Ẹyarade Andibiọn̄ọ Christ

DIDIE ke afo ekpekpeme idemfo edieke ọkpọfiọkde ke ata idiọk udọn̄ọ ke atara asuana ke mbọhọ mbufo? Etie nte afo akpada editịbe oro mîdiyakke udọn̄ọ oro ebe fi ukponyụn̄ usan̄ake-san̄a ukpere mbon oro ẹkemede ndinọ fi udọn̄ọ oro. Se inyenede ndinam edi oro ke n̄kan̄ eke spirit. N̄wed Abasi asian nnyịn ke andibiọn̄ọ Christ “ododu ke ererimbot.” (1 John 4:3) Edieke nnyịn mîyomke ndimen udọn̄ọ eke spirit, ana ifiọk mbon oro ẹsuande udọn̄ọ emi inyụn̄ ifep mmọ. Nnyịn imokop inemesịt koro Bible enen̄ede anam ifiọk mmọ.

Ke nditịm ntịn̄, owo ekededi oro an̄wanade ye Christ, m̀mê abian̄ade owo ete ke idi Christ, m̀mê ke ida ke ibuot esie, edi andibiọn̄ọ Christ. Jesus ke idemesie ọkọdọhọ ete: “Owo eke mîdaha ye ami an̄wan̄wana ye ami [m̀mê edi andibiọn̄ọ Christ], owo eke mînyụn̄ idaha ye ami itan̄ ibok asasuan.”—Luke 11:23.

Edi akpanikọ ke Jesus ama akpa onyụn̄ eset aka heaven ke se ibede isua 60 mbemiso John ekewetde aban̄a andibiọn̄ọ Christ. Mmọdo, ẹdidiọn̄ọ mme andibiọn̄ọ Christ etiene nte mmọ ẹnamde n̄kpọ ye mme anam-akpanikọ anditiene Jesus ke isọn̄.—Matthew 25:40, 45.

Andibiọn̄ọ Christ Edi Andibiọn̄ọ Mme Christian

Jesus ama asian mme anditiene enye ete ke ererimbot ẹyesua mmọ. Enye ọkọdọhọ ete: “Mme owo ẹyeda mbufo ẹyak ẹnọ ukụt ẹnyụn̄ ẹwot mbufo, ndien mbufo ẹyedi mbon emi kpukpru mme idụt ẹsuade ke ntak enyịn̄ mi. Ndien ediwak prọfet nsu ẹyedaha ẹda ẹnyụn̄ ẹda ediwak owo ẹtụn usụn̄.”—Matthew 24:9, 11.

Sia ẹkọbọde mme mbet Jesus “ke ntak enyịn̄” Jesus, mme andikọbọ emi ẹnen̄ede ẹdi mme andibiọn̄ọ Christ. Mme “prọfet nsu,” emi ndusụk mmọ ẹkedide Christian, ẹsịne ke otu emi. (2 John 7) Apostle John ekewet  ete ke “ediwak mme andibiọn̄ọ Christ . . . ẹketo ke otu nnyịn ẹwọn̄ọ, edi mmọ ikedịghe eke nnyịn; koro edieke mmọ ẹkpekedide eke nnyịn, mmọ ẹkpekedu ye nnyịn.”—1 John 2:18, 19.

Se Jesus ye John ẹketịn̄de owụt in̄wan̄-in̄wan̄ nte ke andibiọn̄ọ Christ idịghe owo kiet, edi ke ediwak mme andibiọn̄ọ Christ ẹnam otu emi. Akan oro, sia mmọ ẹdide mme prọfet nsu, kiet ke otu uduak mmọ edi ndida nsunsu ukpepn̄kpọ mbian̄a mme owo. Nso idi ndusụk usụn̄ oro mmọ ẹdade ẹnam emi?

Ndisuan Nsunsu Ukpepn̄kpọ

Apostle Paul ama odụri Timothy nsan̄autom esie utọn̄ ete ekpeme idem ye ukpepn̄kpọ mbon mfiakedem, utọ nte eke Hymenaeus ye Philetus, emi ‘ikọ mmọ akatarade nte ndọk.’ Paul ama adian do ete: “Mmọ emi ẹma ẹwọn̄ọde ẹkpọn̄ akpanikọ, ẹdọhọde ẹte ediset ke n̄kpa ama etetịbe; ndien mmọ ke ẹwụri mbuọtidem ndusụk owo.” (2 Timothy 2:16-18) Etie nte Hymenaeus ye Philetus ẹkekpep ẹte ke ediset ke n̄kpa edi ndamban̄a n̄kpọ ye nte ke mme Christian ẹma ẹseset ke n̄kan̄ eke spirit. Edi akpanikọ ke Paul ke idemesie ama etịn̄ in̄wan̄-in̄wan̄ ete ke Abasi ada owo oro akabarede edi ata mbet Jesus nte owo emi esetde ke n̄kpa. (Ephesus 2:1-5) Nte ededi, se Hymenaeus ye Philetus ẹkekpepde ẹkewụt ke mmọ ikenịmke se Jesus ọkọn̄wọn̄ọde ete ke mme owo ẹyeset ke n̄kpa ke ata ata usụn̄ ke Obio Ubọn̄ Abasi.—John 5:28, 29.

Nte ini akakade, mbon n̄ka Gnostic ẹma ẹdisio ekikere ẹdi oro ọdọhọde ke ediset ke n̄kpa edi ndamban̄a n̄kpọ kpọt. Sia mbon n̄ka Gnostic ẹkenịmde ke owo ekeme ndida ndedịbe odudu nnyene ifiọk, mmọ ẹma ẹda ukpepn̄kpọ mbon mfiakedem Ido Ukpono Christ ẹbuak ye ukpepn̄kpọ akwaifiọk mbon Greece ye ndedịbe ifiọk mbon Edem Usiahautịn. Ke uwụtn̄kpọ, mmọ ẹkenịm ke kpukpru n̄kpọ obụkidem ẹdi idiọkn̄kpọ, oro akanam mmọ  ẹnịm ke Jesus ikedịghe ke obụkidem, edi ke eketetie nte ke enye enyene idem eke obụk. Nte ima ikokụt, emi edi se apostle John ekenen̄erede odụri owo utọn̄ aban̄a.—1 John 4:2, 3; 2 John 7.

Nsunsu ukpepn̄kpọ efen oro ẹketịbide ẹdi ke ediwak isua ikie ẹma ẹkebe edi inua-okot edisana Abasi-Ita-ke-Kiet, emi ẹdọhọde ke Jesus edi Ata Ọkpọsọn̄ Abasi, afiak edi Eyen Abasi. Dr. Alvan Lamson ọdọhọ ke n̄wed esie oro The Church of the First Three Centuries, ete ke ukpepn̄kpọ Abasi-Ita-ke-Kiet “idụhe ebiet ndomokiet ke N̄wed Abasi mme Jew ye eke mme Christian; nte ke ekedi ukpepn̄kpọ emi ọwọrọ edi, mme Ete Ufọkabasi oro ẹkemade ukpepn̄kpọ Plato ẹda enye ẹdisịn ke Ido Ukpono Christ.” Mmanie ẹkedi “mme Ete Ufọkabasi oro ẹkemade ukpepn̄kpọ Plato”? Mmọ ẹkedi mme ọkwọrọ ederi, kpa mbon mfiakedem oro ẹkemade ukpepn̄kpọ Plato, kpa okpono ndem owo akwaifiọk Greece.

Ndikada ukpepn̄kpọ Abasi-Ita-ke-Kiet ndisịn ke Ido Ukpono Christ ekedi ata idiọk n̄kari oro andibiọn̄ọ Christ akanamde, sia ukpepn̄kpọ emi akanam Abasi etie nte ndịben̄kpọ inyụn̄ iyakke mme owo ẹfiọk idaha Abasi ye eke Eyen esie. (John 14:28; 15:10; Colossae 1:15) Kam kere, edieke Abasi ekpedide ndịben̄kpọ, didie ke mme owo ekpekeme ‘ndisan̄a n̄kpere enye’ nte emi N̄wed Abasi etemede?—James 4:8.

Ediwak mme andikabade Bible ẹnam n̄kpọ emi ẹtetịm ẹtịmede mme owo ke ndisio enyịn̄ Abasi Ibom, Jehovah, mfep ke edikabade mmọ, okposụkedi enyịn̄ oro odude ebe utịm ike 7,000 ke akpasarade uwetn̄kpọ! Nte an̄wan̄ade, ndidomo ndinam Ata Ọkpọsọn̄ Abasi akabade etie nte ndịben̄kpọ oro mînyeneke enyịn̄ iwụtke ndomo esisịt ukpono inọ Andibot ye Ikọ esie oro ẹkedade odudu spirit esie ẹwet. (Ediyarade 22:18, 19) Ke adianade do, ndiwet mme udorienyịn̄ nte Ọbọn̄ ye Abasi ke itie enyịn̄ Abasi ikemke ye akam oro Jesus ekekpepde, emi ọdọhọde ubak ubak ete: “Yak ẹnam enyịn̄ fo asana.”—Matthew 6:9.

Andibiọn̄ọ Christ Imaha Obio Ubọn̄ Abasi

Mme andibiọn̄ọ Christ ẹnen̄ede ẹsọn̄ odudu ke “mme akpatre usen” emi. (2 Timothy 3:1) Akpan uduak mmọ edi nditụn mme owo usụn̄ mbak mmọ ẹdifiọk ke Jesus edi Edidem Obio Ubọn̄ Abasi, kpa ukara heaven oro edikarade ofụri isọn̄ ke mîbịghike.—Daniel 7:13, 14; Ediyarade 11:15.

Ke uwụtn̄kpọ, ndusụk mme adaiso ido ukpono ẹkwọrọ ẹte ke Obio Ubọn̄ Abasi odu owo ke esịt, kpa ukpepn̄kpọ oro mîdụhe ke N̄wed Abasi. (Daniel 2:44) Mbon en̄wen ẹdọhọ ke Christ ada mme ukara m̀mê mme n̄ka ererimbot emi usụn̄. Edi Jesus ọkọdọhọ ete: “Obio ubọn̄ mi idịghe ubak ererimbot emi.” (John 18:36) Ke akpanikọ, Satan akam edi “andikara ererimbot emi,” idịghe Christ, enye n̄ko edi “abasi editịm n̄kpọ emi.” (John 14:30; 2 Corinth 4:4) Emi anam ifiọk ntak emi Jesus edisọpde osobo kpukpru ukara owo onyụn̄ akabade edi n̄kukụre Andikara isọn̄. (Psalm 2:2, 6-9; Ediyarade 19:11-21) Se mme owo ẹsiben̄ede edi oro ke ini ẹbọn̄de Akam Ọbọn̄ ẹte: “Yak obio ubọn̄ fo edi. Yak uduak fo ada itie, . . . ke isọn̄.”—Matthew 6:10.

Sia ediwak mme adaiso ido ukpono ẹdiade ubọk kiet ye n̄ka ukaraidem ererimbot emi, mmọ ẹsibiọn̄ọ ẹnyụn̄ ẹkam ẹkọbọ mbon oro ẹtan̄ade akpanikọ ẹban̄a Obio Ubọn̄ Abasi. Enem ndifiọk ke n̄wed Ediyarade etịn̄ n̄kpọ aban̄a ndamban̄a akpara kiet—“Akwa Babylon”—emi ọn̄wọn̄de “iyịp ndisana owo ye iyịp mme ntiense Jesus oyụhọ.” (Ediyarade 17:1-18) Enye asan̄a akpara eke spirit ke ndinọ “ndidem” isọn̄, m̀mê mme n̄ka ukaraidem, ibetedem man ẹfọn mfọn ye enye. Ndamban̄a n̄wan akpara emi idịghe n̄kpọ efen ikan mme nsunsu ido ukpono ererimbot emi. Nsunsu ido ukpono edi ata akpan andibiọn̄ọ Christ.—Ediyarade 18:2, 3; James 4:4.

Mme Andibiọn̄ọ Christ Ẹnam Mme Owo “Ẹkop Se Utọn̄ Mmọ Ẹmade”

Ediwak inua-okot Christian ẹsịn akpanikọ Bible ye idaha udu uwem oro Bible etemede,  ẹkabade ẹma ido uwem oro ediwak owo ẹmade. Ikọ Abasi ama ebebem iso etịn̄ ke emi eyetịbe, ete: “Ini eyedi eke mmọ [mbon oro ẹdọhọde ke inam n̄kpọ Abasi] mîdibọhọ eti ukpepn̄kpọ, edi, mmọ ẹyekọ mme andikpep ẹnọ idemmọ man ẹkop se utọn̄ mmọ ẹmade ndikop, nte ekemde ye mme udọn̄ idemmọ.” (2 Timothy 4:3) Ẹkot nsunsu mme andikpep emi n̄ko “mme apostle nsu, mme anamutom abian̄a, emi ẹforode mme apostle Christ.” Bible adian do ete: “Utịt mmọ eyekem ye mme utom mmọ.”—2 Corinth 11:13-15.

Utom mmọ esịne “mbukpo ido,” emi edide edinen̄ede nda ata eti ido uwem ke mbio. (2 Peter 2:1-3, 12-14) Ndi nnyịn isikwe ata ediwak mme adaiso ido ukpono ye mbon ido ukpono mmọ ẹnamde—mîdịghe yak idọhọ ẹyakde ẹnam—utọ ndiọi n̄kpọ nte idan̄ ukemuduot, use, ye efịbe? Mbọk da ini men usụn̄ uwem oro ediwak owo ẹdọhọde ke ọfọn mi ye nte mme owo ẹdude uwem mfịn domo ye se Bible etịn̄de ke Leviticus 18:22; Rome 1:26, 27; 1 Corinth 6:9, 10; Mme Hebrew 13:4; ye Jude 7.

“Ẹdomo Mme Ikọ Odudu Spirit Ẹse”

Ke ikerede iban̄a se inemede emi, akpana inam se apostle John etịn̄de ete ikûdedei ida se nnyịn ikpepde ke Bible efere efere. Enye odụri owo utọn̄ ete: “Ẹkûnịm kpukpru ikọ odudu spirit ke akpanikọ, edi ẹdomo mme ikọ odudu spirit ẹse man ẹkụt m̀mê mmọ ẹtọn̄ọ ẹto Abasi, koro ediwak prọfet nsu ẹwọn̄ọ ẹdụk ke ererimbot.”—1 John 4:1.

Kere ban̄a eti uwụtn̄kpọ ndusụk mbon oro ‘ẹkenyenede ido ẹkan’ ke obio Beroea ke akpa isua ikie. Mmọ ẹma ẹbọ “ikọ [Abasi] ye ata ọkpọsọn̄ udọn̄, ẹnen̄ede ẹdụn̄ọde N̄wed Abasi ke usen ke usen ẹte ise m̀mê [se Paul ye Silas ẹketịn̄de] ẹdi ntre.” (Utom 17:10, 11) Ih, okposụkedi oro mbon Beroea ẹkenyenede ọkpọsọn̄ udọn̄ ndikpep n̄kpọ, mmọ ẹma ẹkụt ẹte ke se mmimọ ikokopde inyụn̄ inyịmede ẹkenen̄ede ẹto N̄wed Abasi.

Mfịn n̄ko, ata mme Christian iyakke nsio nsio ekikere oro mînyeneke iwụk, emi ediwak owo ẹmade ẹtụn mmọ usụn̄, edi mmọ ẹsọn̄ọ ẹyịre ke akpanikọ Bible. Apostle Paul ekewet ete: “Emi edi se n̄kade iso mbọn̄ akam, nte ima mbufo akpakam ọdọdiọn̄ awak ke nnennen ifiọk ye ọyọhọ mbufiọk.”—Philippi 1:9.

Edieke edide unamke oro kan̄a, biere ndinyene “nnennen ifiọk ye ọyọhọ mbufiọk” ebe ke ndikpep se Bible enen̄erede ekpep. Mme andibiọn̄ọ Christ ikemeke ndida “abian̄a abian̄a ikọ” mbian̄a mbon oro ẹkpebede mbon Beroea. (2 Peter 2:3) Utu ke oro, akpanikọ eke spirit oro anamde ẹfiọk ata Christ ye ata mme anditiene enye osio mmọ ke ufụn.—John 8:32, 36.

[Ekebe/Ndise ke page 4]

SE BIBLE ETỊN̄DE ABAN̄A ANDIBIỌN̄Ọ CHRIST

“N̄kpri nditọ, akpatre ini edi emi [eyedi akpatre ini oro mme apostle ẹkedude uwem ke isọn̄], ndien kpa nte mbufo ẹkekopde ẹte andibiọn̄ọ Christ ke edi, ediwak mme andibiọn̄ọ Christ ẹkam ẹdodu ke emi.”—1 John 2:18.

“Anie edi osu nsu ke mîdịghe owo emi ọdọhọde ete ke Jesus idịghe Christ? Enye emi edi andibiọn̄ọ Christ, kpa owo emi akan̄de Ete ye Eyen.”—1 John 2:22.

“Kpukpru ikọ odudu spirit eke mînyịmeke Jesus itọn̄ọke ito Abasi. N̄ko-n̄ko, emi edi ikọ odudu spirit eke otode andibiọn̄ọ Christ emi mbufo ẹkekopde ke eyedi, ndien idahaemi enye ododu ke ererimbot.”—1 John 4:3.

“Ediwak mbon abian̄a ẹma ẹwọn̄ọ ẹdụk ke ererimbot, kpa mmọ emi mînyịmeke nte ke Jesus Christ ekedi ke obụkidem. Owo emi edi andibian̄a ye andibiọn̄ọ Christ.”—2 John 7.

[Ekebe/Mme ndise ke page 5]

ANDIBIAN̄A EMI AWAKDE N̄KEM

“Andibiọn̄ọ Christ” edi owo ekededi oro mînyịmeke se Bible etịn̄de aban̄a Jesus Christ, kpukpru owo oro ẹbiọn̄ọde Obio Ubọn̄ esie, ye kpukpru mbon oro ẹfiomode mme anditiene enye. Enye n̄ko edi mme owo, mme esop, ye mme idụt oro ẹbian̄ade owo ẹte ke ida ke ibuot Christ m̀mê oro ẹdọhọde ke iyanam se Messiah edinamde, emi ẹsọn̄ọde enyịn ẹn̄wọn̄ọ ndinam se Christ kpọt ekemede ndinam—oro edi ndida ata emem ye ifụre ndi.

[Ebiet Ẹdade N̄kpọ Ẹto]

Augustine: ©SuperStock/age fotostock

[Ndise ke page 7]

Akpana ‘isidụn̄ọrede N̄wed Abasi ke usen ke usen’ nte mbon Beroea ẹkedụn̄ọrede