Ọfọn Ndinam Akpanikọ

UNANA edinam akpanikọ ọkọtọn̄ọ toto ke In̄wan̄ Eden. Kpa ye oro, mme owo ke ediwak ebiet ẹnen̄ede ẹma edinam akpanikọ ẹnyụn̄ ẹnen̄ede ẹsua abian̄a. Esịt esinem owo oro ẹdade nte owo akpanikọ. Nte ededi, ediwak owo ẹkere ke oyom owo anam n̄kpọ n̄kari n̄kari man ekeme ndidu uwem ke ererimbot mfịn. Afo ese emi didie? Ndi ọfọn ndinam akpanikọ? Nso ke afo esida ebiere se idide edinam akpanikọ ye se mîdịghe?

Oyom nnyịn itịn̄ inyụn̄ inam akpanikọ man inem Abasi esịt. Apostle Paul ọkọdọhọ ekemmọ mme Christian ete: “Yak owo mbufo kiet kiet etịn̄ akpanikọ ọnọ mbọhọidụn̄ esie.” (Ephesus 4:25) Paul ama ewet n̄ko ete ke ‘nnyịn iyom ndidu uwem edinam akpanikọ ke kpukpru n̄kpọ.’ (Mme Hebrew 13:18) Nnyịn iyomke ndinam akpanikọ man mme owo ẹtoro nnyịn. Nnyịn inam akpanikọ sia ikponode Andibot nnyịn inyụn̄ iyomde ndinem enye esịt.

Kûdi Owo Mbubịk

Ke ediwak idụt, mme owo ẹsinam nte idi se mmọ mîdịghe man ẹbọ ufọn. Mmọ ẹsida okụk ẹdep mme abian̄a abian̄a n̄wedisan̄, n̄weditoro, ye kad idiọn̄ọ man ẹkeme ndidụk idụt en̄wen m̀mê ẹnyene utom m̀mê ifetutom oro mîkpanaha mmọ ẹnyene. Ndusụk mme ete ye eka ẹsikpụhọde isua emana nditọ mmọ man nditọ mmọ ẹdot ndika n̄wed.

Nte ededi, inaha nnyịn ibian̄a abian̄a edieke iyomde ndinem Abasi esịt. Bible ọdọhọ ke Jehovah edi “Abasi akpanikọ” ye nte ke enye oyom mbon oro ẹyomde ndidi ufan imọ ẹnam akpanikọ. (Psalm 31:5) Edieke nnyịn iyomde ndidi mme ufan Jehovah, inaha ikpebe “mbon nsu” emi ẹdide “mbon mbubịk.”—Psalm 26:4.

Enen̄ede edi ọsọ n̄kpọ n̄ko mfịn mme owo ndidịp akpanikọ ke ini ẹfiọkde ke iyọbọ ntụnọ ke idiọkn̄kpọ oro mmimọ inamde. Ekeme ndidọn̄ owo ndinam ntre idem ke esop Christian. Ke uwụtn̄kpọ, ke esop kiet, akparawa kiet ama enyịme ke iso mbiowo ke imọ ima inam idiọkn̄kpọ. Edi enye ikenyịmeke ke ima iyịp n̄kpọ, kpa ye uyarade oro okodude ke enye ama eyịp. Ẹma ẹdiyarade enye ẹnyụn̄ ẹsio enye ẹfep ke esop. Ndi ikpokowụtke ifiọk edieke enye ekpeketịn̄de ofụri akpanikọ onyụn̄ ọbọ un̄wam oro akpakanamde enye afiak enyene ọsọn̄urua itie ebuana esie ye Jehovah? Kamse, Bible ọdọhọ ete: “Kûse ntụnọ Jehovah ke usụhọde, kûnyụn̄ uyemede ke ini enye enen̄erede fi; koro  Jehovah otụnọ owo eke enye amade.”—Mme Hebrew 12:5, 6.

Ndusụk ini, eyenete oro oyomde ifetutom ke esop ekeme ndidịp mme ndudue esie m̀mê idiọkn̄kpọ oro enye ama akananam. Ke uwụtn̄kpọ, ke ini enye esịnde n̄wed eben̄e oyom akpan ifetutom ekededi, enye ekeme ndidịp ndusụk n̄kpọ ke ini ọbọrọde mme mbụme oro ẹban̄ade nsọn̄idem ye ido uwem esie, ekerede ke nditịn̄ akpanikọ ekeme ndinam imọ ikûdot. Enye ekeme ndikere ke imọ isụhọ nsu, edi ndi enye ama enen̄ede etịn̄ nnennen n̄kpọ ye se idide akpanikọ? Kere ban̄a ikọ emi ke Mme N̄ke 3:32: “Koro mme ọsọn̄-ibuot [“owo abian̄a,” NW] ẹdide se Jehovah asuade: edi enye odụk odu ye mbon edinen ido.”

Akpa kan̄a, ndinam akpanikọ ọwọrọ nditre ndibian̄a idem nnyịn. Nnyịn isiwak ndinịm se iyomde ndinịm utu ke ndinịm se inende m̀mê se idide akpanikọ. Edi mmemmem n̄kpọ didie ntem ndiduọhọ mbon en̄wen ke ndudue oro inamde! Ke uwụtn̄kpọ, Edidem Saul ama odomo ndiwụt ke imọ ikọsọn̄ke ibuot ke ndidọhọ ke mbon en̄wen ẹkedi ntak. Nte utịp, Jehovah ama esịn enye nte edidem. (1 Samuel 15:20-23) Edidem David iketiehe ntre, enye ọkọbọn̄ akam ọnọ Jehovah ete: “Nyasian fi ndudue mi, ndien n̄kofụkke mme ukwan̄-n̄kpọ mi. N̄kọdọhọ nte, Nyetịn̄ mme idiọk ido mi nnọ Jehovah; ndien afo efen ukwan̄-n̄kpọ ye ndudue mi.”—Psalm 32:5.

 Edinam Akpanikọ Ada Edidiọn̄ Edi

Edinam akpanikọ m̀mê unana edinam akpanikọ otụk nte mbon en̄wen ẹsede fi. Edieke mme owo ẹfiọkde ke ama abian̄a mmimọ idem edieke ekedide ini kiet kpọt, mmọ idinịmke fi aba ke akpanikọ, ndien ọyọsọn̄ mmọ ndinyene mbuọtidem ke idemfo. Edi, edieke afo esitịn̄de onyụn̄ anamde akpanikọ, mme owo ẹyefiọk fi nte owo akpanikọ emi odotde ẹberi edem. Mme owo ẹda Mme Ntiense Jehovah ntre. Kere ban̄a mme uwụtn̄kpọ emi.

Ke ini adausụn̄ ke usiakifia kiet ekedide edifiọk ke ediwak mbonutom esie ẹma ẹyịp n̄kpọ ke itieutom, enye ama ada bodisi edimụm mmọ. Ke ini enye ọkọfiọkde ke ẹma ẹtiene ẹmụm owo utom esie emi edide kiet ke otu Mme Ntiense Jehovah, enye ama aka itieutom mme bodisi man okosio enye usọp usọp. Ntak-a? Edi koro enye ama ọfiọk ke owo emi esinam akpanikọ ke utom inyụn̄ inyeneke nduduọhọ. Ntiense oro ama aka iso anam utom do, edi ẹma ẹdọhọ mbon eken ẹkpọn̄ utom. Ekemmọ Mme Ntiense ẹma ẹdara sia ẹkefiọkde ke ido esie ama ada itoro ọnọ enyịn̄ Jehovah.

Mme owo ẹsifiọk mbon oro ẹnyenede eti edu. Ke obio kiet ke Africa, mme owo ẹma ẹyịp ndusụk obukpọk oro ẹkedoride ke akwa udiọn̄edịm man ẹsisan̄a ẹbe. Mme andidụn̄ ke n̄kann̄kụk oro ẹma ẹbiere nditịp okụk nda ndep obukpọk nsịn ke itie oro ẹkeyịpde, edi anie ke ẹkpeyak okụk oro ẹnọ ada ese aban̄a utom oro? Kpukpru mmọ ẹma ẹnyịme ke anaedi kiet ke otu Mme Ntiense Jehovah.

Ke ini ẹken̄wanade en̄wan ukara ye en̄wan ekpụk ke idụt kiet ke Africa, usiakifia oro enyenede n̄kọk itieutom ke ediwak idụt ama ọnọ Ntiense kiet oro ekedide abatokụk ke itieutom oro aka idụt en̄wen akanam utom mbak ẹdiwot enye. Usiakifia oro ama abiat okụk ese aban̄a enye do tutu en̄wan oro etre ke idụt mmọ. Ntak-a? Koro mbemiso ini emi, enye iketieneke idụk odu oro ẹkedụkde ndiwo itieutom oro. Mme akamautom ke usiakifia oro ẹma ẹfiọk ke enye enen̄ede edi owo akpanikọ. Ndi mmọ ẹkpekenyịme ndin̄wam enye edieke enye ekpekedide owo abian̄a?

Mme N̄ke 20:7 ọdọhọ ke “owo eke asan̄ade ke eti ido esie emenen.” Owo akpanikọ edi owo nsọn̄ọnda. Enye isitụkke m̀mê ndibian̄a owo. Ndi idịghe nte afo akpamade mme owo ẹnam n̄kpọ ye afo edi oro? Utuakibuot akpanikọ enen̄ede oyom owo anam akpanikọ. Ndinam akpanikọ owụt ke imama Abasi ye mbọhọidụn̄ nnyịn. Edieke inamde akpanikọ, nnyịn iwụt ke imoyom ndinam item oro Jesus ọkọnọde mi ete: “Ke ntre, kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.”—Matthew 7:12; 22:36-39.

Ndinam akpanikọ kpukpru ini ekeme ndinam itaba ndusụk n̄kpọ, edi esịt oro mîbiomke owo, emi idinyenede enen̄ede ọfọn akan n̄kpọ ekededi oro ikpatabade. Ke akpatre, ndinam akpanikọ nnyụn̄ nnam se inende edinọ utịp oro ọfọnde akan. Ke nditịm ntịn̄, idụhe se ifọnde nte edinyene eti itie ebuana ye Jehovah. Ntak emi akpabiatde eti itie ebuana fo ye Jehovah ke ndibian̄a abian̄a man mme owo ẹkpono fi m̀mê man enyene se mûdotke? Inamke n̄kpọ m̀mê nso n̄kpọ-ata ke nnyịn isobo, nnyịn imekeme ndibuọt idem ke ikọ andiwet psalm emi ọdọhọde ete: “Ọfọfọn ọnọ owo eke enịmde Jehovah ke ibetesịt esie, ndien mîsehe mbon-iseri, ye mmọ eke ẹwahade ẹtiene nsu.”—Psalm 40:4.

[Mme ndise ke page 18]

Ata mme Christian isidepke m̀mê ndida abian̄a abian̄a n̄weditoro nnam n̄kpọ