Kpep Nditọ Fo nte Ẹkpenọde Ibọrọ

PERLA, n̄wan emi otode Mexico eti ke ini imọ ikedide ekpri eyen, ke eka imọ ama esin̄wam imọ itịm idem ndinọ mbio mbio ibọrọ ke Ukpepn̄kpọ Enyọn̄-Ukpeme. Idahaemi, Perla enyene eyeneren isua ition. Didie ke enye esin̄wam eyen emi? Perla ọdọhọ ete: “Mmesibem iso ntịm okịm idem. Ke ini nnamde oro, nyoyom ikpehe ekikere oro edin̄wan̄ade eyen mi, enye oro enye edikemede nditịn̄ ke ikọ idemesie. Ekem nnyịn iyenen̄ede ikpep ikpehe ekikere oro enye edimade ndinọ ibọrọ. Nyọdọhọ enye ada uwụtn̄kpọ oro enye ọfiọkde anam se enye etịn̄de an̄wan̄a. Ekem, iyetịn̄ ifiak itịn̄ nte enye editịn̄de. Imesikama n̄kpọ oro etiede nte ukwak utịn̄ikọ man enye ọfiọk nte edikamade ukwak utịn̄ikọ ọnọ ibọrọ. Esịt enen̄ede enem mi sia idụhe mbono esop oro enye mîsibọrọke mbụme m̀mê ndimenede ubọk ke enyọn̄. Ediwak ini, enye esika ebịne ada ukpepn̄kpọ mbemiso mbono esop ọtọn̄ọde akasian enye ikpehe ekikere oro enye edimade ndinọ ibọrọ.”

Jens, ebiowo oro anamde utom ye otu oro ẹsemde usem Hindi, enyene nditọiren iba, kiet edi isua inan̄, enye eken edi isua iba. Ke ini Jens ye n̄wan esie ẹtiede ye nditọ mmọ ẹtịm idem ẹnọ mbono esop, mmọ ẹsinam nte ete ye eka Jens ẹkesinamde. Jens ọdọhọ ete: “Nnyịn imesimek ikpehe oro edin̄wan̄ade nditọ nnyịn. Ke ima ikanam oro, imesidomo ndinam mmọ ẹfiọk ata akpan n̄kpọ oro odude ke ibuotikọ oro, ekem iyobụp mmọ mbụme oro ikerede ke mmọ ẹyekeme ndibọrọ ke mbono esop. Idem esikpa nnyịn ndikop nte mmọ ẹnen̄erede ẹda ikọ idemmọ ẹnọ ibọrọ. Ibọrọ mmọ esinen̄ede owụt ke mmọ ẹfiọk se mmọ ẹtịn̄de. Emi n̄ko esinen̄ede ọnọ Jehovah itoro onyụn̄ owụt mbuọtidem oro mmọ ẹnyenede.”