‘Mmama Ibet Fo Didie Ntem!’

PSALM 119 edi ikwọ emi aban̄ade nte andiwet enye adade etop, m̀mê ikọ oro ẹkedade odudu spirit Abasi ẹwet. Andiwet psalm ọkwọ ete: ‘Mmada ikọ fo ndịp ke esịt mi.’ ‘Mme ewụhọ fo ẹyedat mi esịt.’ ‘Ukpọn̄ mi amanuaha, koro mme ikpe fo ẹdọn̄de mi kpukpru ini.’ ‘Uyo fo [“mme n̄kpọ oro afo etide mi,” NW] edi inemesịt mi.’ ‘Mmoyom item fo.’ ‘Mbet fo emi mmade ẹyenyụn̄ ẹnem mi esịt.’ ‘Nyonyụn̄ ntie n̄kere mme ewụhọ fo.’ “Mmama [“ibet,” NW] fo didie! enye ke ntie n̄kere ofụri usen.”—Psalm 119:11, 16, 20, 24, 40, 47, 48, 97.

Nso esịtekọm ke andiwet psalm okowụt ntem aban̄a ikọ Abasi oro ẹyararede! Ndi emesiwụt esịtekọm aban̄a etop Ikọ Abasi, kpa Bible? Ndi akpama ndima Ikọ Abasi ntre? Edieke edide ntre, ana afo ebem iso anam edi ido fo ndisikot Bible kpukpru ini, iso-ọfọn kpukpru usen. Jesus Christ ọkọdọhọ ete: “Idịghe uyo ikpọn̄ ke ana owo ada odu uwem, edi edida kpukpru ikọ eke ẹwọrọde Jehovah ke inua odu.” (Matthew 4:4) Ọyọhọ n̄kpọ iba oro anade afo anam edi ndisitie n̄kere se okotde. Nditie n̄kere akpanikọ aban̄ade Abasi, mme edu esie, ye uduak esie ayanam fi enen̄ede owụt esịtekọm aban̄a Bible. (Psalm 143:5) Ke edide akpan n̄kpọ akan, da nti item esie sịn ke edinam kpukpru usen.—Luke 11:28; John 13:17.

Nso ufọn ke afo edibọ ke ndima ndinam se Bible ọdọhọde? Psalm 119:2 (NW) ọdọhọ ete: “Mmọ eke ẹnamde mme n̄kpọ oro [Abasi] etide mmọ ẹkop inemesịt.” Mme n̄kpọ editi oro ẹdude ke Bible ẹyen̄wam fi ọyọ mme mfịna uwem uforo uforo. (Psalm 1:1-3) Afo ọyọfiọk n̄kpọ, enyene ọniọn̄, onyụn̄ edi asian, ndien mme edu emi idiyakke ‘ukot fo odụk kpukpru mme idiọk usụn̄.’ (Psalm 119:98-101) Ndifiọk akpanikọ aban̄ade Abasi ye se enye aduakde aban̄a isọn̄ ayanam uwem fo enen̄ede enyene se ọwọrọde onyụn̄ anam enyene eti idotenyịn aban̄a ini iso.—Isaiah 45:18; John 17:3; Ediyarade 21:3, 4.

Enen̄ede ọdọn̄ Mme Ntiense Jehovah ndin̄wam mbon en̄wen ẹnen̄ede ẹfiọk Bible ẹnyụn̄ ẹma etop esie. Nnyịn imenen̄ede isịn udọn̄ inọ fi ite asian nnyịn m̀mê akpama idi idise fi.