“Ke Ntak Eyeneren Isua Usụkkiet”

INI ekededi oro Mme Ntiense Jehovah ẹkesiwahade ufọk Wiesława ke usụk usụk Poland, enye ama esikọm mmọ ufan ufan onyụn̄ osio mmọ unyọn̄. Usen kiet, Samuel emi ekedide isua usụkkiet ama asan̄a ye eka esie aka ufọk Wiesława. Isan̄ enye emi Wiesława ama ebiere ndikpan̄ utọn̄ nnọ mmọ onyụn̄ ọbọ magazine oro eketịn̄de n̄kpọ aban̄a Paradise ke isọn̄.

Sia Editi n̄kpa Jesus Christ akasan̄ade ekpere, ama ọdọn̄ Samuel ndikot Wiesława edi akpan edinam emi. Ntre, enye ama akama n̄wedikot asan̄a ye eka esie afiak aka ufọk Wiesława . Ke ini Wiesława okokụtde nte eyeneren emi esịnede n̄kpọ ediye ediye, enye ama eben̄e mmọ ete ẹnọ imọ esisịt ini, onyụn̄ odụk esịtufọk okokpụhọ ọfọn̄. Ke ini enye ọkọwọrọde edi, enye ama akpan̄ utọn̄ ọnọ Samuel, ọbọ n̄wedikot oro, onyụn̄ obụp ete: “Nsan̄a ikpọn̄ m̀mê nsan̄a ye ebe mi ndi?” Ekem enye ama adian do ete: “Idem ọkpọkọm ebe mi idịghe, ami nyedi. Samuel, nyedi ke ntak fo.” Samuel ama adat esịt ndikụt enye edide kpa nte enye ọkọn̄wọn̄ọde.

Samuel eketie adiana Wiesława ke ini ẹkenọde utịn̄ikọ Editi onyụn̄ owụt enye mme itie N̄wed Abasi oro ẹkenemede. Emi ama enen̄ede otụk Wiesława. Editi oro ama enen̄ede enem enye, enye ama onyụn̄ owụt esịtekọm aban̄a nte ẹkenemede ntotụn̄ọ ukpepn̄kpọ emi ke mmemmem usụn̄. Enye n̄ko ama ama nte esop ẹkedarade enye ẹnyụn̄ ẹfọnde ido ye enye. Toto ke ini oro, Wiesława emenen̄ede enyene udọn̄ ke n̄kpọ eke spirit onyụn̄ ọtọn̄ọ ndibuana ye Mme Ntiense Jehovah kpukpru ini. Enye ọkọdọhọ ke ndondo emi ete: “Bụt esinam mi sia mmen̄kesikpan̄ke utọn̄ nnọ mbufo ke ini ẹkesiwahade ufọk mi. Ntịn̄ akpanikọ, n̄kakpan̄ utọn̄ nnọ mbufo ke ntak eyeneren isua usụkkiet—oro edi, ke ntak Samuel.”

Ukem nte Samuel ke Poland, ediwak uyen emi ẹdide Mme Ntiense Jehovah ke ẹda inua ye nti edu uwem mmọ ẹtoro Abasi. Edieke afo edide uyen, afo n̄ko emekeme ndin̄wam mbon oro ẹnyenede esịt akpanikọ ẹdi ẹdima n̄kpọ eke spirit.