Mme Mbụme Ẹtode Mme Andikot

Ntak emi New World Translation ọdọhọde ke Deuteronomy 31:2 ete ke ‘owo iyakke aba Moses ada nditọ Israel usụn̄ ọwọrọ onyụn̄ odụk,’ ke ini mme edikabade Bible efen ẹdọhọde ke enye ke idemesie mîkakam ikemeke aba ndinam ntre?

Okposụkedi ẹkemede ndikabade ikọ Hebrew oro ke usụn̄ mbiba emi, nte ẹkabarede ikọ emi ke ndusụk edikabade Bible ọnọ ekikere ke Moses ikenyeneke aba odudu ndida nditọ Israel usụn̄ ke ini enye ekekperede utịt uwem esie. Ke uwụtn̄kpọ, The New English Bible okot oto se Moses ekewetde ete: “Ami ndi isua ikie ye edịp idahaemi, ndien n̄kemeke aba ndiwọrọ nnyụn̄ ndụk nte mmade.” The New American Bible ọdọhọ ntre n̄ko ete: “Ami . . . n̄kemeke aba ndiwọrọ nnyụn̄ ndụk ifụre ifụre.”

Nte ededi, Deuteronomy 34:7 owụt ke okposụkedi Moses ọkọsọn̄de, enye okosụk okokop odudu. Itien̄wed oro ọdọhọ ete: “Ndien Moses esịm isua ikie ye edịp ke ini enye akpade: enyịn ikịmke enye, odudu esie inyụn̄ imemke.” Ntem, Moses okosụk enyenyene ukeme ndida nditọ Israel usụn̄, edi ikedịghe uduak Jehovah enye ndika iso nnam ntre. Se inamde ẹfiọk emi edi se Moses akakade iso ọdọhọ ete: “Jehovah omonyụn̄ ọdọhọ mi, ete, Afo udubehe Jordan emi.” Etie nte Jehovah akafiak ọsọn̄ọ se enye eketịn̄de ke itie mmọn̄ Meribah.—Numbers 20:9-12.

Moses ama odu uwem ebịghi, ndien ẹkeme ndibahade ini uwem esie nsịn ke ikpehe ita. Enye okodụn̄ isua 40 ke Egypt, ndien mi ke ‘ẹkekpep enye ofụri ọniọn̄ nditọ Egypt,’ enye ama onyụn̄ “okop odudu ke ikọ ye ke edinam.” (Utom 7:20-22) Enye ama odụn̄ ke Midian ke isua 40 en̄wen. Do ke enye ekekpep mme edumbet Jehovah oro ẹdin̄wamde enye ekeme ndida ikọt Jehovah usụn̄. Ke akpatre, Moses ama ada nditọ Israel usụn̄ onyụn̄ akara mmọ ke isua 40. Ndien idahaemi Jehovah ama ebiere ke idịghe Moses, edi Joshua, edida idụt Israel usụn̄ ebe Akpa Jordan odụk Isọn̄ Un̄wọn̄ọ.—Deuteronomy 31:3.

Ntem, New World Translation etịn̄ nnennen se Deuteronomy 31:2 ọwọrọde. Ikedịghe unana ukeme akanam Moses okûda aba nditọ Israel usụn̄, edi ekedi koro Jehovah ikayakke enye anam ntre.