Nịm Idemfo ke Ima Abasi!
Nịm Idemfo ke Ima Abasi!
“Ndima, . . . ẹnịm idem mbufo ke ima Abasi, . . . emi edisụn̄ọde ke nsinsi uwem.”—JUDE 20, 21.
1, 2. Didie ke afo ekeme ndinịm idemfo ke ima Abasi?
JEHOVAH enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man mbon oro ẹbuọtde idem ye enye ẹnyene nsinsi uwem. (John 3:16) Nso utịbe utịbe ima ke Abasi ama nnyịn ntem! Edieke afo edide asan̄autom Jehovah, anaedi oyoyom enye ama fi ke nsinsi.
2 Mbet oro Jude, etịn̄ nte afo ekemede ndinịm idem ke ima Abasi. Enye ekewet ete: “Ebede ke ndibọp idem mbufo ke ata edisana mbuọtidem mbufo, nnyụn̄ mbọn̄ akam ke edisana spirit, ẹnịm idem mbufo ke ima Abasi, ke adan̄aemi mbufo ẹtiede ẹbet mbọm Ọbọn̄ nnyịn Jesus Christ emi edisụn̄ọde ke nsinsi uwem.” (Jude 20, 21) Ndikpep Ikọ Abasi nnyụn̄ n̄kwọrọ eti mbụk anam ọbọp idemfo ke “ata edisana mbuọtidem,” kpa mme ukpepn̄kpọ Christian. Man enịm idem ke ima Abasi, ana ọbọn̄ akam “ke edisana spirit,” m̀mê ayak edisana spirit ada fi usụn̄. Man enyene nsinsi uwem, ana afo enyene mbuọtidem n̄ko ke uwa ufak Jesus Christ.—1 John 4:10.
3. Ntak emi ndusụk owo mîdịghe aba Mme Ntiense Jehovah?
3 Ndusụk mbon oro ẹkenyenede mbuọtidem ke ini edem ikakaha iso inịm idemmọ ke ima Abasi. Mmọ idịghe aba Mme Ntiense Jehovah sia mmọ ẹkade iso ndinam idiọk. Nso ke akpanam mbak utọ n̄kpọ oro ediwọrọ fi? Nditie n̄kere mme akpan n̄kpọ oro ẹtienede mi ẹkeme ndin̄wam fi okûnam idiọkn̄kpọ onyụn̄ enịm idemfo ke ima Abasi.
Wụt ke Amama Abasi
4. Ndikop uyo Abasi edi akpan n̄kpọ adan̄a didie?
4 Wụt ke amama Abasi ebe ke ndikop uyo esie. (Matthew 22:37) Apostle John ekewet ete: “Koro emi edi se ndima Abasi ọwọrọde, ete nnyịn inịm ibet esie; ndien ibet esie idobike owo mbiomo.” (1 John 5:3) Ndikop uyo Abasi kpukpru ini ekeme ndisọn̄ọ fi idem man akan idomo onyụn̄ anam fi okop idatesịt. Andiwet psalm ọkọdọhọ ete: “Ọfọfọn ọnọ owo eke mîsan̄ake ke item mme idiọk owo, . . . edi mbet Jehovah adat enye esịt.”—Psalm 1:1, 2.
5. Nso ke edinam edieke amade Jehovah?
5 Ima oro amade Jehovah idiyakke anam akwa idiọkn̄kpọ oro edisuenede enyịn̄ esie. Agur ekeben̄e ete: “Kûnọ mi ubuene, kûnyụn̄ unọ mi inyene; bọk mi ke udia udeme mi: mbak ndiyụhọ, ndien n̄kan̄ fi, ndien ndọhọ nte, Anie edi Jehovah? Mbak ndinyụn̄ mbuene, ndien nyịp inọ, nnyụn̄ nsuene enyịn̄ Abasi mi.” (Mme N̄ke 30:1, 8, 9) Biere ke imọ ‘idisueneke enyịn̄ Abasi.’ Utu ke oro, ka iso domo ndinam nti n̄kpọ oro ẹnọde Abasi ukpono.—Psalm 86:12.
6. Nso ikpetịbe edieke akpakade iso eyịre ke ndinam idiọk?
6 Bọn̄ akam kpukpru ini nọ edima Ete fo eke heaven yom un̄wam man akan idomo edinam idiọkn̄kpọ. (Matthew 6:13; Rome 12:12) Ka iso kop item Abasi mbak n̄kpọ edibiọn̄ọ akam fo. (1 Peter 3:7) Edieke akpakade iso eyịre ke ndinam idiọk, afo ọkpọbọ ata idiọk utịp, koro Jehovah ke ndamban̄a usụn̄ esibiọn̄ọ mbon nsọn̄ibuot nte n̄kpọ eke adade obubịt enyọn̄ ofụk idem man akam mmọ edibe esịm imọ. (Eseme 3:42-44) Ntre, sụhọde idem, nyụn̄ bọn̄ akam ete imọ ikûnam n̄kpọ ekededi oro mîdiyakke imọ isan̄a ikpere Abasi.—2 Corinth 13:7.
Wụt ke Amama Eyen Abasi
7, 8. Didie ke ndinam ewụhọ Jesus ekeme ndinam owo efep idiọk?
7 Wụt ke amama Jesus Christ ebe ke ndinam ewụhọ esie, koro emi idiyakke fi anam idiọk. Jesus ọkọdọhọ ete: “Edieke mbufo ẹnịmde mbet mi, mbufo ẹyedu ke ima mi, kpa nte ami nnịmde mbet Ete mi nnyụn̄ ndude ke ima esie.” (John 15:10) Didie ke edida ikọ Jesus oro nsịn ke edinam ekeme ndin̄wam fi enịm idem ke ima Abasi?
8 Ndikop se Jesus etịn̄de ekeme ndinọ fi odudu ndinam se ifọnde. Ibet oro Abasi ọkọnọde Israel ọkọdọhọ ete: “Kûsịn efịbe.” (Exodus 20:14) Edi Jesus ama etịn̄ edumbet oro esịnede ke ewụhọ emi ete: “Owo ekededi eke owụkde enyịn ese n̄wan tutu udọn̄ idan̄ edemede enye, enye esesịn efịbe ama ke esịt esie ye enye.” (Matthew 5:27, 28) Apostle Peter ọkọdọhọ ke enyịn ndusụk owo ke esop akpa isua ikie ‘ẹkeyọhọ ye efịbe, ẹnyụn̄ ẹtap mme ukpọn̄ eke mîsọn̄ọke ida.’ (2 Peter 2:14) Nte ededi, utu ke ndibiet mmọ, afo emekeme ndifep oburobụt ido idan̄ edieke amade onyụn̄ okponode Abasi ye Christ, onyụn̄ ebierede ndika iso nnyene eti itie ebuana ye mmọ.
Yak Spirit Jehovah Ada Fi Usụn̄
9. Nso ikeme nditịbe nnọ owo oro ekenyenede edisana spirit edieke enye akade iso anam idiọk?
9 Bọn̄ akam ben̄e Abasi edisana spirit esie, nyụn̄ yak enye ada fi usụn̄. (Luke 11:13; Galatia 5:19-25) Abasi ekeme ndibọ fi spirit esie edieke ọkọbọde ke ndinam idiọk. Ke David ama ekesịn efịbe ye Bath-sheba, enye ama ekpe Abasi ubọk ete: “Kûmen mi ke iso fo uduọk; kûnyụn̄ ubọ mi edisana spirit fo.” (Psalm 51:11) Abasi ama ọbọ Edidem Saul spirit esie sia enye mîkakabakede esịt. Idiọkn̄kpọ oro Saul akanamde ekedi enye ndikọfọp edifọp uwa nnyụn̄ ntre ndisobo n̄kpri ufene, enan̄, ye edidem Amalek. Ke oro ebede, Jehovah ama ọbọ Saul spirit esie.—1 Samuel 13:1-14; 15:1-35; 16:14-23.
10. Ntak mûkpokohokoi uyịre ke edinam idiọkn̄kpọ?
10 Kûkokoi uyịre ke edinam idiọk. Apostle Paul ekewet ete: “Edieke nnyịn ikoide-koi ika iso ndinam idiọkn̄kpọ ke ima ikọbọ nnennen ifiọk akpanikọ, uwa ndomokiet idụhe aba inọ mme idiọkn̄kpọ.” (Hebrew 10:26-31) Nso n̄kpọ mmọn̄eyet ke ekpedi ntem edieke okpokoide-koi aka iso anam idiọkn̄kpọ!
Nen̄ede Ma Mbon Enwen
11, 12. Didie ke ima ye ukpono mîdiyakke owo anam oburobụt ido idan̄?
11 Ima oro amade ekemmọ owo idiyakke fi anam oburobụt ido idan̄. (Matthew 22:39) Utọ ima oro ayanam ekpeme esịt fo mbak enye edinam fi enyene udọn̄ ke idem nsan̄a ndọ owo en̄wen. Ndinyene utọ udọn̄ oro ekeme ndinam owo esịn efịbe. (Mme N̄ke 4:23; Jeremiah 4:14; 17:9, 10) Kpebe Job, kpa eti owo oro akanamde ediomi ye enyịn esie, mîkonyụn̄ imaha nditịn̄ enyịn ke idem n̄wan en̄wen ke mîbọhọke n̄wan esie.—Job 31:1.
12 Ndikpono ndọ nte edisana n̄kpọ ekeme ndin̄wam fi efep ndinam akwa idiọkn̄kpọ. Abasi akaduak ete ẹda ndọ oro enyenede ukpono ye ebuana idan̄ nte usụn̄ ndinyene nditọ. (Genesis 1:26-28) Ti ete ke ẹkenam ndido idan̄ man ẹda ẹbon eyen, ndien uwem edi ata edisana n̄kpọ. Mbon use ye mme esịn efịbe ẹsọn̄ ibuot ye Abasi, ẹsabarede idan̄, idaha ndọ nte edisana n̄kpọ, ẹnyụn̄ ẹnam idiọkn̄kpọ ẹdian ikpọkidem mmọ. (1 Corinth 6:18) Edi owo oro amade Abasi ye mbọhọidụn̄ onyụn̄ okopde uyo Abasi, idinamke mme n̄kpọ oro ẹkemede ndinam ẹsio enye ẹfep ke esop Christian.
13. Didie ke oburobụt owo ‘asuan inyene’?
13 Oyom isịn ndiọi ekikere mbak nnyịn idinam iman nnyịn ẹkop ubiak. Mme N̄ke 29:3 ọdọhọ ke ‘nsan̄a akpara asuan inyene.’ Esịn efịbe oro mîkabakede esịt esibiat itie ebuana esie ye Abasi onyụn̄ abiat ubon. N̄wan esie ekeme ndiwọrọ ndọ ke ntak efịbe. (Matthew 19:9) Edide ebe m̀mê n̄wan anam idiọkn̄kpọ, ndidianade ndọ ekeme ndinam nsan̄a ndọ oro mîduehe, nditọ, ye mbon en̄wen ẹnen̄ede ẹkop ubiak. Mmọn̄ọ, ndi unyịmeke ke ndikam mfiọk adan̄a nte oburobụt ido ekemede ndibiat n̄kpọ n̄ketre ekpenyene ndinam nnyịn ibiọn̄ọ idomo edinam idiọk?
14. Nso n̄kpọ aban̄ade oburobụt ido ke ikeme ndikpep nto Mme N̄ke 6:30-35?
14 Ndifiọk ke owo ikemeke ndifiak nnyene eti enyịn̄ ke ama ekesịn efịbe ekpenyene ndinam nnyịn ifep oburobụt ye ibụk ibụk edinam emi. Mme N̄ke 6:30-35 owụt ke ẹkeme nditre ndinen̄ede nsuene inọ oro eyịpde n̄kpọ man oyụhọ ukpọn̄ esie, edi owo idifenke inọ esịn efịbe ke ntak ibụk ibụk udọn̄ esie. Enye “oyosobo ukpọn̄ [m̀mê uwem] esiemmọ.” Ibet Moses ọkọdọhọ ẹwowot utọ owo oro. (Leviticus 20:10) Esịn efịbe esinam mbon en̄wen ẹkop ubiak ke ntak ediyụhọ idiọk udọn̄ idan̄ esie, ndien esịn efịbe oro mîkabakede esịt ikemeke ndinịm idem ke ima Abasi edi ẹyesio enye ẹfep ke edisana esop Christian.
Ka Iso Nyene Eti Ubieresịt
15. Ubieresịt oro ẹdade “ufiop ukwak” ẹnịm mbọn esitie didie?
15 Man inịm idem ke ima Abasi, inaha iyak ubieresịt nnyịn odoro ufiọn. Nte an̄wan̄ade, inaha nnyịn itiene oburobụt ido uwem ererimbot emi, ndien oyom ikpeme nsan̄a oro idụkde, n̄wed oro ikotde, ye edinam unọ idem inemesịt oro imekde. Paul ama odụri owo utọn̄ ete: “Ke ukperedem ini ndusụk owo ẹyeduọ ẹkpọn̄ mbuọtidem, ẹkpan̄ utọn̄ ẹnọ mme ikọ odudu spirit ye ukpepn̄kpọ mme demon emi ẹtụnde owo usụn̄, ebe ke mbubịk mbon oro ẹsude nsu, oro ubieresịt mmọ odorode ufiọn nte n̄kpọ eke ẹdade ufiop ukwak ẹnịm mbọn.” (1 Timothy 4:1, 2) Ubieresịt oro ẹdade “ufiop ukwak” ẹnịm mbọn etie nte ubọk owo oro esimụmde ufiop eso tutu ubọk esie okpụp, inyụn̄ ikopke aba ubiak. Utọ ubieresịt oro ididọhọke nnyịn aba ete ifehe ibọhọ mbon mfiakedem ye mme idaha oro ẹkemede ndinam nnyịn iduọ ikpọn̄ mbuọtidem.
16. Ntak enen̄erede edi akpan n̄kpọ ndinyene eti ubieresịt?
16 Oyom inyene eti ubieresịt man ẹnyan̄a nnyịn. (1 Peter 3:21) Mbuọtidem oro inyenede ke iyịp oro Jesus ọkọduọkde anam ubieresịt nnyịn asana ọbọhọ mme utom n̄kpa “man nnyịn ikpanam edisana utom inọ odu-uwem Abasi.” (Mme Hebrew 9:13, 14) Edieke ikoide-koi inam idiọkn̄kpọ, emi ọwọrọ ke nnyịn inyeneke eti ubieresịt inyụn̄ idịghe aba ndisana owo, nnyịn ikponyụn̄ idotde ndinam utom Abasi. (Titus 1:15) Edi Jehovah ekeme ndin̄wam nnyịn inyene eti ubieresịt.
Mme Usụn̄ Efen Oro Ẹkemede Ndifep Idiọk Edinam
17. Ntak ọfọnde ‘nditịm nsan̄a ye Jehovah?’
17 ‘Tịm san̄a ye Jehovah’ nte Caleb eyen Israel eset akasan̄ade. (Deuteronomy 1:34-36) Nam se Abasi oyomde oto fi, kûnyụn̄ udedei ukere ndidia n̄kpọ ke “okpokoro mme demon.” (1 Corinth 10:21) Fep se iban̄ade mfiakedem! Nen̄ede dia udia eke spirit oro Jehovah ọnọde, kûyak nsunsu mme andikpep m̀mê odudu ndiọi spirit ẹtụn fi usụn̄. (Ephesus 6:12; Jude 3, 4) Nen̄ede sịn idem ke mme n̄kpọ eke spirit nte edikpep Bible, edidụk mme mbono esop, ye ediwọrọ an̄wautom. Edieke etịmde asan̄a ye Jehovah onyụn̄ enyenede ekese ndinam ke utom Ọbọn̄, afo oyokop inemesịt.—1 Corinth 15:58.
18. Didie ke mbak Abasi editụk edu uwem fo?
18 Biere ‘ndida mbak ye uten̄e nnam edisana utom nnọ Abasi.’ (Mme Hebrew 12:28) Uten̄e Jehovah idiyakke nnyịn idụk idiọk usụn̄ uwem ekededi. Enye ayanam ada item oro Peter ọkọnọde ekemmọ mbon oro ẹyetde aran mi esịn ke edinam: “Edieke mbufo ẹsemede ẹkot Ete emi ekpede ikpe nte ekemde ye utom owo kiet kiet mînyụn̄ iten̄eke owo enyịn, ẹdu uwem ke ndịk ke ini emi mbufo ẹdụn̄de nte isen.”—1 Peter 1:17.
19. Ntak emi akpakade iso ada se ekpepde ke Ikọ Abasi esịn ke edinam?
19 Ka iso da se ekpepde ke Ikọ Abasi sịn ke edinam. Emi ayanam efep ndinam akwa idiọkn̄kpọ koro afo edidi kiet ke otu “mbon oro ẹnọde ukeme ufiọk n̄kpọ mmọ ukpep ebe ke ndida enye nnam n̄kpọ man ẹdiọn̄ọ se inende ye se idiọkde.” (Mme Hebrew 5:14) Utu ke nditịn̄ ikọ m̀mê ndinam n̄kpọ isa isa, tịm kpeme man asan̄a nte owo oro enyenede ọniọn̄, ‘dedep ifet’ ke mme idiọk usen emi. ‘Ka iso fiọk se uduak Jehovah edide,’ nyụn̄ ka iso nam uduak oro.—Ephesus 5:15-17; 2 Peter 3:17.
20. Ntak emi nnyịn mîkpesịnke esịt ke n̄kpọ owo?
20 Kûdedei usịn esịt ke n̄kpọ owo, oro edi ndidiọk itọn̄ nyom se mbon en̄wen ẹnyenede. Kiet ke otu Ibet Duop ọdọhọ ete: “Kûyom [‘kûsịn esịt ke,’ New International Version] ufọk mbọhọidụn̄ fo; kûyom n̄wan mbọhọidụn̄ fo, ye ofụn eren esie, ye ofụn an̄wan esie, ye enan̄ esie, ye ass esie, ye n̄kpọ ekededi eke enyenede mbọhọidụn̄ fo.” (Exodus 20:17) Ibet emi ama ekpeme ufọk owo, n̄wan esie, ofụn, unam ye mme n̄kpọ eken oro enye ekenyenede. Edi se idide akpan n̄kpọ ikan edi ikọ Jesus oro nte ke edisịn esịt ke n̄kpọ owo esisabarede owo.—Mark 7:20-23.
21, 22. Nso ke Christian akpanam mbak edinam idiọkn̄kpọ?
21 Kpeme mbak idiọk udọn̄ edinam fi anam idiọkn̄kpọ. Mbet oro James ekewet ete: “Idomo esịm owo kiet kiet ke ini udọn̄ idemesie odụride onyụn̄ atapde enye. Ekem ke ini udọn̄ oro oyomode, aman idiọkn̄kpọ; ndien ke ini idiọkn̄kpọ oro ama okokụre utom esie, ada n̄kpa edi.” (James 1:14, 15) Ke uwụtn̄kpọ, edieke owo ekesinyenede mfịna un̄wọn̄ ọkpọsọn̄ mmịn, enye ekeme ndibiere nditre ndinịm ọkpọsọn̄ mmịn ke ufọk esie. Man Christian efep ediduọ ke idomo ye owo isio uduot, ekeme ndiyom enye okpụhọ itieutom m̀mê utom esie.—Mme N̄ke 6:23-28.
22 Kûdedei ukere ndinam idiọkn̄kpọ. Ndibre ima ye owo oro mîdịghe nsan̄a ndọ fo ye edinyene oburobụt ekikere ekeme ndinam owo anam use m̀mê esịn efịbe. Ndisu nsu ke n̄kpri n̄kpọ ekeme ndinam owo ekere ke mfịna idụhe edieke isude nsu ke ikpọ n̄kpọ, ndien emi ekeme ndinam owo akabade osu nsu. Ndisifọi n̄kpọ nda ekeme ndinam ubieresịt owo odoro ufiọn tutu enye akabade inọ. Ndikam nnyịme ekikere ‘mbon mfiakedem’ idem ke ata n̄kpri n̄kpọ ekeme ndinam owo akabade owo mfiakedem nte ini akade.—Mme N̄ke 11:9, NW; Ediyarade 21:8.
Nso Edieke Anamde Idiọkn̄kpọ?
23, 24. Nso ndọn̄esịt ke 2 Chronicles 6:29, 30 ye Mme N̄ke 28:13 ẹkeme ndinọ nnyịn?
23 Kpukpru owo ẹdi mme anana-mfọnmma. (Ecclesiastes 7:20) Edi, edieke anamde akwa idiọkn̄kpọ, emekeme ndida mme ikọ akam oro Edidem Solomon ọkọbọn̄de ke ini ẹkeyakde temple Jehovah ẹnọ, ndọn̄ idemfo esịt. Solomon ekeben̄e Abasi ete: “Kpukpru akam, kpukpru n̄kpe-ubọk eke kpukpru owo, ye ofụri ikọt fo Israel, eke ẹdifiọkde ufen mmọ, ye ndutụhọ mmọ, ẹdikpede, ẹdinyụn̄ ẹmenerede ubọk mmọ ẹse ufọk emi: afo tie ndien ke enyọn̄, ke ebietidụn̄ fo, kop, nyụn̄ dahado, nyụn̄ nọ owo kpa nte ekemde ye kpukpru ido enye emi afo ọfiọkde esịt esie: (koro afo ikpọn̄-ikpọn̄ ọfiọkde esịt nditọ Adam).”—2 Chronicles 6:29, 30.
24 Ke akpanikọ, Abasi esifiọk se owo ekerede, ndien enye esinyụn̄ efen ọnọ owo. Mme N̄ke 28:13 ọdọhọ ete: “Owo eke edịpde idiọk ido esie idikwe unen: edi owo eke ayararede, onyụn̄ ọkpọn̄de mmọ, oyokụt mbọm.” Abasi ekeme nditua nnyịn mbọm edieke ikabarede esịt, iyararede inyụn̄ ikpọn̄de idiọkn̄kpọ nnyịn. Edi edieke idem ememde fi ke n̄kan̄ eke spirit, nso efen ikeme ndin̄wam fi enịm idem ke ima Abasi?
Didie ke Afo Ọkpọbọrọ?
• Didie ke ikeme ndinịm idem nnyịn ke ima Abasi?
• Didie ke ima oro imade Abasi ye Christ mîdiyakke nnyịn idụk idiọk afan̄?
• Didie ke ata ima oro imade mbon en̄wen mîdiyakke nnyịn inam oburobụt ido idan̄?
• Ke mme usụn̄ ewe ke ikeme ndifep idiọk edinam?
[Mme Mbụme Ukpepn̄kpọ]
[Ndise ke page 21]
Jude owụt nnyịn nte ikpenịmde idem nnyịn ke ima Abasi
[Ndise ke page 23]
Edidianade ndọ ekeme ndinen̄ede mbiak nsan̄a oro mîduehe ye nditọ
[Ndise ke page 24]
Nte emebiere ‘nditịm nsan̄a ye Jehovah’ ukem nte Caleb?
[Ndise ke page 25]
Bọn̄ akam kpukpru ini ben̄e un̄wam man akan idomo