹkeme ndinen̄ede mma kiet eken. Ntre, idem ikpaha nnyịn ke ini mme owo ẹfụhọde ẹban̄a iman mmọ oro ẹkpọn̄de Jehovah.

Ke akpanikọ, iman ndikpọn̄ Jehovah edi kiet ke otu akakan ukụt oro ata mme andituak ibuot nnọ Abasi ẹsikụtde. (Utom 14:22) Jesus ọkọdọhọ ke ubahade oyodu ke ndusụk ubon ke ntak emi enyịmede etop imọ. (Matthew 10:34-38) Oro iwọrọke ke etop Bible esitọ ubahade ke ubon. Utu ke oro, mbonubon oro mînamke akpanikọ ẹsitọ ubahade ebe ke ndisịn, ndikpọn̄, m̀mê ndibiọn̄ọ Ido Ukpono Christ. Nte ededi, ana iwụt esịtekọm inọ Jehovah sia enye esin̄wamde mbon oro ẹnamde akpanikọ ẹnọ enye ẹyọ ukụt oro mmọ ẹkụtde. Edieke afo osụk ofụhọde aban̄a iman fo oro ọkọkpọn̄de Jehovah, mme edumbet Bible ewe ẹkeme ndidọn̄ fi esịt nnyụn̄ n̄n̄wam fi okop idatesịt ye uyụhọ?

Nte Ekemede Ndiyọ

“Ebede ke ndibọp [m̀mê, ndisọn̄ọ] idem mbufo . . . , ẹnịm idem mbufo ke ima Abasi.” (Jude 20, 21) Ekeme ndidi idaha fo iyakke fi ekeme ndinam baba n̄kpọ kiet idahaemi man an̄wam owo ubon fo oro ọkọkpọn̄de Jehovah. Kpa ye oro, afo ekpenyene ndisọn̄ọ mbuọtidem fo ye eke mbonubon fo oro ẹsụk ẹsọn̄ọde ẹda ye Jehovah. Veronica, emi iba ke otu nditọ esie ita ẹkekpọn̄de Jehovah, ọdọhọ ete: “Ẹma ẹti mi ye ebe mi ẹte ke edieke nnyịn ikade iso isọn̄ idem ke n̄kan̄ eke spirit, nnyịn iyenen̄ede ikeme ndifiak ndara nditọ nnyịn ke ini enyịn an̄wan̄ade mmọ. N̄kpọ ekpeketie didie ye idiọk udọ edieke ete esie mîkpekenyịmeke ndifiak ndara enye?”

Man ekeme ndisọn̄ idem, buana ọyọhọ ọyọhọ ke mme edinam eke spirit. Emi esịne edinyene eti ndutịm ukpepn̄kpọ Bible ye edidụk mme mbono esop Christian. Nte idaha fo ayakde, n̄wam mbon en̄wen ke esop. Edi akpanikọ, emi idimemke utom ke ntọn̄ọ. Veronica ọdọhọ ete: “Akpa n̄kpọ oro okodụkde mi ekikere ekedi ndidianade ntie ikpọn̄. Edi, ebe mi ama ọsọn̄ọ etịn̄ ke ọfọn nnyịn inyene eti ndutịm eke spirit. Enye ama okụt ete ke nnyịn imodụk mme mbono esop. Ke ini akamba mbono ekedide edisịm, n̄kenyene ndinen̄ede nsọn̄ọ idem mi esịt man n̄kpekeme ndisobo ye mme owo. Edi, mbono oro ama anam nnyịn itetịm ikpere Jehovah. Mbono oro ama enen̄ede esịn udọn̄ ọnọ eyeneren nnyịn oro ọkọsọn̄ọde ada ye Jehovah.”

Maria oro ikebemde iso itịn̄ iban̄a, okụt ke enen̄ede ọfọn ndinam ekese ke an̄wautom, ndien idahaemi enye ke an̄wam owo inan̄ ẹkpep Bible. Laura n̄ko ọdọhọ ete: “Okposụkedi nsisụk ntuade eyet kpukpru usen, mmọkọm Jehovah koro idem ọkpọkọm mmen̄kwe unen oro ndusụk mme ete ye eka ẹkụtde ke ndibọk nditọ mmọ, mmenyene etop Bible emi ekemede ndin̄wam  mme ubon ke ukperedem ini emi.” Ken ye Eleanor, emi ikpọ nditọ mmọ ẹma ẹkekpọn̄ esop, ẹma ẹnam ndutịm ẹwọrọ ẹka ebiet oro ẹnen̄erede ẹyom mme anditan̄a Obio Ubọn̄ ẹnyụn̄ ẹkenam utom uyọhọ ini do. Utom ukwọrọikọ emi an̄wam mmọ ẹnyene nnennen ekikere inyụn̄ iyakke mfụhọ emen mmọ emen.

Kûduọk idotenyịn. Ima “ododori enyịn ke kpukpru n̄kpọ.” (1 Corinth 13:7) Ken oro ikasiakde ke enyọn̄ emi, ọdọhọ ete: “Ke ini nditọ nnyịn ẹkekpọn̄de akpanikọ, eketie mi nte mmọ ẹkpakpan̄a. Edi mma n̄kpụhọde ekikere ke ini eyeneka mi akakpade. Esịt enem mi ndifiọk ke nditọ mi ikpaha-kpa, ye nte ke Jehovah aka iso ndinọ mmọ ifet ndifiak ndikpono imọ.” Ke akpanikọ, ediwak mbon oro ẹsikpọn̄de Jehovah ẹsifiak ẹdikpono enye.—Luke 15:11-24.

Kûduọhọ idemfo. Mme ete ye eka ẹsiwak ndikere mban̄a se iketịbede ke ini edem ẹnyụn̄ ẹseme ke mmimọ ikanamke n̄kpọ nte akpakanade inam. Nte ededi, akpan n̄kpọ oro ẹwụtde ke Ezekiel 18:20 edi ke Jehovah edinọ owo oro emekde idiọk usụn̄ uwem ufen, idịghe ete m̀mê eka esie. Edi n̄kpọ inemesịt ndifiọk ke item oro n̄wed Mme N̄ke ọnọde nditọ ete ẹkop uyo mme ete ye eka mmọ awak utịm ikanan̄ akan item oro enye ọnọde mme ete ye eka aban̄a mbiomo mmọ ndibọk nditọ mmọ ke eti usụn̄. Ke akpanikọ, obiomo nditọ ndinam se mme ete ye eka mmọ ẹdade N̄wed Abasi ẹkpep mmọ. Anaedi afo ama anam se ekekemede ke ini oro ekebede. Edi, idem ọkpọkọm ekere ke ama anam ndudue, oro iwọrọke ke ndudue oro akanam nditọ fo ẹkpọn̄ Jehovah. Se ededi oro ekedide ntak, ufọn idụhe nditie ntua ubaha. Kpep n̄kpọ to ndudue fo, biere ke udunamke mmọ aba, nyụn̄ ben̄e Jehovah efen ọnọ fi. (Psalm 103:8-14; Isaiah 55:7) Ekem, fre enyịn ban̄a se ikebede, nyụn̄ dori enyịn ke ini iso.

Me ime ye mbon en̄wen. Ekeme ndisọn̄ ndusụk owo ndidiọn̄ọ nnennen usụn̄ oro ẹkpesịnde udọn̄ ẹnọ fi m̀mê nte ẹkpedọn̄de fi esịt, akpan akpan edieke edide akanam utọ n̄kpọ emi iwọrọke mmọ. Ke ẹsiode oro ẹfep, se mme owo ẹbatde nte nsịnudọn̄ ye ndọn̄esịt idịghe ukem. Ntre, edieke ndusụk owo ẹtịn̄de se iyatde fi esịt, nam se apostle Paul etemede ke Colossae 3:13: “Ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye kiet eken.”

Kpono ndutịm oro Jehovah anamde man ẹnọ ntụnọ. Edieke iman fo ọbọde ntụnọ ke esop, ti ete ke emi edi ndutịm Jehovah ye nte ke ẹnam ndutịm emi ke ufọn kpukpru owo, esịnede anamidiọk oro. (Mme Hebrew 12:11) Ntre, kûdedei udomo ndikụt ndudue nnọ mbiowo oro ẹkekamade ikpe oro, m̀mê ndifan̄a ubiere oro mmọ ẹkenamde. Ti ete ke edieke anamde n̄kpọ ke usụn̄ Jehovah, eyenyene nti utịp, edi edieke ọbiọn̄ọde ndutịm esie, ayada mfịna efen efen ọnọ idem.

Ke ẹma ẹkenyan̄a Israel ẹsio ke Egypt, Moses ama esikpe ikpe ọnọ mmọ. (Exodus 18:13-16) Sia ikpe oro etebede owo kiet ekemede nditịp enye eken, anaedi ndusụk owo ikesinemke esịt ye ubiereikpe Moses. Etie nte nditọ Israel ndisikụt ndudue nnọ ubiereikpe Moses ekesinam mmọ ẹsọn̄ ibuot ye enye ndusụk ini ẹnyụn̄ ẹsịn ndausụn̄ esie. Nte ededi, Jehovah akada Moses ọnọ ikọt Esie ndausụn̄, ndien idịghe Moses  ke Enye ọkọnọ ufen, edi ọkọnọ mbon nsọn̄ibuot oro ye ubon mmọ emi ẹkeberede ye mmọ. (Numbers 16:31-35) Emi ekpenyene ndikpep nnyịn ndikpono nnyụn̄ nnyịme ubiere mbon oro Jehovah ọnọde odudu mfịn ke esop.

Ke afan̄ emi, Delores eti nte ọkọsọn̄de enye ndinyene nnennen ekikere ke ini ẹkenọde eyen esie ntụnọ ke esop. Enye ọdọhọ ete: “Se ikan̄wamde mi ekedi ndisikot mme ibuotikọ oro ẹnemede nte ndutịm Jehovah owụtde eti ibuot. Mma nda ekpri n̄wed kiet n̄wet mme akpan n̄kpọ oro ẹtode utịn̄ikọ ye mme ibuotikọ, emi ẹdin̄wamde mi nyọ mfịna oro nnyụn̄ n̄ka iso nnam n̄kpọ Jehovah.” Emi ada nnyịn edisịm akpan n̄kpọ efen emi edin̄wamde nnyịn iyọ mfịna emi.

Tịn̄ nte etiede fi ke idem. Ekeme ndifọn etịn̄ mfịna fo ọnọ ufan emi afo ekemede ndiberi edem. Ke ini oyomde ndinam emi, ka bịne ufan oro edin̄wamde fi aka iso enyene in̄wan̄-in̄wan̄ edu. Eyenen̄ede ọbọ ufọn edieke ‘an̄wan̄ade esịt fo’ ọnọ Jehovah. * (Psalm 62:7, 8) Ntak-a? Koro enye enen̄ede ọfiọk nte etiede fi ke idem. Ke uwụtn̄kpọ, emekeme ndikere ke ikpanaha imọ ikop utọ editịmede esịt emi. Idem n̄kpọ, idịghe imọ ikọkpọn̄ Jehovah. Tịn̄ nte etiede fi ke idem nọ Jehovah, nyụn̄ ben̄e enye anam fi ekeme ndiyọ mfịna emi.—Psalm 37:5.

Nte ini akade, eyedi afo eyetịm ọfiọk ndimụm idem n̄kama. Kan̄a ke emi, kûkpa mba ndinem Ete fo eke heaven esịt, kûnyụn̄ ukere ke utom fo ediwọrọ ikpîkpu. (Galatia 6:9) Ti ete ke ikposụk inyenyene mfịna edieke ikpọkpọn̄de Jehovah. Ke n̄kan̄ eken, edieke nnyịn isọn̄ọde ida inam akpanikọ inọ enye, enye ayan̄wam nnyịn ke ini inyenede mfịna. Ntre, tịm fiọk ke Jehovah ọdiọn̄ọ nte n̄kpọ emi afịnade fi, ndien enye ayaka iso ọnọ fi ukeme oro oyomde ke nnennen ini.—2 Corinth 4:7; Philippi 4:13; Mme Hebrew 4:16.

[Mme Ikọ idakisọn̄]

[Ekebe ke page 19]

Nte Ekemede Ndiyọ

◆ “Ebede ke ndibọp [m̀mê, ndisọn̄ọ] idem mbufo . . . , ẹnịm idem mbufo ke ima Abasi.”—Jude 20, 21.

◆ Kûduọk idotenyịn.—1 Corinth 13:7.

◆ Kûduọhọ idemfo.—Ezekiel 18:20.

◆ Me ime ye mbon en̄wen.—Colossae 3:13.

◆ Kpono ndutịm oro Jehovah anamde man ẹnọ ntụnọ.—Mme Hebrew 12:11.

◆ Tịn̄ nte etiede fi ke idem.—Psalm 62:7, 8.

[Ekebe/Ndise ke page 21]

Ndi Ọmọkpọn̄ Jehovah?

Edieke edide ntre, inamke n̄kpọ m̀mê nso ikedi ntak, afo emekeme nditaba itie ebuana fo ye Jehovah ọkọrọ ye idotenyịn fo kaban̄a nsinsi uwem. Eyedi amaduak ndifiak ndikpono Jehovah. Ndi ke esịn idem ebịne ndinam ntre idahaemi? Mîdịghe ndi ke esịk enịm tutu ekem ini oro afo amade? Ti ete ke Armageddon enen̄ede ekpere. Akan oro, uwem ke editịm n̄kpọ emi omụhọ inyụn̄ inyeneke iwụk. Afo ukam ukemeke ndidiọn̄ọ m̀mê oyodu uwem esiere n̄kpọn̄. (Psalm 102:3; James 4:13, 14) Ete kiet emi ọkọdọn̄ọde udọn̄ọ ada-owo-ibuot, ọkọdọhọ ete: “N̄kọdọn̄ọ udọn̄ọ emi ke adan̄aemi nnamde utom uyọhọ ini nnọ Jehovah, ndien ubọk mi iba afia. Oro anam esịt enem mi idahaemi.” Kere nte ekpeketiede enye ke idem edieke enye ọkpọkọdọn̄ọde udọn̄ọ oro ke ini enye okosụk ọdọhọde ete, “Usen kiet, nyafiak ndikpono Jehovah!” Edieke edide ọmọkpọn̄ Jehovah, nnennen ini edi emi ndifiak ndikpono enye.

[Mme ndise ke page 18]

Ndibuana ọyọhọ ọyọhọ ke mme edinam eke spirit ekeme ndin̄wam fi enyene nnennen ekikere