Ufọkn̄wed Emi Mme Andikụre Ẹnamde Ufọn Ẹnọ Mme Owo ke Ofụri Ererimbot

ABASI ke ekpep kpukpru orụk owo n̄kpọ ke se iwakde ibe esop Mme Ntiense Jehovah 98,000 emi ẹdude ke se ikande idụt 200. Bible edi akpan n̄wed ukpepn̄kpọ emi, ndien uduak ukpepn̄kpọ emi edi man ẹn̄wam mme owo ẹkọri ke n̄kan̄ eke spirit ke ndifiọk se uduak Abasi edide nnyụn̄ ndu uwem ekekem ye enye. Mbon oro ẹbọde ukpep emi ẹnen̄ede ẹbọ ufọn. Mmọ ẹsibuana se mmọ ẹkpepde ye mbon efen, nte Jesus Christ eketemede ke ini enye ọkọdọhọde ẹkenam mbet.—Matthew 28:19, 20.

Mme Ntiense Jehovah ẹsinịm mme akpan ufọkn̄wed, ke adianade ye ukpepn̄kpọ oro mmọ ẹsinịmde kpukpru ini ke mme esop mmọ. Ufọkn̄wed Unọ Mme Asan̄autom Ukpep edi kiet ke otu emi. Ẹketọn̄ọ enye ke Pittsburgh, Pennsylvania, U.S.A. ke October 1987. Nditọ ufọkn̄wed 24 emi ẹketịn̄de Ikọmbakara ẹkedi akpa otu nditọ ufọkn̄wed. Ọtọn̄ọde ke ini oro, ẹmenịm ufọkn̄wed emi ke usem 21 ye ke idụt 43. Kan̄a ke emi, mbiowo ye mme asan̄autom unamutom emi mîdọhọ ndọ, emi ẹtode se iwakde ibe idụt 90 ẹka ufọkn̄wed emi. Ke ẹma ẹkekụre ukpep oro esidade urua itiaita, ẹsinọ mmọ ẹka ebiet oro udọn̄ okponde, ke idụt mmọ m̀mê ke esenidụt. Etisịm utịt 2005, se iwakde ibe owo 22,000 ke otu  Mme Ntiense Jehovah ẹmebọ ukpep emi. Ẹnen̄ede ẹdiọn̄ mmọ ke ndisịn ukeme nnyụn̄ nsụhọde idem nnam utom Obio Ubọn̄ ọkọri nnyụn̄ nnam ufọn nnọ mbon en̄wen.—Mme N̄ke 10:22; 1 Peter 5:5.

Ndiben̄e Idem Nnọ Ufọkn̄wed Emi

Ediwak ke otu mbon oro ẹdụkde Ufọkn̄wed Unọ Mme Asan̄autom Ukpep ẹsinyene ndibọ ini nduọkodudu ke itieutom mmọ nda n̄ka ufọkn̄wed emi. Ndusụk ini emi isimemke utom. Ke Hawaii, iren Christian iba oro ẹdide mme andikpep ẹma ẹdọhọ ẹnọ mmimọ ini man ikodụk ufọkn̄wed emi. Mmọ ẹma ẹsịn eben̄e ẹnyụn̄ ẹnyene mbuọtidem ke Jehovah ayan̄wam mmimọ, ẹnamde an̄wan̄a ntak oro mmimọ iyomde ndika ufọkn̄wed emi ye ufọn oro mmimọ idinyenede. Ẹma ẹnyịme mmọ mbiba ẹka.

Ke ediwak idaha, ẹsidọhọ Mme Ntiense emi ẹyomde ini ndida n̄ka ufọkn̄wed emi ẹte ke ẹyesio mmọ ke utom. Mmọ ẹsimek ndibọ ukpep emi esop Jehovah ọnọde mi, kpa ye oro ẹdisiode mmọ ke utom. Mme eteutom ẹsifiak ẹkot ndusụk mmọ emi ẹdinam utom ke ẹma ẹkekụre ufọkn̄wed emi. Se ẹkemede nditịn̄ mban̄a iwụk oro oyomde ẹnyene man ẹka ufọkn̄wed emi edi emi: Sịn eben̄e fo, bọn̄ akam yom un̄wam Jehovah, nyụn̄ yak enye anam se isụhọde.—Psalm 37:5.

“Jehovah Oyonyụn̄ Eteme”

Ẹsinen̄ede ẹkpep Bible ke urua itiaita oro ẹsinịmde ufọkn̄wed emi. Nditọ ufọkn̄wed ẹsikpep nte ẹtịmde ikọt Jehovah man ẹnam uduak Abasi ye nte mmọ ke idemmọ ẹkemede nditịm nsiak Ikọ Abasi ke utom ukwọrọikọ mmọ, ke mme mbono esop, ye ke mme mbono.

Andikụre ukpep oro ekenen̄erede ama ufọkn̄wed emi ọkọdọhọ owo emi ekeben̄ede idem ndika ete: “Ke akpanikọ, akananam ubọhọ utọ ukpep emi oyomde ndikọbọ do. Itie N̄wed Abasi oro etịn̄de aban̄a ‘Jehovah nditeme’ owo eyetịm an̄wan̄a fi. Kpukpru ukpep emi ẹdi nditụnọ, ndinen̄ede, ndinyụn̄ nnọ owo ukpep man esịt ye edu esie ọdọdiọn̄ ebiet eke Christ Jesus. Emi edidi mfọnn̄kan n̄kpọ oro akanam etịbede ọnọ fi.”—Isaiah 54:13.

Mme Ọkwọrọ Eti Mbụk, Ekpemerọn̄, ye Mme Andikpep

Mme andikụre ukpep ke Ufọkn̄wed Unọ Mme Asan̄autom Ukpep ẹnam utom idahaemi ke idụt 117. Emi ẹsịne mme isuo oro ẹdude ke Atlantic, Caribbean, ye Pacific ọkọrọ ye mme idụt oro n̄kọk itieutom Mme Ntiense Jehovah ẹdude. Mme n̄kọk itieutom ẹtọt ẹte ke ukwọrọikọ, utom ubọkerọn̄, ye ukpep oro nditọ ufọkn̄wed emi ẹnọde ẹwụt ke mmọ ẹma ẹbọ eti ukpep. Ukpep emi etịm mmọ idem nditịm n̄kpep mme owo Bible ke an̄wautom. (2 Timothy 2:15) Mmọ ẹsiwak ndida n̄wed Reasoning From the Scriptures * mbọrọ mme enyeneufọk mbụme, ẹsinyụn̄ ẹkpep mme asuanetop Obio Ubọn̄ eken ndinam kpasụk ntre. Ifịk oro mme andikụre ukpep emi ẹnyenede esibe mbon efen, ndien utom mmọ esisọn̄ọ mme esop idem.

Utom mbiowo esop edi ‘ndikpeme otuerọn̄,’ nnyụn̄ nnọ mmọ se mmọ ẹyomde ke n̄kan̄ eke spirit. (1 Peter 5:2, 3) Ebiowo kiet eketịn̄ ntem aban̄a ndutịm emi ete: “Nnyịn imọkọm n̄kọk itieutom ke ndinọ nditọete oro ẹtịmde ẹnọ ukpep ẹdi ẹdin̄wam nnyịn ibiom mbiomo edikpeme udịmerọn̄ Abasi.” N̄kọk itieutom kiet ke Nsannsan Edem Usiahautịn ekewet ete: “Mme andikụre ukpep emi ẹnen̄ede ẹnyene esịtmbọm. Mmọ ẹsinam utom ọkpọsọn̄, emi onyụn̄ anam esop ẹkpono mmọ. Ẹsitịm ẹfiọk ẹnyụn̄ ẹma nsụhọdeidem, ifụre ifụre ido, ye ifiopesịt mmọ. Mmọ ẹsinyịme ndiwa idemmọ nnyụn̄ n̄wọrọ n̄ka mme esop emi ẹyomde mme ọbọkerọn̄.” (Philippi 2:4) Utọ iren oro ẹsinam ekemmọ mme andinịm ke akpanikọ ẹkop idem inem, onyụn̄ odot ẹtoro mmọ.—1 Corinth 16:18.

Ke adianade ye emi, mme andikpep ke Ufọkn̄wed Unọ Mme Asan̄autom Ukpep ẹsin̄wam nditọ ufọkn̄wed ẹfori usọ mmọ nte mme etịn̄ikọ. Sia mme andikụre ukpep  ẹsidade mme ekikere ye item oro ẹnọde mmọ ẹsịn ke edinam, ẹsisọp ẹda ediwak mmọ ẹnam n̄kpọ ke mme mbono circuit ye eke district. Esenyịn circuit kiet ọkọdọhọ ke mme andikụre ukpep emi ẹsinọ “ndinem utịn̄ikọ ẹnyụn̄ ẹda ata n̄kọkibuot ẹnam se ẹnemede an̄wan̄a.”—1 Timothy 4:13.

Ke ẹma ẹketọn̄ọ Ufọkn̄wed Unọ Mme Asan̄autom Ukpep ke idụt kiet ke Africa, ẹnyụn̄ ẹnọ mme andikụre ukpep ẹka mme esop, ẹma ẹnen̄ede ẹfori usọ unọ ukpep ke mme mbono esop. Ẹsinọ mbiowo ẹto ufọkn̄wed emi ẹka ẹken̄wam ke utom ukwọrọikọ, ubọkerọn̄, ye unọ ukpep, ke ntre ẹsọn̄ọde mme esop idem ke n̄kan̄ eke spirit.—Ephesus 4:8, 11, 12.

Ẹtịm Ẹse Esop Enyịn

Ke ẹyom mbiowo ye mme asan̄autom unamutom ke ata ediwak itie. Ndusụk esop ikpenyeneke mbiowo edieke owo mîkpọnọhọ andikụre ukpep ke Ufọkn̄wed Unọ Mme Asan̄autom Ukpep aka do. Ẹsinọ ediwak mme andikụre ukpep ẹka utọ ebiet emi.

Ediwak n̄kọk itieutom ẹdọhọ ke iren emi “ẹnen̄ede ẹfiọk ndutịm esop,” “ẹda mme mbiomo mmọ ke akpan n̄kpọ,” “ẹn̄wam mbon eken ẹwụt esịtekọm ẹban̄a esop Jehovah,” ẹnyụn̄ “ẹn̄wam mme andibuana ke esop mmọ ẹnyene ifiopesịt ẹnyụn̄ ẹkọri ke n̄kan̄ eke spirit.” Emi esidi koro mme andikụre ukpep ke ufọkn̄wed emi ẹnam se ẹwetde ke Ikọ Abasi inyụn̄ iberike edem ke asian mmọ m̀mê ndise idem ke mme ọfiọkn̄kpọ. (Mme N̄ke 3:5-7) Utọ iren emi ẹsida ekese edidiọn̄ eke spirit ẹsọk mme esop oro ẹnọde mmọ ẹkenam utom.

Ndinam Utom ke Mme Nsannsan Efakutom

Ndusụk mme andikụre ukpep oro ẹnọde ẹkenam utom nte mme akpan asiakusụn̄ ẹsin̄wam mme otu ẹkabade ẹdi mme esop. Ebiowo kiet ke nsannsan ikpehe Guatemala eketịn̄ ntem ndiwụt esịtekọm oro enye enyenede aban̄a un̄wam oro mmọ ẹnọde: “Ke ofụri isua 20 emi ẹbede, mma nsikere nte ẹdikwọrọde ikọ ke utọ akaka efakutom emi. Mma nsibọn̄ akam mban̄a n̄kpọ emi. Ẹma ẹtịm ẹkpep nditọete oro ẹkụrede ufọkn̄wed emi ndinọ utịn̄ikọ, mmọ ẹnyụn̄ ẹfiọk ndutịm esop, ndien esịt enem mi ndikụt ke ẹnen̄ede ẹse ẹban̄a obio emi idahaemi.”

Mmọ ẹsikpep ndikụt unen ke mme efakutom oro mmọ ẹnyenede ndisan̄a anyan isan̄ nnyụn̄ ndọk n̄kokon̄ obot man ẹkesịm n̄kpri obio eken. Mmọ ẹsisọp ẹtọn̄ọ mme otu idem ke mme itie emi mbon eken mîkekemeke nditọn̄ọ otu ndomokiet. Ke uwụtn̄kpọ, ebiowo kiet ke Niger ama ọdọhọ ẹnọ mme andikụre ukpep ẹdin̄wam sia enye ekekerede ke mmọ ẹkeme ndinam ata eti utom ke ebiet oro enye okodụn̄de. Edi mmemmem n̄kpọ iren oro mîdọhọ ndọ ndinam utom nte mme akpan asiakusụn̄ ye mme esenyịn circuit akpan akpan ke mme nsannsan ebiet. Ukem nte apostle Paul, mmọ ẹyesobo ‘n̄kpọndịk ke akpa ye ke ubọk mbon n̄wo, n̄kpọndịk ke wilderness,’ mmọ ẹnyene ndiwa idem, nnyụn̄ n̄kere mban̄a mme esop oro mmọ ẹnamde utom.—2 Corinth 11:26-28.

Ẹnyene Ufọn Ẹnọ Mme Uyen

N̄wed Abasi esịn udọn̄ ọnọ n̄kparawa owo ete ẹti Andibot mmọ. (Ecclesiastes 12:1) Mme ifịk ifịk andikụre ukpep ke Ufọkn̄wed Unọ Mme Asan̄autom Ukpep ẹsinịm eti uwụtn̄kpọ ẹnọ n̄kparawa Christian. Ke owo iba oro ẹkụrede ukpep ẹma ẹkeka esop kiet ke United States, ini oro nditọete ẹkebiatde ke utom ukwọrọikọ ama awak utịm ikaba akan nte ekedide ke akpa. Akan oro, mme asiakusụn̄ ofụri ini, m̀mê mme anditan̄a Obio Ubọn̄ uyọhọ ini emi ẹkedide owo 2 kpọt ẹma ẹwak ẹkesịm owo 11. Utọ n̄kọri emi esidu n̄ko ke ediwak esop.

Mme andikụre ukpep ẹsisịn udọn̄ nde ẹnọ n̄kparawa ndikere mban̄a edika Ufọkn̄wed Unọ Mme Asan̄autom Ukpep. Emi esinam ndusụk mbon oro mîdịghe kan̄a mme asan̄autom unamutom ẹsịn ukeme man ẹkpedi. Ke n̄kọk itieutom Netherlands, ẹdọhọ ke mme andikụre ukpep ke Ufọkn̄wed Unọ Mme Asan̄autom  Ukpep ‘ẹnịm uwụtn̄kpọ ẹnọ n̄kparawa oro ẹkerede se ẹdidade uwem mmọ inam.’

Ndinam Utom ke Mme Esop Oro Ẹsemde Esen Usem

Ke ediwak idụt, ke ẹsịn ukeme ndikwọrọ ikọ nnọ mme owo ke usem emana mmọ. Mme andikụre ukpep ke Ufọkn̄wed Unọ Mme Asan̄autom Ukpep ẹsikpep usem en̄wen ẹnyụn̄ ẹnam utom ke mme efakutom oro ediwak mbon isenidụt ẹdụn̄ọde. Ke uwụtn̄kpọ, ke Belgium, ẹyom mme ọkwọrọ Obio Ubọn̄ efen efen ke efakutom oro ẹsemde Albanian, Persian, ye Russian.

Mme esop ye otu usem esenidụt ke Britain, Germany, Italy, Mexico, United States, ye mme idụt eken ẹmebọ akamba ufọn ẹto mme esenyịn oro ẹsan̄ade-san̄a, mbiowo, ye mme asan̄autom unamutom oro ẹkekade Ufọkn̄wed Unọ Mme Asan̄autom Ukpep. N̄kọk itieutom Korea ẹdọhọ ke “se iwakde ibe owo 200 oro ẹkekụrede ukpep ke ẹnen̄ede ẹsịn ifịk ẹn̄wam mme esop ye mme otu oro ẹsemde usem esenidụt.”

Ndisụhọde Idem Nnam Mme Utom En̄wen

Ke adianade ye ndinam utom ye mme esop ye mme otu oro ẹsemde usem esenidụt, mbon oro ẹkekụrede ukpep ke Ufọkn̄wed Unọ Mme Asan̄autom Ukpep ẹnam utom nte mbiowo, mme asan̄autom unamutom, ye mme esenyịn oro ẹsan̄ade-san̄a. Ndusụk mmọ ẹsinyịme ndikanam utom ke idụt en̄wen, ẹnamde utom ke Itieutom Utịmutom ke n̄kọk itieutom. Mbon oro ẹnyenede ifiọk ubọpn̄kpọ ẹkeme nditiene mbọp Ufọkmbono Obio Ubọn̄.

Ibat mme esop ye circuit ndikọri ke ofụri ererimbot owụt ke ẹsụk ẹyoyom mbufa esenyịn oro ẹsan̄ade-san̄a. Man ẹnyene mbufa esenyịn oro ẹsan̄ade-san̄a, ẹsimek ndusụk mme andikụre ukpep ke Ufọkn̄wed Unọ Mme Asan̄autom Ukpep ẹnyụn̄ ẹnọ mmọ ukpep ke urua duop man ẹnam utom oro ẹsan̄ade-san̄a nte mme andida itie m̀mê mme esenyịn circuit. N̄kpọ nte mme andikụre ukpep 1,300 ẹnam utom nte mme esenyịn oro ẹsan̄ade-san̄a ke idụt 97. Ke idụt kiet ke Africa, n̄kpọ nte mbahade iba ke otu mme esenyịn oro ẹsan̄ade-san̄a ẹma ẹka Ufọkn̄wed Unọ Mme Asan̄autom Ukpep. Ke idụt efen ke Africa, n̄kpọ nte owo itiaba ke otu owo duop ẹkeka.

Ke Australia, Canada, Europe, Nsannsan Edem Usiahautịn, ye United States, ẹnọ ediwak mme andikụre ukpep ke mme itie ikie ẹkenam utom ke mme idụt efen. Ke ntem, ufọn ufọkn̄wed oro atara esịm ofụri ererimbot.

Jehovah amada Jesus Christ Eyen esie anam inyene mme ọkwọrọ eti mbụk, mme ekpemerọn̄, mme andikpep, ye mmọ eken oro ẹnamde utom Obio Ubọn̄ ọkọri ke mme akpatre usen emi. Ndi imekeme ndidori enyịn ke ikọt Abasi ẹyeka iso nditọt? Edi ntre! Ntem ẹyom ediwak iren oro ẹyakde idem ẹnọ ẹnyanade ẹbịne ifetutom efen efen. (Isaiah 60:22; 1 Timothy 3:1, 13) Ufọkn̄wed Unọ Mme Asan̄autom Ukpep ọnọ mbiowo ye mme asan̄autom unamutom ifet nditat utom mmọ nnyụn̄ nda ufọn nsọk idemmọ ye mme owo ke ofụri ererimbot.

[Ikọ idakisọn̄]

[Mme ndise ke page 10]

Ufọkn̄wed Unọ Mme Asan̄autom Ukpep ke anam utom Obio Ubọn̄ ọkọri

[Mme ndise ke page 13]

Ndi ọdọn̄ fi ndika Ufọkn̄wed Unọ Mme Asan̄autom Ukpep nnyụn̄ nnam n̄kpọ nnọ mbon en̄wen?