“Ntak Emi Nnyịn Idude Mi-e?”

ELIE WIESEL emi ọkọbọde enọ Nobel okonyụn̄ ọbọhọde nsobo ofụri orụk ke ubọk mbon Nazi, ama ọdọhọ ini kiet ko ete ke “kpukpru owo ẹnyene ndibụp idemmọ ata akpan mbụme emi.” Mbụme ewe edi oro? Oro edi, “Ntak emi nnyịn idude mi-e?”

Ndi akanam omobụp idemfo mbụme oro? Ediwak owo ẹsibụp, edi inyeneke ibọrọ. Ke ini Arnold Toynbee, ewetmbụk eset oro otode Britain, okodomode nditịn̄ se idide uduak uwem, enye ama ewet ete: “Owo odu uwem man otoro Abasi onyụn̄ okop inemesịt emi otode Enye ke nsinsi.”

Enen̄ede enem ndifiọk ke se ikande isua tọsịn ita emi ẹkebede, owo en̄wen emi ẹkediọn̄ọde nte enye emi ekenen̄erede odụn̄ọde se uwem ọwọrọde, ama enyenyene ibọrọ mbụme oro. Enye ekedi enyene-ọniọn̄ Edidem Solomon, emi ọkọdọhọde ete: “Yak nnyịn ikop utịt ofụri n̄kpọ emi: bak Abasi, nyụn̄ nịm mbet esie: koro emi edi eke kpukpru owo.”—Ecclesiastes 12:13.

Jesus Christ Eyen Abasi ama enyịme ye ikọ emi. Ke ini Jesus okodude ke isọn̄, enye ama anam kpukpru se enye ekekemede man ọnọ Ete esie eke heaven ubọn̄. Ndinam n̄kpọ Abasi ama ofori uwem Jesus. Emi ama ọsọn̄ọ enye idem, anamde enye ọdọhọ ete: “Udia mi edi ndinam uduak enye emi ọkọdọn̄de mi nnyụn̄ nnam utom esie mma.”—John 4:34.

Ntre, ntak emi nnyịn idude mi-e? Nnyịn imekeme ndifiọk uduak uwem inyụn̄ ikop inemesịt ndinam uduak Abasi ukem nte Jesus, Solomon, ye mme asan̄autom Abasi eken ẹkenamde. Ndi afo akpama ndifiọk mme n̄kpọ en̄wen mban̄a nte akpatuakde ibuot ọnọ Abasi “ke spirit ye ke akpanikọ”? (John 4:24) Mme Ntiense Jehovah ke edem mbufo ẹyema ndin̄wam fi mbọrọ mbụme emi: “Ntak emi nnyịn idude mi-e?”