Ndi Uyere Mme Jew Edi Ntọn̄ọ Baptism?

JOHN ANDINỊM OWO BAPTISM ama “ọkwọrọ baptism ke idiọn̄ọ edikabade esịt.” Jesus n̄ko ama owụk mme anditiene enye ete ẹnam mme mbet ẹnyụn̄ ẹnịm mmọ baptism.—Mark 1:4; Matthew 28:19.

Bible owụt ke baptism mme Christian oyom ẹbụk owo ofụri ofụri ke mmọn̄. N̄wed oro Jesus and His Word ọdọhọ ete: “Ediwak ido ukpono ẹma ẹsinam ntre ke eset, ediwak ke ẹnyụn̄ ẹnam ntem idahaemi ke ediwak idụt ye ebiet.” N̄wed oro ọdọhọ ke “baptism mme Christian . . . ọkọtọn̄ọ ke Ido Ukpono Mme Jew.” Ndi ikọ emi edi akpanikọ?

Mme Obube Uyere Mme Jew

Mme ọdọkisọn̄ nyom n̄kpọeset emi ẹkedọkde isọn̄ ẹkpere Obot Temple Jerusalem ẹma ẹkụt se ikperede ndisịm obube uyere 100, emi ẹkedude ke akpa isua ikie M.E.N. ye akpa isua ikie E.N. N̄kpọ emi ẹkewetde ke Synagogue emi okodude ke n̄kpọ nte ọyọhọ isua ikie iba m̀mê ọyọhọ isua ikie ita E.N. ọdọhọ ke ẹma ẹnam mme utọ obube uyere oro ẹnọ “isenowo oro ẹkeyomde ẹnam ẹnọ mmimọ.” Ẹma ẹkụt mme obube uyere en̄wen ke ikpehe Jerusalem oro mbon imọ ye mme ubon oku ẹkedụn̄ọde; ekpere ndidi kpukpru ufọk ẹma ẹnyene obube uyere.

Obube uyere emi ẹkedi akwakwa obube mmọn̄ emi ẹketụn̄de ke itiat m̀mê emi ẹketịbide ke isọn̄ ẹda kọrikọri m̀mê itiat ẹbọp ẹkanade. Ẹma ẹsiyọn̄ọ mmọ mbak ẹdidụt. Mmọ ẹkewak ndidi n̄kpọ nte mita ita ke uniọn̄ ye n̄kpọ nte mita iba ke ubom. Mmọn̄edịm ẹkesisan̄a ke afua ẹkedụk obube emi. Mmọn̄ ekesitụn̄ọ ke n̄kpọ nte mita kiet ye ubak man ekpekeme ndifụk owo ofụri ofụri ke ini owo ọsọrọde-sọrọ. Ndusụk ini ntọpntọp ibibene ama esibahade udịghi ukot ke itie iba. Etie nte mbon oro ẹkade ndinam idem asana ẹkesisan̄a n̄kan̄ kiet ẹdụk obube uyere emi, ẹnyụn̄ ẹsan̄a ke n̄kan̄ eken ẹwọrọ ke ẹma ẹkenam idem asana mbak mbon oro mîsanake ẹdisabarede mmọ.

Obube uyere emi ke mme Jew ẹkesida ẹnam owo asana. Ẹkesinam emi didie?

 Ibet ye Ido Edinam Owo Asana

Ibet Moses ama enen̄ede oyom ikọt Abasi ẹsana ke n̄kan̄ eke spirit ye ke ikpọkidem. Odu ediwak n̄kpọ emi ẹkenamde nditọ Israel ẹdehe, ndien emi ama oyom mmọ ẹyere mmọn̄ ẹnyụn̄ ẹyet ọfọn̄ mmọ man mmọ ẹkpesana.—Leviticus 11:28; 14:1-9; 15:1-31; Deuteronomy 23:10, 11.

Jehovah Abasi asana ama onyụn̄ anana ndo. Ntem, mme oku ye mme Levite ẹkenyene ndiyet ubọk ye ukot mbemiso ẹkade itieuwa, mbak mmọ ẹdikpan̄a.—Exodus 30:17-21.

Nditọ ukpepn̄kpọ ẹdọhọ ke etisịm akpa isua ikie E.N., Ido Ukpono Mme Jew ama ediyom mbon oro mîdịghe mme Levite ẹtiene ẹnam idemmọ ẹsana kpa nte ẹkeyomde mme oku ẹnam. Mbon n̄ka mọn̄k mme Jew ye mme Pharisee ẹma ẹsinam idem asana ndien ndien. N̄wed kiet etịn̄ ntem aban̄a eyo Jesus: “Ẹma ẹyom mme Jew ẹsinam idem asana mbemiso ẹdọkde Obot Temple, ẹwade uwa, ẹnyụn̄ ẹbọde ufọn uwa oro mme oku ẹkewade, ye mme n̄kpọ ntre.” N̄wed ibet mme Jew ẹkotde Talmud ọdọhọ ke mbon oro ẹkeyerede mmọn̄ ẹkenyene ndibụk idem ofụri ofụri ke obube uyere.

Jesus ama ọsọn̄ọ asua ọnọ mme Pharisee ke ntak emi mmọ ẹkesọn̄ọde ẹyịre ke edinam idem asana. Ana in̄wan̄-in̄wan̄ ke mmọ ẹma ẹsinịm “nsio nsio orụk baptism,” esịnede ediyet “cup ye osioinua ye n̄kpọ okpoho.” Jesus ọkọdọhọ ke mme Pharisee ẹma ẹbiat ibet Abasi ẹnyụn̄ ẹnịm mme ido eset idemmọ. (Mme Hebrew 9:10; Mark 7:1-9; Leviticus 11:32, 33; Luke 11:38-42) Idụhe Ibet Moses oro okoyomde ẹbụk idem ofụri ofụri ke mmọn̄.

Ndi uyere mme Jew edi ntọn̄ọ baptism mme Christian? Baba!

Edinam Idem Asana ye Baptism Mme Christian

Mme Jew ẹkesinam idemmọ asana. Nte ededi, baptism oro John ekenịmde ikedịghe orụk edinam idem asana oro mme Jew ẹkefiọkde. Sia ẹkedide ẹdifiọk John nte Andinịm Owo Baptism, emi owụt ke nte enye okobụkde owo ke mmọn̄ ama okpụhọde. Mme adaiso Ido Ukpono Mme Jew ẹma ẹkam ẹdọn̄ mme owo ẹka ẹkebụp enye ẹte: ‘Ntak emi afo enịmde owo baptism?’—John 1:25.

Ẹkesinam idem asana nte Ibet Moses eketemede ini ekededi oro andituak ibuot nnọ Jehovah ekedehede. Baptism oro John ekenịmde m̀mê enye oro mme Christian ẹkedide ẹdinịm ke ukperedem ikedịghe ntre. Baptism oro John ekenịmde okowụt ke owo ama akabarede esịt onyụn̄ ọkpọn̄ akani usụn̄ uwem esiemmọ. Baptism Christian edi uyarade ke owo ama ayak idemesie ọnọ Abasi. Christian ana baptism ini kiet, inaha ediwak ini.

Edinam idem asana ke ufọk oku mme Jew ye ke obube uyere ke eferife ke mbọhọ Obot Temple okonyụn̄ ebebiet baptism Christian. Edinam idem asana ọkọwọrọ ata isio isio n̄kpọ ye baptism Christian. The Anchor Bible Dictionary ọdọhọ ete: “Nditọ ukpepn̄kpọ ẹnen̄ede ẹnyịme ke John [Andinịm Owo Baptism] ikekpebeke m̀mê ndikpụhọ orụk baptism ekededi ke mbọhọ mmọ,” oro edi, eke Ido Ukpono Mme Jew. Kpasụk ntre ke edi ye baptism esop Christian.

Baptism Christian ada aban̄a “eben̄e oro ẹben̄ede Abasi ẹte anam inyene eti ubieresịt.” (1 Peter 3:21) Enye owụt ke owo amayak idemesie ofụri ofụri ọnọ Jehovah ndinam n̄kpọ Esie nte mbet Eyen Esie. Edibụk owo ofụri ofụri ke mmọn̄ edi idiọn̄ọ oro odotde ye utọ uyakidem oro. Owo ndibụhọ ke mmọn̄ ada aban̄a enye ndikpa n̄kpọn̄ akani usụn̄ uwem esie. Ndiwọrọ ke mmọn̄ ada aban̄a ndinam enye odu uwem man anam uduak Abasi.

Jehovah Abasi esinọ mme owo oro ẹyakde idem ẹnọ ntre ẹnyụn̄ ẹnade baptism eti ubieresịt oro. Mmọdo, apostle Peter ama ada odudu spirit Abasi asian ekemmọ mme andinịm ke akpanikọ ete: “[Baptism] ke anyan̄a mbufo n̄ko ke emi.” Oro edi n̄kpọ emi uyere mme Jew mîkemeke ndinam, ọkpọkọm ẹkeyere adan̄a didie.