Ntak Emi Ikpanamde Se Inende?

ỌFIỌKN̄WED owo kiet ọkọdọhọ ini kiet ko ete: “Ukeme ndiyom ndinam n̄kpọ odu ye ami, edi ukeme ndinanam se ifọnde idụhe. Koro eti n̄kpọ oro nyomde ndinam ami nnamke, edi idiọkn̄kpọ oro mmenyomke ndinam kpa oro ke n̄ka iso nnam.” Ntak ọkọsọn̄de eren emi ndinam eti n̄kpọ oro enye okoyomde ndinam? Enye ọkọdọhọ ete: “N̄kụt, ndien, ibet emi mban̄a idem mi: nte ke ini nyomde ndinam se inende, se idiọkde odu ye ami. Mmenen̄ede ndat esịt ke ibet Abasi nte asan̄ade ekekem ye owo oro ami ndide ke esịtidem, edi n̄kụt ibet efen ke mme ndido idem mi nte an̄wanade ye ibet oro odude ke esịt mi onyụn̄ adade mi nte mbuotekọn̄ ọnọ ibet idiọkn̄kpọ emi odude ke mme ndido mi.”—Rome 7:18, 19, 21-23.

Ikọ apostle Paul oro ẹkewetde ke n̄kpọ nte isua 2000 emi ẹkebede, anam ẹfiọk ntak oro ọsọn̄de mme anana-mfọnmma owo ndinam se inende. Oyom owo enen̄ede ama se inende man ekeme ndida ndinen edumbet ndu uwem, akpan akpan ke ini osobode idomo. Ntre odot ibụp ite: Nso idi ata akpan ntak oro ikpanamde se inende?

Kop se N̄wed Abasi etịn̄de aban̄a ini iso edinen owo. Nnyịn ikot ke Psalm 37:37, 38 ite: “Tịn̄ enyịn ke owo eke ọfọnde ama, nyụn̄ se edinen owo: koro (eti) utịt anade ọnọ owo emem. Ẹyenyụn̄ ẹsobo mme idiọk owo ọtọ kiet: ẹyesịbe (eti) utịt mme idiọk owo ẹfep.” Mme N̄ke 2:21, 22 asian nnyịn ete: “Mbon edinen ido ẹyedụn̄ ke obio, mmọ eke ẹfọnde ẹma ẹyenyụn̄ ẹbịghi ke esịt. Edi ẹyesobo mme idiọk owo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.”

Mme un̄wọn̄ọ oro ikotde mi ye mme un̄wọn̄ọ eken ke Bible ẹnọ nnyịn ntak ndinam se inemde Abasi esịt, edi idịghe mmọ ẹdi ata akpan ntak oro inyenede ndinem Abasi esịt. Ata akpan ntak enyene n̄kpọ ndinam ye eneni oro abuanade kpukpru mme angel ke heaven ye mme owo ke isọn̄. Ibuotikọ oro etienede eneme se eneni oro edide ye nte enye otụkde nnyịn.