Utuakibuot Oro Ọfọnde ye Afo

ASAPH andiwet psalm ọkọdọhọ ete: “Ọfọn mi ndikpere Abasi.” Enye ama oyom ndikpebe mbon oro mîkọdọn̄ke enyịn m̀mê Abasi odu man ẹnam se ẹmade. Edi ekem Asaph ama ekere aban̄a mme ufọn oro edisan̄a n̄kpere Abasi adade edi onyụn̄ ebiere ke ọfọn ye imọ. (Psalm 73:2, 3, 12, 28) Ndi utuakibuot akpanikọ ọfọn ye afo mfịn? Didie ke afo ekeme ndibọ ufọn nto enye?

Ndituak ibuot nnọ ata Abasi iyakke fi edi ibụk. Nte “Abasi ima” okobotde nnyịn iyakke mbon ibụk ẹkop inemesịt. (2 Corinth 13:11) Jesus ekekpep akpanikọ aban̄ade nte obot-owo etiede, ke ini enye ọkọdọhọde ete: “Inemesịt okpon ke ndinọnọ akan ke ndibọbọ.” (Utom 20:35) Ntak edi oro esinemde nnyịn ndinam n̄kpọ nnọ mme ufan ye ubon nnyịn. Edi ndinam n̄kpọ Abasi ọnọ owo inemesịt akan. Enye ke ikpama ikan owo efen ekededi. Ediwak miliọn owo emi ẹdude ke nsio nsio idaha ke uwem ẹfiọk ke ndituak ibuot nnọ Abasi, ebe ke ndinam se enye ọdọhọde, anam nnyịn inen̄ede ikop inemesịt.—1 John 5:3.

Ndinyene Uduak ke Uwem

Utuakibuot akpanikọ ọfọn ye afo koro enye anam uwem fo enyene uduak n̄ko. Ndi omokụt ke emesiwak ndikop inemesịt ke ini okụtde unen ke se anamde? Ediwak owo ẹnyene uduak ke uwem, edide enye emi enyenede n̄kpọ ndinam ye ubon, mme ufan, mbubehe, m̀mê inemesịt. Sia uwem mînyeneke iwụk, mme n̄kpọ emi isiwakke ndinam mme owo ẹkop inemesịt. (Ecclesiastes 9:11) Nte ededi, utuakibuot akpanikọ ayan̄wam fi enyene ata uduak ke uwem, kpa uduak emi anamde fi aka iso okop inemesịt, idem ke ini mme n̄kpọ eken ke uwem ẹkpude.

Utuakibuot akpanikọ abuana edifiọk Jehovah nnyụn̄ n̄ka iso nnam n̄kpọ esie. Mbon oro ẹtuakde ibuot ẹnọ ata Abasi ẹnen̄ede ẹsan̄a ẹkpere enye. (Ecclesiastes 12:13; John 4:23; James 4:8) Ekeme ndisọn̄ fi ndikere ke emekeme ndinen̄ede ndiọn̄ọ Abasi tutu enye akabade edi ufan fo. Edi ke ini etiede ekere nte enye esinamde n̄kpọ ye mme owo onyụn̄ ekerede aban̄a mme n̄kpọ oro enye obotde, ke akpanikọ afo eyekeme ndifiọk mme edu esie. (Rome 1:20) Akan oro, ke ini okotde Ikọ Abasi, afo eyedi edifiọk ntak emi nnyịn idude uwem, ntak emi Abasi ayakde ndutụhọ odu, nte enye editrede ndutụhọ, ndien ke edide akpan n̄kpọ akan, nte afo ekemede ndinen̄ede ntịp nsịn ke ndisu uduak Abasi. (Isaiah 43:10; 1 Corinth 3:9) Utọ ifiọk oro ekeme ndinam uwem fo enen̄ede enem!

Ndikabade Ndi Eti Owo

Utuakibuot akpanikọ ọfọn ye afo koro enye ekeme ndin̄wam fi akabade edi eti owo. Ke ini abuanade ke utuakibuot akpanikọ, afo eyenyene edu oro edinamde fi enyene eti itie ebuana ye mbon en̄wen. Abasi ye Eyen esie ẹyekpep fi nte akpanamde akpanikọ, nte ekpetịn̄de ikọ ufan ufan, ye nte ekpedide owo emi ẹkemede ndiberi edem. (Ephesus 4:20-5:5) Ọyọdọn̄ fi ndikpebe Abasi ke ini afo enen̄erede ọdiọn̄ọ enye tutu edi edima enye. Bible ọdọhọ ete: “Ẹdi mme andikpebe Abasi, nte ndima nditọ, ẹnyụn̄ ẹka iso ẹsan̄a ke ima.”—Ephesus 5:1, 2.

Nte esịt ikpadatke fi ndidu ke otu mbon oro ẹkpebede ima Abasi? Edi n̄kpọ inemesịt ndifiọk ke utuakibuot ata Abasi idịghe n̄kpọ emi  anamde ikpọn̄. Enye anam fi edidiọn̄ọ mbon en̄wen emi ẹmade se inende. Nte ededi, ekeme ndidi afo umaha ido ukpono. Edi nte ikokụtde ke ibuotikọ oro ekebemde iso, idịghe ido ukpono ke idemesie ọdiọk, edi se idiọkde edi edida ido ukpono nnam idiọk. Ediwak ido ukpono ẹnam se mme Christian mîkpanamke. Jehovah ke idemesie etịm ikọt esie ye eti uduak. Bible ọdọhọ ete: “Abasi idịghe Abasi ndutịme, edi edi Abasi emem.” (1 Corinth 14:33) Ukem nte ediwak miliọn mbon en̄wen ẹkụtde, afo n̄ko eyedikụt ke ndibuana ye eti otu Christian ekeme ndinam fi enyene idotenyịn kaban̄a ini iso.

Idotenyịn Kaban̄a Ini Iso

Edisana N̄wed Abasi owụt ke Abasi ke etịm ata mme andituak ibuot man mmọ ẹkpebọhọ utịt editịm n̄kpọ emi ẹnyụn̄ ẹda obufa isọn̄ emi ‘edinen ido edidụn̄de,’ ẹnyene. (2 Peter 3:13; Ediyarade 7:9-17) Ntem, utuakibuot oro ọfọnde ye afo ọnọ fi idotenyịn, kpa akpan n̄kpọ oro esinamde owo okop inemesịt. Ndusụk owo ẹdori enyịn ke ini iso ọyọfọn edieke ẹnyenede eti ukara, eti mbubehe, nsọn̄idem ye okụk ukpọn̄ utom. Edi mme n̄kpọ emi isiwakke ndinam owo enen̄ede odori enyịn ke n̄kpọ ọyọfọn ke ini iso. Ke n̄kan̄ eken, apostle Paul ekewet ete: “Nnyịn ikọn̄ idotenyịn nnyịn ke odu-uwem Abasi.”—1 Timothy 4:10.

Edieke afo enen̄erede oyom ata mme andituak ibuot, oyokụt mmọ. Ke ererimbot oro mîdianake kiet mfịn mi, ima ye edidianakiet ẹnam Mme Ntiense Jehovah ẹwọrọ ẹda san̄asan̄a. Mmọ ẹkpere ndito kpukpru idụt ye usem; edi ima oro mmọ ẹmade kiet eken ẹnyụn̄ ẹmade Jehovah anam mmọ ẹdiana kiet. (John 13:35) Mmọ ẹnọ fi ikot ẹte odụn̄ọde ke idemfo ese ima ye edidianakiet oro mmimọ inyenede. Asaph ekewet ete: “Ọfọn mi ndikpere Abasi.”—Psalm 73:28.

[Ndise ke page 7]

Afo emekeme ndidi ufan Abasi